《陳雷文選》

 | | | 轉寄

黃啟ê結劇

作者 陳雷 2006.10.15

大家攏niauh-niauh等，等伊目睭thí金koh看一下。已經成禮拜a，tō是kan-na睏bē醒m̄知人。有一回若像有精神過來，看in罔a，看勝a、宏a、娟a…，liâm-mi tō koh睏去。醫生講，大概無望a，che大家攏知影。70外a，koh是斷腦筋第二擺，顧睏bē醒，應該是擋bē久，上加koh幾工a niā-niā。｡ 咱bat聽人講『良宵一刻值千金』，總是咱人beh去進前，最後『迴光反照』hit個目nih，雖然kan-na看，無講話，現現hit個目神攏猶tī hia，成實bē比『良宵一刻』khah價值？

「恁裝作黨外ê lām tī內面，tòe人行，tòe人hoah，攏mài出手。等有人點火，警察pûn pi-á，恁tō開始拍。」「拍啥人？」「拍警察，，拍安全人員，拍記者…」「Ài用槍？」「免刀免槍。用棍á but。局長ê意思，作恁拍，lú雄lú好，鬧hō͘大，ài大家看會著，警察teh hō͘人拍。」

陳ê kā阿進財按呢吩咐，因為高雄市警察局已經有情報，黨外ê beh tī世界人權日演講遊行，警總beh借這個機會黨外ê總sa。所以局長叫陳ê先來kā阿進財講好勢，叫in hia ê兄弟hit暗裝作黨外ê lām tī hin，時到phah警察惹事。阿進財tō是咱高雄萬國幫ê頭ê，人叫作青蛇。凡是警察ài烏道鬥腳手，攏來chhōe伊tō是。

Hit暗阿進財chhōa十外個兄弟裝作黨外ê，pa̍k頭巾，gia̍h牌á，gia̍h火把tòe人行，tòe人hoah，乖乖無動腳手。因為大統百貨公司hia hit個扶輪公園hō͘警察封鎖，臨時改tī大圓環，大家溢溢來tī hia，規街á路人插插插，大家手裡m̄是gia̍h牌á，tō是gia̍h火把。M̄-kú he火攏hoa ê，無人點。警察、憲兵khiā規排kā大圓環圍leh。遊行總指揮代先有kā大家交代，無beh kap警察衝突，所以雖然人人有火把，這暗無人點火。Hit時台á頂有人講話，阿進財無認真teh聽，kan-na teh張持，等人點火警察pûn pi-á。過來台á頂換一個少年查某講話，中khùi足足，講話大聲，大約是teh講台灣ài民主，ài有人權…。大家聽kah歡喜拍phok-á，tòe leh hoah：「…民主！…人權！…民主！…人權！…」有人hoah了刺激bē soah-khùi，the̍h火來點。火把點hō͘ to̍h，一枝sòa一枝，規個大圓環幾萬pha ê火點kah光hiàⁿ-hiàⁿ，iāⁿ來iāⁿ去，若幾萬蕾黃ê、紅ê大蕾花浮tī規遍ê烏水裡溢過來、溢過去，有人開始唱歌。警察受氣，pûn pi-á圍óa來。阿進財看有人點火，警察pûn pi-á，tō是時間到。Ia̍t一下手，hoah一聲『拍』，十外個兄弟攏「幹恁娘」作一下衝來chhiâng警察，用棍á、用火把kòng警察。He警察據在inkong3，也無回手。有ê hmh了著傷流血，倒tī土腳，tú好幾nā ê記者tī hia，相爭chiⁿ來hip相，mā食拍。這時另外hit旁有人hoah：「鎮暴ê來a！…鎮暴ê來a！…」街á hit頭幾nā隻鐵殼車來。He鎮暴ê全部武裝，gia̍h擋牌、gia̍h霹靂棍、chah mah-su-khuh，kā大圓環包圍起來。Hit個少年查某台á頂看著，mai-khuh gia̍h leh講：「各位咱高雄ê兄弟姊妹，今á日咱tī chia紀念世界人權日，咱beh用和平ê方式要求民主改革，要求人權尊重…。請大家安靜落來，咱無beh kap警察衝突。鎮暴ê若用暴力…咱無beh動腳手…」雄雄pin-pin pòng-pòng，四kho͘圍親像teh爆擊tàn炸彈。有人hoah：「Ga-suh！Ga-suh！…」Liâm-mi he ga-suh ê白煙像茫霧chhèng koân起來，tòe風走，一四界臭ko͘ⁿ-ko͘ⁿ。大家鼻á tēⁿ leh，目睭thí bē開，攏著青驚相爭走，青猴烏白chông。有ê用hiu ê，有ê用哀ê，若像teh趕豬á，據在he鎮暴ê、警察á kòng。

這暗黃啟in頭家叫伊kā印好ê雜誌送去美麗島雜誌社，tú好tī中山大路大圓環hia。黃啟送貨來，遇著人teh遊行演講，tī雜誌社樓頂看鬧熱。雄雄街á人ká滾相拍，鎮暴ê放ga-suh，看m̄是勢，chông落去樓腳tō beh溜soan。Tú好一個少年查某ùi樓梯頭chông起來，青青狂狂kā hoah：「緊去！緊去kā大家講，鎮暴ê來a，…鎮暴ê放ga-suh kòng人…」Ga-suh已經chhèng來到樓頂，黃啟鼻á ng leh，khuh-khuh嗽，目油直直流，強beh bē喘khùi，kan-na聽著樓頂hit個少年查某teh khà電話，大聲嚷：「…ôe!…ôe!…你美國范會長？…我chia台灣高雄lah…你kā海外ê同鄉講，鎮暴ê來a，…in teh放ga-suh kòng人，…ôe!ôe!…我…擋bē tiâu a，…無法度koh講a…」

黃啟ùi後壁門出來，駛hit隻送貨ê細隻tho͘-la-khuh走，直透走轉來到厝。In某罔a看電視teh報，圓環hia teh亂，黨外ê拍警察，拍kah流血倒tī土腳，吩咐黃啟m̄-thang koh出門。

這個高雄事件報紙報真chē，mā有hip真chē相，黨外ê用棍á、用火把拍警察。He電視kā看，警察流血倒tī土腳，據在人拍，攏無回手。二工後，警總開始掠人，黨外hit幾個chhōa頭ê總sa，kan-na一個掠無著，去hō͘走去。美麗島雜誌社mā封掉，黃啟in頭家hit間印刷廠，因為印美麗島雜誌，mā罰金停工。三月初八起訴軍事審判。這回外國記者來bē少，在地報紙mā報真chē。Hit八個被告m̄認罪，顛倒攏辯解台灣ài民主改革。黃啟聽in頭ê講，he軍事檢查官聽kah同情流目屎。Khiā tī法庭邊a ê查某警員擋bē tiâu，走出去外口拭目屎。也有記者ná寫稿ná滴…。黃啟看電視，hit暗tī樓頂khà電話hit個少年查某mā tī hin，判12冬。黃啟定定kā朋友講：「這個我bat伊。」凡是bat黃啟ê人攏講黃啟作人上照起工，m̄ bat講êng話，也m̄ bat chhap選舉。Tō是高雄事件了後，hit年底選立委，黃啟kā罔a講，伊beh去作義工，第一擺chhap選舉，替黨外插旗á。

不而過che已經是真久以前ê代誌。Chit-má黃啟斷腦筋倒tī病院，頭殼內是按怎koh去想著hit暗ê經過，che講來也是真龜怪。大概是chhiàng-suh chhiàng-suh，無啥特別ê理由，伊頭腦傷害了，烏白teh想ê niā-niā?

也無tú-tú可能是病房藥水味真重，hō͘伊頭殼內ná準是koh鼻著hit一暗鎮暴ê ga-suh。伊趕緊chông落去樓腳，tī樓梯頭明明有聽著，hit個中khùi足足ê少年查某tī樓頂khà電話，大聲teh嚷：「…kā大家同鄉講，…鎮暴ê來a，…in teh放ga-suh kòng人，…ôe!ôe!…我…擋bē tiâu a，…無法度koh講a，…」

伊ùi後壁門走出去，hit隻細隻tho͘-la-khuh駛leh tō走。十字路口鎮暴ê遮落，m̄ hō͘伊過。黃啟m̄停車，ngeⁿ衝過，油摧落，一直走。耳á內有聽著遠遠pin-pin piàng-piàng ga-suh彈爆發聲，hit個少年查某kā hoah：「緊去！緊去kā大家講，鎮暴ê來a，…鎮暴ê放ga-suh kòng人。…」

Ga-suh一直khîⁿ來，白茫茫kā伊ê tho͘-la-khuh包圍。車lú駛lú緊，伊趕緊駛去電視台，衝入去播送室，大聲嚷：「鎮暴ê來a！鎮暴ê放ga-suhkong3人…。恁是按怎攏烏白報？！是按怎真ê m̄報，攏報白賊？!…」He播送員一個查甫ê、一個查某ê kā 伊笑，……臭味ê毒氣lú來lú kāu，若緊流ê溪水im來，tú tī水裡bē喘khùi、胸坎cha̍t起來，一時á m̄知人tō去a。

Koh若像teh作夢，夢去倒tī眠床頂，罔a坐tī邊a，頭chhi̍h-chhi̍h teh chhn̍gh。In勝a、宏a、娟a kap美a攏tī眠床邊teh kā看。伊真和平，心內也無感覺有欠啥，…tō是kan-na這個細漢ê美a，近來家庭bē好勢，teh鬧離緣，hō͘伊有煩惱。美a chēng細漢生作上súi，大家攏按呢講，美a人khah nńg-chiáⁿ…。伊ia̍t手叫美a khiā khah óa來，beh kā伊吩咐。手ia̍t bē tín動，嘴開kā美a講：「…to也二個gín-á chiah大漢a，khah lún一下，煌a若酒khah節（chiat）leh，人也m̄是bái lah，…」嘴soah也bē開，話講bē出來，想beh問in罔a、問勝a、宏a kap娟a in…bē赴問tō m̄知人a。

所以到路尾黃啟有koh精神過來，目睭thí金看罔a，看in勝a、宏a kap娟a。若像有話beh交代美a，明明hit個目神攏猶tī hia，無幾分鐘á，目睭kheh leh tō去a。凡是bat黃啟ê人攏講，黃啟作人上蓋照起工，按呢恬靜靜，平平安安過身去。事實上，hit個黃啟ê結劇有比che khah複雜一sut a，不過是khiā tī邊a ê人，tī hit個『迴光返照』ê一目nih看bē出來niā-niā。