《巴克禮普世版聖經（試讀本）》

 | | | 轉寄

巴克禮普世版（試讀本） 提多書第三章

作者 巴克禮普世版小組 2016.05.01

Ki-tok-tô͘ ê Hêng-ûi
1 Tio̍h thê-chhéⁿ tāi-ke ho̍k-chiông chip-chèng-chiá kah chèng-hú koaⁿ-oân, ài sūn-ho̍k chiah ē-tàng sûi-sî piān-piān lâi chò ta̍k-hāng hó-sū. 2 Tio̍h khǹg in m̄-thang húi-pòng, m̄-thang oan-ke, tio̍h un-hô iú-siān, ēng un-jiû lâi tùi-thāi só͘-ū ê lâng. 3 In-ūi lán ka-kī í-chêng mā sī bû-ti, pōe-ge̍k, siū bê-he̍k, chò kok-chióng su-io̍k kah hióng-lo̍k ê lô͘-lē, tī ok-to̍k kah oàn-tò͘ ê tiong-kan teh seng-oa̍h, hō͘-siōng oàn-hūn, pí-chhú thó-ià. 4 M̄-koh lán ê Kiù-Chú Siōng-Chú ê chû-pi kah jîn-ài hián-bêng chhut-lâi ê sî, 5 I chiū chín-kiù lán, m̄-sī in-ūi lán ka-kī ê hó hêng-ûi, sī in-ūi I ê liân-bín, thong-kòe têng-thâu-seⁿ ê sé-lé kah Sèng-Sîn ê keng-sin lâi chín-kiù lán. 6 Sèng-Sîn chiū-sī Siōng-Chú thong-kòe lán ê Kiù-Chú Iâ-so͘ Ki-tok hong-hong hù-hù siúⁿ-sù hō͘ lán. 7 Hō͘ lán thang thong-kòe I ê un-tián lâi kiò-chò gī-lâng, lâi sêng-siū lán só͘ ǹg-bāng ê éng-oán oa̍h-miā. 8 Chit-ê ōe si̍t-chāi kóng liáu chin tio̍h. Góa ài lí te̍k-pia̍t kiông-tiau chiah-ê tāi-chì, hō͘ sìn Siōng-Chú ê lâng choan-sim chò hó-sū. Chiah-ê tāi-chì lóng sī hó, koh tùi lâng ū lī-ek. 9 M̄-koh lí tio̍h siám-phiah gû-gōng ê cheng-lūn, cho̍k-phó͘ ê hun-cheng kah lu̍t-hoat ê cheng-chip, in-ūi chiah-ê tāi-chì lóng sī bô lī-ek koh bô kè-ta̍t. 10 Chè-chō hun-cheng ê lâng, kā i kéng-kài chi̍t-nn̄g pái liáu-āu chiū m̄-thang koh kah i óng-lâi. 11 Lí chai chit-chióng lâng í-keng pāi-hoāi, i án-ne kè-sio̍k hoān-chōe sī teh gí-tēng ka-kī ê chōe.

Chòe-āu ê Kà-sī
12 Góa chhe-phài A-thê-má á-sī Chhui-ki-kó͘ khì lí hia ê sî, lí tio̍h kóaⁿ-kín lâi Ni-ko-pho-li̍p chhōe góa, in-ūi góa í-keng koat-tēng beh khì hia kòe tang-thiⁿ. 13 Lí tio̍h chīn-liōng pang-chō͘ Hoat-lu̍t-kàu-su Se-la̍p kah A-pho-lô lí-hêng ê su-iàu, hō͘ in thang an-sim chhut-hoat. 14 Mā tio̍h hoan-hù lán ka-kī ê lâng tio̍h ha̍k-si̍p chò hó-sū lâi kiong-kip hiah-ê si̍t-chāi su-iàu ê lâng, chiah bián-tit bô kiat kóe-chí. 15 Kah góa tī chia ê lâng lóng beh kā lí chhéng-an. Chhiáⁿ thè goán kā hiah-ê tâng-sìn ê hó pêng-iú chhéng-an. 16 Goān Siōng-Chú ê un-tián kah lín tāi-ke tông-chāi!