《聖經故事三字詩》

 | | | 轉寄

20 Pó-lô....保羅

作者 Tân chheng-chùn 2010.07.11

Lūn Pó-lô, ha̍k-būn hó,
論保羅，學問好，
Bô chū-ko, ài o-ló;
無自高，愛謳咾；

Ki-tok tō, sì-kòe pò,
基督道，四界報，
Siū bû-kò, kòa thih-só,
受誣告，掛鐵索，
Chē kaⁿ-lô, ia̍h thoân-tō;
坐監牢，亦傳道；

Chì-khì ko, ián bōe tó,
志氣高，偃未倒，
Sit chì bô, ū Chú khò,
失志無，有主靠，
Lâng khòaⁿ pó, i pùn-sò;
人看寶，他畚埽；

Káng Chú hó, thoân Chú tō,
講主好，傳主道，
Chia̍h iā hó, khùn iā hó,
食也好，睏也好，

Ū á bô, lóng bô thó,
有抑無，攏無討，
Lêng-hûn pó, tē-it hó.
靈魂保，第一好。

Ū chi̍t cho, tī kaⁿ-lô,
有一遭，佇監牢，
Têng-têng só, ke̍k lo-so;
重重鎖，極嚕嗦；

Chhiùⁿ-koa hô, tē-tāng tò,
唱歌和，地動到，
Tn̄g thih-só, mn̂g-chhòaⁿ lo̍h,
斷鐵索，門栓落，

Lô-chu̍t hô, sim-thâu cho,
牢卒號，心頭懆，
Kaⁿ-nih chō, in bô tô,
監裡坐，[人因]無逃，

Bián tong to, bián hoân-ló,
免動刀，免煩惱，
Án-chóaⁿ chò, sìn Chú pò,
按怎做，信主報，
Choân-ke khò, sìⁿ-miā pó.
全家靠，性命保。