《巴克禮普世版聖經（試讀本）》

 | | | 轉寄

巴克禮普世版（試讀本） 以弗所書第四章

作者 巴克禮普世版小組 2015.09.27

Kàu-hōe ê Ha̍p-it
1 Chò chi̍t-ê ūi-tio̍h Chú chò siû-hoān ê lâng, góa khó͘-khǹg lín chò tāi-chì tio̍h hû-ha̍p Siōng-Chú ê ho͘-tiàu. 2 Hoān-sū tio̍h khiam-pi, un-jiû, jím-nāi, ēng thiàⁿ-sim hō͘-siōng khoan-iông, 3 ēng hô-pêng hō͘-siōng kiat-liân, chīn-la̍t pó-chhî Sèng-Sîn só͘ sù hō͘ lín ê ha̍p-it. 4 Sin-thé chí-ū chi̍t-ê, Sèng-Sîn chí-ū chi̍t-ê, tú chhin-chhiūⁿ Siōng-Chú ho͘-tiàu lán lâi tit-tio̍h ê ǹg-bāng mā sī chi̍t-ê. 5 Chú chí-ū chi̍t-ê, Sèng-Sîn chí-ū chi̍t-ê, sé-lé mā chí-ū chi̍t-ê. 6 Siōng-Chú chí-ū chi̍t-ê, chò jîn-lūi chèng-lâng ê Thiⁿ-Pē. I tī ú-tiū ê tiong-kan, koàn-chhoàn tī bān-bu̍t, koán-hat it-chhè. 7 M̄-koh lán ta̍k-lâng lóng chiàu Ki-tok só͘ un-sù hō͘ lán ê hūn-liōng lâi niá-siū. 8 Chiàu Sèng-keng só͘ kóng: I seng khì-kàu siōng koân thiⁿ-téng, chiū lia̍h hiah-ê siū-lia̍h ê, mā siúⁿ-sù un-tián hō͘ lâng,( chù: SPh 68:18) 9 "I seng-koân" kám m̄-sī teh kóng I bat kàng lo̍h-khì tē-hā? 10 Án-ne, "kàng-lo̍h"ê Hit-ūi chiū-sī "seng-koân" kàu thiⁿ-téng Hit-ūi, thang lâi chhiong-móa ú-tiū bān-bu̍t. 11 Siōng-Chú siúⁿ-sù hō͘ lâng ê, ū sù-tô͘, ū sian-ti, ū thoân hok-im ê, ū bo̍k-su kah kàu-su. 12 Án-ne chò sī beh chong-pī Siōng-Chú ê chú-bīn, thang lâi chò chhe-ēng ê kang, khí-chō Ki-tok ê thé. 13 Chòe-āu, lán lóng thang tùi Siōng-Chú ê Kiáⁿ ū it-tì ê sìn-gióng kah jīn-bat lâi ha̍p-it, chiâⁿ-chò chi̍t-ê oân-choân ê lâng, hō͘ Ki-tok chhiong-móa lâi tióng-tāi sêng-jîn, ta̍t-kàu Ki-tok ê oân-choân kéng-kài. 14 Án-ne, lán bô koh-chài sī gín-á, bē koh hō͘ ta̍k-chióng kà-sī ê hong iô-tāng phiau-liû, tiòng-tio̍h lâng ê khúi-kè kah môa-phiàn, tì-kàu hō͘ lâng ín-iú khì. 15 Lán tian-tò tio̍h ēng thiàⁿ-sim kóng sêng-si̍t-ōe, ta̍k hong-bīn lóng o̍h Ki-tok ê bô͘-iūⁿ lâi chiām-chiām sêng-tióng, in-ūi Ki-tok sī lán ê thâu. 16 Thong-kòe Ki-tok, kui seng-khu ê kok ki-thé kiat-ha̍p khí-lâi, hō͘-siōng chiap-èng, hoat-hui kok ki-thé ê kong-lêng, seng-khu ná tióng tōa, ēng thiàⁿ-sim lâi khí-chō ka-kī.

Ki-tok Hō͘ Lán Chiâⁿ-chò Sin Lâng
17 Só͘-í góa hōng Chú ê miâ khó͘-khǹg lín, m̄-thang koh-chài kè-sio̍k kòe Gōa-pang-lâng hit-khoán ê seng-oa̍h. In ê su-sióng hi-hàm, 18 in ê sim-su o͘-àm, keh-tn̄g Siōng-Chú siúⁿ-sù ê oa̍h-miā, in-ūi in lóng m̄-chai-iáⁿ iū-koh kò͘-chip. 19 In sòng-sit liông-sim, chiū hòng-chhiòng ka-kī ê su-io̍k, koh tham-loân ta̍k-chióng ù-òe ê hêng-ûi. 20 M̄-koh lín pēng m̄-sī án-ne teh ha̍k-si̍p Ki-tok. 21 Lín eng-kai ū thiaⁿ-kòe Ki-tok ê tāi-chì, koh-ū ha̍k-si̍p I ê kà-sī. Iâ-so͘ pún-sin chiū-sī chin-lí. 22 Án-ne, tio̍h thoat-lī í-chêng ê seng-oa̍h, lín thǹg-khì kū ê lâng, kā kū ê "góa" ōaⁿ-sin, in-ūi kū ê "góa" su-io̍k ê ín-iú teh pāi-hoāi. 23 Lín sim-su ì-liām mā tio̍h ōaⁿ sin. 24 Tio̍h chiâⁿ-chò sin ê lâng, chiū-sī chiàu Siōng-Chú ēng chin-lí só͘ sán-seng ê kong-gī kah sèng-kiat, lâi chhòng-chō ê sin-lâng. 25 Só͘-í, lín tio̍h tû-khì pe̍h-chha̍t, ta̍k-lâng kah i ê chhù-piⁿ kóng sêng-si̍t-ōe,( chù: SKL 8:16) in-ūi lán lóng sī Ki-tok ê ki-thé. 26 Lín ê siū-khì m̄-thang tì-kàu hoān-chōe,( chù: SPh 4:4) mā m̄-thang siū-khì kàu ji̍t-lo̍h iáu bē-soah. 27 Mā m̄-thang hō͘ Mô͘-kúi ū khang-phāng thang ji̍p. 28 Bat chò-chha̍t ê m̄-thang koh thau-the̍h. Tio̍h lô-khó͘ chò-kang lâi tit-tio̍h chèng-tong ê siu-ji̍p, chiah ē-tàng pang-chō͘ khiàm-khoeh ê lâng. 29 M̄-thang kóng pháiⁿ-ōe, tian-tò tio̍h kóng ē chō-chiū lâng ê hó-ōe, hō͘ thiaⁿ-tio̍h ê lâng tit-tio̍h lī-ek. 30 Mā m̄-thang hō͘ Siōng-Chú ê Sèng-Sîn iu-siong, in-ūi Sèng-Sîn sī Siōng-Chú ê ìn-kì, pó-chèng lín ê chín-kiù ê ji̍t tit-tio̍h tháu-pàng. 31 Tio̍h tû-khì lín tiong-kan só͘-ū ê khó͘-to̍k, oàn-hūn, siū-khì, pháiⁿ sèng-tē, húi-pòng kah it-chhè ê ok-to̍k. 32 Koh tio̍h ēng jîn-chû hō͘-siōng khoán-thāi, chûn liân-bín ê sim. Tāi-ke hō͘-siōng sià-bián, tú chhin-chhiūⁿ Siōng-Chú thong-kòe Ki-tok bat kā lín sià-bián kāng-khoán.