《巴克禮普世版聖經（試讀本）》

 | | | 轉寄

巴克禮普世版（試讀本） 約翰一書第四章

作者 巴克禮普世版小組 2016.12.05

Chin kah Ké ê Sîn-lêng
1 Chhin-ài ê hiaⁿ-tī chí-mōe, m̄-thang siong-sìn só͘-ū ê sîn-lêng, tio̍h cha-giām sī-m̄-sī tùi Siōng-Chú lâi-.ê, in-ūi ū chin-chē ké-sian-ti chhut-hiān tī chit sè-kan. 2 Lín ē-tàng ēng ē-bīn ê hong-hoat lâi hun-pia̍t sī-m̄-sī Siōng-Chú ê Sèng-Sîn: Kong-khai sêng-jīn Iâ-so͘ Ki-tok tō-chiâⁿ-jio̍k-thé lîm-kàu chit sè-kan hit-ê sîn-lêng chiū-sī tùi Siōng-Chú lâi-.ê. 3 M̄ kong-khai sêng-jīn Iâ-so͘ ê sîn-lêng m̄-sī tùi Siōng-Chú lâi. Che mā sī kah Ki-tok tùi-te̍k ê sîn-lêng. Lín ū thiaⁿ-tio̍h chit-ê sîn-lêng teh-beh lâi, kî-si̍t chit-má í-keng lâi tī sè-kan à. 4 Sè-kiáⁿ, lín sī sio̍k Siōng-Chú, koh í-keng iâⁿ-kòe hiah-ê ké-sian-ti, in-ūi tiàm-tī lín lāi-bīn ê Sèng-Sîn pí tiàm-tī sè-kan-lâng lāi-bīn ê sîn-lêng khah ū-la̍t. 5 Ké-sian-ti sī sio̍k sè-kan, kóng sè-kan-sū, só͘-í sè-kan-lâng chiah thiaⁿ in ê ōe. 6 Lán sī sio̍k Siōng-Chú, jīn-bat Siōng-Chú ê lâng thiaⁿ lán, bô sio̍k Siōng-Chú ê lâng m̄ thiaⁿ lán, án-ne lán chiū ē-tàng hun-pia̍t chin-lí ê Sèng-Sîn kah chhò-gō͘ ê sîn-lêng.

Siōng-Chú Sī Thiàⁿ
7 Chhin-ài ê hiaⁿ-tī chí-mōe, lán tio̍h sio-thiàⁿ, in-ūi thiàⁿ sī tùi Siōng-Chú lâi. Ū thiàⁿ-sim ê lâng sī Siōng-Chú ê kiáⁿ-jî, mā bat Siōng-Chú. 8 Bô thiàⁿ-sim ê lâng m̄-bat Siōng-Chú, in-ūi Siōng-Chú sī thiàⁿ. 9 Siōng-Chú chhe I to̍k-siⁿ ê Kiáⁿ lâi-kàu sè-kan, hō͘ lán tùi I lâi tit-tio̍h oa̍h-miā. Siōng-Chú án-ne tùi lán hián-bêng I ê thiàⁿ tī lán tiong-kan. 10 M̄-sī lán thiàⁿ Siōng-Chú, sī I ū thiàⁿ lán, chhe I ê Kiáⁿ chò sio̍k-chōe-chè lâi sio̍k lán ê chōe. Che chiū-sī Siōng-Chú ê thiàⁿ. 11 Chhin-ài ê hiaⁿ-tī chí-mōe, Siōng-Chú hiah-ni̍h thiàⁿ lán, lán mā tio̍h sio-thiàⁿ. 12 Bô-lâng bat khòaⁿ-tio̍h Siōng-Chú, lán nā sio-thiàⁿ, Siōng-Chú chiū tiàm tī lán lāi-bīn. I ê thiàⁿ thong-kòe lán oân-choân si̍t-hiān. 13 Siōng-Chú í-keng ū chiong Sèng-Sîn siúⁿ-sù hō͘ lán, án-ne lán ē-tàng khak-sìn lán kah Siōng-Chú kiat-liân. 14 Thiⁿ-Pē chhe I ê Kiáⁿ lâi chò sè-kan ê Kiù-Chú. Goán ū khòaⁿ-tio̍h, chit-má teh chò kiàn-chèng. 15 Sêng-jīn Iâ-so͘ sī Siōng-Chú ê Kiáⁿ ê lâng, chiū kah Siōng-Chú kiat-liân. 16 Só͘-í lán chai koh siong-sìn Siōng-Chú thiàⁿ lán. Siōng-Chú chiū-sī thiàⁿ, sèⁿ-miā-lāi ū thiàⁿ ê lâng chiū-sī oa̍h tī Siōng-Chú lāi-bīn, Siōng-Chú mā kah i kiat-liân. 17 Thiàⁿ chiū án-ne tī lán tiong-kan oân-choân si̍t-hiān chhut-lâi, hō͘ lán tī sím-phòaⁿ ê ji̍t thang hó-táⁿ bô teh kiaⁿ, in-ūi lán tī chit sè-kan ū kah Iâ-so͘ kāng-khoán ê oa̍h-miā. 18 Ū thiàⁿ chiū bô kiaⁿ-hiâⁿ, oân-choân ê thiàⁿ kā kiaⁿ-hiâⁿ kóaⁿ chhut-khì, in-ūi kiaⁿ-hiâⁿ kah hêng-hoa̍t ū koan-liân, ū kiaⁿ-hiâⁿ ê lâng iáu-bōe kā thiàⁿ oân-choân si̍t-hiān chhut-lâi. 19 Lán tio̍h sio-thiàⁿ, in-ūi Siōng-Chú tāi-seng thiàⁿ lán. 20 Nā ū-lâng kóng, "Góa thiàⁿ Siōng-Chú" m̄-koh oàn-hūn hiaⁿ-tī á-sī chí-mōe, i sī teh kóng pe̍h-chha̍t, in-ūi bô thiàⁿ khòaⁿ ē-tio̍h ê hiaⁿ-tī á-sī chí-mōe ê lâng ná ē thiàⁿ khòaⁿ bē-tio̍h ê Siōng-Chú. 21 Thiàⁿ Siōng-Chú mā tio̍h thiàⁿ hiaⁿ-tī á-sī chí-mōe. Che sī lán tùi Ki-tok niá-siū ê kài-bēng.