《巴克禮普世版聖經（試讀本）》

 | | | 轉寄

巴克禮普世版（試讀本） 約翰一書第二章

作者 巴克禮普世版小組 2016.11.21

Ki-tok Ūi Lán Piān-hō͘
1 Chhin-ài ê siàu-liân-lâng, góa siá chiah-ê hō͘ lín, sī beh hō͘ lín bô hoān-chōe. Nā ū-lâng hoān-chōe, tī Thiⁿ-Pē ê bīn-chêng lán ū gī-lâng Iâ-so͘ Ki-tok ūi lán piān-hō͘. 2 Ki-tok ūi-tio̍h lán ê chōe, mā ūi-tio̍h choân sè-kài ê chōe chò sio̍k-chōe-chè. 3 Lán nā chun-siú Siōng-Chú ê kài-bēng, chiū án-ne lán ē-tàng khak-sìn lán bat Siōng-Chú. 4 Lâng nā kóng, "Góa bat Siōng-Chú", m̄-koh bô teh chun-siú I ê bēng-lēng, chit-ê lâng sī teh kóng pe̍h-chha̍t, i ê sim-tiong bô chin-lí. 5 M̄-koh lâng nā chun-siú Siōng-Chú ê tō-lí, i tùi Siōng-Chú ê thiàⁿ chiū oân-choân si̍t-chāi, án-ne lán chiū ē-tàng khak-sìn lán ū chiàu Siōng-Chú ê chí-ì teh seng-oa̍h. 6 Lâng nā kóng ka-kī ū chun-chiàu Siōng-Chú ê chí-ì, eng-kai tio̍h chiàu Iâ-so͘ Ki-tok ê giân-hêng kú-chí lâi seng-oa̍h.

Sin ê Kài-bēng
7 Chhin-ài ê hiaⁿ-tī chí-mōe, góa bô siá sin ê bēng-lēng hō͘ lín, sī lín tùi khí-thâu to̍h ū hit-ê kū ê kài-bēng, sī lín bat thiaⁿ-kòe ê sìn-sit. 8 M̄-koh tùi lēng-gōa chi̍t-ê kak-tō͘ khòaⁿ khí-lâi, góa siá hō͘ lín ê kài-bēng sī sin ê, tùi Ki-tok kah lín lâi kóng lóng sī chin-si̍t ê, in-ūi o͘-àm teh kòe-khì, chin-kng í-keng teh chiò. 9 Lâng nā kóng ka-kī seng-oa̍h tī kng-bêng-tiong, m̄-koh iáu-teh oàn-hūn i ê hiaⁿ-tī á-sī chí-mōe, sū-si̍t-siōng i iáu-koh seng-oa̍h tī o͘-àm-tiong. 10 Thiàⁿ hiaⁿ-tī á-sī chí-mōe ê lâng sī tī kng-bêng-tiong teh seng-oa̍h, bē tì-sú hō͘ lâng poa̍h-tó hoān-chōe. 11 M̄-koh oàn-hūn hiaⁿ-tī á-sī chí-mōe ê lâng sī oa̍h tī o͘-àm-tiong. I tī o͘-àm-tiong teh seng-oa̍h m̄-chai ka-kī ê hong-hiòng, in-ūi chit-ê o͘-àm hō͘ i ê ba̍k-chiu chheⁿ-mê. 12 Sè-kiáⁿ, góa siá phoe hō͘ lín, in-ūi khò Ki-tok ê miâ lín ê chōe í-keng tit-tio̍h sià-bián. 13 Hū-ló sī-tōa, góa siá-phoe hō͘ lín, in-ūi lín jīn-bat tùi goân-khí-thâu to̍h chûn-chāi ê Hit-ūi. Siàu-liân lâng, góa siá-phoe hō͘ lín, in-ūi lín í-keng iâⁿ-kòe hit-ê siâ-ok. 14 Sè-kiáⁿ, góa siá-phoe hō͘ lín, in-ūi lín jīn-bat Thiⁿ-Pē. Hū-ló sī-tōa, góa siá-phoe hō͘ lín, in-ūi lín jīn-bat hit-ê tùi goân-khí-thâu to̍h chûn-chāi ê Hit-ūi. Chheng-liân lâng, góa siá-phoe hō͘ lín, in-ūi lín ióng-kiāⁿ, mā ū Siōng-Chú ê tō-lí tī lín sim-lāi, lín koh í-keng iâⁿ-kòe hit-ê siâ-ok. 15 M̄-thang tham-loân sè-kan á-sī sè-kan ê mi̍h. Lâng nā thiàⁿ chit sè-kan, i chiū bô thiàⁿ Thiⁿ-Pē. 16 In-ūi it-chhè sio̍k sè-kan ê, chhin-chhiūⁿ jio̍k-thé ê chêng-io̍k, ba̍k-chiu ê io̍k-bōng kah sè-sio̍k ê kiau-ngō͘, lóng m̄-sī tùi Thiⁿ-Pē lâi, sī tùi sè-kan lâi-.ê. 17 Chit sè-kan kah sè-kan ê chêng-io̍k teh kòe-khì, chóng-sī si̍t-hêng Siōng-Chú chí-ì ê lâng éng-oán chûn-chāi.

Ki-tok ê Tùi-te̍k
18 Sè-kiáⁿ, boa̍t-ji̍t teh-beh kàu à! Lín ū thiaⁿ-tio̍h Ki-tok ê tùi-te̍k teh-beh lâi, chit-má í-keng ū chin-chē Ki-tok ê tùi-te̍k chhut-hiān, chiū án-ne lán chai boa̍t-ji̍t teh-beh kàu à. 19 Chiah-ê lâng si̍t-chāi m̄-sī lán ê lâng, só͘-í tùi lán tiong-kan chhut-khì. In nā-sī sio̍k tī lán, chiū ē kè-sio̍k kah lán chò-hóe. In lī-khui lán sī beh hián-bêng in lóng m̄-sī sio̍k tī lán. 20 Lín í-keng lóng ū tùi Ki-tok niá-siū Sèng-Sîn, só͘-í lín lóng bat chin-lí. 21 Góa siá-phoe hō͘ lín, m̄-sī in-ūi lín m̄-bat chin-lí, sī in-ūi lín bat chin-lí, koh chai it-chhè ê pe̍h-chha̍t lóng m̄-sī tùi chin-lí lâi. 22 Án-ne sī sím-mi̍h-lâng teh kóng pe̍h-chha̍t? It-tēng sī kī-choa̍t Iâ-so͘ chò Ki-tok ê lâng. Kī-choa̍t Thiⁿ-Pē kah Kiáⁿ ê chiū-sī Ki-tok ê tùi-te̍k. 23 Kī-choa̍t Kiáⁿ ê lâng bô chiap-la̍p Thiⁿ-Pē. Sêng-jīn Kiáⁿ ê lâng mā ē sêng-jīn Thiⁿ-Pē. 24 Lín tio̍h kian-siú tùi khí-thâu só͘ thiaⁿ-tio̍h ê sìn-sit. Lín nā kian-siú tùi khí-thâu só͘ thiaⁿ ê sìn-sit, lín chiū ē kè-sio̍k oa̍h tī Kiáⁿ kah Thiⁿ-Pē ê lāi-bīn. 25 Che chiū-sī Ki-tok hō͘ lán ê èng-ín, sī éng-oán ê oa̍h-miā. 26 Góa siá chiah-ê tāi-chì hō͘ lín, sī teh chí hiah-ê siūⁿ-beh bê-he̍k lín ê lâng. 27 Tùi lín lâi kóng, lín tùi Ki-tok niá-siū ê Sèng-Sîn sî-khek kah lín tông-chāi, bián lâng lâi kā lín kà-sī, in-ūi chit-ê Sèng-Sîn ē kà-sī lín bān-hāng sū. I ê kà-sī sī chin-si̍t m̄-sī pe̍h-chha̍t. Lín tio̍h chun-chiàu Sèng-Sîn ê kà-sī, tio̍h kah Ki-tok kiat-liân lâi seng-oa̍h. 28 Taⁿ, sè-kiáⁿ, lín tio̍h kah Ki-tok kiat-liân lâi seng-oa̍h, án-ne tī Ki-tok chài-lîm ê sî ē-tàng hó-táⁿ, bē in-ūi I ê chài-lîm kám-kak kiàn-siàu cháu-khì bih. 29 Lín nā chai Ki-tok sī kong-gī, mā tio̍h chai si̍t-hêng kong-gī ê lâng chiah sī Siōng-Chú ê kiáⁿ-jî.