《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第十二章

作者 巴克禮普世版小組 2013.12.22

Iâ-so͘ Tī Pek-tāi-nî Siū Boah-iû (Mt 26:6-13;Mk 14:3-9)
1 Pôaⁿ-kòe-cheh la̍k ji̍t chêng, Iâ-so͘ khì kàu Pek-tāi-nî, chiū-sī Iâ-so͘ hō͘ i tùi sí-lâng tiong koh-oa̍h hit-ê Lia̍p-sat-lō͘ tòa ê só͘-chāi. 2 In chiū tī hia ūi-tio̍h Iâ-so͘ chún-pī àm-tǹg. Má-tāi teh sū-hāu, Lia̍p-sat-lō͘ kah Iâ-so͘ chē kâng toh. 3 Má-lī-a the̍h chi̍t koàn sûn koh ko-kùi ê phang-iû lâi boah Iâ-so͘ ê kha, koh ēng ka-kī ê thâu-mn̂g kā i chhit, kui chhù-lāi chhiong-móa phang-iû ê phang-bī. 4 Iâ-so͘ ê chi̍t-ê bûn-tô͘, chiū āu-lâi chhut-bē Iâ-so͘ ê Ka-lio̍k-lâng Iû-tāi, kóng, 5 " Ná m̄ chiong chit-ê phang-iû khì bē saⁿ-pah ê gîn-á lâi chín-chè sàn-chhiah lâng?" 6 I án-ne kóng m̄-sī in-ūi i koan-sim sàn-chhiah lâng, sī in-ūi i sī chha̍t, koh siông-siông thau-the̍h i só͘ koán-lí ê kong-khoán. 7 Iâ-so͘ chiū kóng, "Chhut-chāi chit-ê hū-jîn-lâng khì chò! Hō͘ i chiong chiah-ê phang-iû lâu kàu góa bâi-chòng ê ji̍t thang ēng. 8 Put-sî to ū sàn-chhiah lâng kah lín chò-hóe, m̄-koh Góa bô siông-siông kah lín chò-hóe."

Sat-hāi Lia̍p-sat-lō͘ ê Im-bô͘
9 Chin-chē Iû-thài-lâng thiaⁿ-tio̍h Iâ-so͘ tī Pek-tāi-nî chiū khì hia. In m̄-nā sī beh khòaⁿ Iâ-so͘, mā ài beh khòaⁿ Iâ-so͘ hō͘ i tùi sí-lâng tiong koh-oa̍h ê Lia̍p-sat-lō͘. 10 Só͘-í chiah-ê chè-si-tiúⁿ kè-bô͘ liân Lia̍p-sat-lō͘ mā beh kā i sat-hāi. 11 In-ūi ū chin-chē Iû-thài-lâng ūi-tio̍h Lia̍p-sat-lō͘ ê iân-kò͘ khì sìn Iâ-so͘.

Iâ-so͘ Chìn-ji̍p Iâ-lō͘-sat-léng (Mt 21:1-11;Mk 11:1-11;Lk 19:28-40)
12 Keh-tńg-ji̍t, chin-chē lâi kòe cheh ê lâng thiaⁿ-tio̍h Iâ-so͘ beh kàu Iâ-lō͘-sat-léng, 13 chiū gia̍h chang-chhiū ki khì gêng-chiap Iâ-so͘, tōa-siaⁿ hoah kóng, "Hô-sàn-ná, hōng Chú ê miâ lâi ê Hit-ūi eng-kai tit-tio̍h o-ló!( chù: SPh 118:26) Í-sek-lia̍t ê Ông eng-kai tit-tio̍h o-ló!" 14 Iâ-so͘ khòaⁿ-tio̍h chi̍t chiah lî-á-kiáⁿ chiū khan lâi khiâ. Chiàu Sèng-keng só͘ kì-chài: 15 Sek-an ê cha-bó͘-kiáⁿ ah, m̄-bián kiaⁿ! Khòaⁿ! lín ê Ông khiâ lî-á-kiáⁿ teh lâi ā."( chù: SKL 9:9) 16 Hit tong-sî bûn-tô͘ bē liáu-kái chiah-ê tāi-chì. Kàu Iâ-so͘ tit-tio̍h êng-kng ê sî chiah siūⁿ-khí Sèng-keng ū kì-chài chiah-ê tāi-chì sī teh chí Iâ-so͘, mā kó-jiân tī Iâ-so͘ ê sin-chiūⁿ si̍t-hiān chiah-ê tāi-chì. 17 Tng Iâ-so͘ kiò Lia̍p-sat-lō͘ chhut bōng, hō͘ i tùi sí-lâng tiong koh-oa̍h ê sî, kah Iâ-so͘ chò-hóe tī hia ê kûn-chiòng ū kè-sio̍k teh chò kiàn-chèng. 18 Kûn-chiòng chhut-khì gêng-chiap Iâ-so͘, in-ūi in thiaⁿ-tio̍h I ū kiâⁿ chit-ê sîn-jiah. 19 Hoat-lī-sài-phài ê lâng chò-hóe kóng, "Lán khah án-chóaⁿ chò mā bô chhái-kang, lí khòaⁿ, choân sè-kài ê lâng lóng tòe I khì à!"

Hi-lia̍p-lâng Lâi Chhōe Iâ-so͘
20 Cheh-kî tiong chiūⁿ-khì Iâ-lō͘-sat-léng tiâu-pài ê lâng tiong-kan ū kúi-nā-ê Hi-lia̍p-lâng. 21 Chiah-ê lâng lâi kìⁿ Ka-lī-lī-séng ê Pek-sài-tāi lâng Hui-le̍k, kiû i kóng, "Sian-siⁿ, goán ài beh kìⁿ Iâ-so͘." 22 Hui-le̍k lâi kā An-tek-lia̍t kóng. An-tek-lia̍t kah Hui-le̍k chiū lâi kā Iâ-so͘ kóng. 23 Iâ-so͘ ìn kóng, "Jîn-chú tit-tio̍h êng-kng ê sî kàu à. 24 Góa si̍t-chāi kā lín kóng, Chi̍t lia̍p be̍h-á nā bô lo̍h tē lâi sí, iû-goân sī chi̍t lia̍p niā-niā. Nā sí, chiū ē kiat chin-chē lia̍p be̍h-á. 25 Thiàⁿ-sioh ka-kī sèⁿ-miā ê lâng, ē sòng-sit sèⁿ-miā. Tī chit sè-kan bô tham-loân ka-kī sèⁿ-miā ê lâng it-tēng ē pó-siú sèⁿ-miā lâi tit-tio̍h éng-oán ê oa̍h-miā. 26 Lâng nā beh ho̍k-sāi Góa tio̍h tòe Góa. Góa tī sím-mi̍h só͘-chāi, ho̍k-sāi Góa ê lâng mā tio̍h tī hia. Lâng nā ho̍k-sāi Góa, Góa ê Thiⁿ-Pē mā ē kā i chun-tiōng."

Iâ-so͘ Ī-giân I ê Sí-bông
27 Chit chūn Góa ê sim-koaⁿ chin kan-khó͘.( chù: SPh 6:2) Góa beh án-chóaⁿ kóng chiah hó? Kám tio̍h kóng 'Pē ah, kiù Góa thoat-chhut hit-ê sî-khek.' M̄-koh Góa sī ūi-tio̍h chit-ê sî-khek chiah lâi-.ê. 28 Pē ah, goān Lí êng-kng Lí ê miâ." Jiân-āu ū siaⁿ tùi thiⁿ-téng lâi kóng, "Góa í-keng ū êng-kng Góa ê miâ. Taⁿ beh koh-chài kā I êng-kng chi̍t pái." 29 Khiā tī piⁿ-á ê kûn-chiòng thiaⁿ-tio̍h chiū kóng, "Sī lûi teh tân." Mā ū-lâng kóng, "Sī thiⁿ-sài teh kā I kóng-ōe." 30 Iâ-so͘ ìn kóng, "Chit-ê siaⁿ m̄-sī ūi-tio̍h Góa, sī ūi-tio̍h lín lâi-.ê. 31 Chit-má sī chit sè-kan siū sím-phòaⁿ ê sî. Chit sè-kan ê thóng-tī-chiá ē siū thui-hoan. 32 Góa nā siū kú-khí lī-khui sè-kan ê sî, ē khip-ín bān-bîn lâi kui-óa Góa." 33 Iâ-so͘ kóng chiah-ê ōe sī piáu-bêng I beh án-chóaⁿ lâi sí. 34 Chèng-lâng ìn I kóng, "Goán thiaⁿ-tio̍h lu̍t-hoat ū kóng, ' Ki-tok éng-oán chûn-chāi.' Lí án-chóaⁿ kóng, ' Jîn-chú tio̍h siū kú-khí?' Chit-ê Jîn-chú sī siáⁿ-lâng?" 35 Iâ-so͘ ìn kóng, "Kng iáu ē tī lín tiong-kan chi̍t-sî-á kú. Lín tio̍h thàn ū kng ê sî kín kiâⁿ chiah bē hō͘ o͘-àm kā lín jia-khàm. Tī o͘-àm tiong teh kiâⁿ ê lâng, m̄-chai ē kiâⁿ khì tó-ūi. 36 Thàn ū kng ê sî, lín tio̍h sìn kng, thang hō͘ lín chiâⁿ-chò kng-bêng ê lâng."

Iû-thài-lâng M̄-sìn Iâ-so͘
Iâ-so͘ chiah-ê ōe kóng soah chiū lī-khui in, ka-kī bih khí-lâi. 37 Iâ-so͘ sui-jiân tī in ê bīn-chêng kiâⁿ hiah-chē sîn-jiah, in iáu-koh m̄ sìn I. 38 Che sī beh èng-giām sian-ti Í-sài-a ê ōe, kóng, "Chú ah, siáⁿ-lâng ū teh sìn goán só͘ thoân ê sìn-sit? Chú ē tùi siáⁿ-lâng hián-bêng I ê koân-lêng?( chù: ISA 53:1) 39 In bē-tàng siong-sìn ê goân-in, Í-sài-a mā ū án-ne kóng, 40 " Siōng-Chú hō͘ in ê ba̍k-chiu chheⁿ-mê, koh sim ngē. Nā bô in ēng ba̍k-chiu khòaⁿ-kìⁿ koh ēng sim hiáu-ngō͘ lâi kui-hiòng Góa, Góa chiū ē kā in i-hó.( chù: ISA 6:10) 41 Í-sài-a án-ne kóng sī in-ūi i ū khòaⁿ-tio̍h Iâ-so͘ ê êng-kng, chiah kóng koan-hē I ê tāi-chì. 42 Sui-jiân án-ne, Iû-thài-lâng ê léng-siù ū chin-chē sìn Iâ-so͘, m̄-koh in kiaⁿ Hoat-lī-sài-phài ê lâng chiah bô kong-khai sêng-jīn I, chiah bián siū kóaⁿ-chhut hōe-tn̂g. 43 Chiah-ê Hoat-lī-sài-phài ê lâng ài lâng ê o-ló, chhiau-kòe tùi Siōng-Chú lâi ê o-ló.

Iâ-so͘ ê Ōe Beh Sím-phòaⁿ Lâng
44 Iâ-so͘ tōa-siaⁿ hoah kóng, "Sìn Góa ê lâng m̄-sī teh sìn Góa, sī sìn chhe-phài Góa lâi ê Hit-ūi. 45 Khòaⁿ-kìⁿ Góa ê lâng chiū-sī khòaⁿ-tio̍h chhe-phài Góa lâi ê Hit-ūi. 46 Góa chò kng lâi-kàu chit sè-kan, sī beh hō͘ sìn Góa ê lâng thoat-lī o͘-àm. 47 Thiaⁿ Góa ê ōe bô khì chun-siú ê lâng, Góa beh kā i sím-phòaⁿ, in-ūi Góa m̄-sī lâi beh sím-phòaⁿ sè-kan-lâng, sī beh chín-kiù sè-kan-lâng. 48 Kī-choa̍t Góa koh m̄ chiap-la̍p Góa ê ōe ê lâng, ū chi̍t-ê sím-phòaⁿ-chiá kā i sím-phòaⁿ. Tī boa̍t-ji̍t ê sî, Góa só͘ kóng ê tō-lí ē kā i sím-phòaⁿ. 49 In-ūi Góa m̄-sī chiàu ka-kī ê ì-sù kóng. Sī chiàu chhe-phài Góa lâi ê Thiⁿ-Pē bēng-lēng Góa sím-mi̍h, Góa chiū thoân sím-mi̍h, kóng sím-mi̍h. 50 Góa chai Siōng-Chú ê kài-bēng sī éng-oán ê oa̍h-miā, só͘-í Góa só͘ kóng ê lóng sī chiàu Thiⁿ-Pē kā Góa kóng-.ê."