《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第二十四章

作者 巴克禮普世版小組 2013.09.22

Iâ-so͘ ê Koh-oa̍h (Mt 28:1-10;Mk 16:1-8;Ih 20:1-10)
1 Chhit-ji̍t ê thâu chi̍t-ji̍t, thiⁿ-phú-kng, hiah-ê hū-jîn-lâng tòa só͘ chún-pī ê phang-liāu lâi-kàu bōng-tē. 2 In khòaⁿ-tio̍h chio̍h-thâu í-keng tùi bōng-kháu kō khui. 3 In ji̍p-khì bōng-lāi, bô khòaⁿ-tio̍h Chú ê sin-si. 4 In ūi-tio̍h án-ne iáu teh tiû-tû ê sî, hut-jiân ū nn̄g-ê lâng chhēng kng-iàⁿ-iàⁿ ê saⁿ khiā tī in sin-piⁿ. 5 Hū-jîn-lâng tōa tio̍h-kiaⁿ, bīn phak lo̍h thô͘-kha. Hit nn̄g-ê lâng kā in kóng, " Lín ná-ē tī sí-lâng tiong teh chhōe oa̍h-lâng? 6 I bô tī chia, I í-keng koh-oa̍h ā. Lín tio̍h kì-tit I iáu tī Ka-lī-lī-séng ê sî kā lín kóng ê ōe: 7 ' Jîn-chú it-tēng ē hông chhut-bē kau tī chōe-jîn ê chhiú, hō͘ in tèng tī si̍p-jī-kè, tē-saⁿ ji̍t koh-oa̍h.' 8 Hiah-ê hū-jîn-lâng chiū siūⁿ-khí Iâ-so͘ ê ōe. 9 In lī-khui bōng-tē tńg-khì, chiong chiah-ê tāi-chì lóng pò hō͘ cha̍p-it ê sù-tô͘ kah kî-tha ê kûn-chiòng chai. 10 Tùi sù-tô͘ pò-kò chiah-ê tāi-chì ê, chiū-sī Boa̍t-tāi-lia̍p ê Má-lī-a kah Iok-a-ná, Ngá-kok ê lāu-bú Má-lī-a, í-ki̍p kî-tha kah in chò-tīn ê hū-jîn-lâng. 11 Sù-tô͘ siūⁿ-kóng hiah-ê hū-jîn-lâng só͘ kóng ê ōe bô-iáⁿ bô-chiah, só͘-í m̄ siong-sìn. 12 M̄-koh Pí-tek khí-lâi cháu khì bōng-ni̍h, àⁿ lo̍h-khì chi̍t khòaⁿ, chí-ū khòaⁿ-tio̍h iù-tē-pò͘. I chiū tńg-khì, tùi só͘ hoat-seng ê tāi-chì kám-kak chin kî-koài.

Tī Í-má-ngó͘ ê Lō͘-tiong (Mk 16:12-13)
13 Siāng hit ji̍t, bûn-tô͘ tiong ū nn̄g lâng khì chi̍t-ê kiò-chò Í-má-ngó͘ ê chng-siā, lī Iâ-lō͘-sat-léng iok cha̍p-it kong-lí. 14 In ná kiâⁿ ná teh tâm-lūn só͘ hoat-seng ê tāi-chì. 15 In tng teh tâm-lūn lâi tâm-lūn khì ê sî, Iâ-so͘ chhin-sin óa-lâi kah in chò-tīn kiâⁿ. 16 M̄-koh kah-ná ū mi̍h-kiāⁿ teh that-gāi in ê ba̍k-chiu, soah bē jīn-tit Iâ-so͘. 17 Iâ-so͘ tùi in kóng, " Lín ná kiâⁿ ná teh piān-lūn ê sī sím-mi̍h tāi-chì?" In chiū thêng lo̍h-lâi, móa-bīn iu-chhiû. 18 Kî-tiong chi̍t-ê kiò Kek-liû-pa ìn Iâ-so͘ kóng, " Chit kúi ji̍t tī Iâ-lō͘-sat-léng só͘ hoat-seng ê tāi-chì, sī án-chóaⁿ kan-taⁿ Lí m̄-chai?" 19 Iâ-so͘ mn̄g kóng, " Sī sím-mi̍h tāi-chì?" In ìn kóng, " Chiū-sī Ná-sat-le̍k-lâng Iâ-so͘ ê tāi-chì. I sī sian-ti, tī Siōng-Chú kah chèng-lâng ê bīn-chêng só͘ kóng só͘ chò lóng chin ū koân-lêng. 20 Hiah-ê chè-si-tiúⁿ kah thâu-lâng kā I ah khì hō͘ lâng phòaⁿ sí-hêng, tèng si̍p-jī-kè. 21 I chiū-sī goán só͘ kî-thāi teh-beh lâi chín-kiù Í-sek-lia̍t ê Hit-ūi. M̄-nā án-ne, chiah-ê tāi-chì hoat-seng kàu taⁿ í-keng saⁿ ji̍t ā. 22 Koh goán tiong-kan kúi-nā-ê hū-jîn-lâng hō͘ goán chin tio̍h-kiaⁿ koh kî-koài. In-ūi in phah-phú-kng to̍h kàu bōng-tē. 23 M̄-koh in chhōe bô Iâ-so͘ ê sin-si, chiū tńg-lâi kóng, in ū khòaⁿ-tio̍h thiⁿ-sài chhut-hiān kā in kóng, Iâ-so͘ í-keng koh-oa̍h à. 24 Goán tiong-kan mā ū kúi-nā-ê lâng khì bōng-tē, khòaⁿ-tio̍h ê it-chhè lóng kah hū-jîn-lâng só͘ kóng ê kāng-khoán. M̄-koh in mā bô khòaⁿ-tio̍h Iâ-so͘. 25 Iâ-so͘ tùi in kóng, " Ai-ah, lín ná-ē chiah-ni̍h gōng, sim ná-ē chiah-ni̍h tūn, bē siong-sìn sian-ti só͘ kóng it-chhè ê ōe!? 26 Ki-tok kám m̄-sī tio̍h siū chiah-ê khó͘-lān chiah lâi ji̍p I ê êng-kng?" 27 Iâ-so͘ chiū tùi Mô͘-se kah chèng sian-ti khai-sí kóng khí, chiong Sèng-keng tiong só͘-ū koan-hē Iâ-so͘ ê kì-chài, lóng tùi in soat-bêng. 28 In teh-beh kàu só͘ beh khì ê chng-siā, Iâ-so͘ ná chhin-chhiūⁿ beh kè-sio̍k kiâⁿ. 29 M̄-koh hit nn̄g lâng kiông lâu Iâ-so͘ kóng, " Ji̍t-thâu lo̍h-soaⁿ à, thiⁿ í-keng àm. Chhiáⁿ kah goán tòa." Iâ-so͘ chiū ji̍p-khì kah in tòa. 30 Iâ-so͘ kah in chē-toh ê sî, the̍h piáⁿ chiok-siā, jiân-āu peh-khui pun hō͘ in. 31 In ê ba̍k-chiu khui chiū jīn-chhut I sī Iâ-so͘. I sûi-sî tùi in tiong-kan siau-sit. 32 In chiū hō͘-siōng kóng, " I tī lō͘-ni̍h kah lán kóng-ōe, kā lán soat-bêng Sèng-keng ê sî, lán ê sim kám bô chhin-chhiūⁿ hóe teh to̍h?" 33 In sûi-sî chhut-hoat tńg-khì Iâ-lō͘-sat-léng, tú-tio̍h hit cha̍p-it ê sù-tô͘ kah kî-tha ê lâng chū-chi̍p teh tâm-lūn, 34 kóng, " Chú kó-jiân koh-oa̍h ā, I í-keng chhut-hiān hō͘ Se-bûn khòaⁿ." 35 Hit nn̄g-ê lâng chiū kóng-khí tī lō͘-ni̍h só͘ tú-tio̍h ê tāi-chì, kah Iâ-so͘ peh piáⁿ ê sî in án-chóaⁿ jīn-chhut I ê it-chhè lóng kóng hō͘ in thiaⁿ.

Iâ-so͘ Tùi Bûn-tô͘ Hián-hiān (Mt 28:16-20; Mk 16:14-18; Ih 20:19-23; St 1:6-8)
36 Hit nn̄g-ê bûn-tô͘ teh kóng chiah-ê ōe ê sî, Iâ-so͘ chhin-sin khiā tī in tiong-kan, kā in kóng, " Goān lín pêng-an!" 37 In tio̍h-kiaⁿ koh kám-kak kî-koài, lia̍h-chò sī khòaⁿ-tio̍h kúi. 38 Iâ-so͘ chiū kā in kóng, " Lín ná-ē teh put-an, sim-lāi teh khí giâu-gî? 39 Lâi khòaⁿ góa ê chhiú, góa ê kha, khak-si̍t sī Góa pún-sin. Lín bong chiū chai, in-ūi kúi bô kut bô bah. Lín bong khòaⁿ, Góa lóng ū!" 40 Iâ-so͘ án-ne kóng liáu chiū chiong chhiú kah kha hō͘ in khòaⁿ. 41 Bûn-tô͘ hoaⁿ-hí kah iáu-koh m̄-káⁿ siong-sìn, iáu-teh bo̍k-bêng kî-biāu ê sî, Iâ-so͘ kā in kóng, " Lín chia ū sím-mi̍h thang chia̍h bô?" 42 In chiū the̍h chi̍t tè hang hó ê hî hō͘ Iâ-so͘. 43 Iâ-so͘ chiap kòe-lâi, tng in ê bīn-chêng chia̍h hō͘ in khòaⁿ. 44 Iâ-so͘ koh tùi in kóng, " Góa iáu kah lín chò-hóe ê sî ū kā lín kóng kòe. Mô͘-se ê lu̍t-hoat, kah sian-ti ê chheh, í-ki̍p Si-phian só͘ kì-chài koan-hē Góa ê tāi-chì lóng it-tēng ē èng-giām." 45 Iâ-so͘ khui in ê sim-khiàu, hō͘ in ē-tàng liáu-kái Sèng-keng. 46 Koh tùi in kóng, " Sèng-keng ū án-ne kì-chài, Ki-tok tio̍h siū khó͘-lān, tē-saⁿ ji̍t tùi sí-lâng tiong koh-oa̍h. 47 Koh ū kì-chài: Lín tio̍h hōng I ê miâ thoân hóe-kái lâi tit-tio̍h sià-chōe ê tō-lí, tùi Iâ-lō͘-sat-léng khai-sí thoân kàu choân sè-kài. 48 Lín chiū-sī chiah-ê tāi-chì ê kiàn-chèng-jîn. 49 Góa chiong Góa ê Thiⁿ-Pē só͘ èng-ín ê kau hō͘ lín. M̄-koh lín tio̍h tī chit-ê siâⁿ thèng-hāu kàu tit-tio̍h téng-bīn lâi ê koân-lêng."

Iâ-so͘ Chiūⁿ-thiⁿ (Mt 16:19-20; St 1:9-11)
50 Iâ-so͘ chhōa in chhut-khì kàu Pek-tāi-nî, jiân-āu gia̍h-khí siang-chhiú kā in chiok-hok. 51 Teh kā in chiok-hok ê tiong-kan chiū lī-khui in, siū chiap chiūⁿ-thiⁿ. 52 In chiū phak lo̍h-khì kā I pài. Jiân-āu hoaⁿ-hoaⁿ hí-hí tńg-khì Iâ-lō͘-sat-léng, 53 kè-sio̍k ta̍k-ji̍t tī sèng-tiān lāi o-ló Siōng-Chú.