《巴克禮普世版聖經（試讀本）》

 | | | 轉寄

巴克禮普世版（試讀本） 哥林多後書第九章

作者 巴克禮普世版小組 2015.06.21

Pang-chō͘ Tâng Sìn ê Hiaⁿ-tī
1 Koan-hē chín-chè Iû-thài sìn-tô͘ ê tāi-chì, góa m̄-bián koh siá phoe hō͘ lín. 2 Góa chai lín jia̍t-sim pang-chō͘ lâng, góa bat chiong chit-hāng tāi-chì tùi Má-kî-tùn-lâng khoa-kháu, kóng, "A-kai-a ê sìn-tô͘ tī kū-nî to̍h chún-pī piān." Lín ê jia̍t-sim ū kám-kek chin-chē lâng. 3 Góa chhe-phài chiah-ê hiaⁿ-tī khì lín hia, ǹg-bāng lín chiàu góa kóng ê seng chún-pī piān, chiah bián góa tī chit-hāng tāi-chì só͘ khoa-kháu ê piàn-chiâⁿ khang-chhùi teh pō͘-chi̍h. 4 Nā bô, bān-it ū Má-kî-tùn-lâng kah góa chò-hóe khì, khòaⁿ-tio̍h lín bô chún-pī piān, goán ē in-ūi siuⁿ-kòe siong-sìn lín soah chin làu-khùi. Lín kám bē kám-kak koh-khah làu-khùi? 5 Só͘-í góa siūⁿ tio̍h khǹg hiah-ê hiaⁿ-tī liōng-chá khì lín hia, kiò lín chêng só͘ tap-èng ê hōng-hiàn seng chún-pī piān, án-ne góa kàu-ūi ê sî lín lóng chún-pī piān, thang piáu-sī lín ê hōng-hiàn m̄-sī bián-kióng, sī kam-sim lo̍k-ì. 6 Lín tio̍h ē-kì-tit, chéng-chí iā chió ê lâng, siu-sêng to̍h chió; chéng-chí iā chē ê lâng, siu-sêng to̍h chē 7 Só͘-í ta̍k-lâng tio̍h chiàu ka-kī só͘ koat-tēng ê lâi hōng-hiàn, m̄-thang m̄-kam, m̄-thang bián-kióng, in-ūi Siōng-Chú thiàⁿ hoaⁿ-hí hōng-hiàn ê lâng. 8 Siōng-Chú ē chiong ta̍k-hāng un-tián chhiong-móa tī lín tiong-kan, m̄-nā hō͘ lín sî-siông chhiong-chiok, koh ē-tàng chò ta̍k-hāng hó-sū. 9 Tú chiàu Sèng-keng só͘ kì-chài: I khóng-khài chín-chè sàn-chhiah-lâng, I ê jîn-chû éng-oán chûn-chāi.( chù: SPh 112:9) 10 Hit-ūi siúⁿ-sù chéng-chí hō͘ iā-chéng ê, mā siúⁿ-sù bí-niû hō͘ lâng chia̍h ê Siōng-Chú, I ē siúⁿ-sù lín su-iàu ê chéng-chí, mā ē ke-thiⁿ lín jîn-chû só͘ kiat ê kóe-chí. 11 Siōng-Chú ē sî-siông hō͘ lín hù-chiok, thang sûi-sî chín-chè su-iàu ê lâng, hō͘ chin-chē lâng thong-kòe goán chiap-tio̍h lín ê hōng-hiàn lâi kám-siā Siōng-Chú. 12 In-ūi lín chit-ê ho̍k-sāi ê kang-chok m̄-nā kái-koat sìn-tô͘ ê su-iàu, mā hō͘ chin-chē lâng ke-thiⁿ in tùi Siōng-Chú ê kám-siā. 13 Thong-kòe lín só͘ chò chit-hāng chû-siān ê kang-chok, chèng-si̍t lín ū sūn-ho̍k lín só͘ sêng-jīn Ki-tok ê hok-im, iū-koh khóng-khài chín-chè sàn-chhiah-lâng,thang kui êng-kng hō͘ Siōng-Chú. 14 Siōng-Chú siúⁿ-sù lín te̍k-pia̍t ê un-tián, hō͘ hiah-ê lâng koh-khah kèng-ài lín, koh ūi lín kî-tó. 15 Tio̍h kám-siā Siōng-Chú, I siúⁿ-sù lán bē-tàng kó͘-kè ê un-tián.