《宋澤萊ê台文蕃薯園》

 | | | 轉寄

好冊紹介《番俗六考》

作者 宋澤萊, 台譯：Lîm ChùnIo̍k/林俊育 2021.10.17

【題目】比郁永河ê《裨海紀遊》價高百倍ê《番俗六考》白話翻譯本正式出版！──全盤翻新你對台灣人先祖平埔族觀念ê一本冊
◎宋澤萊

今á日台灣人tī別人ê面前公然講：「阮ê先祖是平埔族！」大概無人ētàng大聲應嘴，因為根據林媽利小姐ê血液調查分析，台灣有85% ê閩南人、客家人有原住民血統﹝包括高山族、平埔族﹞，至少你ê話有85%是正確ê。

● M̄koh，若是有人koh khah進一步問你：「Ánne，你一定知影iáu未漢化ê平埔族人ê生活、習慣loh！」你to̍h無一定ētàng真肯定講：「我知影！」Tio̍h算你真肯定講知影，mā無一定是正確ê。

● 像講你講：「平埔族lóng是母系社會，所以應該lóng是男方嫁到女方ê厝！」這to̍h m̄tio̍h à。Kiámchhái台灣真chē地區大部分是ánne；m̄koh，《番俗六考》裡記載大肚、清水、沙鹿chiahê地區「有kóa家庭是男娶女，有ê是男方hông招」，看起來並無lóng是男方嫁到女方。

● Koh像講你講：「平埔族婚姻比較khah自由，因為婚姻是男女kakī自主，所以離婚是平常事。」Ánne講kiámchhái大部分是tio̍h ê，m̄koh有部分是m̄tio̍h ê，因為《番俗六考》記載雲林、彰化一帯有一个「南社」，in翁ábó͘按照規定是kui世人lóng m̄離婚ê。

● Koh像講你聽信《東番記》ê謠言，對人講：「平埔族tī陸地無teh掠魚！」這mā m̄tio̍h，因為番俗六考裡記載講：「﹝彰化﹞二林地區ê掠魚方法是：婦人十人á是十gōa人tī溪流中，kā籠á套tī正pêng大腿頂面，所有ê番民lóng the̍h竹篙tùi水頭ê所在phah水趕魚，番婦ê籠á同齊起落，kā魚扣tòa tī籠á內底，koh再用手去籠á內底取魚。」

● 有真chē ê平埔族ê生活習慣，lóng超過你ê想像以外……。
● Beh糾正chiahê錯誤觀念，除了你詳細閱讀《番俗六考》以外，並無其它辦法。
● 《番俗六考》chit本冊是清朝皇帝差派來台ê欽差大臣黃淑璥ê作品。黃淑璥是一位對原住民充滿溫情kah同情ê官員，到chitmá已經是299年前，伊來到台灣。來台了後，伊下命令hō͘台灣ê地方官，kā台灣地區大部分平埔族kah少部分高山族分做13群做調查，內面有10群左右是平埔族，比論講台南府城附近是一陣，彰化雲林交界處又koh是一陣，桃竹苗宜蘭花蓮又koh是一陣……ta̍k个群體lóng無仝款，一定tio̍h kā in ê tòa、lim食、穿插、婚嫁、喪葬、器用、番歌以及真chē古典文學對平埔族ê重要記述lóng節錄落來，構成一本對平埔族地毯式ê記錄，非常清楚明白。後來黃叔璥kā《番俗六考》編tī伊ê名著《台海使槎錄》出版，流傳到今á日。

● 《番俗六考》是án怎ē比郁永河ê《裨海紀遊》koh khah重要？這是khiā tī對平埔族ê認bat chit方面ê觀點來看ê。因為《番俗六考》是大規模ê官方調查記錄，就ánne動用幾十个á是百个人力調查出來ê，所用ê工夫、金錢定tio̍h oh得計算，乃是一定tio̍h上呈皇帝ê一本報告，kah個人創作無仝。郁永河ê《裨海紀遊》tio̍h講是真精彩，畢竟lóng是伊個人對平埔族ê倉倉pōngpōng ê看法，比較是有侷限ê，看bētio̍h全面，所以對平埔族ê認bat to̍h差《番俗六考》真遠。

● M̄nā是tī清朝，tī以前ê荷蘭、東寧王國，以及了後ê日據時代，從來無chiahni̍h大規模kah詳細ê平埔族調查記錄，所以，它是想beh認bat平埔族ê人頭一本應該看ê冊，其它ê冊lóng是次要ê。

● Chit本古冊存在已經真久，m̄koh頭尾lóng無人去ka翻譯。Chit pái前衛出版社協請原住民史專家詹素娟博士來注解chit本冊ê地名，而且由宋澤萊擔任翻譯，kā它用白話文徹底整理出來，是真用時間koh食力ê一本冊。Chit本用白話文注解、翻譯ê冊，定tio̍h ētànghō͘台灣人對平埔族ê認bat koh khah深刻，對台灣人ê自我認同有刷新歸真ê作用。