《巴克禮普世版聖經（試讀本）》

 | | | 轉寄

巴克禮普世版（試讀本） 彼得前書第四章

作者 巴克禮普世版小組 2016.10.08

Kái-piàn ê Sin Seng-oa̍h
1 Ki-tok kì-jiân tī jio̍k-thé siū-khó͘, lín mā tio̍h ēng chit-chióng ê sim-chì lâi chong-pī ka-kī, in-ūi jio̍k-thé siū-khó͘ chiū-sī kah chōe-ok toān-choa̍t koan-hē. 2 Án-ne lín iáu tī sè-kan ê ji̍t-chí, bô koh chiàu lâng ê chêng-io̍k, sī chiàu Siōng-Chú ê chí-ì lâi seng-oa̍h. 3 Lín í-chêng chiàu bī-sìn-chiá só͘ ài-chò ê teh lōng-hùi tī îm-loān, sek-io̍k, chiú-chùi, hòng-chhiòng, iàn-lo̍k kah hiah-ê khó-ò͘ ê ngó͘-siōng chông-pài, í-keng kàu-gia̍h à. 4 Taⁿ in khòaⁿ-tio̍h lín bô koh kah in kòe hòng-tōng bô chiat-chè ê seng-oa̍h chiū kám-kak kî-koài, soah kā lín húi-pòng. 5 In tio̍h kah teh-beh sím-phòaⁿ oa̍h-lâng í-ki̍p sí-lâng ê Siōng-Chú sǹg-siàu. 6 In-ūi hok-im mā bat thoân hō͘ sí-lâng, sī beh hō͘ in tī jio̍k-thé chiàu lâng ê khoán-sit siū sím-phòaⁿ, m̄-koh in ê lêng-hûn ē-tàng chiàu Siōng-Chú ê khoán lâi oa̍h.

Chò Siōng-Chú Un-sù ê Hó Koán-ke
7 Bān-sū ê kiat-kio̍k teh-beh kàu, só͘-í lín tio̍h kín-sīn siú-kí, kéng-séng lâi kî-tó. 8 Siōng iàu-kín tio̍h sêng-khún sio-thiàⁿ, in-ūi thiàⁿ ē-tàng siau-tû chin-chē chōe-kò. 9 Lín tio̍h hō͘-siōng hó khoán-thāi, m̄-thang bâi-oàn. 10 Ta̍k-lâng tio̍h chiàu só͘ niá-siū ê un-sù hō͘-siōng ho̍k-sāi, lâi chò Siōng-Chú kok-chióng un-sù ê hó koán-ke. 11 Kóng tō-lí ê lâng tio̍h soan-káng Siōng-Chú ê sìn-sit. Sū-hōng ê lâng tio̍h ēng Siōng-Chú só͘ siúⁿ-sù ê khùi-la̍t lâi sū-hōng, hō͘ Siōng-Chú thong-kòe Iâ-so͘ Ki-tok tī bān-sū tit-tio̍h êng-kng. Goān êng-kng kah koân-lêng lóng kui tī Siōng-Chú, tāi-tāi bô soah. Amen.

Chò Ki-tok-tô͘ Tio̍h Jím-siū Khó͘-lān
12 Chhin-ài ê hiaⁿ-tī chí-mōe, lín tú-tio̍h kah-ná hóe ê chhì-liān, m̄-thang ná-chún tú-tio̍h kî-koài ê tāi-chì. 13 Hoán-tńg tio̍h in-ūi ū hūn tī Ki-tok ê kan-khó͘ lâi hoaⁿ-hí, hō͘ lín tī I êng-kng hián-hiān ê sî mā thang hoaⁿ-hí khoài-lo̍k. 14 Lín nā ūi-tio̍h Ki-tok ê miâ hō͘ lâng bú-jio̍k, lín chin ū hok-khì, in-ūi ū Siōng-Chú ê Sèng-Sîn tiàm tī lín sin-chiūⁿ. 15 Lín tiong-kan m̄-thang ū-lâng ūi-tio̍h thâi-lâng, chò-chha̍t, chò pháiⁿ á-sī in-ūi chhap pa̍t-lâng ê tāi-chì lâi siū-khó͘. 16 Nā ūi-tio̍h chò Ki-tok-tô͘ lâi siū-khó͘, m̄-bián kám-kak kiàn-siàu, hoán-tńg tio̍h in-ūi ū chit-ê miâ kui êng-kng hō͘ Siōng-Chú. 17 Sím-phòaⁿ ê sî kàu à, Siōng-Chú ka-kī ê chú-bîn tāi-seng siū sím-phòaⁿ. Nā sī sím-phòaⁿ tùi lán khai-sí, hiah-ê m̄ sìn Siōng-Chú hok-im ê lâng kiat-kio̍k ē án-chóaⁿ? 18 Sèng-keng kì-chài kóng, "Gī-lâng bô iông-ī tit-kiù, án-ne bô kèng-khiân kah chōe-jîn ē án-chóaⁿ?" 19 Só͘-í hiah-ê chiàu Siōng-Chú ê chí-ì siū-khó͘ ê lâng, tio̍h ēng hó phín-hēng chiong in ê lêng-hûn kau-tài hō͘ sìn-si̍t ê Chō-bu̍t-Chú.