《巴克禮普世版聖經（試讀本）》

 | | | 轉寄

巴克禮普世版（試讀本） 提摩太後書第一章

作者 巴克禮普世版小組 2016.03.20

1 Góa sī Pó-lô, hōng Siōng-Chú ê chí-ì chò Ki-tok Iâ-so͘ ê sù-tô͘, lâi thoân Siōng-Chú só͘ èng-ín thong-kòe kah Ki-tok Iâ-so͘ kiat-liân chiah ē-tàng tit-tio̍h ê oa̍h-miā. 2 Góa siá phoe kià hō͘ góa só͘ thiàⁿ ê kiáⁿ Thê-mô͘-thài. Goān lí tùi Thiⁿ-Pē Siōng-Chú kah lán ê Chú Ki-tok Iâ-so͘ tit-tio̍h un-tián, liân-bín kah pêng-an.

Kám-siā kah Kó͘-lē
3 Góa kám-siā kah goán lia̍t-chó͘ kāng-khoán ēng sûn-kiat ê liông-sim kèng-pài ê Siōng-Chú, góa mê-ji̍t tī kî-tó tiong put-sî lóng teh siàu-liām lí bô soah. 4 Góa ē-kì-tit lán lī-pia̍t ê sî lí teh lâu ba̍k-sái, góa chiū chin ài koh kah lí kìⁿ-bīn, thang hō͘ góa móa-sim hoaⁿ-hí. 5 Góa ē-kì-tit lí ū sûn-chin ê sìn-gióng, chiū-sī lí ê gōa-má Lô-í kah lí ê lāu-bú Iú-nî-ki khah-chá to̍h ū-.ê. Góa khak-sìn lí chit-má mā ū chit-chióng ê sìn-gióng. 6 In-ūi án-ne, góa kā lí thê-chhéⁿ, tio̍h chiong góa kā lí hōaⁿ-chhiú ê sî Siōng-Chú hō͘ lí ê un-sù, chhin-chhiūⁿ hō͘ hóe koh tiám to̍h khí-lâi. 7 In-ūi Siōng-Chú siúⁿ-sù lán ê Sèng-lêng, m̄-sī hō͘ lán kiaⁿ-hiâⁿ, tian-tò sī hō͘ lán ū khùi-la̍t, thiàⁿ-sim kah siú-kí ê sim-lêng. 8 Só͘-í lán ūi Chú chò kiàn-chèng m̄-thang kám-kak kiàn-siàu, mā m̄-thang in-ūi góa ūi-tio̍h Chú chiâⁿ-chò siû-hoān lâi kám-kak kiàn-siàu, tio̍h chiàu Siōng-Chú só͘ sù ê koân-lêng lâi kah góa ūi-tio̍h hok-im chò-hóe siū-khó͘. 9 Siōng-Chú chín-kiù lán, ho͘-tiàu lán chò I ê chú-bîn, m̄-sī kin-kì lán ê hêng-ûi, sī chiàu I ka-kī ê chí-ì kah un-tián. Chit-ê un-tián sī tī bān-sè í-chêng to̍h thong-kòe Ki-tok Iâ-so͘ siúⁿ-sù lán. 10 Chit-ê un-tián chit-má thong-kòe lán ê Kiù-Chú Ki-tok Iâ-so͘ ê hián-hiān lâi si̍t-hiān. Ki-tok í-keng húi-bia̍t sí-bông ê koân-sè, koh thong-kòe hok-im chiong bē pāi-hoāi ê oa̍h-miā koh-chài hián-bêng chhut-lâi. 11 Ūi-tio̍h chit-ê hok-im, Siōng-Chú kā góa siat-li̍p chò thoân-tō-chiá, chò sù-tô͘, chò kàu-su. 12 Só͘-í góa chiah teh siū-khó͘, m̄-koh góa bô kám-kak kiàn-siàu, in-ūi góa bat góa só͘ sìn ê Siōng-Chú, mā khak-sìn I ē pó-siú góa chò I kau-thok góa chò ê kang-chok, ti̍t-kàu Chú chài-lîm ê ji̍t. 13 Tio̍h ēng lí tùi góa só͘ thiaⁿ-tio̍h hiah-ê kiān-choân ê tō-lí chò bô͘-hoān, lâi chhî-siú lán thong-kòe kah Ki-tok Iâ-so͘ kiat-liân só͘ tit-tio̍h ê sìn-sim kah thiàⁿ-sim. 14 Tio̍h óa-khò Sèng-Sîn lâi kò͘-siú Siōng-Chú kau-thok lán ê hó-sū. 15 Lí chai tī A-se-a-séng ê lâng lóng pōe-ge̍k góa, pau-khoat Hui-kiat-lō͘ kah Hek-mô͘-kî-nî. 16 Goān Chú liân-bín O-nî-sek-hut chi̍t-ke ê lâng, in-ūi i siông-siông kā góa kó͘-lē, mā bô in-ūi góa kòa thih-liān kám-kak kiàn-siàu. 17 Tian-tò chi̍t-ē lâi-kàu Lô-má to̍h phah-piàⁿ chhōe góa, chhōe kàu tio̍h ûi-chí. 18 Goān Chú hō͘ i tī Chú chài-lîm hit ji̍t, tùi Chú tit-tio̍h liân-bín! Lí mā chin chheng-chhó i tī Í-hut-só͘ hiah-ni̍h gâu ho̍k-sāi góa.