《巴克禮普世版聖經（試讀本）》

 | | | 轉寄

巴克禮普世版（試讀本） 哥林多後書第七章

作者 巴克禮普世版小組 2015.06.07

1 Chhin-ài ê hiaⁿ-tī chí-mōe ah, lán kì-jiân tit-tio̍h chiah-ê èng-ín, tio̍h chheng-khì ka-kī, tû-khì it-chhè jio̍k-thé kah sim-lêng ê lah-sap, kèng-ùi Siōng-Chú lâi hō͘ seng-oa̍h oân-choân sèng-hòa.

Pó-lô ê Hoaⁿ-hí
2 Tio̍h khui-khoah lín ê sim-heng lâi chiap-la̍p goán. Goán m̄-bat khek-khui lâng, m̄-bat hāi lâng tūi-lo̍h, m̄-bat phiⁿ lâng. 3 Góa kóng án-ne m̄-sī beh kā lín chek-pī, in-ūi góa bat kóng goán chin thiàⁿ lín, goān-ì kah lín tâng-sí tâng-oa̍h. 4 Góa chin sìn-jīm lín, put-sî ēng lín chò khoa-kháu. Tī goán it-chhè ê hoān-lān tiong, góa móa-sim hoaⁿ-hí koh chhiong-móa an-ùi. 5 Goán lâi-kàu Má-kî-tùn í-āu, seng-khu m̄-nā lóng bô thang hioh-khùn, hoán-tńg ta̍k-hāng tāi-chì tú-tio̍h khùn-lân, gōa-bīn ū hun-cheng, lāi-bīn ū kiaⁿ-hiâⁿ. 6 M̄-koh Hit-ūi an-ùi sit-chì ê lâng ê Siōng-Chú chhe Thê-to lâi kā goán an-ùi. 7 M̄-nā i ū lâi, mā ū kóng-khí lín án-chóaⁿ kā i kó͘-lē ê tāi-chì, í-ki̍p lín án-chóaⁿ khat-bō͘ kìⁿ góa, lín án-chóaⁿ ai-siong, lín án-chóaⁿ jia̍t-sim ūi góa piān-hō͘, hō͘ góa koh-khah hoaⁿ-hí. 8 Góa chêng hit-tiuⁿ phoe sui-jiân ū hō͘ lín kan-khó͘-sim, góa pēng-bô hiō-hóe. Taⁿ góa ū sió-khóa hiō-hóe, in-ūi góa chai-iáⁿ hit-tiuⁿ phoe ū hō͘ lín chi̍t-sî ê kan-khó͘-sim. 9 Taⁿ góa chin hoaⁿ-hí, m̄-sī in-ūi lín kan-khó͘-sim, sī in-ūi lín ê kan-khó͘-sim ū hō͘ lín hóe-kái. Siōng-Chú ū siān-iōng lín ê kan-khó͘-sim, só͘-í goán bô hō͘ lín siū-tio̍h siong-hāi. 10 In-ūi Siōng-Chú siān-iōng lín ê kan-khó͘-sim lâi hō͘ lín hóe-kái thang tit-kiù, góa bô sím-mi̍h thang hiō-hóe, m̄-koh sio̍k sè-kan ê kan-khó͘-sim ē hō͘ lâng tì-kàu sí-bông. 11 Lín khòaⁿ, Siōng-Chú hiah-ni̍h gâu siān-iōng lín ê kan-khó͘-sim, chiah hō͘ lín hiah-ni̍h jia̍t-sim lâi piān-kái lín ka-kī ê chheng-pe̍k, hiah-ni̍h hùn-khài, hiah-ni̍h kéng-séng, hiah-ni̍h khat-bō͘, hiah-ni̍h jia̍t-chêng, hiah-ni̍h ke̍k-lia̍t khián-chek put-hoa̍t. Lín tī chiah-ê tāi-chì téng-bīn í-keng chèng-bêng lín ka-kī sī chheng-khì. 12 Só͘-í góa sui-jiân ū siá hit-tiuⁿ phoe hō͘ lín, m̄-koh m̄-sī ūi-tio̍h kā lâng khek-khui á-sī hō͘ lâng khek-khui ê lâng siá ê, sī beh hō͘ lín tī Siōng-Chú ê bīn-chêng bêng-pe̍k goán tùi lín ê jia̍t-sêng ū jōa chhim. 13 Goán ū in-ūi án-ne tit-tio̍h an-ùi. Goán m̄-nā tit-tio̍h an-ùi, mā in-ūi khòaⁿ-tio̍h Thê-to ê hoaⁿ-hí hō͘ goán koh-khah chhiong-móa hoaⁿ-hí, in-ūi i ê sim ū tùi lín tāi-ke lâi tit-tio̍h hoaⁿ-hí. 14 Góa bat tùi i khoa-kháu lín ê tāi-chì, lín si̍t-chāi bô hō͘ góa làu-khùi. Góa ta̍k-hāng tāi-chì lóng tùi lín kóng si̍t-chāi-ōe, góa tùi Thê-to khoa-kháu lín ê ōe mā sī chin-si̍t. 15 Só͘-í i nā siūⁿ-khí lín lóng án-chóaⁿ sūn-ho̍k i, koh kiong-kiong kèng-kèng kā i chiap-thāi, i tùi lín ê thiàⁿ-sim chiū ná chhim. 16 Taⁿ góa hui-siông hoaⁿ-hí, in-ūi góa ē-tàng oân-choân sìn-jīm lín!