《宋澤萊ê台文蕃薯園》

 | | | 轉寄

是án怎台灣各基督教派ē彼此紛爭、互相批判？In到底teh爭啥物？Kám值得？﹝比較上，全面ê靈命經驗是啥物？﹞──mā談基督教小說創作

作者 宋澤萊, 台譯：Lîm ChùnIo̍k/林俊育 2021.12.12

●挑戰信仰●


◎宋澤萊


○○○賢者，平安： 我已經kā你ê〈啟示kah傳道〉論文大部分看過，真佩服你ê才情。你雖然m̄是基督徒，m̄ koh ē tàng探討、挑戰chiah个深層ê基督教教理，是真了不起。若是你ē tàng改宗信基督教，將來tī基督教裡一定ē tàng有bē細ê成就kah貢獻。

下kha是我看完你chit篇論文了後，初步想tio̍h ê幾个問題kah答案，提出來hō͘你做參考，thang做你ê論文ê補述：
1,《廢墟台灣》無應該khǹg tī我ê基督教小說裡來討論！
Chit本小說寫tī 1985年，當時我iáu未信耶穌，對基督教ê理解lóng是tòe人嘴尾ê。我ê家庭是一个半基督教家庭，阿媽生七个gíná，有四个信耶穌。所以，自細漢我ē tàng tùi in ê言談中知影基督教ê殘餘僅見；m̄ koh對基督教有真正有認bat，是tùi 1990年左右開始，我開始信耶穌死去koh活ê時；然後有聖神降臨，我chiah真正進入基督教ê真信仰內面。

2, 是án怎寫基督教小說？是án怎beh寫天國？
我真早to̍h kā讀者講，我ê基督教小說是用來宣傳基督教ê，有傳教ê目的。是án怎我beh傳播基督教？這是我想講基督教是好ê，比傳統宗教koh khah ē tàng拯救一个人ê靈魂；mā比傳統宗教 koh khah ē tàng hō͘台灣實踐現代化。我ǹg望台灣加一koá基督徒，為咱ê社會注入有信、有望、有疼ê活力，ē tàng hō͘人心振興起來，bē致使頭尾被虛無、phú色ê精神狀態所掌握，對台灣社會ê未來比較khah有利益。

雖然我公然講我ê小說有傳教ê目的，m̄ koh讀者á是m̄驚hō͘我洗腦。尤其是《血色夜婆降臨ê城市》kahná iáu變成暢銷冊，真受歡迎，看ê人大概lóng是非基督徒。就我所知，有一kóa人因為看了《血色夜婆降臨ê城市》，就ánne去信基督教，chiah个tāichì lóng有發生。我ê讀者設定的確是khǹg tī非基督徒身chiūⁿ，我並無啥歡迎基督徒閱讀我ê小說，in成見深，無法度tī內底得tio̍h好處。後來，我kah胡長松tī網路頂開辦《基督教通訊》，寫將近百篇文章，目標mā是khǹg tī非基督徒á是tú信教ê基督徒身chiūⁿ，對資深ê基督徒，我是無能為力hō͘ in啥物。

3, 是án怎tī基督教小說裡寫家國？
我畢竟是鄉土小說家，關懷社會成做我寫小說ê目的之一，所以，我無可能m̄寫社會現狀。同時，若是我kantaⁿ寫基督教小說，卻無寫社會，我ê小說to̍h ē架空，變成《天路歷程》hit種非現實ê教義演繹小說。《天路歷程》hit種基督教小說，kantaⁿ有普遍信基督教ê國家（英國）ê人ē看， tī台灣kiámchhái無gōa有人願意chhap。所以，我tī基督教小說裡加入家國ê書寫是必要ê，它ē tàng hō͘我ê基督教小說ânân插入tī社會ê大事件中，ē tàng引起大家ê注意。


4, 我ê基督教小說是án怎ēkah《舊約》《新約》經文發生關係？
這是一定ê，因為基督徒一定tio̍h看《聖經》。一方面理解《聖經》寫啥物；同時mā用《聖經》來印證kakī ê體驗。基督徒bē tàng無讀聖經，讀聖經是進入基督教奧義siōng緊ê方法，mā是檢證kakī ê經驗、思想是m̄是偏離教義ê唯一準繩。記tiâu《聖經》經文是基督徒ê義務之一，慢慢á，《聖經》ê經文to̍h ē成做信徒信仰ê血肉，tī言行思想中表現出《聖經》ê內涵。所以ài我無tī基督教小說中出現聖經ê經文á是聖經ê內容是真oh ê。《聖經》ê經文認bat to̍h是我理解基督教內容siōng重要ê礎石之一。

※ 早期，像講《血色夜婆降臨ê城市》kah《熱帶魔界》裡，《聖經》ê經文引用少。M̄ koh tī《天上卷軸上卷》to̍h引用真chē。因為我寫《天上卷軸》有一个目的，he to̍h是hō͘人thang看tio̍h《聖經》經文ê siōng菁華部分，hō͘讀者看《天上卷軸》ná親像teh看細本聖經仝款，chit个目標我tī《天上卷軸下卷》，無來達成bē sái得。

5, 是án怎我歡喜寫聖神？
「聖神」是基督徒ê保惠師，無聖神引chhōa ê基督徒to̍h是盲目ê教徒。祂既然是《舊約》耶和華ê靈，mā是《新約》耶穌ê靈。是三个上帝中ê一个上帝。真好ê信徒tùi開始信仰ê hit一工，到死去ê hit一工，lóng是不斷接受聖神ê引chhōa。聖神帶領我信耶穌，聖神mā hō͘我《新約》kah《舊約》裡所講ê hiah个異夢、異象、方言kah保羅所講ê九種屬靈恩賜，mā帶領我讀《聖經》，認bat開創天地ê上帝以羅欣（ELOHIM），hō͘我ē tàng知罪、認罪，而且hō͘我永生bē死ê性命，hō͘我重頭生。無聖神ê啟示，我to̍h m̄ bat基督教。祂是我ê源頭，是我siōng熟sāi ê上帝，所以，我特別歡喜寫聖神ê種種表現。同時，聖神ê表現大部分帶玄妙性，絕大部分lóng ē hō͘人感覺意外、驚奇，書寫聖神ê表現等於帶領讀者做一chōa有趣味ê神奇之旅，小說tú需要chit種吸引力，所以，書寫聖神ê種種奇蹟，變成我ê基督教小說ê主要內容之一。

6, 我是án怎暫停《天上卷軸下卷》ê書寫？（我ê靈命經驗有tó一kóa？） 是án怎我中止《天上卷軸》ê書寫，kantaⁿ出版上卷；無看tio̍h下卷出版？ Siōng大ê原因是我tī書寫完上卷ê時，忽然感覺我ê靈命經驗無夠。

※ Tī提筆寫《天上卷軸》ê起初，我設定這是一本專寫信徒靈命過程ê一本冊，tùi kē階往koân階寫，kahná行石階仝款，每階lóng tio̍h寫，而且beh寫kah真詳細，留hō͘後來ê基督徒當做靈命進階ê範本。M̄ koh，當我寫完上卷ê時，發見我ê靈命經驗淺薄，無認為ē tàng繼續，就ánne我停筆，回頭去體驗koh khah深ê靈命，想辦法hō͘ kakī koh khah進步；就ánne，我ê《天上卷軸》to̍h暫停à。

※ 經過chit幾年ê koh再進步，我想講kám ē tàng繼續寫？勉強來講，我想講chitmá ē tàng寫。M̄ koh，我mā teh考慮，假使像講koh再延後一段時間是m̄是ē比較khah好？！到目前為止，我ē tàng歸納出我ê靈命經驗共有四个階段，chit四个階段lóng kah聖神ê積極教誨有關，kah我個人ê才情無關係，這lóng是聖神所賜ê恩惠：

※ 第一个階段：因信稱義ê階段。Chit个階段tùi 1990年左右開始。Tùi我信「耶穌死去koh活」是真開始，一直到信《使徒信經》是真，koh再信《四福音書》是真，koh再信〈保羅書信〉是真。思想中心是圍teh認bat耶穌，信耶穌來展開。我知影因為信耶穌，所以，我ê罪lóng遭遇tio̍h免除，我得救，將來ē tàng進入新天新地。

※ 第二个階段：聖神外顯ê階段。Chit个階段mā是tī 1990年左右開始，特別是聖神降臨tī我ê身chiūⁿtahtah三工了後展開。當時異夢、異象非常頻繁，siōng尾iáu ē tàng講方言，甚至mā有能力幫贊教友趕鬼、講預言……等等ê能力。總講一句，chit種聖神外顯ê現象是聖神tī人ê身chiūⁿ去koh來，來koh去ê現象，所顯出ê能力、現象是hō͘人thang看tio̍h ê、感受tio̍h ê、堪得檢驗ê。除了異夢、異象以外，chiah个聖神恩賜ê能力iáu包括tī保羅所講ê聖神ê九種恩賜裡。Tī聖經內面，《舊約》記載有大量先知ê異象、異夢經驗，以《小先知書》siōng chē。Tī《新約》裡，以〈馬可福音〉、〈啟示錄〉記載siōng chē，〈使徒行傳〉mā有一kóa。


第三个階段：聖神內住ê階段。Chit个階段tùi 2013年五月初4開始，我忽然感覺聖神內住tī我ê身軀裡，無koh來來去去，卻是永遠tòa tī身體內面；祂無koh離開，to̍h是我犯罪，祂mā bē 離開，我ê身軀就變成「聖神ê殿」。因為祂bē離開，所以，聖神ê聖潔ê特性to̍h tī我ê內在展開，hō͘我知影原來ê我是愛犯罪ê、無清氣ê、穩死ê、是神所憤怒ê對象。這to̍h是講我開始「知罪」，m̄ koh，我ài犯罪ê本性一時真oh得去除，就ánne，聖神to̍h透過種種警告（siōng常hō͘我異夢），嚴格責備我ê犯罪行為，指出hiah个bē tàng kā人講ê pháiⁿ行為，á是用懲罰ê手段，禁止我koh犯hiah个包死ê大罪。就ánne，我被逼就範，改正kakī。這to̍h是「悔改」。「認罪、悔改」to̍h是chit階段ê靈命經驗。目的是hō͘人遠離罪惡，聖潔起來。Chit種「老我（老性命）」kah「聖神」雙方爭鬥ê過程非常激烈，達到無法度並存ê ê地步，滋味m̄是hiahni̍h好忍受。M̄ koh，聖神mā hō͘我結「聖神ê kóechí」做補償，tiāⁿtiāⁿ有喜樂、平安…·chiah个美好感受。Chit个階段ê經驗，tī《新約》裡ê〈保羅書信〉有真chē ê描述，特別是〈羅馬書〉、〈哥林多前書〉、〈加拉太書〉有真生動ê描述。總講一句，信徒一定tio̍h「認罪、悔改」，以及「老我（老性命）」「聖神」ê爭鬥現象，to̍h是〈保羅書信〉ê核心內容之一。

※ 第四个階段：得tio̍h永生bē死ê性命階段，mā to̍h是進入重頭生ê階段。Chit个階段tùi 2017年開始，這是第三階段造成ê siōng尾結果。因為「老我（老性命）」kah聖神無法度並存，經過一回激烈ê爭鬥，「老我（老性命）」漸漸衰弱，siōng尾忽然消失，mā to̍h是tī「老我（老性命）」消失ê當今，「聖神」to̍h成做唯一ê新自我。Chit時，聖神to̍h顯露出祂無始無終、永生bē死ê特性，hō͘你看tio̍h「新自我（新性命）」ê特性。原來chit个新自我是一个「我是α（阿拉法），我是Ω（俄梅嘎）；我是起頭，mā是終止」ê上帝ê性命，mā to̍h是耶穌ê性命，你總算正確得tio̍h耶穌賞賜hō͘你ê chit个新性命，你完全新生，to̍h叫做「重頭生」。這是上帝所差派祂ê kiáⁿ耶穌來到世界上ê真正目的。Chit方面ê經文以〈約翰福音〉、〈約翰一書〉講了siōng chē。

以上四个階段to̍h是我到目前為止所經歷過ê靈命四个階段。

※ 我teh寫《天上卷軸上卷》ê時，kantaⁿ經歷過第一kah第二階段，所以只好停寫。《天上卷軸下卷》我ē繼續寫第三kah第四个階段。

7, Án怎判斷目前台灣各基督教派ê偏重kah優劣？
Chia我附帶講一下á經歷靈命四階段ê重要性。 根據我所知，chitmá ê台灣無任何教派ê教義ē tàng包括chit四个階段ê靈命。In lóng偏向某一个、á是某兩个階段，m̄是四个階段lóng講、lóng bat。

※ 比論講：真耶穌教會kah靈糧堂chit兩教派lóng專講第二階段「聖神外顯」ê靈命，教導in ê信徒tio̍h有聖神外顯ê能力，ài ē tàng講方言，注意異夢、異象，甚至ē tàng講預言。M̄ koh，對第一階段ê因信稱義、第三階段ê聖神內住、第四个階段ê重頭生to̍h少講，m̄ bat。因為少講，信徒to̍h bē tàng bat，特別是m̄知聖神內住ê「認罪、悔改」真重要，mā m̄知得tio̍h永生bē死ê性命chiah是信基督教ê siōng尾ê目的。這to̍h致使追隨in ê信徒食大虧，無法度理解基督教koh khah深沉、究極ê道理。

※ Koh比論講長老會，因為加爾文ê影響，in只有講第一階段ê因信稱義、第三階段ê聖神內住。M̄ koh避開第二階段ê聖神外顯階段kah第四階段ê重頭生階段。這to̍h真可惜，致使in對《聖經》ê認bat無全面。特別是長老會對「重頭生」ê定義非常jû chhángchháng，無固定ê答案，非常慘淡。

※ Koh比論講李常受ê地方集會所教會，in專講第一階段ê因信稱義，避開第二階段ê聖神外顯。因為對講方言、異夢、異象m̄講、m̄ bat，結果對聖神ê外顯現象就to̍h無知、無識。同時，雖然李常受真認真teh談第四階段，m̄ koh，因為李常受本人講第三階段ê聖神內住無夠精純，koh無第四階段ê實際重頭生經驗，就ánne誤會重頭生ê內涵，tiāⁿtiāⁿ對信徒暗示á是明講：只要受洗、信耶穌to̍h重頭生！結果kā第一階段當做第四階段講。舞到siōng尾，地方集會所教會ê信徒to̍h認為kakī重頭生，m̄免koh再追求重頭生。Ánne，地方集會所教會ê信徒to̍h食大虧，信仰to̍h變kah軟chiáⁿ，無奮進ê精神，想beh真正重頭生to̍h遙遙無期！

這是一kóa我tī靈命經驗上ê細細心得，而且提供給你做參考！ ──2017、06、07 tī鹿港