《巴克禮普世版聖經（試讀本）》

 | | | 轉寄

巴克禮普世版（試讀本） 哥林多後書第五章

作者 巴克禮普世版小組 2015.05.24

5 Goán chai, lán tī tē-chiūⁿ teh tòa pò͘-pêⁿ ê chhù nā húi-hoāi, Siōng-Chú chiū ē hō͘ lán thiⁿ-téng ê chhù. He m̄-sī lâng ê chhiú khí-chō ê chhù, sī Siōng-Chú khí-chō éng-oán tī thiⁿ-téng ê chhù. 2 Lán chit-má tòa tī chit-ê pò͘-pêⁿ teh thó͘-khùi, khat-bō͘ thang khì tòa thiⁿ-téng ê chhù, chhin-chhiūⁿ saⁿ chhēng lo̍h-khì. 3 Nā kā saⁿ chhēng lo̍h-khì, chiū bē thǹg-pak-theh. 4 Lán iáu tòa tī chit-ê pò͘-pêⁿ teh thoa-bôa thó͘-khùi, m̄-sī ài kā tē-chiūⁿ ê thé thǹg khí-lâi, sī ài tha̍h sio̍k-thiⁿ ê thé, thang hō͘ oa̍h-miā lâi khek-ho̍k hit-ê ē-sí ê thé. 5 Siōng-Chú hō͘ lán ū chit-ê kái-piàn, I mā sù Sèng-Sîn lâi chò lán ê pó-chèng. 6 Só͘-í goán put-sî chhiong-móa ióng-khì, goán chai, lán iáu sī jio̍k-thé teh oa̍h ê sî, chiū-sī kah Chú ūi lán chún-pī ê chhù lī-khui hn̄g-hn̄g. 7 In-ūi lán teh oa̍h sī khò sìn-sim, m̄-sī khò ba̍k-chiu só͘ khòaⁿ-.ê. 8 Goán chhiong-móa ióng-khì, khah ài lī-khui tē-chiūⁿ ê seng-khu, khì kah Chú chò-hóe tòa. 9 Só͘-í, bô-lūn tiàm-tī tē-chiūⁿ ê seng-khu, á-sī lī-khui seng-khu, goán só͘ tì-ì ê sī hō͘ Chú hoaⁿ-hí. 10 In-ūi lán tāi-ke lóng tio̍h khiā tī Ki-tok ê bīn-chêng siū sím-phòaⁿ, ta̍k-lâng lóng tio̍h chiàu ka-kī tī tē-chiūⁿ seng-khu só͘ chò ê tāi-chì, bô-lūn sī hó á-sī pháiⁿ, chiap-siū pò-èng.

Thong-kòe Ki-tok Lâi Kah Siōng-Chú Hô-hó
11 In-ūi goán chai tio̍h kèng-ùi Siōng-Chú, goán chiū án-ne lâi khó͘-khǹg lâng, m̄-koh Siōng-Chú jīn-bat lán kah hui-siông chheng-chhó, góa mā ǹg-bāng lín ē tùi lín ê liông-sim lâi jīn-bat goán. 12 Goán m̄-sī koh beh chhui-chiàn ka-kī, sī beh hō͘ lín ūi-tio̍h goán ū thang khoa-kháu ê só͘-chāi, thang ìn-tap hiah-ê chù-tiōng gōa-māu bô chù-tiōng lāi-sim lâi khoa-kháu ê lâng. 13 Goán nā chin-chiàⁿ khí-kông, sī ūi-tio̍h Siōng-Chú ê iân-kò͘. Goán cheng-sîn nā chèng-siông, sī ūi-tio̍h lín ê iân-kò͘. 14 In-ūi Ki-tok ê thiàⁿ chhui-pek goán, hō͘ goán bêng-pe̍k: chi̍t-ê lâng thè chèng-lâng sí, chèng-lâng chiū lóng sí. 15 Ki-tok ūi-tio̍h chèng-lâng sí, sī beh hō͘ hiah-ê oa̍h-teh ê lâng, bô koh ūi-tio̍h ka-kī lâi oa̍h, sī ūi-tio̍h thè in sí koh-oa̍h ê Ki-tok lâi oa̍h. 16 Só͘-í tùi taⁿ í-āu, goán bô koh chiàu lâng ê phiau-chún lâi bat lâng; goán sui-jiân bat chiàu lâng ê phiau-chún lâi bat Ki-tok, m̄-koh chit-má goán bô koh án-ne chò. 17 Bô-lūn sím-mi̍h lâng, nā kah Ki-tok kiat-liân, chiū-sī sin chhòng-chō ê lâng; kū ê tāi-chì í-keng kòe-khì, taⁿ lóng piàn-chò sin-.ê. 18 Chiah-ê it-chhè lóng sī Siōng-Chú ê chok-ûi, I thong-kòe Ki-tok hō͘ lán kah I koh-chài hô-hó, mā chiong chit-ê khǹg lâng kah Siōng-Chú koh-chài hô-hó ê chit-hūn kau hō͘ goán. 19 Goán só͘ thoân ê hok-im chiū-sī: Siōng-Chú thong-kòe Ki-tok hō͘ sè-kan-lâng kah I koh-chài hô-hó, bô koh tui-kiù in ê chōe-kòa, mā chiong I kah lâng koh hô ê sìn-sit kau-thok goán. 20 Án-ne goán chò Ki-tok ê sù-chiá, Siōng-Chú thong-kòe goán khǹg lín; goán thè Ki-tok kā lín khún-kiû, tio̍h kah Siōng-Chú koh-chài hô-hó. 21 Siōng-Chú hō͘ hit-ê bô chōe ê Ki-tok lâi taⁿ lán ê chōe, sī beh hō͘ lán kah I kiat-liân, lâi kah Siōng-Chú kiàn-li̍p ha̍p-gî ê koan-hē.