《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第十章

作者 巴克禮普世版小組 2011.06.05

1, Iâ-so͘ chiū kiò I cha̍p-jī ê bûn-tô͘ lâi, hō͘ in ū chè-ap siâ-sîn ê koân, lâi kóaⁿ-tio̍k in, sòa i-hó ta̍k chióng ê chèng-thâu, ta̍k chióng ê pēⁿ-thiàⁿ.
2, Cha̍p-jī sù-tô͘ ê miâ chiū-sī chiah-ê: thâu-chi̍t-ê Se-bûn( kiò chò Pí-tek), kap i ê hiaⁿ-tī An-tek-lia̍t; Se-pí-thài ê kiáⁿ Ngá-kok, kap i ê hiaⁿ-tī Iok-hān;
3, Hui-le̍k, kap Pa-to-lô-mái; To-má, kap thiu-sòe ê Má-thài; A-le̍k-hui ê kiáⁿ Ngá-kok, kap Ta̍t-thài;
4, Ka-ná-nî ê Se-bûn, kap Ka-lio̍k lâng Iû-tāi, chiū-sī bē Iâ-so͘ ê.
5, Iâ-so͘ chhe chit cha̍p-jī lâng, sòa hoan-hù in kóng, Gōa-pang ê lō͘ mài kiâⁿ, Sat-má-lī-a lâng ê siâⁿ mài ji̍p;
6, khah hó tio̍h khì chiū-kūn Í-sek-lia̍t ke sit-lo̍h ê iûⁿ.
7, Kiâⁿ ê sî, tio̍h thoân kóng, Thian-kok kūn à.
8, I-hó ū pēⁿ ê; hō͘ sí ê koh-oa̍h; hō͘ thái-ko ê chheng-khì; kóaⁿ kúi; lín pe̍h-pe̍h tit-tio̍h, tio̍h pe̍h-pe̍h hō͘ lâng.
9, Lín ê io-tó͘ lāi, lóng m̄-thang ū kim, gûn, tâng;
10, lō͘-ni̍h iā bo̍h-tit ū hêng-lí-tē, bo̍h-tit nn̄g niá saⁿ, bo̍h-tit ôe, bo̍h-tit koáiⁿ-á; in-ūi chò-kang lâng kham-tit tit-tio̍h i ê lim-chia̍h.
11, Lín só͘ ji̍p ê, bô lūn sím-mi̍h siâⁿ, sím-mi̍h hiuⁿ-lí, tio̍h thàm-thiaⁿ kî-tiong siáⁿ-lâng ē kham-tit, chiū tiàm tī hia, kàu lī-khui ê sî.
12, Ji̍p hit ê chhù, tio̍h kā i chhéng-an.
13, Hit ê chhù nā ē kham-tit, chiū hō͘ lín ê pêng-an kàu tī i; nā bē kham-tit, chiū hō͘ lín ê pêng-an kui tī lín.
14, Kìⁿ-nā m̄ chiap-la̍p lín, m̄ thiaⁿ lín ê ē ê, chhut hit ê chhù, hit ê siâⁿ ê sî, tio̍h pōaⁿ-khì lín kha-ni̍h ê thô͘-hún.
15, Góa si̍t-chāi kā lín kóng, Tng sím-phòaⁿ ê ji̍t, Só͘-to-má kap Gô͘-mô͘-la̍h ê tē-hng pí hit ê siâⁿ iáu khah khoài tam-tng.
16, Taⁿ góa chhe lín chhin-chhiūⁿ iûⁿ tī chhâi-lông ê tiong-kan; só͘-í lín tio̍h tì-sek chhin-chhiūⁿ chôa, sûn-liông chhin-chhiūⁿ hún-chiáu.
17, Tān-sī tio̍h tî-hông lâng; in-ūi in boeh chiong lín kau hō͘ kong-hōe, iā boeh tī lín ê hōe-tn̂g piⁿ-phah lín;
18, koh lín iā boeh ūi-tio̍h góa ê iân-kò͘, siū thoa kàu chóng-tok kap kun-ông ê bīn-chêng, lâi chò kiàn-chèng tī in kap gōa-pang lâng.
19, Tān-sī lín siū sàng-kau ê sî, bo̍h-tit khòa-lū boeh cháiⁿ-iūⁿ kóng, á-sī kóng sím-mi̍h ōe; in-ūi só͘ tio̍h kóng ê, boeh tī hit sî siúⁿ-sù lín.
20, In-ūi m̄-sī lín ka-kī kóng, sī lín ê Pē ê Sîn tiàm-tī lín teh kóng.
21, Hiaⁿ-tī boeh chiong hiaⁿ-tī sàng-kau khì sí, pē khoán-thāi kiáⁿ iā án-ne; kiáⁿ-jî boeh khí-lâi kong-kek pē-bú, hō͘ in sí.
22, Ia̍h lín in-ūi góa ê miâ boeh hō͘ chèng lâng oàn-hūn, chí-ū thun-lún kàu lō͘-bé ê, i boeh tit-tio̍h kiù.
23, Tī chit-ê siâⁿ pek-hāi lín, tio̍h cháu kàu hit siâⁿ; góa si̍t-chāi kā lín kóng, Í-sek-lia̍t chiah-ê siâⁿ, lín kiâⁿ bē thàng, Jîn-chú chiū kàu.
24, Bûn-tô͘ bē pôaⁿ-koe3sian-siⁿ, lô͘-po̍k bē pôaⁿ-koe3chu2-lâng.
25, Bûn-tô͘ chhin-chhiūⁿ sian-siⁿ, lô͘-po̍k chhin-chhiūⁿ chú-lâng, chiū kàu-gia̍h. Lâng kì-jiân kiò ke-chú chò Pia̍t-se-pok, hô-hòng kiò i ke-lāi ê lâng.
26, Só͘-í m̄-bián kiaⁿ in; in-ūi bô ū khàm-ba̍t āu-lâi bô lō͘-chhut ê sū; iā bô ū ún-ba̍t āu-lâi bô hō͘ lâng chai ê.
27, Góa tī àm-tiong kā lín kóng ê, lín tio̍h tī kng-bêng ê só͘-chāi kóng-chhut; àⁿ tī hīⁿ-khang kā lín kóng ê, tio̍h tī chhù-téng thoân i.
28, Hiah-ê hāi-sí sin-khu, bē hāi-sí lêng-hûn ê, m̄-bián kiaⁿ in; chí-ū hit-ê ē bia̍t lêng-hûn kap sin-khu tī tē-ge̍k ê, khah tio̍h kiaⁿ.
29, Nn̄g chiah chhek-chiáu-á kiám m̄-sī bē chi̍t hun gûn mah? nā m̄-sī lín ê Pē ū chún, chi̍t chiah iā bē ka-la̍uh tē;
30, lín ê thâu-mn̂g chiū iā lóng kè-sǹg.
31, Só͘-í lín m̄-bián kiaⁿ; lín pí chē-chē chhek-chiáu-á khah kùi-khì.
32, Só͘-í kìⁿ-nā tī lâng ê bīn-chêng jīn góa ê, góa iā tī góa tī thiⁿ-téng ê Pē ê bīn-chêng boeh jīn i.
33, Kìⁿ-nā tī lâng ê bīn-chêng m̄ jīn góa ê, góa iā tī góa tī thiⁿ-téng ê Pē ê bīn-chêng boeh m̄ jīn i.
34, Bo̍h-tit phah-sǹg góa lâi sī boeh hō͘ tē-chiūⁿ hô-pêng; góa lâi m̄-sī boeh hō͘ i hô-pêng, chiū-sī hiat-lo̍h to-kiàm.
35, In-ūi góa lâi, sī hō͘ kiáⁿ kap i ê lāu-pē choa̍t-chêng, cha-bó͘-kiáⁿ kap i ê lāu-bú, sim-pū kap i ê ta-ke, iā boeh án-ne.
36, Koh lâng ê tùi-te̍k chiū-sī i ka-kī ke-lāi ê lâng.
37, Thiàⁿ pē-bú khah kè-thâu tī thiàⁿ góa ê, bē kham-tit tī góa; thiàⁿ kiáⁿ cha-bó͘-kiáⁿ khah kè-thâu tī thiàⁿ góa ê, bē kham-tit tī góa;
38, m̄ pē ka-kī ê si̍p-jī-koe3lai5 tòe tī góa ê āu-bīn ê, iā bē kham-tit tī góa.
39, Tit-tio̍h i ê sìⁿ-miā ê lâng, boeh sit-lo̍h i; ūi-tio̍h góa sit-lo̍h i ê sìⁿ-miā ê lâng, boeh tit-tio̍h i.
40, Chiap-la̍p lín ê, chiū-sī chiap-la̍p góa; chiap-la̍p góa ê, chiū-sī chiap-la̍p chhe góa ê.
41, Ūi-tio̍h sian-ti ê miâ lâi chiap-la̍p sian-ti ê, boeh tit-tio̍h sian-ti ê siúⁿ; ūi-tio̍h gī lâng ê miâ lâi chiap-la̍p gī lâng ê, boeh tit-tio̍h gī lâng ê siúⁿ.
42, Kìⁿ-nā ūi-tio̍h bûn-tô͘ ê miâ, kan-ta ēng chi̍t poe léng-chúi hō͘ chiah-ê sòe-kiáⁿ ê chi̍t ê lim ê, góa si̍t-chāi kā lín kóng, i choa̍t-tùi bē sit-lo̍h i ê siúⁿ.