《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第一章

作者 巴克禮普世版小組 2014.09.14

Chhéng-an
1 Góa sī Iâ-so͘ Ki-tok ê kang-lâng Pó-lô, Siōng-Chú soán-tiàu góa chò sù-tô͘, chhe-phài góa lâi thoân I ê hok-im. 2 Chit-ê hok-im sī Siōng-Chú chiok-kú í-chêng to̍h thong-kòe I ê chèng sian-ti, kì-chài tī Sèng-keng ê èng-ín. 3 Che sī koan-hē I ê Kiáⁿ, lán ê Chú Iâ-so͘ Ki-tok ê tāi-chì. Tùi jîn-sèng lâi kóng, I sī Tāi-pi̍t ê kiáⁿ-sun. 4 Chiàu sèng-kiat ê Sèng-Sîn lâi kóng, Siōng-Chú hō͘ I tùi sí-lâng-tiong koh-oa̍h, ēng chit-ê tōa koân-lêng lâi hián-bêng I sī Siōng-Chú ê Kiáⁿ. I chiū-sī lán ê Chú Iâ-so͘ Ki-tok. 5 Goán niá-siū I ê un-sù chiâⁿ-chò sù-tô͘, ūi-tio̍h Ki-tok ê miâ, beh ín-chhōa bān-bîn lâi sìn koh sūn-ho̍k chit-ê hok-im. 6 Mā pau-hâm lín chiah-ê siū Siōng-Chú ê soán-tiàu, lâi kui-sio̍k Iâ-so͘ Ki-tok ê lâng. 7 Góa siá chit-tiuⁿ phoe hō͘ só͘-ū tòa tī Lô-má, Siōng-Chú só͘ thiàⁿ, siū kéng-tiàu chò I ê sìn-tô͘ ê lâng. Goān lán ê Thiⁿ-Pē Siōng-Chú kah Chú Iâ-so͘ Ki-tok, sù lìn un-tián kah pêng-an!

Kám-siā ê Kî-tó
8 Tāi-seng, góa thong-kòe Iâ-so͘ Ki-tok, ūi-tio̍h lín tāi-ke kám-siā góa ê Siōng-Chú, in-ūi lín ê sìn-gióng í-keng thoân kàu choân sè-kài. 9 Góa choân-sim choân-ì teh sū-hōng Siōng-Chú, soan-iông koan-hē I ê Kiáⁿ ê hok-im. Siōng-Chú ē thè góa chò-chèng, góa siông-siông tī kî-tó tiong siàu-liām lín, 10 put-sî tī kî-tó-tiong, khún-kiû Siōng-Chú chiàu I ê hó chí-ì, hō͘ góa ū ki-hōe sūn-lī khì-kàu lín hia. 11 Góa chin ài khì kìⁿ lín, thang chiong lêng-sèng ê un-sù pun hō͘ lin, hō͘ lín koh-khah kian-kiông. 12 Chiū-sī kóng góa kàu lín tiong-kan ê sî-chūn, thong-kòe lí-góa sìn-gióng ê hun-hióng, lán ē-tàng hō͘-siong tit-tio̍h kó͘-lē. 13 Kok-ūi hiaⁿ-tī chí-mōe, góa chin ài lín chai, góa kúi-nā pái kè-ōe beh-khì hóng-būn lin, thang chhin-chhiūⁿ tī kî-thaⁿ Gōa-pang-lâng ê tiong-kan kāng-khoán, mā tī lín tiong-kan siu-sêng chi̍t-kóa kóe-chí, m̄-koh kàu taⁿ iáu ū chó͘-tòng. 14 Bô-lūn sím-mi̍h khoán lâng, ū khai-hòa-.ê, á-sī bī-khai-hòa-.ê; ū tì-hūi-.ê, á-sī bô tì-hūi-.ê, góa lóng tùi in ū chek-jīm. 15 Só͘-í góa pek-chhiat ǹg-bāng, ē-tàng kā hok-im thoân hō͘ lín tī Lô-má ê lâng.

Hok-im Sī Siōng-Chú ê Tōa Lêng-le̍k
16 Góa bô khòaⁿ hok-im chò kiàn-siàu, in-ūi chit-ê hok-im sī Siōng-Chú ê tōa lêng-le̍k, beh chín-kiù só͘-ū sìn ê lâng, tāi-seng sī Iû-thài-lâng, jiân-āu chiah Hi-lia̍p-lâng. 17 In-ūi chit-ê hok-im ū khé-sī Siōng-Chú ê gī, chit-ê gī tùi thâu kàu bóe lóng sī thong-kòe sìn lâi tit-tio̍h. Chiàu Sèng-keng só͘ kì-chài, “Gī ê lâng ē tùi sìn lâi oa̍h.”( chù: HPK 2:4)

Jîn-lūi ê Chōe
18 Siōng-Chú tùi thiⁿ-téng, hiòng hiah-ê put-khiân put-gī ê lâng hián-chhut I ê siū-khì, in-ūi in ê put-khiân put-gī chó͘-tòng lâng lâi bat chin-lí. 19 Kì-jiân Siōng-Chú ū tùi in khé-sī, in tùi I ê jīn-bat eng-kai chin chheng-chhó chiah tio̍h. 20 Chū chhòng-sè í-lâi, lâng khòaⁿ bē-tio̍h Hit-ê Siōng-Chú ê pún-sèng, chiū-sī I éng-oán ê tōa lêng-le̍k kah sîn-sèng, lâng nā khòaⁿ-tio̍h I só͘ chhòng-chō ê mi̍h chiū ē-tàng chai-iáⁿ, só͘-í lâng lóng bô piān-kái ê î-tē. 21 In sui-jiân bat Siōng-Chú khiok bô chun-tiōng I, mā bô kā I kám-siā. In ê sim-su hoán-tńg hām-lo̍h tī bô si̍t-chāi ê thui-lí, bē bêng-pe̍k ê sim-su chhiong-móa o͘-àm. 22 In lia̍h ka-kī chò chhong-bêng, kî-si̍t sī gû-gōng. 23 In bô chiong êng-kng kui hō͘ éng-oán-oa̍h ê Siōng-Chú, tian-tó khì pài ē sí-bia̍t ê lâng, poe-chiáu, khîm-siù, á-sī thâng-lūi ê hêng-thé só͘ chò ê ngó͘-siōng. 24 Só͘-í Siōng-Chú chhut-chāi in chiàu ka-kī ê su-io̍k, khì chò bô chheng-khì ê tāi-chì, hō͘ in ê jio̍k-thé hō͘-siōng lâi chò kiàn-siàu ê tāi-chì. 25 In ēng pe̍h-chha̍t-ōe tāi-thè Siōng-Chú ê chin-lí, in ho̍k-sāi siū-chō-bu̍t, bô kèng-pài Hit-ūi chō-bu̍t ê Chú, I chiah sī eng-kai éng-oán siū o-ló-.ê. Amen. 26 In-ūi án-ne, Siōng-Chú chhut-chāi in hòng-chhiòng chêng-io̍k khì chò it-poaⁿ-lâng kám-kak kiàn-siàu ê tāi-chì, cha-bó͘-lâng kah cha-bó͘-lâng, ēng hoán-chū-jiân ê sèng-koan-hē, lâi tāi-thè kah cha-po͘-lâng ê chū-jiân sèng-koan-hē. 27 Cha-po͘-lâng mā kāng-khoán pàng-sak kah cha-bó͘-lâng chū-jiân ê sèng-koan-hē, cha-po͘-lâng kah cha-po͘-lâng pí-chhú io̍k-hóe-hûn-sin, chò kiàn-siàu ê tāi-chì. Kiat-kó tio̍h siū chit-khoán piàn-thài ê hêng-ûi só͘ eng-kai tú-tio̍h ê pò-èng. 28 In kì-jiân bô beh chin-chiàⁿ jīn-bat Siōng-Chú, Siōng-Chú chiū chhut-chāi in ēng pāi-hoāi ê sim-su, khì-chò bô eng-kai chò ê tāi-chì. 29 In chhiong-móa ta̍k-khoán ê put-gī, siâ-ok, tham-sim, ok-to̍k, oàn-tò͘, hiong-sat, tàu-cheng, kan-chà, im-bô͘, kóng lâng ê kha-chiah-āu-ōe, 30 húi-pòng lâng, oàn-hūn Siōng-Chú, bú-jio̍k lâng, kiau-ngō͘, khoa-kháu, chè-chō sī-hui, ngó͘-ge̍k pē-bú, 31 bô liông-sim, bô siú-iok, bô-chêng, bô liân-bín. 32 In sui-jiân chai, chiàu Siōng-Chú ê kài-bēng, chò chiah-ê tāi-chì ê lâng eng-kai sí. In m̄-nā ka-kī chò, sīm-chì mā chàn-sêng pa̍t-lâng án-ne chò.