《巴克禮普世版聖經（試讀本）》

 | | | 轉寄

巴克禮普世版（試讀本） 啟示錄第十章

作者 巴克禮普世版小組 2017.03.13

Thiⁿ-sài Kah Sè-kńg-chheh
1 Góa koh khòaⁿ-tio̍h lēng-gōa chi̍t-ê tōa khùi-la̍t ê thiⁿ-sài tùi thiⁿ kàng lo̍h-lâi, i ēng hûn chò saⁿ chhēng, thâu-khak téng ū khēng, i ê bīn chhin-chhiūⁿ ji̍t-thâu, kha chhin-chhiūⁿ hóe-thiāu. 2 I ê chhiú the̍h chi̍t-kńg í-keng hian-khui ê sè-kńg chheh, chiàⁿ-kha ta̍h tī hái-ni̍h, tò-kha ta̍h tī tē-chiūⁿ. 3 I chhin-chhiūⁿ sai teh háu tōa-siaⁿ hoah ê sî, hit chhit-ê lûi chiū chhut-siaⁿ hôe-èng. 4 Chhit-ê lûi chhut siaⁿ liáu-āu, góa tú-beh siá lo̍h-lâi ê sî, góa thiaⁿ-tio̍h tùi thiⁿ ū siaⁿ kóng, "Chhit-ê lûi só͘ kóng ê, lí tio̍h pó-siú pì-bi̍t, m̄-thang siá lo̍h-lâi." 5 Jiân-āu góa khòaⁿ-tio̍h khiā tī hái kah tē-chiūⁿ ê thiⁿ-sài gia̍h-khí i ê chiàⁿ-chhiú ǹg thiⁿ, 6 kí Hit-ūi chhòng-chō thiⁿ kah thiⁿ-téng ê mi̍h, tē kah tē-chiūⁿ ê mi̍h, hái kah hái-ni̍h ê mi̍h, éng-oán oa̍h-teh ê Siōng-Chú lâi chiù-chōa kóng, "Bē-koh iân-chhiân lò͘!" 7 M̄-koh tī tē-chhit-ê thiⁿ-sài pûn lat-pah ê ji̍t, lat-pah ê siaⁿ hiáng ê sî, Siōng-Chú chiàu thoân hō͘ I ê lô͘-po̍k, chiū-sī hiah-ê sian-ti ê ò-biāu chiū ē si̍t-hiān." 8 Í-chêng tùi thiⁿ-téng kā góa kóng-ōe hit-ê siaⁿ, taⁿ koh tùi góa kóng, "Lí khì kā kha ta̍h hái kah tē-chiūⁿ hit-ê thiⁿ-sài chhiú-tiong hit-kǹg hian-khui ê chheh the̍h lâi." 9 Góa chiū khì hit-ê thiⁿ-sài hia, chhiáⁿ i kā hit-kǹg sè-kńg chheh hō͘ góa. I kā góa kóng, "Lí the̍h-khì kā i chia̍h lo̍h-khì, lí ê pak-tó͘ ē kám-kak khó͘, m̄-koh tī chhùi-lāi ē tiⁿ kah chhin-chhiūⁿ bi̍t." 10 Góa chiū tùi thiⁿ-sài ê chhiú the̍h hit-pún sè-kńg chheh lâi chia̍h. Chhùi-lāi kó-jiân tiⁿ kah chhin-chhiūⁿ bi̍t, thun lo̍h-khì pak-tó͘ chiū piàn khó͘. 11 Thiⁿ-sài kā góa kóng, "Lí tio̍h koh soan-pò͘ koan-hē Siōng-Chú tùi kok-chióng bîn-cho̍k, kok-ka, gí-giân kah kun-ông ī-giân ê tāi-chì."