《巴克禮普世版聖經（試讀本）》

 | | | 轉寄

巴克禮普世版（試讀本） 哥林多後書第十一章

作者 巴克禮普世版小組 2015.07.05

Pó-lô Kah Ké Sù-tô͘
1 Chhiáⁿ lín khoan-iông góa sió-khóa ê gû-gōng. Góa siong-sìn lín ē kā góa khoan-iông. 2 Góa thiàⁿ lín chhin-chhiūⁿ Siōng-Chú thiàⁿ lín thiàⁿ kah ē khí chi̍t-tò͘, in-ūi lín chhin-chhiūⁿ sûn-kiat ê chāi-sek-lí, góa kā lín phòe hō͘ chi̍t-ê tiōng-hu, chiū-sī Ki-tok. 3 Chhin-chhiūⁿ Hā-oa hō͘ chôa ê hoa-giân khá-gí phiàn-khì, góa khióng-kiaⁿ lín ê sim-su ē siū bê-he̍k, soah khì-sak tùi Ki-tok ê sûn-kiat kah chin-sêng. 4 Ū-lâng khì lín hia thoân kah goán só͘ thoân bô-kāng ê Iâ-so͘, lín chiap-siū kah chêng tùi goán só͘ chiap-siū bô-kāng ê Sèng-Sîn kah hok-im, lín mā lóng iông-ín. 5 Kah lín hiah-ê "te̍k-pia̍t sù-tô͘" pí khí-lâi, góa siūⁿ góa chi̍t-sut-á to bô khah su. 6 Kiám-chhái góa kóng-ōe khah ham-bān, m̄-koh tì-sek bē pí lâng khah su. Chit-tiám, goán í-keng ū ēng ta̍k-chióng hong-hoat lī-iōng ta̍k-chióng ki-hōe tùi lín piáu-bêng. 7 Góa bián-hùi tùi lín thoân Siōng-Chú ê hok-im. Ūi-tio̍h beh hō͘ lín ko-seng, góa tio̍h khut-kē ka-kī, Góa án-ne chò kám ū m̄-tio̍h? 8 Góa tī lín hia teh kang-chok ê sî, pa̍t-ê kàu-hōe teh kā góa kiong-kip it-chhè hùi-iōng. Kóng khí-lâi góa sī teh the̍h pa̍t-ê kàu-hōe ê siā-lé lâi ho̍k-sāi lín. 9 Góa tī lín hia ê sî, bô kàu ēng mā m̄-bat kiû lín pang-chō͘ lâi kā lín mâ-hoân. It-chhè ê hùi-iōng lóng sī Má-kî-tùn lâi ê hiaⁿ-tī kā góa kiong-kip. Kòe-khì sī án-ne, chiong-lâi mā sī án-ne. Góa choa̍t-tùi bē kā lín thoa-lūi. 10 Góa káⁿ chí góa só͘ sìn ê Ki-tok chin-lí chiù-chōa, tī A-kai-a-séng ê tē-khu, góa lóng ē-tàng án-ne khoa-kháu. 11 Sī án-chóaⁿ kóng lè? Kám kóng góa bô thiàⁿ lín? Góa ū thiàⁿ lín, Siōng-Chú chai! 12 Góa beh kè-sio̍k án-ne chò, thang hō͘ hiah-ê chū-chheng "sù-tô͘" ê lâng bô ki-hōe khoa-kháu in só͘ chò ê kang-chok kah goán kāng-khoán. 13 Hit-chióng lâng sī ké sù-tô͘, chò tāi-chì kan-chà, ké-chò Ki-tok ê sù-tô͘. 14 Che bô kî-koài, liân Sat-tàn mā ké-chò kng-bêng ê thiⁿ-sài. 15 Án-ne, Sat-tàn ê lô͘-po̍k ké-chò gī ê lô͘-po̍k, mā m̄-sī sím-mi̍h tōa tāi-chì. Chòe-āu in ē chiàu in ê hêng-ûi siū-tio̍h èng-tit ê pò-èng.

Pó-lô Chò Sù-tô͘ ê Lô-khó͘
16 Góa koh kóng chi̍t-pái, m̄-thang kā góa khòaⁿ-chò gōng-lâng, m̄-koh lín nā-sī án-ne siūⁿ, chiū chiap-la̍p góa tòng-chò gōng-lâng, hō͘ góa ū tām-po̍h-á thang khoa-kháu. 17 Góa chit-má teh kóng ê m̄-sī Chú ê ì-sù, sī chò chi̍t-ê gōng-lâng teh khoa-kháu. 18 Kì-jiân ū hiah-chē lâng teh tián sio̍k-sè ê tāi-chì, góa mā beh khoa-kháu chi̍t-ē. 19 Lín kì-jiân hiah-ni̍h khiáu, eng-kai ē hoaⁿ-hí khoan-iông góa chit-ê gōng-lâng chiah tio̍h. 20 Nā ū-lâng kā lín tòng-chò lô͘-po̍k, kā lín phiⁿ, kā lín hām-hāi, tùi lín kiau-ngō͘, siàn lín ê chhùi-phóe, lín lóng ē khoan-iông jím-siū. 21 Kóng khí-lâi chin kiàn-siàu, góa kòe-khì m̄-káⁿ chò chit-khoán tāi-chì, m̄-koh nā ū-lâng káⁿ khoa-kháu sím-mi̍h, chún-chò chi̍t-ê gōng-lâng lâi kóng-ōe, góa mā káⁿ. 22 In kám sī Hi-pek-lâi lâng? Góa mā sī. In kám sī Í-sek-lia̍t-lâng? Góa mā sī. In kám sī A-pek-la̍h-hán ê kiáⁿ-sun? Góa mā sī. 23 In kám sī Ki-tok ê lô͘-po̍k? Chún-chò sī siáu-lâng lâi kóng-ōe, góa koh-khah sī. Góa siū koh-khah-chē ê lô-khó͘, hông koaiⁿ lo̍h-kaⁿ pí in khah-chē pái, siū sǹg-bē-liáu ê piⁿ-phah, chin-chē-pái hiám-hiám-á sí-khì. 24 Góa hō͘ Iû-thài-lâng lia̍h khì ēng piⁿ phah gō͘-pái, ta̍k-pái sì-cha̍p-ē kiám chi̍t-ē, lóng phah-kah hiám-hiám-á sí-khì! 25 Saⁿ pái hō͘ Lô-má-lâng ēng koái-á phah, chi̍t pái hō͘ lâng ēng chio̍h-thâu tìm, saⁿ pái tú-tio̍h chûn-phòa, chi̍t pái tī hái-ni̍h phiau-liû chi̍t-ji̍t chi̍t-mê. 26 Siông-siông tī lí-hêng tiong tú-tio̍h tōa-chúi ê gûi-hiám, chhiúⁿ-kiap ê gûi-hiám, Iû-thài tông-pau kah Gōa-pang-lâng ê gûi-hiám, siâⁿ-lāi ê hām-hāi, khòng-iá ê gûi-hiám, hái-siōng ê gûi-hiám, ké sìn-tô͘ chō-sêng ê gûi-hiám. 27 Góa lô-khó͘ thoa-bôa, siông-siông bô khùn, iau-gō chhùi-ta, bô thang chia̍h, bô thang tòa, bô thang chhēng. 28 Kî-tha ê tāi-chì bián kóng, kan-taⁿ ta̍k-ji̍t thè só͘-ū kàu-hōe teh chhau-hoân to̍h kàu-gia̍h. 29 Nā ū-lâng loán-jio̍k, góa kám bē kám-kak loán-jio̍k? Nā ū-lâng hoān-chōe, góa ê sim-hóe kám bē to̍h khí-lâi? 30 Góa nā tio̍h khoa-kháu, chiū beh khoa-kháu hiah-ê koan-hē góa loán-jio̍k ê tāi-chì. 31 Chú Iâ-so͘ ê Thiⁿ-Pē Siōng-Chú, sī Hit-ūi éng-oán thang o-ló-.ê. I chai góa bô kóng pe̍h-chha̍t. 32 Góa tī Tāi-má-sek ê sî, A-lí-ta̍t-ông chhiú-hā ê chóng-tok pò͘-tì ōe-peng kò͘-siú siâⁿ-mn̂g beh kā góa lia̍h. 33 M̄-koh ū-lâng ēng bí-lô-á tùi siâⁿ-chhiûⁿ ê thang-á kā góa lūi lo̍h-lâi, hō͘ góa thoat-lī i ê chhiú.