《《陳夫人》日譯台e5台灣小說 第二部》 |
 |
 |
|
 轉寄 |
《陳夫人》第二部 親子 第十五章
作者 庄司總一著 賴永祥指導 林俊育台譯 2017.02.12
工廠是起tī市郊。
四角形ê工廠建築物油漆雞卵色，tùi遠遠看起來kah-ná一塊雞卵糕khǹg tī四kho͘ 圍ê綠地kah晴空中間。Mò͘-tah（譯註：外來語ê モ—タ—/motor/馬達）準時起動，bel-toh（譯註：外來語ê ベルト/belt/運送帶）開始se̍h, bo-i-lah（譯註：外來語ê ボイラ—/boiler/熱水爐）teh chhèng水氣，煙筒teh出煙，chit時ê陳清文，心內ê喜樂大旗teh飄揚。伊tī日本ê大學畢業，chhōa安子tńg來家己ê故鄉，隨時換穿官服去官廳上班。Tùi hit-ê年輕光輝時代以來，從來m̄-bat有過ê新鮮感動。伊做中學教師到taⁿ有十年以上，hit-ê古老ê氣息無致使伊ê心胸荒廢，taⁿ koh khah hō͘ 伊感覺tio̍h chit點。He是培養宗教精神ê特殊學校，雖然kah普通ê教育工作無仝，ē-sái講伊tī hia停止成長soah固定落來，伊ê思想無法度koh再充實是免不了ê tāi-chì。總講一句，伊ê自我表現m̄是kan-taⁿ用嘴講講leh to̍h滿足，伊是想beh有所作為hit種人。
經過三年，伊ê事業終於正式上（chiūⁿ）軌道。Tī這chìn前，陳清公司ê原料是對外採購（káng），m̄-koh從今以後，tùi家己農場生產ê鳳梨，由家己工廠ê機械來製造罐頭。Án-ne, 生產ê體制已經齊（chiâu）備，m̄-koh, 清文想beh做ê, mā是無做bē-sái得ê, 是今後ê tāi-chì。伊創設鳳梨罐頭公司m̄是想beh thàn大錢，若是chit種ê利益企圖心，只不過是出tī富有ē-tàng轉變khah好ê慾望。
清文對tī農場kah工廠，主要lóng是圖謀提高勞動者ê生活kah精神。下面是hit當時台南ê農業工人每日工資：男性 60錢（sián），女性25錢。
台北ê工資是這ê兩倍，因為hit時台南ê工資是全台灣siōng低。雖然有種種ê理由，總講一句，因為hit當時ê南部社會pháiⁿ毛病真chē, 無teh進步。總是，工資tio̍h gōa chē chiah tú好是一個難題，像（chhiūⁿ）講一個經濟機構beh hō͘ 工人非常富有，卻無一定是siōng好ê想法，因為in iáu未達到善用其富ê境界。所以，清文ê準則是：M̄-nā tio̍h hō͘ in tī豐富ê狀態，mā tio̍h顧慮in ē-tàng充分維持生活，而且有chhun淡薄，m̄-koh, bē-sái hō͘ hiah-ê chhun錢致使in陷入物資主義。
伊tī工廠kah農場投入金錢來做設備上ê新構想。工人ê健康比啥物都khah重要，所以，清文為in設備「休閒」場所kah醫務室，尤其是農場ê庄腳所在衛生無好，清子kah阿明tī hia染tio̍h a-me-bah赤痢。當地ê居民tiāⁿ-tiāⁿ tio̍h ma-lá-lí-á, mā有腸á熱。所以，陳清公司ê農場時常請附近ê村醫林文貴來，為工人做健康診斷，hō͘ in食khi-nih-neh（華語ê奎寧），kā in做腸á熱kah其它ê預防注射，治療砂眼。
總是，無知ê農民kah工人無對清文感謝，大概感覺hō͘ 人péng一下目chiu皮á是tuh一針，不如加領一個十錢（sián）ê銅錢á khah實在。對chiah-ê m̄-bat世事ê人，清文真傷腦筋，tiāⁿ-tiāⁿ真失望、受氣。總是，伊無放棄ǹg望，ǹg望in有一工會了解；準講in若是bē了解，in ê kiáⁿ孫mā會來了解。
安子起初無真chia̍p去農場，別莊完成了後to̍h chia̍p-chia̍p去。她tī hia做菜園，種各種蔬菜。她接受農場監督游德仁ê指導，伊半khau洗講：若栽種不良會變成koân價ê蔬菜。安子認為成本koân mā無所謂，家己栽種家己收割，其中ē-tàng得tio̍h種種ê教示。生產ê辛苦kah喜樂，ē-tàng食tio̍h比市場買來ê khah新鮮ê蔬菜，準講金銀mā會生sian，要緊ê是物件tio̍h tiāⁿ-tiāⁿ保持新鮮。Chit種教示道理，是tùi家己親身ê體驗，chiah有法度得tio̍h。
她穿工作褲，手gia̍h鋤頭，手掌起泡（phā），面曝kah紅kì-kì，倦tauh-tauh tńg來到厝。
有一工，安子洗身軀了後，kā in ta-ke報告農場ê情形kah她種菜ê tāi-chì。
「Ai-ah, 你....你做khang-khoè, kah-ná作穡人。」
對阿嬌來講，這是意外ê tāi-chì。安子無想beh hō͘ 人褒獎，想bē到會hō͘ ta-ke hiah-ni̍h tio̍h驚。大家（tōa-ke）sim-pū落田種作，安子ê頭腦有問題，老大人ê面色顯然露出pháiⁿ面chhiuⁿ。安子用無真liú掠 ê台語向ta-ke說明，m̄-koh, 阿嬌bē了解，準講開明ê ta-koaⁿ阿山在世，大概伊mā bē了解。阿嬌chit階層ê老大人認為做khang-khoè是卑微下賤，cha-bó͘人恬恬á快樂過日子to̍h好。所以， 她家己kā指甲留長一兩寸，來表示家己免動手to̍h有thang食。早前有時mā看會看tio̍h chit種老大人。
Chit-má ê時代無koh有chit種人，m̄-koh, chit種思想kah傳統iáu有少數存在。像瑞文chit類，kan-taⁿ一支嘴hô͘-lùi-lùi, 一日到暗食飽閒閒，感覺真滿足，tiāⁿ-tiāⁿ受tio̍h清文ê警戒。Chit pái不管伊願意á是m̄願意，清文安排伊來負責農場方面ê事務。M̄-koh, 阿嬌表示不滿，m̄免hiah辛苦mā ē-tàng生活，ná-tio̍h走去hiah遠ê庄腳做khang-khoè？總是，瑞文來農場工作了後，自出世to̍h衰弱tiāⁿ-tiāⁿ破病ê身體，看起來to̍h有khah結實。因此，伊為tio̍h健康比為tio̍h工作khah熱心來庄腳。
有一工，安子來農場，瑞文mā來，伊beh去看早前施工chit-má完成ê河川堤防。
寒天ta-ta無水ê河川，到熱天雨水期to̍h變成濁水teh流，有時氾濫致使鳳梨園kah安子ê菜園淹水。所以tio̍h做堤防，這需要一筆費用，創設公司ê時無編chit-ê預算，m̄-koh, 無做koh bē-sái得。陳清公司一直teh虧損，安子私下有teh煩惱。鳳梨tùi栽種到收割需要一年半ê時間，起初原料是對外採購，m̄-koh, 原料採購無夠需要量。鳳梨罐頭已經成做民眾ài食ê物件，罐頭公司kan-taⁿ ē-tàng買tio̍h需要量10%（pha-sian）ê鳳梨。而且製造工廠已經早一步完成，生產作業變成跛腳teh進行。一工ē-tàng生產60噸ê機械放teh空轉。
所以，自營農場ê完成是siōng急ê tāi-chì, m̄-koh, tùi農場得tio̍h收割，經營上無真樂觀。因為實際上，免有自營農場，直接向農民購買原料khah會hô，一般ê罐頭業者lóng採取chit種方法。農民施肥，引水灌溉，關懷作物，tùi日出到日落lóng teh工作。Hiah chē時間kah勞動量，簡單付款就ē-sái, 準講成本小khóa khah koân, 結果iáu是chit-ê方法khah會hô。自營農場to̍h無法度án-ne, tio̍h考慮各種設備、肥料、勞動時間ê限制kah待遇等等ê問題，結果原料價數（siàu）提高。
M̄-nā án-ne, koh因為清文ê根本精神無以營利為目的，經營ná會bē有困難？所以，一直虧損mā無辦法。安子想：若無法度經營來中途放棄，án-ne, in ê工作意義kám m̄是完全失去？清文對將來抱tio̍h ǹg望，m̄-koh, chit-má siōng要緊ê, tio̍h每個作為抱tio̍h快樂kah ǹg望ê心情，寄託美好ê將來。若無法度達成hit-ê願望，過去ê日子只有流落來悲哀ê灰色後悔。
河邊沿岸已經起好十尺koân ê土堤。安子tú-chiah對瑞文講hiah-ê事業感覺不安ê話，chit時瑞文kā她安慰講：「無問題，免煩惱」，簡單to̍h結束話題。伊想beh去看堤防是藉口，kah-ná有甚麼話beh對安子講。
不而過，瑞文tī土堤坐落來teh pok薰，無要無緊ê態度，安子感覺kiōng-beh bē喘氣。目chiu前ê河床真闊，大部分成做乾地，kan-taⁿ中央有濁水teh流。河ê hit pêng有田園，chiah tú過六月一時á, 稻á已經結實變黃色，teh beh ē-tàng收割à。白鴒鷥雙腳整齊伸tùi後壁，ná棉花輕輕á飛起來，降落tī田園khiā teh，chit幕kah-ná teh看快速ê影片。全身烏烏烏ê烏鶖用真猛ê氣勢飛起來，飛過田園對面ê山坪（phiâⁿ）中kúi-nā個山谷，一直飛到山腳。其中四界有小部落藏tī山谷下底，看bē-tio̍h, 只有阿里山山脈ê尾溜連接天空ê hit pêng。
「你teh看tó位？」
安子問瑞文，伊iⁿ-iⁿ-n̄g-n̄g無應答。安子想講伊大概是teh回憶陳陣ê tāi-chì；伊期待安子會問起ê款式，m̄-koh, 安子thiau故意kek m̄知伊ê心思。伊就忍bē-tiâu, 深深感慨講：
「阿陣，她chit-má m̄知情形án怎？」
「庄頭就tī對面，你去看māi, án怎....」
安子隨便kí一個方向，笑笑á講。瑞文心靈ê創傷顯然iáu有一點á痛，安子想beh摸伊ê傷口。
「奇怪ê cha-bó͘ gín-á, ná會恬恬á離開家庭？」
安子知影事情ê真相án-ne講，瑞文氣憤nih目chiu講：
「用空氣槍射gín-á, koh是家己ê cha-bó͘-kiáⁿ。M̄-koh, 阿陣是一個非常卑怯（khiap）ê人，無通知半項就m̄知去向，想講án-ne阮會án怎。」
「真正是大tāi-chì, hit時我tú好tńg去日本，m̄-koh....」
「我去hō͘ 景文kah玉簾責備kah有夠thiám, 尤其是玉簾hit款cha-bó͘人, 每工來要求看beh án怎chiah好，還我liâm-piⁿ to̍h beh出嫁ê cha-bó͘-kiáⁿ ê目chiu等等，teh要求, teh哭, teh罵....。Hiah-ni̍h艱苦心，我tio̍h去chhōe hit-ê cha-bó͘人！我受tio̍h to̍h想beh kā她paⁿ落去，kā她刣死。」
「M̄-koh, mā m̄是你講ê hiah-ni̍h卑怯。你hō͘ 蛇咬tio̍hê時，她mā是盡力kā你救。想tio̍h這，你kám無想beh去見她？」
「Chit-má去見她mā無chhái工，我無想beh見她....」
「你是薄情郎，瑞文，你kám是因為好強chiah án-ne講。」
瑞文感覺安子teh kā伊khau洗，雖然露出bē爽快ê面色，m̄-koh, m̄是她講ê án-ne, 伊是考慮tio̍h koh khah嚴肅ê現實問題，伊用正經ê口氣講：「我已經m̄是以前ê我，kám m̄是？長男已經十九歲。我二十歲to̍h娶bó͘ 。」
瑞文teh苦笑，伊想tio̍h in kiáⁿ to̍h埋怨。長男chit-má是高等學校一年生，tī台北teh讀冊。伊本人起初希望讀文科，瑞文為tio̍h伊ê將來設想，苦勸伊去讀理科。阿明聽伊ê話，瑞文放心吐一口氣。想bē到阿明iáu是認為家己無適合讀理科，讀一年理科了後，又koh重新tùi一年級文科讀起。伊講若無伊beh休學。
「真正hō͘ 人傷腦筋ê gín-á，究竟án怎chiah好，我一屑á辦法都無....聽講伊mā有寫phoe hō͘ 清子，kám有寫啥物pháiⁿ tāi-chì？」
「無lah, 無啥物....。只是清子mā bē了解，kah-ná有啥物艱難ê思想上ê問題，á是啥物....」
「真狡怪ê gín-á！」
「其實阿明真認真讀冊。」
「Kám講反抗有好ê kah pháiⁿ ê雙面意義？尤其是伊chit-má是反抗老父ê年齡。阮tau ê清文mā是án-ne, 對她講啥物她lóng m̄聽；我講án-ne. 她偏偏beh顛倒péng。」
安子kan-taⁿ tī瑞文面前輕描淡寫，其實安子ê心情比一般親子ê問題koh khah複雜微妙。M̄知什麼原因清子會kah清文疏遠，近來連清文都有感覺chit點。老父為她買好冊，她並無顯露歡喜ê表情，食飯ê時mā無親近講話。她是唯一ê獨生女，hē入去老父ê目chiu mā bē感覺痛，cha-bó͘-kiáⁿ對chit款ê疼，對老父應該koh khah親密chiah tio̍h。M̄-koh, 清子卻m̄是án-ne。這是為甚麼緣故？是chit種甚麼感情？安子kah-ná了解koh kah-ná無了解。照她tú-chiah所講ê，若是gín-á ài反抗ê一時現象to̍h無要緊，免煩惱，度過chit-ê時期to̍h好。若無，問題to̍h嚴重，安子tiāⁿ-tiāⁿ想tio̍h chit-ê問題，心內不安。
安子無顯露她ê不安，假做無tāi-chì講：
「總是，瑞文，咱互相年歲大ā, 操心gín-á ê tāi-chì, 為gín-á來煩惱。」
「實在真寂寞！人若老，對啥物lóng感覺無意思。真討厭，阿嫂kám有chit種心chiâⁿ？」
「Mā無一定，五十歲有五十歲ê趣味，到六十歲有六十歲ê快樂kah幸福，kah年輕時代無仝—。」
安子án-ne teh講，忽然感覺kah-ná踏tio̍h秋天ê落葉，心情寂寞。她mā已經體驗tio̍h進入冬天枯木前兆ê年齡。目chiu角有魚尾紋，面皮鬆lēng，而且，年輕時苗條ê身材mā變大kho͘ 起來。若m̄是骨骼細支，看起來會有肥chut-chut ê感覺，ē-sái講kah-ná kā以前ê瘦抽面影抹殺掉，加上她去田園做工，hō͘日頭曝kah烏mà-mà。....Chit-má忽然感覺tī瑞文ê鏡面前顯出變bái ê姿態，她感覺見笑koh寂寞。
有一種ài beh回復年輕ê心chiâⁿ kah「歲月不饒人」ê感慨，同時溢上安子ê心頭。她kah瑞文做伙落堤防，beh行tńg去農場。
「你是hō͘ 蛇咬tio̍h tó位？」
兩人行過大片ê林投kah龍舌蘭，安子參雜好奇心kah嬉弄ê心情án-ne問。
「Βē記得確實是tó位。總是，hit時若無阿陣做伙tī hia, 我有可能bē活。想起來真不可思議。」
「Án-ne講起來，我hit暝tī反對墓地移轉ê演講會中，去hō͘ 人用刀鑿tio̍h。若m̄是鑿tio̍h腰帶，會鑿koh khah深....」
「總是，人結局會死。」
「一日一日行向死亡。」
「雖然是án-ne, 咱mā tio̍h好好á活落去，kah-ná有teh食不老長壽ê藥á ê面容。」
「你mā有幾pái死裡求生ê經驗。」
「已經無hiah驚死亡ā, 可能是年歲有khah大ê緣故。」
兩人án-ne teh講話，忽然聽tio̍h林投kah龍舌蘭中間傳出sa-sa ê聲。Tú teh講毒蛇kah死亡ê tāi-chì, 安子驚一tiô, 腳步停落來。瑞文mā是無膽ê人，因為tú teh講已經無hiah驚死亡ā, 雖然kek kah-ná無tāi-chì teh微微á笑，iáu是掩khàm bē-tiâu, 面色變蒼白。 「Lâ-lí-á（譯註：華語ê穿山甲）！」
並m̄是毒蛇，恐怖感消失，瑞文安心hoah出聲。Kan-taⁿ看tio̍h一隻kah-ná烏色小型戰車ê動物teh走。瑞文隨時jiok oá去，走到約90尺khah lap窩ê草地，伊大聲叫安子。
動物鑽入去土洞內底，瑞文知影ē-tàng安全kā牠掠起來。伊做一氣掠tiâu露出洞外ê動物尾溜，出力kah面紅kì-kì，beh kā牠khiú出來，看起來是氣力相當強ê動物，伊khiú bē出來。
「Ah, 活掠lâ-lí-á！阿嫂，你替我掠tiâu牠ê尾溜，我來去農場the̍h工具！」
「無ài lah, 祂會kā我咬，beh án怎？」
Lâ-lí-á是食káu蟻ê動物，bē咬人，安子以前有聽講，m̄-koh, 她驚kah hoah講：「祂會kā我咬....」。動物kui身軀連尾溜mā有kah-ná指甲ê鱗，安子無勇氣掠tiâu牠ê尾溜。因此，iáu是瑞文掠tiâu動物ê尾溜，安子走去農場the̍h鐵鍬kah索á來。用鐵鍬挖洞，動物就kiu做圓團，無抵抗。就án-ne簡單活掠lâ-lí-á。
Lâ-lí-á tī hit所在tiāⁿ-tiāⁿ hō͘ 人掠tio̍h。雖然是án-ne, 對in來講這是意外ê收成，因為一隻時價60圓。鱗thang做藥用，真珍貴，肉mā有補藥ê作用，食起來是天下ê珍味。皮thang做手提包，bē輸鱷魚皮。
Lâ-lí-á！ Lâ-lí-á！厝內ê人lóng轟動起來。若是人擔來賣to̍h無稀罕，是安子kah瑞文兩人掠tio̍h ê, 所以就稀罕。安子kah瑞文kā牠當做禮物送hō͘ 老母，阿嬌真歡喜，她講有一工她mā beh去鳳梨園看māi。
