《陳雷文選》

 | | | 轉寄

作罪lah

作者 陳雷 2006.11.12

(1)

無想著昨暗雨落hiah大，像teh piàⁿ面桶水，相連續落幾nā點鐘。透早天soah清起來，雲也無a。雄雄雨攏停去，大路洗kah金金，上好tō是這條大溝，pùn-sò châng kah清氣清氣，chhun幾位積溝á土ê所在，因為已經有發長草，無hō͘水châng去。落大雨了tō是按呢，連大溝ê臭味mā無去。

這tah離學校猶hn̄g，普通時無啥人。這日透早大溝邊已經圍一陣人，kheh來kheh去bē輸teh看戲。“死狗á lah！”“死狗！？你目睭thoah-thang。死豬á kiáⁿ khah有影lah！”“死豬á!？你目睭屎糊著！”Hit二個學生kheh tī後面，看bē啥會著，nè腳尾teh相chèⁿ。下面大溝底，一個掛烏仁目鏡ê查甫人khiā tī溝á土積koân起來ê所在，gia̍h一枝竹篙lā來lā去，teh鉤(kau)水裡ê死豬á｡“著a！鉤著a！”頭前ê人按呢hoah。He死豬á tú好khê tī大溝oat角hit tah，hit個掛烏仁目鏡ê查甫人雙手kā竹篙liâu-liâu-á liú過來。這時雖然水勢已經退一半a，猶是kòng-kòng流，差一sut á koh hō͘ châng去。

Hit個掛烏目鏡ê查甫人kā嬰á ko͘起來，khǹg入去ka-chù內面，索á pa̍k好拍一個結，溝á頂另外一個查甫人kā ka-chù liū起來。大家作一下圍óa來，相爭beh看。“嬰á lah！一個紅嬰á lah！緊！緊！”頭前有人hoah，後面ê作一下chhîⁿ作前去，差一sut á e e落去大溝底。大路hit頭一陣流浪狗五、六隻，m̄知是鼻著嬰á味抑是學人鬥鬧熱，也攏chông-chông來，跳來跳去直直吠。Tú好當teh鬧熱，有人去叫警察來a。Ka-chù拍開看，成實內底一個嬰á，光光規身軀，chhun一條破布á tîⁿ tī ām-kún，頭毛長長長，頭殼kap面攏掩leh，像m̄ bat剃過。“僥倖a，查某嬰á lah！”chiⁿ tī上頭前hit個大kho͘查某人穿一領大kho͘花裙按呢hoah。“死ê lah！死ê lah！”趕緊頭殼頂hit條紅巾á giú來掩hit個大鼻。“Che嬰á啥人ê?”警察問，大家恬恬。“Khong ê ê!Hit個khong ê ê!”一手掩鼻，一手比大溝khah koân hit頭，ná比ná行。警察tòe伊行，大家tòe警察行。Hit陣狗作一下chông作前去chhōa路。

He狗nǹg過pōng空，走去到peh-kiā起lih hit頭大溝頂等。Hn̄g-hn̄g大溝底óa壁有a-iân-phiáⁿ搭ê寮á，二間相tú-óa，beh倒beh倒。“Ti hia lah！Tī hia lah！”大kho͘查某人比hō͘警察看，he掩鼻á ê巾á the̍h掉大聲hoah。

警察ka-chù kōaⁿ leh，ùi路旁hit chōa kiā-kiā ê石gīm-á 行落去。He溝á底普通時lah-sap lī-lô，死狗死niau攏有，熱人時臭kah連狗mā m̄落去。Chit-má雖然大雨了，mā無人beh tòe落去，khiā tòa溝á頂hn̄g-hn̄g看，he狗tiàm gîm-á頂吠。

警察落來到溝á底，雄雄一個阿婆ùi寮á內面探頭出來，規頭殼ê白頭鬃，散iā-iā，phòng sai-sai，無看著面tō koh kiu入去a。“M̄是伊lah！koh過hit個！”大kho͘查某tī溝á頂hiu。

警察tī hia探來探去，一晡才chhōe著寮á入去ê所在。頭àⁿ leh入去。一時á久，雄雄寮á內一聲足大聲，像teh哀koh像teh吱。雄雄kā聽，無sêng人聲，概sêng狗起siáu teh叫。Liâm-mih hit個警察出來，一手拖一個查某，雙手手扣扣leh。He查某頭鬃長長長，散iā-iā，moa一領退kah無色ê衫，破kê-kê，闊lòng-lòng，bē輸布袋。溝á頂ê人攏會認得：“Khong ê lah！ Hit個khong ê lah！，也有人hoah：“Siáu ê lah！Hit個siáu ê lah！”

來到大溝頂，大家圍leh看。這個khong ê也kā in看，二蕾目睭m̄知是驚抑是歡喜，chha̍uh-chha̍uh nih。Hit個面圓圓扁扁，khàm一iân土，嘴唇翹翹，頂koân有一個khî。看起來m̄知是20歲抑是40！學生gín-á kā伊phùi-nōa，警察kā伊ah入去車裡，tō載走去。Hia ê看鬧熱ê猶無夠khùi，m̄ 願soah戲，khiā tī路邊一人一句：“夭壽lah！一個嬰á猶未滿月，活活淹hō͘死！”“生生beh創啥？會曉生bē曉飼，作罪lah ！” 路口踏三輪車ê按呢講。Hit個大kho͘查某上大聲，紅巾á pa̍k倒轉去頭殼頂，hàiⁿ 頭：“Khong mā無人khong kah這款！”另外一個無頭毛ê阿公á 拐á thuh leh ná行：“可憐lah，khong-khong敢會知影一個啥？”大家才散散去。

(2)

M̄知tòa tī溝á底外久a，大概是阿婆來以後。這個所在地勢khah koân起來，m̄ bat淹著水。代先是箱á紙khàm ê，落雨tō pháiⁿ去。尾a用a-iân-phiáⁿ kēng，tō加真好勢a。Tú來hit chām，ta̍k日phāiⁿ一個大個竹láng，kap阿婆出去khioh字紙。尾a字紙無khioh，家己一個四界se̍h，主要是khioh食ê，m̄ bat去kāng人，人也m̄ bat去kāng伊，所以無人知影伊ê名。若是有名，大概kan-na阿婆知影。大家攏chhìn-chhái叫伊“Khong ê”。

攏先去上帝廟hia，因為廟口有人賣食，pùn-sò攏tún tī廟邊巷á頭。M̄-kú有時siuⁿ早去，pùn-sò猶未tàn出來，tō khioh無食。有時siuⁿ òaⁿ到，pùn-sò piaⁿ出來，狗已經先食了a。這日tú好一大包tī hia，伊趕緊kā pùn-sò iah開，khioh丸á kap菜枝食。Tú-chiah péng二下，he狗來a，一陣七、八隻，作頭ê一隻狗母，烏色lām土色，正旁無目睭，ná吠ná衝來。伊gia̍h khioh字紙ê鐵鉤kòng狗，he狗攏m̄驚伊，顛倒受氣，lú吠lú雄。He狗母上pháiⁿ，衝來咬，差一sut á nauh著腳。驚一下，丸á that tòa嘴裡趕緊走。

Ùi hia se̍h一大liàn ，ná行ná chhōe，來到車頭圓環hia，四、五個踏三輪車ê teh排pān。這個春福排tī頭pān，50外，作公a，咬一枝薰吹tō叫：“蘭a beh坐車？”這個“蘭a”tō是in踏三輪車ê kā伊號ê名。水a輪tī後pān，少年家20外猶未娶，上蓋愛kā凌治。一粒粽the̍h出來tháu，咬一嘴食hō͘伊看。蘭a看人食粽，停腳落來，khiā tiàm hia看m̄走。看kah pak肚iau，嘴nōa直直吞。水a看蘭a一領破衫闊lòng-lòng若布袋，內面二粒奶有掩若無掩，siâⁿ kah手ngiau。粽食一半，問：“蘭a beh食粽？”一粒粽the̍h來伊面前kā siâⁿ。蘭a伸手àⁿ來the̍h粽，二粒奶tō看現現。水a手m̄放，一手粽gīm leh hō͘伊咬，一手tō伸入去衫裡摸伊ê奶。蘭a pak肚iau顧食粽，奶顧在水a摸，一時á半粒粽食了a，oat leh tō行。水a罵：“幹！恁父猶未燒lō leh，作你走！”Hia ê踏車ê，春福a、阿西a kap良朋a笑kah hī-hā叫，良朋a講：“明á chài、恁父教你一步。”

隔轉日蘭a來，春福a叫：“蘭a來坐車。”kā良朋a nih一個目。良朋a the̍h粽出來peh，蘭a óa來看伊食粽。良朋a刁古董，假仙m̄ chhap伊，粽作伊家己食。蘭a pak肚iau，擋bē tiâu，伸手來the̍h粽，衫掀開beh hō͘伊摸奶。良朋a伸手摸伊ê奶，粽也m̄ hō͘伊，顧家己食，ná食ná摸奶。蘭a顧看粽，等beh食，奶顧在伊去摸，khiā tī hia等。良朋a粽liâu-liâu-á食，奶liâu-liâu-á摸，阿西a看bē作得，講：“Mā m̄通chiah夭壽，一粒粽niâ。”良朋a粽食了，蘭a khiā tī hia等，猶m̄走。良朋a kā hat：“粽食了a猶teh等啥？走！走！走！”Hia ê踏車ê，春福--a、水--a kap阿西--a又koh笑kah hī-hā叫。Sńg了猶無夠khùi，春福--a講：“Che無啥！明á chài看我，包你八馬（pat-má）！”“八馬？！老歲á m̄認輸，讓少年ê khah有影lah！”水a按呢kā tu̍h。“幹！m̄甘願？kap你插！”“插來lah！”“插啥？”“一包薰lah！”結果水a、阿西a kap良朋a一人攏插春福a一包新樂園ê。

Hit日暗頭á蘭a來，春福a叫：“蘭a來坐車。”The̍h二粒粽出來hō͘ 伊看，蘭a óa來beh the̍h 粽，春福a粽gīm tī手裡m̄ hō͘伊。蘭a衫掀開beh hō͘伊摸奶，春福a講：“蘭a坐車才食粽。”蘭a聽有，大腳竹láng á phāiⁿ leh，peh起lih三輪車坐。春福a薰吹嘴收起來，一條巾á hàiⁿ tī肩頭，車踏leh sù-sù走。

過有一晡á久，踏車轉來，無看蘭a。“按怎？！有輸贏無？”Hit幾個圍leh問。春福a gī-gī笑m̄應 in。水a罵：“幹！a̍h是有抑無？kan-na笑he giàn頭ê。”春福a phùi 一嘴檳榔，比二枝指頭á:“八馬lah！二粒粽八馬lah！”“幹! a̍h成實khong ê也會曉?!”“會曉？koh m̄是kan-na會曉niâ！”大家笑kah東倒西歪，“Khong ê mā會曉！”按呢hoah，一人輸一包新樂園hō͘春福a。

Tō是按呢蘭a若khioh無食tō來車頭hia討粽。He踏三輪車ê有時有hō͘伊粽，有時無，m̄-kú攏有kā摸奶，有時載伊去別位“八馬”。附近thàn食人攏知影這項代誌，一句話傳來傳去，“幹，he khong ê mā會曉。”

(3)

生hit暗落規暝ê sap-sap雨，chit-má kā想起來，有人講tō是天公伯a替嬰á teh流目屎。He嬰á生出來細細漢m̄成物，有皮無肉，jiâu-jiâu 若一隻niau-á kiáⁿ，也bē曉háu。阿婆kā伊鬥生，用嘴咬kā轉臍，一tè破布包leh hō͘老母抱。老母kā嬰á áⁿ leh，寮á內面暗暗，kan-na大溝頂一pha路燈hn̄g-hn̄g照入來，嬰á生作啥款也看bē出來，也bē曉飼乳。嬰á恬chiuh-chiuh，kan-na有時á ngia̍uh一下，才知影猶活leh，m̄是死ê。

隔轉日晝晝才出門，來到上帝廟口，he狗看伊腳脊āiⁿ一個láng-á，胸前phāiⁿ一個嬰á，又koh鼻著嬰á味，攏足受氣，悽慘吠。Hit隻烏色lam土色ê狗母，家己mā chhōa一陣狗á kiáⁿ，上蓋雄，jiok來beh咬。蘭a m̄敢óa去，oa̍t頭tō走。

又koh se̍h一大liàn來到車頭圓環hia，春福a叫：“蘭a來坐車。”一kā看，這日蘭a腳脊phāiⁿ 一個竹láng，胸前āiⁿ一個袋á，奶á遮leh無看著。奇怪m̄知he袋á內面是啥物，掀起來看，ai-ioh-ōe，內面一個嬰á，頭毛長長長，腳手若柴枝á，ngia̍uh leh ngia̍uh leh。“僥倖--a，che是啥物？！”水a、阿西a攏來看。“Taⁿ是狗á kiáⁿ抑是niau-á kiáⁿ？”伸手kā摸，一粒頭nńg-nńg若椪柑，頭毛póe開看he面，koh鼻目嘴攏有。“一個嬰á lah！”He嬰á hō͘人吵醒，hiⁿ一下想beh háu，háu bē出聲。He面liap作一球，sêng一隻猴，ná有sêng 嬰á?大家看kah起愛笑，水a講：“福a，che嬰á有sêng你！”春福a罵：“烏白講，你看che鼻kap嘴，khah sêng阿西a。”阿西a講：“幹！你看che目睭，一蕾大一蕾小，水a ê無m̄-tio̍h lah！”Tī hia ná笑ná chèⁿ，無人beh認。蘭a khiā hia等beh食粽，衫掀開beh hō͘ in摸奶。水a比福a，講：“Kā老父á討。”春福a比阿西a：“老父tī hia。”無人beh粽hō͘伊。Liâm-mih人客來beh坐車，“走！走！”tō kā伊hoah hoah走。

Se̍h去到興南客運頭前，路邊阿婆teh煎粿，khiā tòa hia看m̄走。阿婆看伊一身軀thái-ko nōa-lô，āiⁿ一個嬰á可憐無通食，thuh一tè粿hō͘伊。蘭a粿the̍h leh食，衫掀開beh hō͘阿婆摸奶。“緊去！緊去！”阿婆kā iat手，嘴內念：“實在有夠pháiⁿ積德o͘h！Hia ê踏三輪á車ê!”

(4)

Tī chia熱人若落大雨，定定tō會淹水。不過hit tah地勢koân起來，猶m̄ bat淹過水。這暗實在落了太雄，水bē赴流，大溝若溪á lòng-long叫。He水ká入來koh ká出去，嬰á睏tī土腳tòe水流出去，也無哀，也bē赴khàu。隔轉早起來，水退a，蘭a chhōe無嬰á｡雄雄一個戴帽á ê查甫人kōaⁿ一腳ka-chù入來。拍開hō͘伊看，嬰á tī hin內面。伊歡喜kā嬰á抱起來，嬰á冷ki-ki，nńg siô-siô，衫掀開kā嬰á飼乳。嬰á m̄食乳，也m̄ khàu…。戴帽á ê查甫人kā嬰á抱去，伊m̄ hō͘伊抱，雙手lám leh搶hit個嬰á，搶輸大聲哀。查甫人kā嬰á tàn入去ka-chù內面，用手扣雙手扣leh，kā伊拖出來。外面天已經清彩，日頭mā出來a，風mā停a，一大陣人tī溝á頂kheh來kheh去，有人指頭á kā伊指（kí)，“作罪o͘h！一個嬰á活活淹hō͘死！”“可憐lah！khong-khong敢會知影一個啥？！”“夭壽lah！kan-na會曉beh生……”