《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第二十二章

作者 巴克禮普世版小組 2013.09.08

Hām-hāi Iâ-so͘ ê Im-bô͘ (Mt 26:1-5, 14-16; Mk 14:1-2, 10-11; Ih 11:45-53)
1 Tû-kàⁿ-cheh, mā kiò-chò Pôaⁿ-kòe-cheh, teh-beh kàu. 2 Chè-si-tiúⁿ kah keng-ha̍k kàu-su in-ūi kiaⁿ jîn-bîn hoán-tôaⁿ, só͘-í chhōe-khòaⁿ ū sím-mi̍h pān-hoat thang hāi-sí Iâ-so͘.

Iû-tāi Tông-ì Chhut-bē Iâ-so͘ (Mt 26:14~16;Mk 14:10~11)
3 Sat-tàn ji̍p tī hit-ê kiò-chò Ka-lio̍k ê Iû-tāi, i sī cha̍p-jī sù-tô͘ ê chi̍t-ê; 4 chiū khì kah chiah-ê chè-si-tiúⁿ í-ki̍p sèng-tiān ê siú-ōe-koaⁿ chò-hóe chham-siông, khòaⁿ beh ēng sím-mi̍h hong-hoat chiong Iâ-so͘ kau hō͘ in. 5 In chin hoaⁿ-hí, iok-tēng beh hō͘ i chîⁿ. 6 Iû-tāi tông-ì, chiū chhōe ki-hōe tng jîn-bîn bô tī in tiong-kan ê sî, chiong Iâ-so͘ kau hō͘ in.

Chún-pī Pôaⁿ-kòe-cheh ê Boán-chhan (Mt 26:17-25; Mk 14:12-21; Ih 13:21-30)
7 Tû-kàⁿ-cheh kàu à. Hit ji̍t tio̍h thâi Pôaⁿ-kòe-cheh ê iûⁿ-ko. 8 Iâ-so͘ chhe Pí-tek kah Iok-hān kóng, " Lín khì chún-pī Pôaⁿ-kòe-cheh ê boán-chhan." 9 In nn̄g-ê mn̄g kóng, " Lí ài goán khì sím-mi̍h só͘-chāi chún-pī?" 10 Iâ-so͘ ìn kóng, " Lín ji̍p-khì siâⁿ-lāi chiū ē tú-tio̍h chi̍t-ê lâng kōaⁿ chúi-pân. Lín tòe i ji̍p-khì hit keng chhù, 11 kā hit keng chhù ê chú-lâng kóng, ' Lāu-su teh mn̄g, I beh kah sù-tô͘ chia̍h Pôaⁿ-kòe-cheh boán-chhan ê kheh-thiaⁿ tī tó-ūi?.' 12 Hit-ê lâng ē pò lín khòaⁿ lâu-téng chi̍t keng í-keng pò͘-tì hó-sè ê tōa-thiaⁿ. Lín tio̍h tī hia chún-pī." 13 In khì, kó-jiân ta̍k-hāng lóng chiàu Iâ-so͘ só͘ kā in kóng ê. In chiū tī hia chún-pī Pôaⁿ-kòe-cheh ê boán-chhan.

Chú ê Boán-chhan (Mt 26:26-30; Mk 14:22-26; Ih 11:23-25)
14 Boán-chhan ê sî-kan kàu, Iâ-so͘ chiū kah sù-tô͘ chò-hóe chē-toh. 15 Iâ-so͘ tùi in kóng, " Tī siū-hāi chìn-chêng, góa chin ì-ài kah lín chia̍h chit-ê Pôaⁿ-kòe-cheh ê boán-chhan. 16 Góa kā lín kóng, tī Siōng-Chú ê Kok-tō͘ si̍t-hiān í-chêng góa bē koh chia̍h chit khoán ê boán-chhan." 17 Iâ-so͘ kā poe chiap kòe-lâi, chiok-siā liáu-āu, kóng, " Lín phâng chit-ê poe khì pun hō͘ ta̍k-ke lim. 18 Góa kā lín kóng, tùi chit-má khí ti̍t-kàu Siōng-Chú ê Kok-tō͘ lâi-lîm, góa choa̍t-tùi bē koh lim chit khoán ê phû-tô-chiap." 19 Jiân-āu Iâ-so͘ the̍h piáⁿ chiok-siā liáu-āu peh-khui the̍h hō͘ in, kóng, " Chit-ê sī góa ê seng-khu, ūi-tio̍h lín lâi hiàn ê, lín tio̍h án-ne chò lâi kì-liām Góa." 20 Chia̍h liáu-āu koh phâng poe chiok-siā, kóng, " Chit-ê poe sī sin-iok, ēng góa ūi-tio̍h lín lâu ê hoeh lâi siat-li̍p ê bêng-iok. 21 Lín khòaⁿ! chhut-bē góa hit-ê lâng kah Góa chò-hóe chhun-chhiú tī toh-téng. 22 In-ūi Jîn-chú ē chiàu Siōng-Chú só͘ tiāⁿ-tio̍h ê lâi lī-khui sè-kan. M̄-koh chhut-bē Jîn-chú hit-ê lâng ū chai-hō!" 23 In chiū hō͘-siōng mn̄g-lâi mn̄g-khì, ài beh chai in tiong-kan siáⁿ-lâng ē chò chit-ê tāi-chì.

Siáⁿ-lâng Siōng-tōa ê Cheng-lūn
24 In ū teh cheng-lūn, khòaⁿ in tiong-kan siáⁿ-lâng sǹg siōng tōa. 25 Iâ-so͘ chiū kā in kóng, " Gōa-pang-lâng ê kun-ông chò chú lâi tī-lí jîn-bîn; thóng-tī-chiá kiò-chò un-chú. 26 M̄-koh lín chiū m̄-sī án-ne; lín tiong-kan chò tōa ê tio̍h chhin-chhiūⁿ sī-sè, chò thâu-lâng ê tio̍h chhin-chhiūⁿ chhe-ēng ê. 27 Sím-mi̍h lâng chò tōa? Sī chē-toh-ê lâng-kheh, á-sī ho̍k-bū ê lâng? Kám m̄-sī chē-toh ê lâng-kheh? M̄-koh góa tī lín tiong-kan chhin-chhiūⁿ teh chò ho̍k-bū ê lâng. 28 Lín tī chhì-thàm tiong siông-siông kah góa chò-hóe. 29 Góa ê Thiⁿ-Pē ēng ông ê koân-pèng hō͘ góa. Góa mā beh án-ne chiong ông ê koân-pèng hō͘ lín. 30 Hō͘ lín thang tī góa ê kok-tō͘ kah góa chò-hóe chē-toh lim-chia̍h. Koh chē tòa pó-chō lâi sím-phòaⁿ Í-sek-lia̍t cha̍p-jī ê chi-cho̍k."

Ī-giân Pí-tek M̄-jīn Chú (Mt 26:31-35; Mk 14:27-31; Ih 13:36-38)
31 Iâ-so͘ koh kóng, Se-bûn, Se-bûn ah, lí khòaⁿ, Sat-tàn í-keng tit-tio̍h ín-chún, beh chhin-chhiūⁿ pòa be̍h án-ne kā lín pòa. 32 M̄-koh góa ū thè lí kî-tó, hō͘ lí bē sit-khì sìn-sim. Lí hôe-sim choán-ì liáu-āu, tio̍h kian-kò͘ lí hiaⁿ-tī ê sìn-sim." 33 Pí-tek ìn kóng, " Chú ah, góa chún-pī piān-piān beh kah lí khì chē-kaⁿ, kah lí chò-hóe sí." 34 Iâ-so͘ kā i kóng, " Pí-tek ah, góa kā lí kóng, kin-á-ji̍t ke iáu-bōe thî í-chêng, lí ē saⁿ pái m̄ jīn Góa."

Chîⁿ-tē kah To-kiàm
35 Koh kā cha̍p-jī sù-tô͘ kóng, " Góa chêng chhe lín chhut-khì, kiò lín m̄-thang tòa chîⁿ-tē, hêng-lí-tē kah ê. Lín kám ū khiàm sím-mi̍h?" Sù-tô͘ ìn kóng, " Bô." 36 Iâ-so͘ kā in kóng, " M̄-koh taⁿ ū chîⁿ-tē ê tio̍h tòa khì, ū hêng-lí-tē ê mā tio̍h tòa khì. Bô to ê lâng tio̍h bē i ê gōa-saⁿ khì bé to lâi tòa khì. 37 Sèng-keng ū kì-chài: I hō͘ lâng sǹg-chò put-hoat ê lâng.( chù: ISA 53:12) Chit-kù ōe it-tēng ē èng-giām tī Góa ê seng-khu. Sū-si̍t-siōng, Sèng-keng só͘ kì-chāi koan-hē Góa ê tāi-chì í-keng teh-beh èng-giām ā." 38 Sù-tô͘ kóng, " Chú ah, lí khòaⁿ, tī chia ū nn̄g ki to." Iâ-so͘ ìn kóng, " Án-ne ū kàu-gia̍h à."
Iâ-so͘ Tī Kan-ná-soaⁿ Kî-tó (Mt 26:36-46; Mk 14:32-42)
39 Iâ-so͘ chiàu-siông chhut-khì Kan-ná-soaⁿ. Sù-tô͘ mā tòe I khì. 40 Kàu hit só͘-chāi Iâ-so͘ chiū kā in kóng, " Lín tio̍h kî-tó, chiah bē siū chhì-thàm ê bê-he̍k." 41 Jiân-āu Iâ-so͘ lī-khui in chha-put-to ū hiat chio̍h-thâu ê hn̄g, kūi lo̍h-khì kî-tó, kóng, 42 " Thiⁿ-Pē ah, Lí nā khéng, kiû Lí chiong chit-ê khó͘-poe phâng lī-khui góa. Tān m̄-thang chiàu Góa ê ì-sù, tio̍h chiàu lí ê chí-ì lâi si̍t-hiān." 43 Ū chi̍t-ê thiⁿ-sài tùi thiⁿ chhut-hiān lâi ke-thiⁿ I ê khùi-la̍t. 44 Iâ-so͘ hui-siông thòng-khó͘, kî-tó jú pek-chhiat. I ê kōaⁿ chhin-chhiūⁿ tōa-tiám hoeh teh tih lo̍h tē. 45 Iâ-so͘ kî-tó soah khiā khí-lâi, khì kàu sù-tô͘ hia khòaⁿ-tio̍h in in-ūi iu-būn soah khùn khì. 46 Iâ-so͘ kā in kóng, " Lín ná-ē teh khùn? khí-lâi kî-tó chiah bē siū chhì-thàm ê bê-he̍k."

Iâ-so͘ Hông Lia̍h-khì (Mt 26:47-56; Mk 14:43-50; Ih 18:3-11)
47 Iáu teh kóng ê sî ū kui-tīn lâng kàu. Cha̍p-jī sù-tô͘ ê chi̍t-ê, chiū-sī hit-ê kiò-chò Iû-tāi ê chò thâu-chêng chhōa-lō͘. Iû-tāi kiâⁿ óa Iâ-so͘ beh kā I chim. 48 M̄-koh Iâ-so͘ kā i kóng, " Iû-tāi, lí ēng chim-chhùi lâi chhut-bē Jîn-chú sī-bô?" 49 Iâ-so͘ sin-piⁿ ê sù-tô͘ khòaⁿ-tio̍h só͘ beh hoat-seng ê tāi-chì chiū kóng, " Chú ah, goán ēng to lâi kā in thâi hó bô?" 50 Kî-tiong chi̍t-ê lâng kā chè-si-tiúⁿ ê lô͘-po̍k phut lo̍h-khì, kā i chiàⁿ-pêng ê hīⁿ-á siah khí-lâi. 51 Iâ-so͘ kóng, " Soah khì! Án-ne hó à!" I chiū bong hit-ê lô͘-po̍k ê hīⁿ-á, lâi kā i i-hó. 52 Iâ-so͘ tùi hiah-ê lâi beh lia̍h I ê chè-si-tiúⁿ, sèng-tiān ê siú-ōe-koaⁿ kah tiúⁿ-ló kóng, " Lín kám tio̍h gia̍h to kah thûi chhut-lâi? Bē su teh-beh lia̍h thó͘-húi leh? 53 Góa ta̍k-ji̍t kah lín tī sèng-tiān, lín bô hē-chhiú kā góa lia̍h. M̄-koh chit-má sī lín tng âng ê sî, mā sī o͘-àm teh chiáng- koân."

Pí-tek M̄-jīn Iâ-so͘ (Mt 26:57-58, 69-75; Mk 14:53-54, 66-72; Ih 18:12-18, 25-27)
54 In chiū lia̍h Iâ-so͘, kā I ah-khì chè-si-tiúⁿ ê kong-koán. Pí-tek lī hn̄g-hn̄g teh tòe Iâ-so͘. 55 Ū-lâng tī tiâⁿ-ni̍h khí hóe, chò-hóe ûi teh chē. Pí-tek mā chē tī in tiong-kan. 56 Ū chi̍t-ê lí-pī khòaⁿ-tio̍h Pí-tek chē tī hia teh hang-hóe, chiū ba̍k-chiu kim-kim kā i siòng, kóng, " Chit-ê lâng mā sī kah Iâ-so͘ teh chò tīn." 57 Pí-tek m̄ sêng-jīn, kóng, " Hū-jîn-lâng ah, góa m̄-bat I." 58 Koh kòe bô jōa kú, lēng-gōa chi̍t-ê lâng khòaⁿ-tio̍h Pí-tek chiū kóng, " Lí mā sī kah in tàu-tīn ê lâng." Pí-tek ìn kóng, " Pêng-iú ah, góa m̄-sī." 59 Chha-put-to kòe chi̍t-tiám cheng kú, koh ū chi̍t-ê lâng kian-chhî kóng, " Chit-ê lâng chin-chiàⁿ kah Iâ-so͘ chò tīn. In-ūi i mā sī Ka-lī-lī-lâng." 60 M̄-koh Pí-tek kóng, " Pêng-iú ah, lí teh kóng sím-mi̍h, góa m̄-chai." Iáu teh kóng ê sî, ke sûi-sî thî. 61 Hit sî Chú oa̍t thâu khòaⁿ Pí-tek. Pí-tek chiū siūⁿ-khí Chú tùi i kóng ê ōe: " Kin-á-ji̍t ke thî í-chêng, lí ē saⁿ pái m̄ jīn Góa." 62 Pí-tek chiū chhut-khì gōa-bīn tōa-siaⁿ thî-khàu.

Iâ-so͘ Siū Hí-lāng Piⁿ-phah (Mt 26:67-68; Mk 14:65)
63 Hiah-ê kò͘-siú Iâ-so͘ ê lâng kā I hì-lāng, koh kā I piⁿ-phah. 64 In am Iâ-so͘ ê bīn, mn̄g I kóng, " Lí nā sī sian-ti, ioh khòaⁿ siáⁿ-lâng kā Lí phah?" 65 In koh kóng chin-chē ōe lâi kā I bú-jio̍k.

Iâ-so͘ Tī Gī-hōe Siū Sím-mn̄g (Mt 26:59-66; Mk 14:55-64; Ih 18:19-24)
66 Thiⁿ chi̍t-ē kng, Iû-thài-lâng ê chè-si-tiúⁿ kah keng-ha̍k kàu-su chū-chi̍p khui-hōe koat-tēng kā Iâ-so͘ ah khì in ê gī-hōe. 67 In mn̄g Iâ-so͘ kóng, "Lí nā sī Ki-tok tio̍h kā goán kóng." 68 Iâ-so͘ kā in kóng, " Góa kā lín kóng, lín mā m̄ sìn. Góa nā mn̄g lín, lín mā m̄ ìn. 69 M̄-koh tùi chit-má khí, Jîn-chú ē chē tī koân-lêng Siōng-Chú ê chiàⁿ-pêng."( chù: SPh 110:1) 70 Chèng-lâng lóng kóng, " Án-ne, Lí chiū-sī Siōng-Chú ê Kiáⁿ sī-bô?" Iâ-so͘ ìn kóng, " Chiàu lín só͘ kóng ê, Góa chiū-sī." 71 In kóng, " Lán ná-tio̍h koh su-iàu sím-mi̍h chèng-kì? Lán í-keng ū thiaⁿ-tio̍h I chhin-chhùi kóng à."