《巴克禮普世版聖經（試讀本）》

 | | | 轉寄

巴克禮普世版（試讀本） 彼得後書第三章

作者 巴克禮普世版小組 2016.11.07

Chú Chài-lîm ê Èng-ún
1 Chhin-ài ê hiaⁿ-tī chí-mōe, góa chit-má siá hō͘ lín ê sī tē-jī-tiuⁿ phoe. Chit nn̄g-tiuⁿ phoe lóng sī beh kā lín thê-chhéⁿ, kek-lē lín sûn-kiat ê sim-chì. 2 Góa ài lín ē-kì-tit sîn-sèng sian-ti ī-giân ê ōe í-ki̍p Kiù-Chú thong-kòe sù-tô͘ thoân hō͘ lín ê bēng-lēng. 3 Siōng iàu-kín lín tio̍h chai, tī boa̍t-ji̍t ū chi̍t-kóa hòng-chhiòng su-io̍k ê lâng chhut-hiān, kā lín thí-chhiò, 4 kóng, "Chú èng-ín beh chài-lîm, taⁿ tī tó-ūi? Lán ê chó͘-sian lóng sí-khì à, m̄-koh tùi chhòng-chō ú-tiū í-lâi it-chhè lóng kāng-khoán." 5 Hiah-ê lâng tiâu-kò͘-ì bē kì-tit chit-ê sū-si̍t, chiū-sī chū-chá tùi Siōng-Chú ê ōe chhòng-chō thiⁿ, tē tùi chúi mā ēng chúi lâi hêng-sêng. 6 Tong-sî ê sè-kài hō͘ tōa-chúi siau-bia̍t. 7 M̄-koh chiah-ê thiⁿ kah tē mā-sī tùi Siōng-Chú ê ōe pó-liû lo̍h-lâi, ti̍t-kàu hiah-ê bô kèng-khiân ê lâng siū sím-phòaⁿ kah hō͘ hóe sio bia̍t-bông ê ji̍t-chí. 8 Chhin-ài ê hiaⁿ-tī chí-mōe, ū chi̍t-hāng tāi-chì chhiáⁿ lín m̄-thang bē kì-tit, chiū-sī Tī Chú ê gán-tiong, chi̍t ji̍t kah-ná chi̍t-chheng nî, chi̍t-chheng nî kah-ná chi̍t ji̍t. 9 Ū-lâng siūⁿ-kóng Chú teh iân-chhiân I ê èng-ín. Kî-si̍t sī teh khoan-iông lín, I bô ài ū-lâng bia̍t-bông, sī ài ta̍k-lâng lóng hóe-kái. 10 M̄-koh Chú chài-lîm ê ji̍t ē chhin-chhiūⁿ chha̍t-á hut-jiân lîm-kàu. Hit ji̍t hiah-ê thiⁿ ē tī tōa ê hiáng-siaⁿ-tiong siau-bia̍t, hiah-ê thian-thé hō͘ hóe sio iûⁿ-khì, tē kah kî-tiong ê bān-bu̍t mā lóng húi-bia̍t khì. 11 Bān-bu̍t kì-jiân ē án-ne siau-bia̍t, lín tio̍h án-chóaⁿ chò-lâng? Lín ê seng-oa̍h tio̍h sèng-kiat koh kèng-khiân, 12 lâi thèng-hāu Siōng-Chú ê ji̍t kóaⁿ-kín kàu. Tī hit ji̍t, chiah-ê thiⁿ ē hō͘ hóe siau-bia̍t, thian-thé ē hō͘ hóe sio-iûⁿ khì. 13 M̄-koh lán teh thèng-hāu ê sī Siōng-Chú só͘ èng-ín ê sin thiⁿ kah sin tē, tī hia ū éng-oán ê kong-gī. 14 Só͘-í, chhin-ài ê hiaⁿ-tī chí-mōe, lín kì-jiân teh thèng-hāu chiah-ê tāi-chì, tio̍h tī Siōng-Chú ê bīn-chêng chīn-la̍t tui-kiû sèng-kiat, kòe bô khoat-tiám ê seng-oa̍h, thang kah I hô-hó. 15 Tio̍h chiong lán ê Chú ê khoan-iông khòaⁿ-chò chín-kiù ê ki-hōe. Lán chhin-ài ê hiaⁿ-tī Pó-lô ēng Siōng-Chú siúⁿ-sù hō͘ i ê tì-hūi siá phoe hō͘ lín mā ū án-ne kóng. 16 I só͘-ū ê phoe lóng ū thê-khí chiah-ê tāi-chì. I ê phoe ū chi̍t-kóa oh-tit liáu-kái ê só͘-chāi hō͘ hiah-ê bô ha̍k-būn kah bô tēng-sèng ê lâng khiok-kái, chhin-chhiūⁿ in khiok-kái kî-tha ê keng-bûn. Kiat-kó in ka-kī chū-thó bia̍t-bông. 17 Chhin-ài ê hiaⁿ-tī chí-mōe, án-ne lín kì-jiân tāi-seng chai chiah-ê tāi-chì, tio̍h kéng-kài chiah bián-tit hō͘ hiah-ê pháiⁿ-lâng ēng chhò-gō͘ ê giân-lūn chhōa lín kiâⁿ-ji̍p bê-lō͘, lâi sit-lo̍h lín kian-kò͘ ê sìn-gióng. 18 Tio̍h óa-khò lán ê Kiù-Chú Iâ-so͘ Ki-tok ê un-tián, lâi hō͘ lán tùi I ê jīn-bat kè-sio̍k chìn-pō͘. Goān êng-kng kui hō͘ I, tùi chit-má ti̍t-kàu éng-oán! Amen!