《巴克禮普世版聖經（試讀本）》

 | | | 轉寄

巴克禮普世版（試讀本） 啟示錄第八章

作者 巴克禮普世版小組 2017.02.27

Tē-chhit-ê Hong-ìn
1 Iûⁿ-ko khui tē-chhit-ê hong-ìn ê sî, thiⁿ-téng chēng-chēng iok pòaⁿ-tiám-cheng kú. 2 Jiân-āu góa khòaⁿ-tio̍h hit chhit-ê thiⁿ-sài khiā tī Siōng-Chú ê bīn-chêng, in ū niá-siū chhit-ki la-pa. 3 Lēng-gōa chi̍t-ê thiⁿ-sài phâng kim hiuⁿ-lô͘ lâi khiā tòa chè-tôaⁿ piⁿ. I ū niá-siū chin-chē hiuⁿ thang kah chèng sìn-tô͘ chò-hóe kî-tó hiàn tī pó-chō chêng ê kim chè-tôaⁿ téng. 4 Hiuⁿ-ian kah chèng sìn-tô͘ ê kî-tó tùi thiⁿ-sài ê chhiú chhèng kàu Siōng-Chú ê bīn-chêng. 5 Jiân-āu thiⁿ-sài phâng hit-ê hiuⁿ-lô͘, chiong chè-tôaⁿ-téng ê hóe té kàu móa chiah hiat lo̍h-khì tē-chiūⁿ, sûi-sî ū tân-lûi ê siaⁿ, sih-nà kah tē-tāng.

Lat-pah
6 Gia̍h chhit-ki lat-pah hit chhit-ê thiⁿ-sài chún-pī hó-sè beh pûn. 7 Thâu-chi̍t-ê thiⁿ-sài pûn, sûi-sî ū pha̍uh kah hóe chham hoeh piàⁿ-lo̍h tē-chiūⁿ. Saⁿ-hūn chi-it ê tē sio-sio-khì, saⁿ-hūn chi-it ê chhiū-ba̍k sio-sio-khì, só͘-ū ê chheⁿ-chháu mā lóng sio-sio-khì. 8 Tē-jī ê thiⁿ-sài chi̍t-ē pûn, sûi-sî ū chhin-chhiūⁿ hóe teh sio ê tōa-soaⁿ hiat-lo̍h hái. Saⁿ-hūn chi-it ê hái piàn-chò hoeh. 9 Hái-ni̍h só͘ ū ê oa̍h-mi̍h saⁿ-hūn chi-it sí-khì. Chûn-chiah mā ū saⁿ-hūn chi-it phòa-khì. 10 Tē-saⁿ ê thiⁿ-sài chi̍t-ē pûn, sûi-sî ū tōa-lia̍p chheⁿ tùi thiⁿ-téng lak lo̍h-lâi, chhin-chhiūⁿ teh-to̍h ê hóe-pé, lak tī saⁿ-hūn chi-it ê kang-hô kah chúi-goân. 11 Chit-lia̍p chheⁿ ê miâ-kiò-chò "Khó͘-hiāⁿ". Saⁿ-hūn chi-it ê chúi piàn khó͘. Chin-chē lâng ūi-tio̍h chiah-ê chúi sí-khì, in-ūi chúi piàn khó͘. 12 Tē-sì ê thiⁿ-sài chi̍t-ē pûn, ji̍t ê saⁿ-hūn chi-it, goe̍h ê saⁿ-hūn chi-it, chheⁿ ê saⁿ-hūn chi-it, lóng siū-tio̍h kong-kek, tì-sú ji̍t, goe̍h, chheⁿ ê saⁿ-hūn chi-it piàn-chò àm. Ji̍t-sî saⁿ-hūn chi-it bô kng, àm-sî mā saⁿ-hūn chi-it bô kng. 13 Jiân-āu góa koh khòaⁿ, ū thiaⁿ-tio̍h chi̍t-chiah tī khong-tiong teh poe ê eng-chiáu tōa-siaⁿ kóng, "Ū chai-hō à, ū chai-hō à, tòa tī tē-chiūⁿ ê lâng ū chai-hō à, in-ūi kî-tha saⁿ-ê thiⁿ-sài teh-beh koh pûn lat-pah!"