《巴克禮普世版聖經（試讀本）》

 | | | 轉寄

巴克禮普世版（試讀本） 啟示錄第十八章

作者 巴克禮普世版小組 2017.05.08

Pa-pí-lûn ê Bia̍t-bông
1 Jiân-āu góa khòaⁿ-tio̍h lēng-gōa chi̍t-ê thiⁿ-sài tùi thiⁿ lo̍h-lâi. I ū tōa koân-pèng, i ê êng-kng kā choân-tē chiò-kng. 2 I tōa-siaⁿ hoah, "Tó lo̍h-khì lò͘! Tōa Pa-pí-lûn tó lo̍h-khì à! Taⁿ chit-ê siâⁿ chiâⁿ-chò kúi teh tòa ê só͘-chāi, it-chhè ù-òe siâ-sîn ê kaⁿ-lô, í-ki̍p só͘-ū bô chheng-khì koh khó-ò͘ⁿ ê chiáu-lūi ê chiáu-siū. 3 In-ūi bān-kok lóng ū lim-tio̍h chit-ê îm-hū îm-loān ê chiú lâi jiá-khí Siōng-Chú ê siū-khì, tē-chiūⁿ ê kun-ông lóng bat kah i kiâⁿ kan-îm, tē-chiūⁿ chiah-ê seng-lí-lâng lóng ū tùi i ê chhia-hoa hòng-tōng lâi hoat-châi. 4 Góa koh thiaⁿ-tio̍h lēng-gōa chi̍t-ê siaⁿ tùi thiⁿ-téng hoat-chhut, kóng, "Góa ê chú-bîn ah, tio̍h tùi îm-hū hia chhut-lâi, chiah bián bak-tio̍h i ê chōe, mā bián kah i chò-hóe siū chai-hō. 5 In-ūi i ê chōe í-keng lúi-chek tú thiⁿ, Siōng-Chú ē-kì-tit i ê siâ-ok hêng-ûi. 6 Tio̍h chiàu i khoán-thāi lán ê thāi-tō͘ lâi kā i khoán-thāi, chiàu i ê só͘-chò ê ka-pōe kā i pò-èng, ēng i tiâu-chiú ê poe, tiâu ka-pōe kiông ê chiú hō͘ i. 7 I bat án-chóaⁿ êng-kng ka-kī lâi chhia-hoa, tio̍h chiàu án-ne hō͘ i kan-khó͘ pi-ai, in-ūi i sim-lāi ka-kī kóng: Góa chò lí-ông chē tī ông-ūi, pēng m̄-sī kóaⁿ-hū, góa choa̍t-tùi bē tú-tio̍h pi-siong ê tāi-chì. 8 Só͘-í tī chi̍t-ji̍t ê tiong-kan, i ê chai-hō ē lóng kàu: ū sí-bông, pi-ai, ki-hng, i mā ē hō͘ hóe sio-bia̍t, in-ūi sím-phòaⁿ i ê Chú Siōng-Chú ū tōa khùi-la̍t. 9 Tē-chiūⁿ hiah-ê kah i kiâⁿ kan-îm koh kòe chhia-hoa seng-oa̍h ê kun-ông, khòaⁿ-tio̍h siâⁿ teh hóe-sio ê ian, ē ūi-tio̍h siâⁿ pi-siong thî-khàu. 10 In kiaⁿ khòaⁿ-tio̍h Pa-pí-lûn só͘ siū ê kan-khó͘ chiū khiā hn̄g-hn̄g kóng, "Chhám ah! chit-ê tōa-siâⁿ Pa-pí-lûn chhám ah! kian-kò͘ ê siâⁿ chhám ah! in-ūi koh chi̍t-sî-á kú lí chiū ē siū sím-phòaⁿ!" 11 Tē-chiūⁿ hiah-ê seng-lí lâng mā ūi-tio̍h i pi-siong thî-khàu, in-ūi bô-lâng koh bé in ê hòe, 12 chiū-sī kim, gîn, pó-chio̍h, chin-chu, iù-môa-pò͘, si-tiû, chí-sek kah chu-âng-sek ê ko-kùi pò͘-liāu, chiah-ê hòe; kah ta̍k-khoán ê hiuⁿ-chhâ, ta̍k-khoán chhiūⁿ-gê chè-phín, ta̍k-khoán kùi-khì ê chhâ, tâng, thih kah pe̍h-chio̍h ê khì-kū, 13 mā ū jio̍k-kùi, tāu-khò͘, phang-liāu, phang-iû, jú-hiuⁿ, chiú, iû, iù-mī, be̍h, gû, iûⁿ, bé, chhia, lô͘-po̍k, í-ki̍p sīm-chí lâng ê lêng-hûn. 14 Hiah-ê seng-lí-lâng tùi i kóng, "Lí ê sim só͘ ì-ài hiah-ê hó-mi̍h lóng bô-khì à, lí it-chhè ê êng-hôa hù-kùi lóng siau-sit khì, éng-oán bē-tàng koh khòaⁿ-tio̍h." 15 Khò chit-ê siâⁿ chò seng-lí lâng hoat-châi ê lâng, in-ūi chin kiaⁿ khòaⁿ-tio̍h chit-ê siâⁿ só͘ siū ê kan-khó͘, lóng ē khiā hn̄g-hn̄g teh pi-siong thî-khàu, 16 kóng, "Chhám à! chit-ê tōa-siâⁿ chhám à! pêng-sî chhēng iù-môa-pò͘, chí-sek kah chu-âng-sek ê saⁿ, kui-seng-khu chng kah lóng sī kim, pó-chio̍h kah chin-chu. 17 Chi̍t-sî-á kú, hiah-ê châi-hù lóng bô-khì. Só͘-ū ê chûn-tiúⁿ, lí-kheh kah chúi-siú í-ki̍p só͘-ū khò-hái seng-oa̍h ê lâng, lóng khiā hn̄g-hn̄g teh khòaⁿ, 18 khòaⁿ-tio̍h chit-ê siâⁿ hóe-sio ê ian, chiū tōa-siaⁿ hoah: "Ū tó chi̍t-ê siâⁿ chhin-chhiūⁿ chit-ê tōa-siâⁿ?" 19 In tī ka-kī ê thâu-khak-téng sám thô͘-hún, pi-siong thî-khàu tōa-siaⁿ hoah: "Chhám à! chit-ê tōa-siâⁿ chhám à! Tī hái-ni̍h kiâⁿ-chûn ê lâng lóng khò chit-ê siâⁿ lâi hoat-châi. Chit-ê siâⁿ chi̍t-sî-á kú to̍h to̍h hùi-bô-khì!" 20 Thiⁿ ah, lín chiah-ê sìn-tô͘ kah sian-ti tio̍h ūi-tio̍h chit-ê siâⁿ ê bia̍t-bông lâi hoaⁿ-hí, in-ūi Siōng-Chú í-keng thè lín sin-oan, kā chit-ê siâⁿ chhú-hoa̍t ā. 21 Jiân-āu ū chi̍t-ê tōa khùi-la̍t ê thiⁿ-sài mo͘h chi̍t-tè chhin-chhiūⁿ tōa-chio̍h-bō ê chio̍h-thâu khí-lâi, hiat lo̍h-khì hái-ni̍h, kóng, "Pa-pí-lûn tōa-siâⁿ mā ē chhin-chhiūⁿ án-ne hō͘ lâng chhut-la̍t hiat lo̍h-khì, choa̍t-tùi bē-tàng koh khòaⁿ-tio̍h. 22 Mā bē koh thiaⁿ-tio̍h tôaⁿ-khîm, chàu-ga̍k, pûn siau, pûn lat-pah ê siaⁿ; mā bē koh khòaⁿ-tio̍h ta̍k-chióng kang-gē ê sai-hū; mā bē koh thiaⁿ-tio̍h e-bō ê siaⁿ; 23 mā bē koh khòaⁿ-tio̍h teng-hóe ê kng; mā bē koh thiaⁿ-tio̍h sin-lông kah sin-niû ê siaⁿ. Lí ê seng-lí lâng pêng-sî tī tē-chiūⁿ lóng sī ū sè-le̍k ê lâng; bān-kok mā lóng hō͘ lí ê siâ-su̍t bê-he̍k khì! 24 Sian-ti, sìn-tô͘ kah tē-chiūⁿ só͘-ū siū sat-hāi ê lâng ê hoeh lóng tī chit-ê siâⁿ chhōe-tio̍h, Pa-pí-lûn chiah siū chhú-hoa̍t."