《陳雷文選》

 | | | 轉寄

寫hō͘ 學生朋友ê代誌 44 - 黃昏美夢

作者 陳雷 2019.12.29

（Siá hou7hak8-seng pêng-iú ê tāi-chì 44）（寫hō͘學生朋友ê代誌 44）

Hông-hun bí-bāng / 黃昏美夢

Lán lâng ta̍k-mê chò-bāng, m̄-kú khah siông sī cheng-sîn tō bē kì-tit liáu-liáu. Chòe-kīn chi̍t-ê bāng, cheng-sîn liáu, bāng--nih ê tāi-chì, tùi-ōe, kéng-tì...chêng-chêng-āu-āu chheng-chheng-chhó-chhó, si̍t-si̍t-chāi-chāi, bē-su sī tú-chiah ùi hit-ê hiān-si̍t ê sè-kài tńg-lâi chit-ê hiān-si̍t, m̄-sī chò-bāng.

咱人ta̍k瞑做夢, m̄-kú khah常是精神tō bē記得了了. 最近一个夢, 精神了, 夢--裡ê代誌, 對話, 景緻...前前後後清清楚楚, 實實在在, bē輸是tú-chiah ùi hit个現實ê世界轉來這个現實, m̄是做夢.

Góa kiâⁿ-lâi kàu chi̍t-châng tōa-chhiū-kha. Tōa-ki chhiū-oe ē-bīn tiàu chi̍t-pak tô͘, chha-put-to phó͘-thong ê tiān-sī hiah tōa-bīn. Chhái-sek hún-pit ōe--ê, chin súi koh chin se̍k-sāi. Kā khòaⁿ, goân-lâi sī Tâi-oân lâm-pō͘ hit-ê chháu-tē sió só͘-chai Môa-tāu ê kéng-tì. Góa ê kò͘-hiong ê chhân-hn̂g, joa̍h--lâng ê hông-hun. Chi̍t tōa-phìⁿ kim-sek ê tiū-á. Hn̄g-hn̄g chi̍t-chōa thn̂g-chhiúⁿ ê sió hóe-chhia teh cháu, chi̍t-chat chi̍t-chat, kam-chià thūn tīⁿ-tīⁿ. Siông-sè kā khòaⁿ, siōng ē-bīn-kak kak-á chi̍t-chōa iù-jī. Bū-bū tha̍k-bô. Khó-lêng sī chit-tiuⁿ tô͘ ê miâ he̍k-chiá ōe ê lâng-miâ. Khòaⁿ--khí-lâi chin sêng góa ê pêng-iú Lîm Sim-tì sin-seⁿ ê hêng-thé.

我行來到一叢大樹腳. 大枝樹oe下面吊一pak圖, 差不多普通ê電視hiah大面. 彩色粉筆畫--ê, 真 súi koh 真熟似. Kā看, 原來是台灣南部hit 个草地小所在麻豆ê景緻. 我ê故鄉ê田園, 熱--人ê黃昏. 一大片金色ê稻á. Hn̄g-hn̄g 一chōa糖廠ê小火車 teh走, 一節一節, 甘蔗thūn tīⁿ-tīⁿ. 詳細kā看, 上下面角角á一chōa幼字. 霧霧讀無. 可能是這張圖ê名或者畫ê人名. 看--起-來真成我ê朋友林心智先生ê形體.

Lú khòaⁿ lú ài, chiah-ni̍h un-loán chhin-chhiat. Sim-lāi siūⁿ, chit-tiuⁿ tô͘ nā-sī góa ê, ta̍k-ji̍t pôe-góa chò-phōaⁿ, kám m̄-sī chin-hó?Tú-hó chi̍t-ê cha-po͘-lâng kiâⁿ-óa--lâi, 30 thóng hòe, chò-kang-lâng hit-khoán. I kóng chit-pak tô͘ sī lán Môa-tāu chi̍t-ê ōe-ka, choan-kang ōe hō͘ lán Môa-tāu chi̍t-ê Tâi-to̍k ūn-tōng ê sian-pòe. I pí tōa-chhiū koh kòe--khì hit-keng tōa-chhù, saⁿ-chàn-lâu, le̍k-sek ê chhù-khak, kóng:「Chit-pak tô͘ pún-lâi sī chit-keng bí-su̍t phok-bu̍t-koán ê. Chit-má sī góa ê.」Góa khòaⁿ hit-keng tōa-lâu, tō-sī góa í-chêng tī Ka-ná-tāi tòa ê chhù, ná ē piàn-chó bí-su̍t phok-bu̍t-koán?I kóng chit-tiuⁿ tô͘ i beh bé, khui-kè bí-kim sì-bān nn̄g-chheng kho͘.

Lú看lú愛, chiah- ni̍h溫暖親切. 心內想, 這張圖若是我 ê, ta̍k日陪我做伴, 敢m̄是真好？Tú好一个查埔人行óa--來, 30 thóng歲, 做工人hit款. 伊講這pak圖是咱麻豆一个畫家, 專工畫hō͘ 咱麻豆一个台獨運動ê先輩. 伊比大樹koh過--去hit間大厝, 三層樓, 綠色ê厝殼, 講：「這pak圖本來是這間美術博物館ê. Chit-má是我ê.」我看hit間大樓, tō是我以前tī 加拿大tòa ê厝, ná ē變做美術博物館？伊講這張圖伊beh賣, 開價美金四萬二千kho͘.

Khó-sioh bē-hù kā bé tō cheng-sîn--a. Chhíⁿ--khí-lâi thàu-chá saⁿ-tiám saⁿ-cha̍p-hun. Chi̍t-sî soah bē-hiáu hun, iáu tī bāng--ni̍h, á-sī tńg-lâi tī lēng-gōa chi̍t-ê hiān-si̍t. Tī góa jîn-seng ê hông-hun, chin hok-khì bāng chit-ê bāng. Góa ê nn̄g-ê kò͘-hiong, Tâi-oâng kap Ka-ná-tāi, bāng-chò chi̍t-hóe. Khòaⁿ-tio̍h chit-pak súi-tô͘, éng-oán kì tī thâu-khak-lāi. Kám-sī ùi lēng-gōa chi̍t-ê pêng-hêng ê ú-tiū(parallel universe)sàng--lâi ê sìn-hō? He̍k-chiá sī chhin-chhiūⁿ goán Môa-tāu ê Bûn-hē sin-seⁿ chhiùⁿ ê koa, hông-hun ê kò͘-hiong teh kiò-góa--leh？

可惜bē赴kā買tō精神--a. 醒--起-來透早三點三十分. 一時soah bē曉分, iáu tī 夢--裡, á是轉來tī 另外 一个現實. Tī我人生ê黃昏, 真福氣夢這个夢. 我ê兩個故鄉, 台灣kap加拿大, 夢做一伙. 看tio̍h這pak súi圖, 永遠記tī頭殼內. 敢是ùi另外一个平行ê宇宙（parallel universe)送--來 ê信號？ 或者是親像阮麻豆ê鄉親文夏先生唱ê歌, 黃昏ê故鄉teh叫我--leh？

（Chok-chiá chù:chhiáⁿ-iōng pe̍h-ōe-jī) （作者注：請用白話字）