《巴克禮普世版聖經（試讀本）》

 | | | 轉寄

巴克禮普世版（試讀本） 啟示錄第二十章

作者 巴克禮普世版小組 2017.05.22

Chi̍t-chheng-nî ê Ông-kok
1 Jiân-āu góa koh khòaⁿ-tio̍h chi̍t-ê thiⁿ-sài tùi thiⁿ-téng lo̍h-lâi, chhiú the̍h bô-té chhim-kheⁿ ê só-sî kah chi̍t-tiâu tōa-tiâu thih-liān. 2 I lia̍h hit-chiah liông, chiū-sī hit-bóe lāu-chôa, mā sī kiò-chò Mô͘-kúi á-sī Sat-tàn, ēng thih-liān kā i pa̍k chi̍t-chheng-nî kú. 3 Thiⁿ-sài kā i hiat lo̍h-khì bô-té chhim-kheⁿ koaiⁿ khí-lâi, koh ēng hong-ìn hong khí-lâi, hō͘ i bô thang koh bê-he̍k lia̍t-kok, ti̍t-kàu chi̍t-chheng-nî móa. Chit-ê kî-hān liáu-āu, i it-tēng ē chiām-sî siū tháu-pàng. 4 Góa koh khòaⁿ-tio̍h kúi-nā-ê pó-chō, chē tī hit téng-bīn ê ū tit-tio̍h sím-phòaⁿ ê koân-pèng. Góa mā ū khòaⁿ-tio̍h hiah-ê ūi Iâ-so͘ chò kiàn-chèng kah ūi-tio̍h Siōng-Chú ê tō hō͘ lâng chām-thâu ê lâng ê lêng-hûn. Chiah-ê lâng m̄-bat pài hit-chiah béng-siù kah béng-siù ê chō-siōng, thâu-hia̍h á-sī tī chhiú-ni̍h mā bô siū i khap-ìn chò kì-hō. In lóng koh-oa̍h, kah Ki-tok chò-hóe thóng-tī chi̍t chheng nî. 5 Che sī thâu-chi̍t-pái ê koh-oa̍h. Kî-tha ê sí-lâng tio̍h kàu hit-ê chi̍t-chheng-nî kî-móa chiah ē koh-oa̍h. 6 Ū hūn tī thâu-chi̍t-pái koh-oa̍h ê lâng chin ū hok-khì, in sī sèng-kiat ê lâng. Tē-jī-pái ê sí-bông bô koân kā in koán-hat, in ē chò Siōng-Chú kah Ki-tok ê chè-si, mā ē kah Ki-tok chò-hóe thóng-tī chi̍t-chheng nî.

Sat-tàn Chiàn-pāi
7 Hit-ê chi̍t-chheng nî kî-móa, Sat-tàn ē siū tháu-pàng chhut-lâi. 8 I ē chhut-khì bê-he̍k tē-chiūⁿ sì-hng ê lia̍t-kok, chiū-sī Kok kah Má-kok, kā in tiàu-chi̍p óa-lâi kau-chiàn, in ê lâng-sò͘ chē kah ná hái-soa. 9 In chiū khí-lâi tī tē-chiūⁿ móa-sì-kè khì ûi-khùn sìn-tô͘ ê iâⁿ kah Siōng-Chú só͘ thiàⁿ ê siâⁿ, m̄-koh ū hóe tùi thiⁿ kàng lo̍h-lâi kā in siau-bia̍t. 10 Hiah-ê kā in bê-he̍k ê Mô͘-kúi siū hiat lo̍h-khì hóe kah liû-hông ê ô͘, hit-chiah béng-siù kah ké-sian-ti í-keng tī hia. In ē mê-ji̍t siū khó͘-chhó͘, éng-oán bô soah.

Chòe-āu ê Sím-phòaⁿ
11 Sòa lo̍h-lâi góa koh khòaⁿ-tio̍h chi̍t-ê pe̍h-sek ê tōa pó-chō kah chē tī hit téng-bīn Hit-ūi, tē kah thiⁿ tùi I ê bīn-chêng tô-cháu, cháu kah bô khòaⁿ in ê iáⁿ-chiah. 12 Góa koh khòaⁿ-tio̍h sí-khì ê lâng, bô-lūn tōa-sè lóng khiā tī pó-chō chêng. Kì-lo̍k ê chheh lóng hian-khui, lēng-gōa chi̍t-pún oa̍h-miā chheh mā hian-khui. Sí-khì ê lâng chiàu in ê hêng-ûi, kin-kì chiah-ê chheh só͘ kì-chài ê lâi siū sím-phòaⁿ. 13 Hái chiong lāi-bīn ê sí-lâng kau chhut-lâi, sí-bông kah im-hú mā chiong lāi-bīn ê sí-lâng kau chhut-lâi. Ta̍k-lâng chiàu in ê hêng-ûi siū sím-phòaⁿ. 14 Jiân-āu sí-bông kah im-hú mā siū hiat lo̍h-khì hóe-ô͘. Chit-ê hóe-ô͘ chiū-sī tē-jī pái ê sí. 15 Miâ bô kì-chài tī oa̍h-miā chheh ê lâng mā lóng siū hiat lo̍h-khì hóe-ô͘.