《巴克禮普世版聖經（試讀本）》

 | | | 轉寄

巴克禮普世版（試讀本） 哥林多後書第十三章

作者 巴克禮普世版小組 2015.07.19

Chòe-āu ê Kéng-kò kah Chhéng-an
1 Che sī góa tē-saⁿ pái beh khì lín hia. Sèng-keng kóng, "Bô-lūn sím-mi̍h khòng-kò tio̍h ū nn̄g-ê á-sī saⁿ-ê chèng-jîn." 2 Tùi hiah-ê í-chêng hoān-chōe kah kî-tha lóng-chóng ê lâng, góa tī tē-jī pái khì lín hia ê sî ū kā lín kéng-kò. Chit-má góa bô tī lín hia, beh koh chi̍t-pái kā lín kéng-kò, āu-pái góa koh khì lín hia ê sî, to̍h bô beh kā lín khoan-iông. 3 Lín ē tit-tio̍h lín só͘ su-iàu ê chèng-kì lâi chèng-bêng Ki-tok thong-kòe góa lâi teh kóng-ōe. Ki-tok tùi-thāi lín pēng bē nńg-chiáⁿ, tian-tò tī lín tiong-kan hián-chhut tōa koân-lêng. 4 Ki-tok sui-jiân in-ūi loán-jio̍k lâi siū tèng si̍p-jī-kè, m̄-koh I óa-khò Siōng-Chú ê koân-lêng lâi teh oa̍h; chhin-chhiūⁿ án-ne goán kah I kiat-liân piàn-chò loán-jio̍k, m̄-koh ūi-tio̍h lín, goán óa-khò Siōng-Chú ê koân-lêng ē kah Ki-tok chò-hóe oa̍h. 5 Lín tio̍h séng-chhat ka-kī, khòaⁿ ū chiàu sìn-gióng teh seng-oa̍h á bô? Lín tio̍h khó-giām ka-kī. Lín it-tēng chai ū Iâ-so͘ Ki-tok tiàm-tī lín lāi-bīn. Nā bô keng-kòe khó-giām chiū bián-kóng. 6 Góa siong-sìn lín chai, goán ū thong-kòe khó-giām. 7 Goán kî-kiû Siōng-Chú hō͘ lín bē chò m̄-tio̍h. Che m̄-sī beh piáu-sī goán ū thong-kòe khó-giām, sī beh hō͘ lín ū chèng-ti̍t ê hêng-ûi. Goán sui-jiân hō͘ lâng khòaⁿ-chò bô thong-kòe khó-giām ê, án-ne mā bô iàu-kín. 8 In-ūi goán bē-tàng chò ûi-pōe chin-lí ê tāi-chì, chí-ū ióng-hō͘ chin-lí. 9 Goán loán-jio̍k, lín ióng-chòng, goán chiū hoaⁿ-hí. Goán só͘ kî-kiû ê chiū-sī hō͘ lín ē-tàng chiâⁿ-chò oân-choân. 10 In-ūi án-ne, thàn góa bô tī lín hia ê sî siá chit-tiuⁿ phoe, chiah bián góa khì kàu lín hia ê sî ēng Chú só͘ hō͘ góa ê koân-pèng lâi giâm-hat tùi-thāi lín. Chit-ê koân-pèng sī beh khí-chō, m̄-sī beh phò-hoāi. 11 Hiaⁿ-tī chí-mōe ah, taⁿ siá kàu chia ûi-chí lán tio̍h hoaⁿ-hí. Tio̍h tui-kiû oân-choân, tio̍h hō͘-siōng bián-lē, tio̍h tâng-sim, tio̍h hô-bo̍k chò-hóe. Goān siúⁿ-sù thiàⁿ-sim kah pêng-an ê Siōng-Chú kah lín tông-chāi. 12 Tio̍h ēng sîn-sèng ê sio-chim lâi hō͘-siōng chhéng-an. 13 Só͘-ū ê sìn-tô͘ lóng beh kā lín chhéng-an. 14 Goān Chú Iâ-so͘ Ki-tok ê un-tián, Siōng-Chú ê thiàⁿ-thàng, Sèng-Sîn ê siong-thong, kah lín tāi-ke tông-chāi.