《巴克禮普世版聖經（試讀本）》

 | | | 轉寄

巴克禮普世版（試讀本） 加拉太書第二章

作者 巴克禮普世版小組 2015.08.02

Pó-lô Kah Kî-tha ê Sù-tô͘
1 Cha̍p-sì nî āu, góa kah Pa-ná-pa koh chiūⁿ Iâ-lō͘-sat-léng, mā chhōa Thê-to chò-hóe khì. 2 Góa sī tit-tio̍h Siōng-Chú ê khé-sī chiah chiūⁿ khì. góa tùi hiah-ê ū bêng-bōng ê lâng su-hā soat-bêng góa tī gōa-pang só͘ thoân ê hok-im, bián-tit góa chit-má á-sī í-chêng só͘ chò ê tāi-chì piàn-chiâⁿ bô chhái-kang. 3 Kah góa chò-hóe khì ê Thê-to, sui-jiân sī Hi-lia̍p-lâng, mā bô hō͘ lâng bián-kióng i chiap-siū kat-lé. 4 Ū chi̍t-kóa ké sìn-tô͘ thau-thau-á nǹg ji̍p-lâi lán tiong-kan, lâi thau-khòaⁿ lán tùi Ki-tok Iâ-so͘ só͘ tit-tio̍h ê chū-iû, siūⁿ beh hō͘ lán chiâⁿ-chò lô͘-lē. 5 Ūi-tio̍h beh hō͘ lín ē-tàng pó-chûn hok-im ê chin-lí, goán chi̍t-si-á to bô tùi in niū-pō͘. 6 M̄-koh hiah-ê ū bêng-bōng ê lâng, bô-lūn in ū sím-mi̍h tē-ūi, tùi góa lóng bô khah-choa̍h, in-ūi Siōng-Chú bô ēng gōa-māu lâi phòaⁿ-toàn lâng. Hiah-ê ū bêng-bōng ê lâng tùi góa pēng-bô ū sím-mi̍h chí-sī. 7 In tian-tò liáu-kái Chú ū kau-thok góa khì thoân hok-im hō͘ bô siū kat-lé ê lâng. Tú chhin-chhiūⁿ I kau-thok Pí-tek khì thoân hok-im hō͘ ū siū kat-lé ê lâng. 8 In-ūi Siōng-Chú ū siū-koân hō͘ Pí-tek chiâⁿ-chò siū kat-lé ê lâng ê sù-tô͘, mā ū siū-koân hō͘ góa chiâⁿ-chò Gōa-pang-lâng ê sù-tô͘. 9 Ngá-kok, Pí-tek kah Iok-hān chiah-ê hō͘ lâng khòaⁿ-chò kàu-hōe thiāu-chio̍h ê lâng, chai-iáⁿ Siōng-Chú ū te̍k-pia̍t ê sù-bēng kau-tài góa, chiāh kah góa hâm Pa-ná-pa ak-chhiú, piáu-sī tāi-ke lóng sī tâng-kang. In koh tông-ì hō͘ goán khì Gōa-pang-lâng tiong-kan kang-chok, in lâu tī Iû-thài-lâng tiong-kan kang-chok. 10 In kan-taⁿ ài goán siàu-liām sàn-chhiah ê Iû-thài-lâng. Che mā sī góa it-ti̍t ló͘-le̍k teh chò-.ê.

Pó-lô Tī An-thê-o Chek-pī Pí-tek
11 Pí-tek lâi-kàu An-thê-o ê sî, in-ūi i ū bêng-hián ê chhò-gō͘, góa chiah tng-bīn kā i chek-pī. 12 In-ūi ū chi̍t-kóa tùi Ngá-kok hia lâi ê lâng iáu-bōe kàu ê sî, Pí-tek ū kah Gōa-pang-lâng chò-hóe chia̍h-pn̄g. Hiah-ê lâng kàu-ūi liáu-āu, i soah siám-phiah Gōa-pang-lâng sìn-tô͘, m̄-káⁿ koh kah in chò-hóe chia̍h-pn̄g, in-ūi i kiaⁿ hiah-ê chú-tiuⁿ Gōa-pang-lâng tio̍h siū kat-lé ê lâng. 13 Kî-tha ê Iû-thài-lâng sìn-tô͘ mā kah Pí-tek kāng-khoán chò hit-khoán hi-ké ê tāi-chì, sīm-chí liân Pa-ná-pa mā siū éng-hióng khì chò hit-khoán bô goân-chek ê tāi-chì. 14 Góa chi̍t-ē khòaⁿ-tio̍h in bô chiàu hok-im ê chin-lí teh kiâⁿ, chiū tī kûn-chiòng ê bīn-chêng kā Pí-tek kóng, "Lí sī Iû-thài-lâng, chò-lâng kì-jiân chhin-chhiūⁿ Gōa-pang-lâng, bô chhin-chhiūⁿ Iû-thài-lâng, án-chóaⁿ teh bián-kióng Gōa-pang-lâng o̍h Iû-thài-lâng seng-oa̍h?

Iû-thài-lâng Kah Gōa-pang-lâng Lóng Tùi Sìn Lâi Tit-kiù
15 Lán pún-sin chhut-sì chò Iû-thài-lâng, m̄-sī lâng só͘-kóng ê "gōa-pang chōe-jîn". 16 M̄-koh lán chai lâng ē-tàng kah Siōng-Chú ū hô-hó ê koan-hē, sī thong-kòe sìn Iâ-so͘ Ki-tok, m̄-sī khò chun-siú Mô͘-se ê lu̍t-hoat. Lán ka-kī mā sìn-khò Ki-tok Iâ-so͘ lâi kah Siōng-Chú kiàn-li̍p hô-hó ê koan-hē, m̄-sī khò chun-siú lu̍t-hoat, in-ūi bô-lâng ē-tàng óa-khò chun-siú lu̍t-hoat lâi kah Siōng-Chú ū hô-hó ê koan-hē. 17 Lán nā siūⁿ-beh tùi óa-khò Ki-tok lâi kah Siōng-Chú ū hô-hó ê koan-hē, iáu-koh hō͘ lâng khòaⁿ-chò kah Gōa-pang-lâng sio-siâng sī chōe-jîn, án-ne Ki-tok sī chōe-ok ê chhe-ēng sī-bô? Choa̍t-tùi m̄-sī! 18 Góa nā koh khí-chō góa chêng só͘ thiah-húi ê, chiū chèng-bêng góa sī ûi-pōe lu̍t-hoat ê lâng. 19 In-ūi chiàu lu̍t-hoat lâi kóng, góa í-keng sí tī lu̍t-hoat ē-bīn, che sī beh hō͘ góa ǹg Siōng-Chú lâi oa̍h. Góa í-keng kah Ki-tok tâng-chê hō͘ lâng tèng si̍p-jī-kè. 20 Án-ne góa chit-má teh oa̍h ê m̄-sī goân-lâi ê góa, sī Ki-tok tiàm-tī góa lāi-bīn teh oa̍h. Góa chit-má teh oa̍h, sī khò sìn Siōng-Chú ê Kiáⁿ teh oa̍h. Ki-tok thiàⁿ góa, ūi-tio̍h góa pàng-sak sèⁿ-miā. 21 Góa bô kī-choa̍t Siōng-Chú ê un-tián, in-ūi tùi lu̍t-hoat nā ē-tàng kah Siōng-Chú ū hô-hó ê koan-hē, án-ne Ki-tok kám m̄-sī pe̍h-pe̍h thè lán sí?