《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第六章

作者 巴克禮普世版小組 2011.05.01

br>
1) Lín tio̍h kín-sīn, m̄-thang ūi-tio̍h boeh hō͘ lâng khòaⁿ, kò͘-ì tī lâng ê bīn-chêng tián lín ê kèng-khiân. Nā án-ne chò, lín bē-tàng tit-tio̍h Thiⁿ-pē ê pò-siúⁿ.
2) Só͘-í lí chín-chè ê sî, m̄-thang chhin-chhiūⁿ ké-hó ê lâng tī hōe-tn̂g kap koe-lō͘ pûn kó͘-chhoe soan-thoân, ài hō͘ lâng o-ló. Góa si̍t-chāi kā lín kóng, In í-keng tit-tio̍h in ê pò-siúⁿ à.
3) Chí-ū lí chín-chè ê sî, m̄-thang hō͘ lí ê tò-chhiú chai lí ê chiàⁿ-chhiú ê só͘ chò;
4) hō͘ lí ê chín-chè ún-ba̍t; chiū lí ê Pē, kàm-chhat tī ún-ba̍t ê, boeh pò-tap lí.
5) Lín kî-tó ê sî, m̄-thang chhin-chhiūⁿ ké-hó ê lâng; in-ūi in ài khiā tī hōe-tn̂g kap tōa koe-bīn ê oat-kak kî-tó, boeh hō͘ lâng khòaⁿ-tio̍h. Góa si̍t-chāi kā lín kóng, In í-keng siū-tio̍h in ê pò-siúⁿ à.
6) Chí-ū lí kî-tó ê sî, tio̍h ji̍p lí ê ba̍t-pâng, koaiⁿ mn̂g, kiû lí ê Pē, tiàm tī ún-ba̍t ê; chiū lí ê Pē, kàm-chhat tī ún-ba̍t ê, boeh pò-tap lí.
7) Koh lín kî-tó ê sî, ōe m̄-thang ta̍uh-ta̍uh têng-hok, chhin-chhiūⁿ gōa-pang lâng; in-ūi in phah-sǹg kóng chē-chē ōe, chiah tit-tio̍h thiaⁿ-tio̍h.
8) Só͘-í lín m̄-thang o̍h in; in-ūi lín bē kiû I ê tāi-seng, lín ê Pē í-keng chai lín só͘ khiàm-ēng ê.
9) Só͘-í lín tio̍h án-ne kî-tó: Goán tī thiⁿ-téng ê Pē, Goān lí ê miâ sèng.
10) Lí ê kok lîm-kàu. Lí ê chí-ì tit chiâⁿ, tī tē-ni̍h chhin-chhiūⁿ tī thiⁿ-téng.
11) Goán ê ji̍t-si̍t, kin-á-ji̍t hō͘ goán.
12) Sià-bián goán ê ko͘-hū, chhin-chhiūⁿ goán iā ū sià-bián ko͘-hū goán ê lâng.
13) Bo̍h-tit chhōa goán ji̍p tī chhì, tio̍h kiù goán thoat-lī hit ê pháiⁿ-ê.
14) In-ūi lín nā sià-bián lâng ê kè-sit, lín ê Thiⁿ Pē iā boeh sià-bián lín.
15) Lín nā bô sià-bián lâng ê kè-sit, lín ê Pē iā bô boeh sià-bián lín ê kè-sit.
16) Koh lín kìm-chia̍h ê sî, m̄-thang chhin-chhiūⁿ ké-hó ê lâng tài iu-iông; in-ūi in chiong in ê bīn pìⁿ pháiⁿ khòaⁿ, boeh hō͘ lâng khòaⁿ-tio̍h in teh kìm-chia̍h. Góa si̍t-chāi kā lín kóng, In í-keng siū-tio̍h in ê pò-siúⁿ à.
17) Chí-ū lí kìm-chia̍h ê sî, tio̍h boah lí ê thâu, sóe lí ê bīn;
18) bô hō͘ lâng khòaⁿ-tio̍h lí teh kìm-chia̍h, sī hō͘ lí tòa tī ún-ba̍t ê Pē khòaⁿ-tio̍h; chiū lí ê Pē, kàm-chhat tī ún-ba̍t ê, boeh pò-tap lí.
19) M̄-thang ūi-tio̍h ka-kī chek-chū châi-pó tī tē-ni̍h, ū thâng kap sian phah-pháiⁿ, iā ū chha̍t iah khang thau-the̍h ê só͘-chāi.
20) Chí-ū ūi-tio̍h ka-kī chek-chū châi-pó tī thiⁿ-téng, thâng kap sian bô phah-pháiⁿ, iā bô chha̍t iah khang thau-the̍h ê só͘-chāi.
21) In-ūi lín ê châi-pó tī hia, lín ê sim iā boeh tī hia.
22) Seng-khu ê teng chiū-sī ba̍k-chiu; lí ê ba̍k-chiu nā kim, choân seng-khu chiū kng.
23) Lí ê ba̍k-chiu nā hoe, choân seng-khu chiū àm. Lí lāi-bīn ê kng nā àm, hit ê àm jōa tōa ah!
24) Bô lâng ōe ho̍k-sāi nn̄g ê chú-lâng; in-ūi i ōe oàn-hūn chit-ê, thiàⁿ hit-ê; á-sī ōe chun-tiōng chit-ê, khòaⁿ-khin hit-ê; lín bōe-ōe ho̍k-sāi Siōng-chú sòa ho̍k-sāi chîⁿ-châi.
25) Só͘-í góa kā lín kóng, Bo̍h-tit khòa-lū lín ê sìⁿ-miā boeh chia̍h sím-mi̍h, boeh lim sím-mi̍h, á-sī lín ê seng-khu boeh chhēng sím-mi̍h. Lín ê sìⁿ-miā kiám bô khah tōa tī bí-niû, iā lín ê seng-khu kiám bô khah tōa tī i-chiûⁿ mah?
26) Chhì-khòaⁿ thiⁿ-tiong ê pe-chiáu, bô chèng-choh, bô siu-sêng, bô chek-chū tī chhek-chhng, lín ê Thiⁿ Pē iā teh chhī in. Lín kiám bô pí hiah-ê khah kùi-khì mah?
27) Lín sím-mi̍h lâng ōe ēng khòa-lū hō͘ sìⁿ-miā khah tn̂g chi̍t khek kú? 28 Siáⁿ-sū ūi-tio̍h i-chiûⁿ khòa-lū ah? Chhì-siūⁿ soaⁿ-ni̍h ê pek-ha̍p-hoe, cháiⁿ-iūⁿ tōa châng; in bô lô-khó͘, bô pháng cheh;
29) tān-sī góa kā lín kóng, tng Só͘-lô-bûn ke̍k hâng-ngó͘ ê sî, i só͘ chhēng ê m̄ ta̍t-tio̍h chit chióng hoe ê chi̍t lúi.
30) Taⁿ soaⁿ-ni̍h ê chháu, kin-á-ji̍t tī-teh, bîn-á-ji̍t hiat tī hóe-lô͘, Siōng-chú hō͘ i chhēng kàu án-ne, hô-hòng lín, sió-sìn ê lâng ah?
31) Só͘-í m̄-thang khòa-lū kóng, Goán boeh chia̍h sím-mi̍h? Boeh lim sím-mi̍h? Boeh chhēng sím-mi̍h?
32) In-ūi chiah-ê lóng sī gōa-pang lâng só͘ kiû ê; lín ê Thiⁿ Pē iā chai chiah-ê lóng sī lín khiàm-ēng ê.
33) Chí-ū tāi-seng kiû I ê kok kap I ê gī, chiū chiah-ê mi̍h lóng boeh sòa hō͘ lín.
34) Só͘-í m̄-thang ūi-tio̍h bîn-á-ji̍t khòa-lū; in-ūi hit ê bîn-á-ji̍t, i boeh ka-kī khòa-lū. Chi̍t ji̍t ê kan-khó͘ tī chi̍t ji̍t kàu-gia̍h.