《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第二章

作者 巴克禮普世版小組 2013.04.21

Iâ-so͘ ê chhut-sì (Mt 1:18-25)
1 Hit sî, Lô-má hông-tè A-kó͘-sū-tok ū pan-pò͘ chiàu-lēng, kiò choân-kok ê jîn-bîn lóng tio̍h teng-kì hō͘-kháu. 2 Chit-ê thâu chi̍t pái ê hō͘-kháu phó͘-cha, sī Ku-lí-liú chò Sū-lī-a chóng-tok ê sî si̍t-si ê. 3 Só͘-í ta̍k-lâng lóng tio̍h khì ka-kī ê kò͘-hiong teng-kì hō͘-kháu. 4 Iok-sek tùi Ka-lī-lī-séng ê Ná-sat-le̍k siâⁿ, chiūⁿ-khì Iû-thài-séng ê Pek-lī-hêng-siâⁿ, chiū-sī Tāi-pi̍t chhut-sì ê siâⁿ, in-ūi Iok-sek sio̍k Tāi-pi̍t ê ke, sī Tāi-pi̍t ê sè-hē. 5 Iok-sek beh kah i só͘ phèng-tiāⁿ ê Má-lī-a, chò-hóe teng-kì hō͘-kháu. Hit sî, Má-lī-a í-keng ū sin-īn ā. 6 In tī hia ê sî, Má-lī-a seng-sán ê kî kàu. 7 Chiū seⁿ thâu-the ê cha-po͘-kiáⁿ. I ēng pò͘ kā I pau, hō͘ I khùn tòa bé-chô-ni̍h; in-ūi kheh-koán bô só͘-chāi thang hō͘ in tòa.

Bo̍k-chiá Kah Thiⁿ-sài
8 Hit tē-hng ū kò͘-iûⁿ ê lâng tòa tī soaⁿ-ni̍h, àm-sî lûn-liû kò͘ in ê iûⁿ-kûn. 9 Ū chi̍t-ūi Chú ê thiⁿ-sài chhut-hiān tī in ê sin-piⁿ, Chú ê êng-kng sì-bīn teh kā in chiò, in tōa tio̍h-kiaⁿ. 10 Thiⁿ-sài kā in kóng, " M̄-bián kiaⁿ! góa pò lín chi̍t-ê bān-bîn lóng tōa hoaⁿ-hí ê hó siau-sit. 11 Kin-á-ji̍t tī Tāi-pi̍t ê siâⁿ, ū chi̍t-ūi Kiù-Chú ūi-tio̍h lín chhut-sì, chiū-sī Chú Ki-tok. 12 Lín ē khòaⁿ-tio̍h chi̍t-ê eⁿ-á ēng pò͘ pau, khùn tī chô-ni̍h, chit-ê chiū-sī hō͘ lín chò kì-hō." 13 Hut-jiân ū chin-chē thian-peng kah hit-ê thiⁿ-sài, chò-hóe teh o-ló Siōng-Chú, kóng, 14 " Goān êng-kng kui tī chì-koân ê Siōng-Chú, Goān I sù hô-pêng hō͘ I só͘ hoaⁿ-hí ê lâng." 15 Chiah-ê thiⁿ-sài lī-khui in beh chiūⁿ-thiⁿ ê sî, kò͘-iûⁿ ê lâng chò-hóe kóng, " Taⁿ lán lâi khì Pek-lī-hêng-siâⁿ, khòaⁿ Chú pò lán chai só͘ hoat-seng ê tāi-chì." 16 In chiū kóaⁿ-kín khì, chhōe-tio̍h Má-lī-a kah Iok-sek, koh khòaⁿ-tio̍h eⁿ-á khùn tī bé-chô-ni̍h. 17 In khòaⁿ liáu, chiū kā thiⁿ-sài tùi in só͘ kóng chit-ê eⁿ-á ê tāi-chì, pò hō͘ lâng chai. 18 Thiaⁿ-tio̍h ê lâng lóng kám-kak chin kî-koài. 19 M̄-koh Má-lī-a kā chiah-ê ōe kì tiâu-tiâu, sim-lāi siông-siông teh siūⁿ. 20 Kò͘-iûⁿ ê lâng tńg-khì, ūi-tio̍h só͘ thiaⁿ-tio̍h kah só͘ khòaⁿ-tio̍h ê tāi-chì, lóng kah thiⁿ-sài só͘ kóng ê oân-choân kāng-khoán, chiū chiong êng-kng kah o-ló kui hō͘ Siōng-Chú.

Kā Iâ-so͘ Hō-miâ
21 Kàu eⁿ-á chhut-sì āu tē-peh ji̍t, kā eⁿ-á kiâⁿ kat-lé ê ji̍t kàu, chiū kā I hō-miâ kiò-chò Iâ-so͘. Chit-ê miâ sī Má-lī-a iáu-bōe hoâi-īn ê sî, thiⁿ-sài kā I hō ê.

Phō Iâ-so͘ Khì sèng-tiān Hōng-hiàn
22 In chheng-khì ê ji̍t-kî chi̍t-ē móa, Iok-sek kah Má-lī-a chiàu Mô͘-se ê lu̍t-hoat, chiū phō eⁿ-á khì Iâ-lō͘-sat-léng, beh kā I hiàn hō͘ Chú. 23 Chiàu Chú ê lu̍t-hoat kì-chài:, " thâu-chi̍t-the ê cha-po͘-kiáⁿ, lóng tio̍h sèng-pia̍t lâi kui hō͘ Chú. 24 Chiàu Chú ê lu̍t-hoat kui-tēng, tio̍h hiàn chi̍t-tùi pan-kah, á-sī nn̄g-chiah hún-chiáu-kiáⁿ chò seng-lé.( chù: LBK 12:8; 5:11 LXX) 25 Tī Iâ-lō͘-sat-léng ū chi̍t-ê lâng, miâ-kiò Se-biān; chit-ê lâng sī gī-lâng koh kèng-khiân, put-sî to teh kî-thāi Í-sek-lia̍t ê ho̍k-heng. Sèng-Sîn mā kah i tông-chāi. 26 I bat tit-tio̍h Sèng-Sîn chí-sī, chai-iáⁿ i sí í-chêng, ē khòaⁿ-tio̍h Chú só͘ èng-ún ê Ki-tok. 27 I hō͘ Sèng-Sîn kám-tōng, ji̍p-khì sèng-tiān. Tú hit sî, Iâ-so͘ ê pē-bú phō eⁿ-á ji̍p-lâi, beh chiàu lu̍t-hoat kā Iâ-so͘ kí-hêng gî-sek. 28 Se-biān ēng siang chhiú kā eⁿ-á chiap kòe-lâi, o-ló Siōng-Chú kóng, 29 " Chú ah, taⁿ chiàu Lí ê ōe, hō͘ Lí ê lô͘-po̍k pêng-pêng an-an lī-khui sè-kan. 30 In-ūi góa í-keng chhin-ba̍k khòaⁿ-tio̍h Lí ê chín-kiù. 31 Chiū-sī lí ūi-tio̍h bān-bîn só͘ chún-pī ê. 32 Lí chò khé-sī Gōa-pang-lâng ê kng, Koh chò Lí ê chú-bîn Í-sek-lia̍t-lâng ê êng-kng." 33 Iâ-so͘ ê pē-bú thiaⁿ-tio̍h Se-biān kóng-khí koan-hē eⁿ-á ê ōe, kám-kak kî-koài koh tio̍h-kiaⁿ. 34 Se-biān kā in chiok-hok, koh tùi Iâ-so͘ ê lāu-bú Má-lī-a kóng, " Chit-ê eⁿ-á siū siat-li̍p, sī beh hō͘ Í-sek-lia̍t tiong chin-chē lâng poa̍h-tó, chin-chē lâng peh khí-lâi, mā chò siū kong-kek ê kì-hō. 35 Koh hō͘ chin-chē lâng sim-lāi ê ì-liām lō͘-chhut. Lí ka-kī ê sim mā ē hō͘ kiàm chha̍k thàng-kòe." 36 Koh ū chi̍t-ê nî-hòe chin lāu ê lú-sian-ti A-ná, sī A-siat chi-cho̍k Hoat-lōe-le̍k ê cha-bó͘-kiáⁿ. I kiat-hun liáu-āu kah tiōng-hu chò-hóe seng-oa̍h chhit-nî kú. 37 Āu-lâi i chiū chiú-kóaⁿ. Kàu taⁿ í-keng peh-cha̍p-sì hòe lóng bô lī-khui sèng-tiān, mê-ji̍t kìm-chia̍h kî-tó, ho̍k-sāi Siōng-Chú. 38 Tú hit sî, i mā kiâⁿ chìn-chêng lâi kám-siā Siōng-Chú, tùi só͘-ū kî-thāi Siōng-Chú kiù-sio̍k Iâ-lō͘-sat-léng ê lâng, kóng-khí chit-ê eⁿ-á ê tāi-chì.

Tńg-khì Ná-sat-le̍k
39 Iok-sek kah Má-lī-a, chiàu Chú ê lu̍t-hoat pān oân ta̍k-hāng tāi-chì liáu-āu, chiū tńg-khì Ka-lī-lī-séng, kàu in ê kò͘-hiong Ná-sat-le̍k. 40 Eⁿ-á chiām-chiām tōa-hàn, ji̍t-ji̍t ióng-chòng, tì-hūi chhiong-móa, Siōng-Chú ê un-tián kah I tông-chāi.

Gín-á Iâ-so͘ Tī sèng-tiān
41 Ta̍k nî Pôaⁿ-kòe-cheh ê sî, Iâ-so͘ ê pē-bú lóng ē khì Iâ-lō͘-sat-léng kòe-cheh. 42 Kàu Iâ-so͘ cha̍p-jī hòe ê sî, chiàu koàn-lē lóng khì Iâ-lō͘-sat-léng kòe-cheh. 43 Cheh-kî soah liáu-āu, in beh tńg-khì ê sî, gín-á Iâ-so͘ iáu lâu tī Iâ-lō͘-sat-léng. I ê pē-bú m̄-chai. 44 In siūⁿ-kóng Iâ-so͘ tī chò-hóe kiâⁿ ê lâng tiong-kan. In kiâⁿ chi̍t ji̍t ê lō͘-chām liáu-āu, chiah tī chhin-chiâⁿ kah se̍k-sāi-lâng ê tiong-kan chhōe Iâ-so͘. 45 In chhōe bô Iâ-so͘, chiū tò-tńg khì Iâ-lō͘-sat-léng chhōe. 46 Saⁿ ji̍t āu chiah tī sèng-tiān lāi, khòaⁿ-tio̍h Iâ-so͘ chē tī hiah-ê kàu-su tiong-kan, mā teh thiaⁿ, mā teh mn̄g. 47 Thiaⁿ-tio̍h Iâ-so͘ teh kóng-ōe ê lâng, lóng tùi I ê chhong-bêng kah ìn-tap, kám-kak kî-koài. 48 Pē-bú khòaⁿ-tio̍h I chiū tio̍h-kiaⁿ koh kî-koài; I ê lāu-bú tùi I kóng, " Kiáⁿ ah, Lí ná thang án-ne khoán-thāi goán? Lí khòaⁿ, Lí ê lāu-pē kah góa chin hoân-ló, it-ti̍t teh chhōe Lí." 49 Iâ-so͘ ìn kóng, " Lín ná-tio̍h chhōe Góa? Lín kám m̄-chai Góa eng-kai tio̍h tòa Góa ê Thiⁿ-Pē ê chhù?" 50 M̄-koh in bē liáu-kái Iâ-so͘ tùi in kóng ê ōe. 51 Iâ-so͘ chiū kah pē-bú tńg-khì kàu Ná-sat-le̍k, lâi hàu-sūn in. I ê lāu-bú kā chiah-ê ōe lóng kì tī sim-lāi. 52 Iâ-so͘ ê tì-hūi kah nî-hòe ná ke-thiⁿ, Siōng-Chú kah lâng mā ná thiàⁿ I.