《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第六章

作者 巴克禮普世版小組 2013.05.19

An-hioh-ji̍t ê Būn-tê (Mt 12:1-8;Mk 2:23-28)
1 Ū chi̍t-ê An-hioh-ji̍t, Iâ-so͘ tùi be̍h-hn̂g keng-kòe, I ê bûn-tô͘ tiah be̍h-sūi, ēng chhiú jôe lâi chia̍h. 2 Ū kóa Hoat-lī-sài-phài ê lâng tùi in kóng, " Lín ná-ē tī An-hioh-ji̍t, chò lu̍t-hoat kui-tēng bô eng-kai chò ê tāi-chì?" 3 Iâ-so͘ ìn kóng, " Lín kám bô tha̍k-tio̍h Tāi-pi̍t kah kin-tòe ê lâng, pak-tó͘ iau ê sî só͘ chò ê tāi-chì? 4 I ji̍p-khì Siōng-Chú ê tiān, the̍h hiàn-chè ê piáⁿ lâi chia̍h, koh hō͘ i kin-tòe ê lâng chia̍h. Chit chióng piáⁿ kan-tāⁿ chè-si chiah thang chia̍h." 5 Iâ-so͘ koh kā in kóng, " Jîn-chú sī An-hioh-ji̍t ê Chú."

Iâ-so͘ I-hó Khôe-Chhiú ê Lâng (Mt 12:9-14;Mk 3:1-6)
6 Koh ū chi̍t-ê An-hioh-ji̍t, Iâ-so͘ ji̍p-khì hōe-tn̂g kà-sī. tī hia ū chi̍t-ê chiàⁿ-chhiú khôe-khì ê lâng. 7 Ū kóa Keng-ha̍k-kàu-su kah Hoat-lī-sài-phài ê lâng teh tng-tán, khòaⁿ Iâ-so͘ ū tī An-hioh-ji̍t kā lâng i-pēⁿ á bô. Ì-sù sī beh chhōe khang-phāng thang kò Iâ-so͘. 8 Iâ-so͘ chai in ê khì-tô͘, chiū kā hit-ê khôe-chhiú ê lâng kóng, " Khí-lâi! khiā tòa tiong-ng." Hit lâng chiū khiā khí-lâi tī hia. 9 Jiân-āu Iâ-so͘ tùi in kóng, " Góa mn̄g lín, tī An-hioh-ji̍t chò hó-sū á-sī chò pháiⁿ sū, kiù sèⁿ-miā á-sī hāi sèⁿ-miā, tó chi̍t-hāng khah ha̍h lu̍t-hoat?" 10 Iâ-so͘ kā kûn-chiòng khòaⁿ chi̍t liàn liáu-āu tùi hit lâng kóng, " Kā lí ê chhiú chhun chhut-lâi! " I chi̍t-ē chhun chhiú, chhiú chiū ho̍k-goân. 11 Hiah-ê lâng hui-siông siū-khì, chò-hóe chham-siông beh án-chóaⁿ lâi tùi-hù Iâ-so͘.

Iâ-so͘ Kéng-soán Cha̍p-jī Sù-tô͘ (Mt 10:1-4;Mk 3:13-19)
12 Ū chi̍t kang, Iâ-so͘ chhut-khì soaⁿ-ni̍h kî-tó, kui mê tùi Siōng-Chú kî-kiû. 13 Kàu thiⁿ-kng chiū kiò bûn-tô͘ lâi; tùi in tiong-kan kéng-soán cha̍p-jī lâng, kā in kiò-chò sù-tô͘. 14 Chiū sī Se-bûn, Iâ-so͘ koh kā i hō-miâ chò Pí-tek, kah i ê hiaⁿ-tī An-tek-lia̍t, koh ū Ngá-kok kah Iok-hān, Hui-le̍k kah Pa-to-lô-mái, 15 Má-thài kah To-má, A-le̍k-hui ê kiáⁿ Ngá-kok kah kiò-chò Se-lô-tí ê Se-bûn, 16 Ngá-kok ê kiáⁿ Iû-tāi, kah chhut-bē Iâ-so͘ ê Ka-lio̍k-lâng Iû-tāi.

Iâ-so͘ ê Kà-sī kah I-pēⁿ (Mt 4:23-25)
17 Iâ-so͘ kah sù-tô͘ lo̍h-soaⁿ lâi khiā tī pêⁿ-tē, tī hia ū chin-chē I ê bûn-tô͘ kah kui tōa-tīn ê bîn-chiòng. Chiah-ê lâng sī tùi Iû-thài choân-tē kah Iâ-lō͘-sat-léng, í-ki̍p Chhui-lô kah Se-tùn iân-hái ê só͘-chāi lâi. 18 In lâi beh thiaⁿ Iâ-so͘ kóng tō-lí, mā beh hō͘ I i-pēⁿ. Hiah-ê hō͘ siâ-sîn hū-sin kiáu-jiáu ê lâng, mā lóng tit-tio̍h i-tī. 19 Chèng-lâng lóng siūⁿ-beh kā I bong, in-ūi ū koân-lêng tùi Iâ-so͘ chhut-lâi, hō͘ in lóng tit-tio̍h i-hó.

Hok-khì kah Chai-hō (Mt 5:1-12)
20 Iâ-so͘ gia̍h thâu khòaⁿ I ê bûn-tô͘, kóng, " Lín chiah-ê sàn-chhiah-lâng, si̍t-chāi ū hok-khì, in-ūi Siōng-Chú Kok-tō͘ sī lín ê. 21 Lín chit-má teh iau ê lâng, si̍t-chāi ū hok-khì, in-ūi Siōng-Chú ē hō͘ lín chia̍h kah pá. Lín chit-má teh thî-khàu ê lâng, si̍t-chāi ū hok-khì, in-ūi Siōng-Chú ē hō͘ lín chhiò. 22 Lâng ūi-tio̍h Jîn-chú ê iân-kò͘ lâi oàn-hūn lín, kū-choa̍t lín, bú-jio̍k lín, kā lín khòaⁿ-chò pháiⁿ lâi pâi-thek ê sî, lín si̍t-chāi ū hok-khì. 23 Hit ji̍t lín tio̍h hoaⁿ-hí tiô-thiàu; in-ūi lín tī thiⁿ-téng ê pò-siúⁿ chin tōa. Í-chêng hiah-ê人ê chó͘-sian mā sī án-ne khoán-thāi sian-ti. 24 M̄-koh lín chiah-ê hó-gia̍h-lâng, ē ū chai-hō! in-ūi lín í-keng teh hióng-siū an-lo̍k ê seng-oa̍h. 25 Lín chit-má pá-chiok ê lâng, ē ū chai-hō! in-ūi lín teh-beh iau. Lín chit-má teh chhiò ê lâng, ē ū chai-hō! in-ūi lín teh-beh ai-siong thî-khàu. 26 Lín chiah-ê hō͘ kûn-chiòng o-ló ê lâng, ē ū chai-hō! in-ūi in ê chó͘-sian mā bat án-ne khoán-thāi ké-sian-ti."

Thiàⁿ Te̍k-jîn (Mt 5:38-48;7:12)
27 " M̄-koh lín chiah-ê teh thiaⁿ ê lâng, Góa kā lín kóng, tio̍h thiàⁿ lín ê tùi-te̍k. Tio̍h hó khoán-thāi oàn-hūn lín ê lâng. 28 Tio̍h chiok-hok pháiⁿ-chhùi mē lín ê lâng. Tio̍h thè bú-jio̍k lín ê lâng kî-tó. 29 Nā ū-lâng siàn lí chi̍t-pêng ê chhùi-phóe, lēng-gōa chi̍t pêng mā hō͘ i siàn; nā ū-lâng pak lín ê gōa-saⁿ, liân lāi-saⁿ mā sūn-sòa hō͘ i. 30 Nā ū-lâng kā lí kiû siáⁿ-mi̍h, tio̍h hō͘ i; nā ū-lâng chhiúⁿ lí ê mi̍h-kiāⁿ, m̄-thang kā i thó tńg-lâi. 31 Lín ài lâng án-chóaⁿ tùi-thāi lín, mā tio̍h án-ne tùi-thāi lâng. 32 Lín nā thiàⁿ hiah-ê thiàⁿ lín ê lâng, ū siáⁿ-mi̍h thang o-ló? in-ūi pháiⁿ-lâng mā sī thiàⁿ hiah-ê thiàⁿ in ê lâng. 33 Lín nā hó khoán-thāi hiah-ê hó khoán-thāi lín ê lâng, ū siáⁿ-mi̍h thang o-ló? in-ūi pháiⁿ-lâng mā sī án-ne teh chò. 34 Lín nā chioh chîⁿ hō͘ hiah-ê ū thang ǹg-bāng hêng lí chîⁿ ê lâng, ū siáⁿ-mi̍h thang o-ló? in-ūi pháiⁿ-lâng mā káⁿ chioh chîⁿ hō͘ ē chiàu siàu-gia̍h lâi hêng ê lâng. 35 M̄-koh lín tio̍h thiàⁿ lín ê tùi-te̍k, hó khoán-thāi in. Chioh lâng mā m̄-thang siūⁿ-beh thó tńg-lâi. Án-ne lín ē tit-tio̍h chin tōa ê pò-siúⁿ, koh ē chiâⁿ-chò Chì-koân Siōng-Chú ê kiáⁿ-jî, in-ūi I tùi bōng-un pōe-gī kah chò pháiⁿ ê lâng chin chû-pi. 36 Só͘-í lín tio̍h ū liân-bín ê sim, chhin-chhiūⁿ lín ê Thiⁿ-Pē teh liân-bín lâng."

Phoe-phêng Lâng (Mt 7:1-5;10:24;15:14)
37 M̄-thang phoe-phêng lâng, chiah bē hō͘ lâng phoe-phêng. M̄-thang kā lâng phòaⁿ-chōe, chiah bē hō͘ lâng kā lín phòaⁿ-chōe. Tio̍h sià-bián lâng, chiah ē tit-tio̍h lâng ê sià-bián. 38 Tio̍h hō͘ lâng, lín chiah ē tit-tio̍h, jî-chhiáⁿ ē chin chhiong-chiok, kā lín ji̍h koh iô, hō͘ i cha̍t kah móa chhut-lâi, piàⁿ lo̍h-khì lín ê saⁿ-á-phè, in-ūi lín ēng siáⁿ-mi̍h niû-khì lâi niû hō͘ lâng, lâng mā ē chiàu án-ne niû tò-tńg khì hō͘ lín." 39 Iâ-so͘ koh ēng phì-jū kā in kóng, " Chheⁿ-mê ê lâng kám ē kā chheⁿ-mê-ê chhōa-lō͘? Kám bē nn̄g-ê lâng lóng poa̍h-lo̍h kheⁿ-kau? 40 Ha̍k-seng bē-tàng iâⁿ-kòe lāu-su, m̄-koh ha̍k-seng nā o̍h ū khí, chiū ē chhin-chhiūⁿ i ê lāu-su." 41 " Lí ná-ē kan-tāⁿ khòaⁿ-tio̍h hiaⁿ-tī ba̍k-chiu lāi ê kì-sut-hu, ia̍h bô chù-ì tio̍h lí ka-kī ba̍k-chiu lāi ê chhâ-kho͘? 42 Á-sī lí pún-sin bô khòaⁿ-kìⁿ ka-kī ba̍k-chiu lāi ê chhâ-kho͘, ná ē-tàng kā lí ê hiaⁿ-tī kóng, ' Hiaⁿ-tī chí-mōe ah, lí ba̍k-chiu lāi ê kì-sut-hu hō͘ góa kā i the̍h chhut-lâi'? Ké-hó ê lâng ah, tio̍h seng kā lí ka-kī ba̍k-chiu lāi ê chhâ-kho͘ the̍h chhut-lâi, chiah ē-tàng khòaⁿ chheng-chhó, thang kā lí hiaⁿ-tī ba̍k-chiu lāi ê kì-sut-hu the̍h chhut-lâi."

Chhiū kah Kóe-chí (Mt 7:16-20;12:33-35)
43 In-ūi hó chhiū bē kiat pháiⁿ kóe-chí, pháiⁿ chhiū mā bē kiat hó kóe-chí. 44 Khòaⁿ kóe-chí chiū ē-tàng chai hit châng chhiū ê hó-pháiⁿ. Bē-tàng tùi chhì-phè lāi bán bû-hoa-kó, mā bē-tàng tùi chhì-á-tîn bán phû-tô. 45 Hó-lâng tùi i ê sim só͘ chek-chū ê hó, lâi hoat-chhut hó; pháiⁿ-lâng tùi i só͘ chek-chū ê pháiⁿ, lâi hoat-chhut pháiⁿ, in-ūi lâng sim-lāi chhiong-móa siáⁿ-mi̍h, chhùi chiū ē kóng chhut siáⁿ-mi̍h."

Nn̄g Chióng Tē-ki (Mt 7:24~27)
46 Lín ná-ē chheng-ho͘ Góa, ' Chú ah, Chú ah,' khiok bô chiàu Góa ê kà-sī khì chò? 47 Lâi Góa chia, thiaⁿ Góa ê ōe koh chiàu Góa ê ōe khì chò ê lâng, Góa pò lín chai hit-khoán lâng chhin-chhiūⁿ siáⁿ-mi̍h. 48 I chhin-chhiūⁿ lâng teh khí chhù, ku̍t hō͘ i chhim, kā tē-ki hē tī chio̍h-pôaⁿ téng, tōa-chúi chi̍t-ē kàu, khe-lâu chhiong-tio̍h chhù, chhù mā bē iô-tāng, in-ūi chhù khí-liáu chin kian-kò͘. 49 M̄-koh thiaⁿ-liáu bô khì chò ê lâng, sī chhin-chhiūⁿ lâng khí chhù tī thô͘-téng, bô hē tē-ki, hō͘ khe-lâu chhiong-tio̍h, chiū sûi-sî tó lo̍h-khì, hit-keng chhù ē tó kah chin siong-tiōng."