《巴克禮普世版聖經（試讀本）》

 | | | 轉寄

巴克禮普世版（試讀本） 歌羅西書第一章

作者 巴克禮普世版小組 2015.11.15

1 Góa Pó-lô hōng Siōng-Chú ê chí-ì chò Ki-tok Iâ-so͘ ê sù-tô͘, kah Thê-mô͘-thài hiaⁿ-tī, 2 siá phoe hō͘ tòa tī Ko-lô-se ê sìn-tô͘, chiū-sī kah Ki-tok kiat-liân ê tiong-si̍t ê hiaⁿ-tī chí-mōe: Goān lán ê Thiⁿ-Pē Siōng-Chú siúⁿ-sù lín un-tián kah pêng-an.

Kám-un ê Kî-tó
3 Goán thè lín kî-tó ê sî, siông-siông kám-siā Siōng-Chú, chiū-sī lán ê Chú Iâ-so͘ Ki-tok ê Thiⁿ-Pē, 4 In-ūi goán ū thiaⁿ-tio̍h lín tùi Ki-tok Iâ-so͘ ū sìn-sim, koh tùi só͘-ū ê sìn-tô͘ ū thiàⁿ-sim. 5 Khí-chho͘ hok-im chin-tō thoân hō͘ lín ê sî, lín thiaⁿ chit-ê hok-im ū tòa-lâi khǹg tī thiⁿ-téng ê ǹg-bāng. 6 Chit-ê hok-im thoân kàu lín hia, lín koh chin-chiàⁿ jīn-bat Siōng-Chú chin-si̍t ê un-tián. Kah hit ji̍t khí ê chêng-hêng kāng-khoán, chit-ê hok-im chit-má mā thoân kàu choân sè-kài, tng teh kiat kóe-chí, mā ná tōa châng. 7 Lín tùi Í-pa-hut só͘ ha̍k-si̍p ê hok-im, i sī kah goán pêⁿ-pêⁿ chò lô͘-po̍k ê, mā ūi-tio̍h goán teh chò Ki-tok tiong-si̍t ê chhe-ēng, 8 i mā tùi goán kóng-khí Sèng-Sîn hō͘ lín ū thiàⁿ-sim ê tāi-chì. 9 Só͘-í, goán thiaⁿ-tio̍h lín ê siau-sit liáu-āu, chiū kè-sio̍k ūi-tio̍h lín kî-tó, put-sî khún-kiû Siōng-Chú hō͘ lín ē-tàng tùi Sèng-Sîn tit-tio̍h ta̍k-chióng ê tì-hūi kah lí-kái, chhiong-hun bêng-pe̍k I ê chí-ì. 10 Koh hō͘ lín ê kiâⁿ-ta̍h chiàu Chú só͘ ài, ta̍k-hāng tāi-chì lóng hō͘ I hoaⁿ-hí, tī ta̍k-hāng hó-sū téng-bīn kiat hó kóe-chí, koh jīn-bat Siōng-Chú ná kú ná chìn-pō͘. 11 Goān lín tùi I êng-iāu ê tāi-lêng lâi tit-tio̍h khùi-la̍t, kian-kiông khí-lâi, hō͘ lín ū nāi-sim lâi jím-siū it-chhè. 12 Koh tio̍h kám-siā Thiⁿ-Pē, in-ūi I hō͘ lán ū chu-keh thang hun-hióng I ūi sìn-tô͘ tī kng-bêng ê kok-tō͘ só͘ pó-liû ê hok-khì. 13 I kiù lán thoat-lī o͘-àm ê koân-sè, kā lán poaⁿ-sóa ji̍p-khì I só͘ thiàⁿ ê Kiáⁿ ê kok-tō͘. 14 Lán tùi I ê Kiáⁿ tit-tio̍h kiù-sio̍k, chōe tit-tio̍h sià-bián.

Ki-tok ê Kang-chok
15 Ki-tok sī khòaⁿ bē-tio̍h ê Siōng-Chú ê hêng-siōng: I sī tōa-kiáⁿ, pí it-chhè siū-chō-bu̍t khah chá chûn-chāi. 16 In-ūi Siōng-Chú thong-kòe I lâi chhòng-chō bān-bu̍t, chiū-sī tī thiⁿ-téng kah tī tē-chiūⁿ ê, khòaⁿ ē-tio̍h kah khòaⁿ bē-tio̍h-.ê, lêng-kài chē ông-ūi ê kah thóng-tī-chiá, chip-chèng-chiá kah chiáng-koân-chiá. Siōng-Chú thong-kòe I, mā sī ūi-tio̍h I chhòng-chō bān-bu̍t. 17 Iáu-bōe ū bān-bu̍t í-chêng I to̍h chûn-chāi, bān-bu̍t kah I kiat-liân kah chin hó-sè. 18 Kàu-hōe sī I ê seng-khu, I sī kàu-hōe ê thâu. I sī goân-khí-thâu, I sī tōa-kiáⁿ. Siōng-Chú hō͘ I thâu-chi̍t-ê tùi sí-lâng tiong koh-oa̍h, hō͘ I tī bān-bu̍t tiong chiâⁿ-chò tē-it. 19 In-ūi Siōng-Chú chiàu ka-kī ê chí-ì, hō͘ Kiáⁿ chhiong-móa I hong-sēng ê te̍k-chit. 20 Siōng-Chú thong-kòe I ê Kiáⁿ tī si̍p-jī-kè ê hoeh lâi chhiok-sêng hô-pêng, hō͘ bān-bu̍t kah I pún-sin koh-chài hô-hó. Bô-lūn sī tē-chiūⁿ ê á-sī tī thiⁿ-téng ê lóng kui-sio̍k I. 21 Lín ū chi̍t-sî kah Siōng-Chú keh-tn̄g koan-hē, sim-lāi kah I tùi-te̍k, chò pháiⁿ tāi-chì. 22 M̄-koh chit-má Siōng-Chú thong-kòe I ê Kiáⁿ jio̍k-thé ê sí, í-keng hō͘ lín koh-chài kah I hô-hó, chiâⁿ-chò sèng-kiat, bô khoat-tiám koh bô thang hiâm ê chè-mi̍h hiàn tī I ê bīn-chêng. 23 Lín tio̍h kian-chhî sìn-sim, kian-kò͘ khiā chāi, hō͘ lín thiaⁿ-tio̍h hok-im só͘ tit-tio̍h ê ǹg-bāng bô iô-tāng. Chit-ê hok-im í-keng thoân hō͘ thiⁿ-ē múi chi̍t-ê lâng. Góa Pó-lô mā sī ūi-tio̍h chit-ê hok-im lâi teh chò lô͘-po̍k.

Pó-lô Sū-hōng Kàu-hōe
24 Taⁿ góa ūi-tio̍h lín siū chiah-ê kan-khó͘, kám-kak chin hoaⁿ-hí. Góa jio̍k-thé siū-khó͘ sī ūi-tio̍h Ki-tok ê seng-khu, chiū-sī kàu-hōe, teh siū iáu-bōe chīn ê khó͘-lān. 25 Góa siū siat-li̍p chò kàu-hōe ê lô͘-po̍k, chiàu Siōng-Chú ūi-tio̍h lín só͘ kau-tài góa ê chit-hūn, lâi chiong Siōng-Chú ê sìn-sit thoân-khui. 26 Chit-ê sìn-sit sī bān-sè-tāi í-lâi tùi jîn-lūi ún-ba̍t ê ò-biāu, taⁿ í-keng tùi I ê sìn-tô͘ hián-bêng. 27 Siōng-Chú ài beh hō͘ in chai, ūi-tio̍h Gōa-pang-lâng chún-pī chit-ê ò-biāu ū jōa-ni̍h hong-sēng koh êng-iāu, chiū-sī Ki-tok tiàm-tī lín lāi-bīn, chò lín hióng-siū Siōng-Chú êng-iāu ê ǹg-bāng. 28 Só͘-í, goán tùi só͘-ū ê lâng soan-iông Ki-tok, ēng ta̍k-chióng ê tì-hūi lâi khó͘-khǹg ta̍k-lâng, kà-sī ta̍k-lâng, sī beh hō͘ in kah Ki-tok kiat-liân lâi chiâⁿ-chò chi̍t-ê oân-choân ê lâng, thang ín-chhōa in khì-kàu Siōng-Chú ê bīn-chêng. 29 Ūi-tio̍h chit-ê bo̍k-tek, góa khò Ki-tok tī góa lāi-bīn ūn-hêng ê tōa lêng-le̍k, chīn-la̍t teh phah-piàⁿ.