《巴克禮普世版聖經（試讀本）》

 | | | 轉寄

巴克禮普世版（試讀本） 啟示錄第十六四章

作者 巴克禮普世版小組 2017.04.24

Siōng-Chú Tōa-siū-khì ê Óaⁿ
1 Āu-lâi góa koh thiaⁿ-tio̍h ū tōa-siaⁿ tùi sèng-tiān chhut-lâi, kā chhit-ê thiⁿ-sài kóng, "Lín khì, chiong hit chhit óaⁿ Siōng-Chú ê tōa-siū-khì piàⁿ lo̍h-khì tē-chiūⁿ." 2 Thâu-chi̍t-ê thiⁿ-sài chiū khì, chiong i hit óaⁿ piàⁿ lo̍h-khì tē-chiūⁿ, hiah-ê ū béng-siù ê kì-hō kah pài i ê chō-siōng ê lâng chiū seⁿ chhàu koh to̍k ê chhng. 3 Tē-jī ê thiⁿ-sài chiong i ê óaⁿ piàⁿ lo̍h-khì hái-ni̍h, hái chiū piàn-chò chhin-chhiūⁿ sí-lâng ê hoeh, hái-tiong ê oa̍h-mi̍h lóng sí-khì. 4 Tē-saⁿ-ê thiⁿ-sài chiong i ê óaⁿ piàⁿ lo̍h-khì kang-hô kah chúi chôaⁿ, chúi chiū piàn-chò hoeh. 5 Góa thiaⁿ-tio̍h chiáng-koán chiah-ê chúi ê thiⁿ-sài kóng, "Hiān-chāi chûn-chāi, chá chûn-chāi, chì-sèng ê Siōng-Chú, Lí sī kong-gī, Lí ê sím-phòaⁿ kong-chèng. 6 In-ūi in ū lâu sìn-tô͘ kah sian-ti ê hoeh, taⁿ Lí ēng hoeh hō͘ in lim. Che sī in eng-kai siū ê pò-èng." 7 Jiân-āu góa koh thiaⁿ-tio̍h chè-tôaⁿ ū siaⁿ kóng, "Sī ah, Chú, choân-lêng ê Siōng-Chú, Lí ê sím-phòaⁿ chin-si̍t koh kong-gī." 8 Tē-sì-ê thiⁿ-sài chiong i hit-ê óaⁿ piàⁿ lo̍h-khì ji̍t-thâu, ji̍t-thâu chiū tit-tio̍h koân-pèng ēng hóe sio lâng. 9 Lâng hō͘ tōa iām-jia̍t ê hóe sio-tio̍h chiū siat-to̍k hit-ê ū koân chiáng-koán chiah-ê chai-hō ê Siōng-Chú ê miâ, iû-goân m̄-khéng hóe-kái lâi kui êng-kng hō͘ Siōng-Chú. 10 Tē-gō͘-ê thiⁿ-sài chiong i hit-ê óaⁿ piàⁿ lo̍h-khì béng-siù ê chō-ūi, béng-siù ê kok-tō͘ sûi-sî piàn o͘-àm, lâng chiū kan-khó͘ kah kā-chi̍h. 11 Koh in-ūi in ê kan-khó͘ kah chhng-to̍k, chiū siat-to̍k thiⁿ-téng ê Siōng-Chú, iû-goân bô hóe-kái lâi kái-piàn in ê kiâⁿ-ta̍h. 12 Tē-la̍k-ê thiⁿ-sài chiong i hit-ê óaⁿ piàⁿ lo̍h-khì Iù-hoat-la̍h-tí tōa-hô, hô-chúi sûi-sî ta-khì, ūi-tio̍h tùi tang-hng lâi ê lia̍t-ông chún-pī chi̍t-tiâu lō͘. 13 Góa koh khòaⁿ-tio̍h ū saⁿ-ê bô chheng-khì ê sîn-lêng, chhin-chhiūⁿ chhân-kap-á tùi liông ê chhùi, béng-siù ê chhùi kah ké-sian-ti ê chhùi chhut-lâi. 14 In chiū-sī ē kiâⁿ kî-chek ê ok-mô͘ ê siâ-sîn, chhut-khì chio-chi̍p choân sè-kài ê kun-ông, tī choân-lêng Siōng-Chú só͘ tiāⁿ-tio̍h hit-ê tōa ji̍t-chí chhut-lâi kau-chiàn. 15 " Lí tio̍h chù-ì! Góa ē chhin-chhiūⁿ chha̍t lâi. Hit-ê sûi-sî kéng-séng kā saⁿ chhēng piān-piān ê lâng si̍t-chāi ū hok-khì, in-ūi i m̄-bián hō͘ chèng-lâng khòaⁿ-tio̍h i thǹg-pak-theh ê kiàn-siàu." 16 Hiah-ê siâ-mô͘ chiū chio-chi̍p lia̍t-ông tī chi̍t-ê Hi-pek-lâi-ōe kiò-chò A-má-ge̍k-tùn ê só͘-chāi. 17 Tē-chhit-ê thiⁿ-sài chiong i hit-ê óaⁿ piàⁿ lo̍h-khì khong-tiong, chiū ū tōa-siaⁿ tùi sèng-tiān ê pó-chō chhut-lâi, kóng, "Oân-sêng à!" 18 Hit-sî ū sih-nà, ū hiáng-siaⁿ, ū lûi tân kah tōa tē-tāng, tē-chiūⁿ ū jîn-lūi í-lâi m̄-bat ū chiah-ni̍h tōa ê tē-tāng. 19 Hit-ê Pa-pí-lûn tōa-siâⁿ chiū li̍h-chò saⁿ-tè, lia̍t-kok ê siâⁿ-chhī mā lóng tó-hoāi. Siōng-Chú mā ē-kì-tit Pa-pí-lûn tōa-siâⁿ ê tāi-chì, chiū hō͘ i lim té-móa Siōng-Chú ke̍k-tōa siū-khì ê chiú. 20 Só͘-ū ê hái-tó kah soaⁿ lóng siau-sit khì. 21 Jiân-āu tùi thiⁿ-téng kàng-lo̍h tōa-lia̍p pha̍uh, ta̍k-lia̍p ê tāng-liōng lóng ū kúi-nā-cha̍p kong-kin. Lâng ūi-tio̍h pha̍uh ê chai-hō chiū siat-to̍k Siōng-Chú, in-ūi hit-ê chai-hō hui-siông giâm-tiōng.