《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第18章

作者 巴克禮普世版小組 2011.07.31

1, Hit tong-sî, bûn-tô͘ chiū-kūn Iâ-so͘ kóng, Tī Thian-kok sím-mi̍h lâng chò tōa?
2, Iâ-so͘ chiū kiò chi̍t ê sòe-hàn gín-ná, hō͘ i khiā tī in tiong-kan;
3, kóng, Góa si̍t-chāi kā lín kóng, Lín nā bô oa̍t-tńg lâi chiâⁿ-chò chhin-chhiūⁿ sòe-hàn gín-ná ê, choa̍t-tùi bē ji̍p Thian-kok.
4, Só͘-í kìⁿ-nā ka-kī khiam-pi chhin-chhiūⁿ chit-ê sòe-hàn gín-ná ê, i tī Thian-kok chiū-sī chò tōa.
5, Kìⁿ-nā tī góa ê miâ chiap-la̍p chit chióng sòe-hàn gín-ná ê chi̍t ê, chiū-sī chiap-la̍p góa.
6, Kìⁿ-nā hō͘ chiah-ê sìn góa ê bî-sòe ê chi̍t ê siū that-gāi, hit lâng lêng-khó͘ ū tōa chio̍h-bō tiàu i ê ām-kún, thiām tī chhim hái.
7, Chit sè-kan ū chai-ē ah, tùi ū that-gāi lâng ê sū; in-ūi that-gāi ê sū, bē bián-tit ū; tān-sī that-gāi ê sū tùi siáⁿ-lâng lâi, hit lâng ū chai-ē.
8, Siat-sú lí chi̍t chhiú chi̍t kha that-gāi lí, chiū tio̍h chām hiat-ka̍k; lí phòa-siùⁿ á-sī pái-kha ji̍p tī oa̍h sī hó, khah-tit nn̄g chhiú nn̄g kha hiat-lo̍h éng-oán ê hóe.
9, Siat-sú lí chi̍t ba̍k that-gāi lí, chiū tio̍h iah hiat-ka̍k; lí chi̍t ba̍k ji̍p tī oa̍h sī hó, khah-tit nn̄g ba̍k hiat-lo̍h tē-ge̍k ê hóe.
10, Lín tio̍h kín-sīn, bo̍h-tit khòaⁿ-khin chiah-ê bî-sòe tiong ê chi̍t-ê; in-ūi góa kā lín kóng, In ê thiⁿ-sài tī thiⁿ-téng, siông-siông kìⁿ góa tī thiⁿ-téng ê Pē ê bīn.
11,12, Lín phah-sǹg cháiⁿ-iūⁿ? Lâng nā ū chi̍t pah chiah iûⁿ, lâi phah-m̄-kìⁿ chi̍t chiah, kiám bô chhiáⁿ pàng-hē hit káu-cha̍p-káu chiah, khì soaⁿ-ni̍h chhōe hit chiah phah-m̄-kìⁿ ê mah?
13, Nā kó-jiân chhōe-tio̍h, góa si̍t-chāi kā lín kóng, i ūi-tio̍h hit chiah hoaⁿ-hí, iâⁿ-koe3kau2-cha̍p-káu chiah bô phah-m̄-kìⁿ ê.
14, Án-ne chiah-ê bî-sòe tiong ê chi̍t-ê tîm-lûn, iā m̄-sī lín tī thiⁿ-téng ê Pē ê chí-ì.
15, Siat-sú lí ê hiaⁿ-tī tek-chōe lí , chiū tio̍h khì, kan-ta lí kap i tī-teh ê sî, chí-bêng i ê m̄-tio̍h; i nā thiaⁿ lí, chiū tit-tio̍h lí ê hiaⁿ-tī.
16, I nā m̄ thiaⁿ, chiū tio̍h chhōa chi̍t nn̄g lâng saⁿ-kap khì, ēng nn̄g saⁿ lâng ê chhùi chò kiàn-chèng, ta̍k kù ē thang chò pîn-chún.
17, Nā m̄ khéng thiaⁿ in, chiū kā kàu-hōe kóng; nā koh m̄ khéng thiaⁿ kàu-hōe, chiū tio̍h khòaⁿ i chhin-chhiūⁿ gōa-pang lâng, kap thiu-sòe ê chi̍t iūⁿ.
18, Góa si̍t-chāi kā lín kóng, Hoān-nā lín tī tē-ni̍h pa̍k ê, tī thiⁿ-téng iā boeh pa̍k in; hoān-nā lín tī tē-ni̍h tháu ê, tī thiⁿ-téng iā boeh tháu in.
19, Góa koh kā lín kóng, siat-sú lín tiong-kan nn̄g lâng tī tē-ni̍h bô lūn kiû sím-mi̍h, nā sī tâng-sim, chiū góa tī thiⁿ-téng ê Pē boeh kā in chò chiâⁿ.
20, In-ūi put-lūn sím-mi̍h só͘-chāi ū nn̄g saⁿ lâng tī góa ê miâ chū-chi̍p, góa iā tī in tiong-kan.
21, Hit sî Pí-tek óa-lâi kā I kóng, Chú ah, góa ê hiaⁿ-tī tek-chōe góa, góa sià-bián i tio̍h kúi pái? Tio̍h chhit pái mah?
22, Iâ-so͘ kā i kóng, Góa bô kā lí kóng tio̍h kàu chhit pái, chiū-sī kàu chhit-cha̍p ê chhit pái.
23, Só͘-í Thian-kok pí-phēng jîn-kun ài boeh kap i ê lô͘-po̍k sǹg-siàu.
24, Khí-thâu sǹg ê sî, ū chhōa chi̍t-ê khiàm i chheng-bān gûn ê lâi.
25, Kì-jiân bô thang hêng, i ê chú-lâng bēng-lēng tio̍h bē i pún-sin, kap i ê bó͘-kiáⁿ, liân i it-chhè só͘ ū ê, lâi hêng.
26, Hit ê lô͘-po̍k chiū phak-teh, pài i, kóng, Chú ah, tio̍h khoan-iông góa, góa boeh lóng-chóng hêng.
27, Lô͘-po̍k ê chú-lâng chiū lîn-bín lâi pàng i, koh sià-bián i ê chè.
28, Hit ê lô͘-po̍k chhut-khì, tú-tio̍h i chi̍t-ê tâng chò lô͘-po̍k ê, khiàm i chi̍t pah ê gûn-á, chiū lia̍h i, chhe i ê ām-kún, kóng, Lí só͘ khiàm ê tio̍h hêng.
29, Tâng chò lô͘-po̍k ê phak-teh, kiû i kóng, Tio̍h khoan-iông góa, góa boeh hêng lí.
30, Tān-sī i m̄ khéng, chiū khì kā i koaiⁿ-lo̍h kaⁿ, lâi thèng-hāu i hêng só͘ khiàm ê.
31, Chiah-ê tâng chò lô͘-po̍k ê khòaⁿ-tio̍h chit-ê tāi-chì, chin iu-būn, chiong lóng-chóng ê sū tùi chú-lâng kóng bêng.
32, Tùi án-ne i ê chú-lâng tiàu i lâi, kā i kóng, Pháiⁿ ê lô͘-po̍k ah, in-ūi lí tùi góa kiû, góa chiū chiong lí só͘ khiàm ê lóng sià-bián.
33, Lí kiám m̄ tio̍h lîn-bín lí tâng chò lô͘-po̍k ê, chhin-chhiūⁿ góa lîn-bín lí?
34, I ê chú-lâng siū-khì, chiong i kau-tāi hêng-tiōng, thèng-hāu i choân-pō͘ hêng só͘ khiàm ê.
35, Án-ne lín ta̍k lâng bô ēng sim sià-bián lín ê hiaⁿ-tī, chiū góa ê Thiⁿ Pē iā boeh án-ne khoán-thāi lín.