《巴克禮普世版聖經（試讀本）》

 | | | 轉寄

巴克禮普世版（試讀本） 希伯來書第三章

作者 巴克禮普世版小組 2016.05.29

Iâ-so͘ Pí Mô͘-se Khah Úi-tāi
1 Pêⁿ-pêⁿ siū Siōng-Chú soán-tiàu chiâⁿ-chò Ki-tok-tô͘ ê hiaⁿ-tī chí-mōe, tio̍h chhim-chhim su-khó Hit-ūi lán só͘ sêng-jīn chò Sù-chiá koh chò Chè-si-tiúⁿ ê Iâ-so͘. 2 Iâ-so͘ tùi kā I siat-li̍p ê Siōng-Chú chīn-tiong, tú chhin-chhiūⁿ Mô͘-se tī Siōng-Chú ê ke chīn-tiong. 3 Khí-chhù ê lâng pí i só͘ khí ê chhù khah chun-kùi, án-ne Iâ-so͘ pí Mô͘-se tio̍h siū koh-khah tōa ê êng-kng. 4 Só͘-ū ê chhù lóng sī lâng khí ê, m̄-koh Siōng-Chú chhòng-chō bān-bu̍t. 5 Mô͘-se chò lô͘-po̍k, tùi Siōng-Chú ê choân-ke chīn-tiong, ūi-tio̍h Siōng-Chú āu-lâi beh kóng ê tāi-chì chò-chèng. 6 Chóng-sī Ki-tok chò Kiáⁿ lâi tī-lí Siōng-Chú ê ke. Nā chhî-siú lán só͘ gióng-bōng ê sìn-liām kah ióng-khì, lán chiū-sī Siōng-Chú ke-lāi ê lâng. 7 Siōng-Chú Chú-bîn ê An-hioh Só͘-í, chiàu Sèng-Sîn só͘ kóng: Kin-á-ji̍t lín nā thiaⁿ-tio̍h Siōng-Chú ê siaⁿ, 8 Chiū m̄-thang ngē lín ê sim, chhin-chhiūⁿ lín ê chó͘-sian pōe-ge̍k ê sî, Tī khòng-iá teh chhì-thàm Siōng-Chú." 9 Siōng-Chú kóng, "Lín ê chó͘-sian tī khòng-iá sì-cha̍p-nî kú, sui-jiân ū khòaⁿ-tio̍h Góa ê chok-ûi, iû-goân tī hia khó-giām Góa koh chhì-thàm Góa. 10 Só͘-í góa bô hoaⁿ-hí hit tāi ê lâng, kóng, 'In ê sim siông-siông sit-bê, in m̄-bat Góa ê tō-lō͘. 11 Góa tī siū-khì tiong chiù-chōa kóng, 'In choa̍t-tùi bē-tàng tit-tio̍h Góa siúⁿ-sù ê an-hioh.( chù: SPh 95:7-11) 12 Hiaⁿ-tī chí-mōe ah, lín tio̍h kín-sīn, lín tiong-kan chiah bián ū-lâng sim-su pāi-hoāi m̄-khéng siong-sìn, soah lâi lī-khui éng-oa̍h ê Siōng-Chú. 13 Lín tio̍h pá-ak iáu ū thang kiò-chò 'kin-á-ji̍t' ê sî-ki, ji̍t-ji̍t hō͘-siōng khoàn-bián. Chiah bián-tit lín tiong-kan ū-lâng hō͘ chōe-ok bê-he̍k, soah piàn ngē-sim. 14 Lán nā chhî-siú tong-chho͘ ê sìn-sim kàu lō͘-bóe, chiū ē chiâⁿ-chò Ki-tok ê tâng-kang. 15 Sèng-keng án-ne kóng: Kin-á-ji̍t lín nā thiaⁿ-tio̍h Siōng-Chú ê siaⁿ, Chiū m̄-thang ngē lín ê sim, chhin-chhiūⁿ lín ê chó͘-sian pōe-ge̍k ê sî.( chù: SPh 95:7-8) 16 Thiaⁿ-tio̍h Siōng-Chú ê siaⁿ iáu-koh pōe-ge̍k ê sī siáⁿ-lâng? Kám m̄-sī tòe Mô͘-se chhut Ai-ki̍p hiah-ê lâng? 17 Siōng-Chú sì-cha̍p-nî kú tùi siáⁿ-lâng hoat siū-khì? Kám m̄-sī hiah-ê hoān-chōe sí tī khòng-iá ê lâng? 18 Tû-liáu hiah-ê pōe-ge̍k ê lâng í-gōa, Siōng-Chú kám bat chiù-chōa m̄-chún lâng chìn-ji̍p I só͘ siúⁿ-sù ê an-hioh? 19 Án-ne kóng khí-lâi, in bē-tàng chìn-ji̍p an-hioh, sī in-ūi in m̄-sìn.