《巴克禮普世版聖經（試讀本）》

 | | | 轉寄

巴克禮普世版（試讀本） 馬可福音第十四章

作者 巴克禮普世版小組 2013.03.24

Hāi-sí Iâ-so͘ ê Im-bô͘ (Mt 26:1-5;Lk 22:1-2;Ih 11:45-53)
1 Pôaⁿ-kòe-cheh, mā sī Tû-kàⁿ-cheh ê nn̄g-ji̍t chêng, chè-si-tiúⁿ kah keng-ha̍k kàu-su teh chhōe khòaⁿ, tio̍h ēng siáⁿ-mi̍h kè-bô͘ lia̍h Iâ-so͘, lâi kā I hāi-sí. 2 In kóng, " Tng cheh-kî m̄-thang, khióng-kiaⁿ jîn-bîn ē khí jiáu-loān."

Iâ-so͘ Tī Pek-tāi-nî Siū Boah-iû (Mt 26:6-13;Ih 12:1-8)
3 Iâ-so͘ tī Pek-tāi-nî, khì thái-ko pēⁿ-lâng Se-bûn ê chhù teh chē-toh chia̍h-pn̄g ê sî, ū chi̍t-ê hū-jîn-lâng tòa chi̍t-koàn ge̍k-pân ji̍p-lâi, lāi-bīn té chin sûn koh kùi ê Ná-ta̍t phang-iû. I kòng-phòa ge̍k-pân, kā phang-iû piàⁿ tī Iâ-so͘ ê thâu-khak téng. 4 Ū chi̍t-kóa lâng chin siū-khì, hō͘-siōng gī-lūn kóng, " Ná tio̍h án-ne lâi lōng-hùi phang-iû? 5 In-ūi chit koàn phang-iû ē-tàng bē saⁿ-pah gōa ê gîn-á, lâi chín-chè sàn-chhiah lâng." In chiū kā i chek-pī. 6 M̄-koh Iâ-so͘ kóng, " Chhut-chāi i khì. Lín ná-ē kā i thiau-lân? I ū ūi-tio̍h Góa chò chi̍t-hāng hó-sū. 7 In-ūi siông-siông ū sàn-chhiah lâng kah lín chò-hóe, put-koán sî lóng ē-tàng tùi in hó khoán-thāi, m̄-koh Góa bô siông-siông kah lín chò-hóe. 8 Chit-ê hū-jîn-lâng í-keng chīn-la̍t lâi chò. I seng ēng iû boah Góa ê seng-khu, lâi kā Góa chún-pī bâi-chòng. 9 Góa si̍t-chāi kā lín kóng, Hok-im bô-lūn thoân-kàu siáⁿ-mi̍h só͘-chāi, lâng lóng ē kóng-khí chit-ê hū-jîn-lâng só͘ chò ê tāi-chì, lâi kā i kì-liām."

Iû-tāi Chhut-bē Iâ-so͘ (Mt 26:14-16;Lk 22:3-6) 10 Cha̍p-jī bûn-tô͘ ê chi̍t-ê, Ka-lio̍k-lâng Iû-tāi, khì kìⁿ hiah-ê chè-si-tiúⁿ, beh kā Iâ-so͘ chhut-bē hō͘ in. 11 In thiaⁿ-tio̍h án-ne chiū chin hoaⁿ-hí, koh tap-èng beh hō͘ i chîⁿ. Iû-tāi chiū chhōe-khòaⁿ ū siáⁿ-mi̍h ki-hōe, thang kā Iâ-so͘ chhut-bē.

Chún-pī Pôaⁿ-kòe-cheh ê Boán-chhan (Mt26:17-25;Lk22:7-14,21-23;Ih13:21-30) 12 Tû-kàⁿ-cheh ê thâu chi̍t-ji̍t, chiū-sī thâi Pôaⁿ-kòe-cheh ê iûⁿ-ko ê ji̍t, bûn-tô͘ mn̄g Iâ-so͘ kóng, " Lí ài goán khì siáⁿ-mi̍h só͘-chāi chún-pī, hō͘ Lí chia̍h pôaⁿ-kòe-cheh ê boán-chhan?" 13 Iâ-so͘ chhe nn̄g-ê bûn-tô͘, kā in kóng, " Lín ji̍p-khì siâⁿ-lāi, chiū ē tú-tio̍h chi̍t-ê the̍h chúi-pân ê lâng, lín tio̍h tòe i khì. 14 Tī i só͘ ji̍p-khì ê chhù, kā hit ke ê chú-lâng kóng, " Lāu-su kóng, ' Góa beh kah bûn-tô͘ chia̍h Pôaⁿ-kòe-cheh boán-chhan ê kheh-thiaⁿ tī tó-ūi?' 15 I ē pò lín khòaⁿ lâu-téng chi̍t keng í-keng chún-pī hó-sè ê tōa thiaⁿ. Lín tòa hia chún-pī lán ê boán-chhan." 16 Hit nn̄g-ê bûn-tô͘ chiū chhut-khì lâi-kàu siâⁿ-lāi. Kó-jiân tú-tio̍h chiàu Iâ-so͘ só͘ kóng ê it-chhè. In chiū tòa hia chún-pī Pôaⁿ-kòe-cheh ê boán-chhan. 17 Kàu ji̍t àm, Iâ-so͘ chiū kah cha̍p-jī sù-tô͘ chò-hóe lâi. 18 In chē-toh teh chia̍h-pn̄g ê sî, Iâ-so͘ kóng, " Góa si̍t-chāi kā lín kóng, lín chiah-ê kah Góa chò-hóe chia̍h ê tiong-kan, ū chi̍t-ê lâng ē kā Góa chhut-bē ." 19 Tāi-ke chin iu-būn, chi̍t-ê chi̍t-ê mn̄g Iâ-so͘ kóng, " Chóng m̄ sī góa ho͘ⁿh?" 20 Iâ-so͘ kā in kóng, " Sī lín cha̍p-jī lâng tiong-kan ê chi̍t-ê. Chiū-sī the̍h piáⁿ kah Góa tâng-chê tī pôaⁿ-ni̍h teh ùn hit lâng. 21 Jîn-chú si̍t-chāi ē chiàu Sèng-keng só͘ kì-chài ê lâi siū-hāi, m̄-koh chhut-bē Jîn-chú ê lâng ū chai-hō! Hit lâng lêng-khó bô chhut-sì khah hó!"

Chú ê Boán-chhan (Mt 26:26-30;Lk 22:14-20;1Ko 11:23-25)
22 In teh chia̍h ê sî, Iâ-so͘ the̍h piáⁿ chiok-siā, chiū peh-phòa pun hō͘ bûn-tô͘, kóng, " The̍h-khì chia̍h, chit-ê sī Góa ê seng-khu." 23 Sòa lo̍h-lâi koh phâng poe chiok-siā liáu-āu, the̍h hō͘ bûn-tô͘. In lóng lim hit poe. 24 Iâ-so͘ kā in kóng, " Chit-ê sī Góa ê hoeh, chiū-sī bêng-iok ê hoeh, ūi-tio̍h chin-chē lâng lâi lâu chhut-lâi ê. 25 Góa si̍t-chāi kā lín kóng, tùi taⁿ í-āu kàu tī Siōng-Chú Kok-tō͘ lim hit-ê sin ê phû-tô-chiap í-chêng, Góa choa̍t-tùi bô koh lim chit-ê phû-tô-chiap." 26 In gîm-si liáu-āu chiū chhut-lâi, khì Kan-ná-soaⁿ.

Iâ-so͘ Ī-giân Pí-tek M̄-jīn I (Mt26:31-35;Lk22:31-34;Ih13:36-38)
27 Iâ-so͘ kā in kóng, " Lín lóng ē sit-khì sìn-sim lâi pàng-sak Góa, in-ūi Sèng-keng ū kì-chài:, ' Góa beh phah bo̍k-chiá, iûⁿ chiū sì-sòaⁿ.'( chù: SKLA 13:7) 28 M̄-koh góa koh-oa̍h liáu-āu, ē pí lín tāi-seng khì kàu Ka-lī-lī-séng." 29 Pí-tek kā Iâ-so͘ kóng, " Chèng-lâng sui-jiân ē pàng-sak Lí, m̄-koh góa bē án-ne chò." 30 Iâ-so͘ kā i kóng, " Góa si̍t-chāi kā lí kóng, kin-á-ji̍t chiū-sī tī eng-àm, ke thî nn̄g pái í-chêng, lí ē saⁿ pái m̄ jīn góa." 31 M̄-koh Pí-tek koh-khah kian-chhî kóng, " Góa nā tio̍h kah Lí chò-hóe sí, mā choa̍t-tùi bē m̄ jīn Lí." Chèng-lâng mā lóng án-ne kóng.

Tī Khek-se-má-nî-hn̂g Kî-tó (Mt 26:36-46;Lk 23:39-46)
32 Iâ-so͘ kah bûn-tô͘ chò-hóe lâi-kàu chi̍t-ê kiò Khek-se-má-nî ê só͘-chāi. Iâ-so͘ kā bûn-tô͘ kóng, " Lín chē tòa chia thèng-hāu. Góa beh khì kî-tó." 33 Iâ-so͘ chiū chhōa Pí-tek, Ngá-kok kah Iok-hān chò-hóe khì. Iâ-so͘ tio̍h-kiaⁿ koh kî-koài, kám-kak hui-siông ai-siong. 34 Kā in kóng, " Góa ê sim iu-būn kah kiông-beh sí. Lín tòa chia tio̍h kéng-séng!" 35 Iâ-so͘ koh lio̍h-á chìn-chêng phak tī thô͘-kha kî-kiû, khòaⁿ ē-tàng hō͘ I bián keng-kòe chit-ê thòng-khó͘ ê sî-kan á-bē. 36 Iâ-so͘ kî-kiû kóng, " A-pà Thiⁿ-Pē ah, Lí bān-sū lóng ē, goān Lí hō͘ chit-ê poe lī-khui Góa, m̄-koh m̄-sī chiàu Góa só͘ ì-ài, tio̍h chiàu Lí ê chí-ì lâi si̍t-hiān." 37 Jiân-āu Iâ-so͘ tńg-lâi, khòaⁿ-tio̍h in teh khùn, chiū kā Pí-tek kóng, " Se-bûn, lí teh khùn? Kám bē-tàng chhéⁿ-chhéⁿ kéng-séng chi̍t sî kú? 38 Lín tio̍h kéng-séng kî-tó, chiah bián-tit siū bê-he̍k. Sim-lêng ì-ài chò hó, m̄-koh jio̍k-thé nńg-chiáⁿ loán-jio̍k." 39 Iâ-so͘ koh-chài khì kî-tó, mā sī kāng-khoán kóng hiah-ê ōe. 40 Iâ-so͘ tńg-lâi koh khòaⁿ-tio̍h in in-ūi ba̍k-chiu chin siap iáu teh khùn. In mā m̄-chai tio̍h án-chóaⁿ ìn Iâ-so͘ khah hó. 41 Iâ-so͘ tē-saⁿ pái tńg-lâi kā in kóng, " Taⁿ lín iáu-teh khùn, iáu-teh hioh-khùn , sī-bô? Án-ne hó à, sî-kan í-keng kàu à, Jîn-chú hō͘ lâng chhut-bē kau tī chōe-jîn ê chhiú-thâu à. 42 Khí-lâi! Lán lâi-khì. Lín khòaⁿ, chhut-bē Góa ê lâng beh kàu à."

Iâ-so͘ Hông Lia̍h-khì (Mt 26:47-56;Lk 22:47-63;Ih18:3-12)
43 Iâ-so͘ iáu teh kóng ê sî, cha̍p-jī bûn-tô͘ tiong-kan ê Iû-tāi lâi kàu-ūi, mā ū kui-tīn lâng gia̍h to kah thûi-á, tòe chè-si-tiúⁿ, keng-ha̍k kàu-su kah tiúⁿ-ló chò-hóe óa-lâi. 44 Hit-ê chhut-bē Iâ-so͘ ê lâng chìn-chêng ū kah in thò àm-hō kóng, " Góa kā I chim ê hit lâng chiū-sī Iâ-so͘. Lín thang kā I lia̍h khí-lâi, sè-jī kā I ah khì." 45 Iû-tāi lâi kàu-ūi, sûi-sî kiâⁿ óa khì Iâ-so͘ hia, kiò chi̍t siaⁿ " Lāu-su", chiū ti̍t-ti̍t kā I chim. 46 In chiū hē-chhiú lia̍h Iâ-so͘. 47 Khiā tī piⁿ-á ê chi̍t-ê lâng pu̍ih to chhut-lâi, tùi tōa-chè-si ê lô͘-po̍k phut-khì, kā i chi̍t-pêng hīⁿ-á siah-tiāu. 48 Iâ-so͘ kā in kóng, " Lín gia̍h to kah thûi-á chhut-lâi lia̍h góa, chhin-chhiūⁿ beh lia̍h chha̍t-á, sī-bô? 49 Góa ta̍k-ji̍t tī sèng-tiān lāi kà-sī lâng, kah lín chò-hóe tī hia, lín bô kā Góa lia̍h, m̄-koh án-ne sī beh èng-giām Sèng-keng ê ōe." 50 Hit sî, só͘-ū ê bûn-tô͘ lóng pàng-sak Iâ-so͘, tô-cháu. 51 Ū chi̍t-ê siàu-liân-lâng thǹg-pak-theh, kan-taⁿ moa iù-tē-pò͘, tòe Iâ-so͘ kiâⁿ. In beh kā i lia̍h. 52 Hit lâng chiū kā iù-tē-pò͘ pàng teh, thǹg-pak-theh tô-cháu.

Iâ-so͘ Tī Gī-hōe Siū Sím-mn̄g (Mt 26:57-68;Lk 22:54-55,63-71;Ih 18:13-14,19-24)
53 Jiân-āu hiah-ê lâng kā Iâ-so͘ tòa kàu tōa-chè-si ê só͘-chāi. Só͘-ū ê chè-si-tiúⁿ, tiúⁿ-ló kah keng-ha̍k kàu-su lóng chū-chi̍p óa-lâi. 54 Pí-tek lī hn̄g-hn̄g tòe Iâ-so͘, lâi-kàu tōa-chè-si kong-koán ê tiâⁿ, ji̍p-khì lāi-bīn, kah hiah-ê sī-ōe-peng chē chò-hóe teh hang-hóe. 55 Chiah-ê chè-si-tiúⁿ kah choân gī-hōe it-ti̍t beh chhōe chèng-kì lâi kò Iâ-so͘, beh kā I tēng sí-chōe, m̄-koh lóng chhōe bô jīm-hô chèng-kì. 56 In-ūi ū chin-chē lâng lām-sám kí-chèng lâi bû-kò Iâ-so͘, m̄-koh in ê chèng-sû bô tùi-tâng. 57 Mā ū kúi-nā lâng khí-lâi lām-sám kiàn-chèng kóng, 58 " Goán bat thiaⁿ-tio̍h I kóng, ' Góa beh húi-hoāi chit-keng lâng ê chhiú só͘ khí ê sèng-tiān, saⁿ-ji̍t lāi beh koh khí chi̍t keng m̄-sī lâng ê chhiú só͘ khí ê sèng-tiān.'" 59 In án-ne ê chèng-sû mā bô tùi-tâng. 60 Tōa-chè-si chiū khiā khí-lâi, tī chèng-lâng ê bīn-chêng mn̄g Iâ-so͘ kóng, " Chiah-ê lâng teh kā Lí kò siáⁿ-mi̍h? Lí ná-ē lóng bô ìn?" 61 Iâ-so͘ tiām-tiām lóng bô ìn. Tōa-chè-si koh mn̄g I kóng, " Lí sī Ki-tok, sī eng-kai o-ló ê Hit-ūi ê Kiáⁿ á m̄-sī?" 62 Iâ-so͘ kóng, " Góa sī, lín ē khòaⁿ-tio̍h Jîn-chú chē tī ū koân-lêng Hit-ūi ê chiàⁿ-pêng, chē thiⁿ-téng ê hûn kàng-lîm." 63 Tōa-chè-si thiah-phòa ka-kī ê gōa-saⁿ, kóng, " Lán kám iáu su-iàu siáⁿ-mi̍h chèng-jîn? 64 Lín í-keng thiaⁿ-tio̍h I teh siat-to̍k Siōng-Chú à. Lín phah-sǹg án-chóaⁿ?" In lóng toàn-tēng I kai sí. 65 Ū chi̍t-kóa lâng kā Iâ-so͘ phùi chhùi-nōa , am I ê bīn, ēng kûn-thâu-bó kā I cheng, kā I kóng, " Lí chò sian-ti, ioh khòaⁿ siáⁿ-lâng kā Lí cheng?" Hiah-ê sī-ōe-peng ûi óa-lâi, ēng chhiú kā I siàn.

Pí-tek M̄-Jīn Chú Iâ-so͘ (Mt 26:69-75;Lk 22:56-62;Ih 18:15-18,25-27)
66 Pí-tek iáu tī ē-bīn gōa-tiâⁿ ê sî, ū tōa-chè-si chi̍t-ê lú-pī óa-lâi, 67 khòaⁿ-tio̍h Pí-tek teh hang-hóe, chiū ti̍t-ti̍t kā i siòng, kóng, " Lí mā bat kah hit-ê Ná-sat-le̍k-lâng Iâ-so͘ tàu-tīn." 68 Pí-tek m̄ sêng-jīn kóng, " Góa m̄-chai, mā bē liáu-kái lí teh kóng siáⁿ-mi̍h." Pí-tek chiū chhut-khì kàu chêng-tiâⁿ. Hit sî ke chiū thî. 69 Hit-ê lú-pī koh khòaⁿ-tio̍h i, kā piⁿ-á teh khiā ê lâng kóng, " Chit-ê lâng mā sī in hit tiong-kan ê chi̍t-ê." Pí-tek koh m̄ sêng-jīn. 70 Kòe bô jōa kú, piⁿ-á teh khiā ê koh tùi Pí-tek kóng, " Lí khak-si̍t kah in kâng tóng, in-ūi lí mā sī Ka-lī-lī-lâng." 71 Pí-tek chiū chiù-chōa kóng, " Lín só͘ kóng hit-ê lâng, góa m̄-bat." 72 Hit sî ke chiū thî tē-jī pái. Pí-tek siūⁿ-khí Iâ-so͘ kā i kóng ê ōe: "Ke thî nn̄g pái í-chêng, lí ē saⁿ pái m̄ jīn Góa." chiū tōa-siaⁿ thî-khàu.