《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第二十一章

作者 巴克禮普世版小組 2014.07.20

Pó-lô Khì Iâ-lō͘-sat-léng
1 Goán kah in lī-pia̍t liáu-āu chiū khui chûn, it-ti̍t kàu Ko-sū, keh-tńg-ji̍t lâi-kàu Lô-tí, tùi hia koh khì-kàu Phàⁿ-tāi-lah; 2 Tī hia tú-tio̍h chi̍t-chiah chûn beh khì Hui-nî-ki, goán chiū chiūⁿ-chûn chhut-hoat. 3 Goán lâi-kàu khòaⁿ ē-tio̍h Ku-pí-lō͘ ê sî chiū tùi chiàⁿ pêng sái-kòe khì-kàu Sū-lī-a, tī Chhui-lô lo̍h-chûn, in-ūi chûn tī hia sià-hòe. 4 Goán chhōe-tio̍h chi̍t-kóa sìn-tô͘, kah in tòa chhit ji̍t. In tit-tio̍h Sèng-Sîn ê chí-sī, khǹg Pó-lô m̄-thang chiūⁿ Iâ-lō͘-sat-léng. 5 Chhit ji̍t liáu-āu, goán chhut-hoat kè-sio̍k goán ê lō͘-têng. Chèng-lâng chhōa bó͘-kiáⁿ sàng goán kàu siâⁿ-gōa, tāi-ke lóng kūi lo̍h-khì hái-piⁿ kî-tó, 6 Hō͘-siōng sio-sî goán chiūⁿ-chûn, in tńg-khì in tau. 7 Goán kè-sio̍k chē-chûn tùi Chhui-lô lâi-kàu To-lī-mái, kā hia ê sìn-tô͘ chhéng-an, kah in tòa chi̍t ji̍t. 8 Keh-tńg-ji̍t chhut-hoat lâi-kàu Kai-sat-lī-a. Tī hia tòa thoân-hok-im ê Hui-le̍k ê chhù, i sī Iâ-lō͘-sat-léng hit chhit-ê chip-sū chi-it. 9 I ū sì-ê cha-bó͘-kiáⁿ, lóng sī chāi-sek-lí, mā lóng chò sian-ti. 10 Goán tòa hia kúi-nā ji̍t ê tiong-kan, ū chi̍t-ê tùi Iû-thài lo̍h-lâi ê sian-ti miâ-kiò A-ka-pò͘. 11 I lâi chhōe goán, the̍h Pó-lô ê io-tòa lâi pa̍k ka-kī ê kha-chhiú, kóng, "Sèng-Sîn án-ne kóng, 'Iû-thài-lâng tī Iâ-lō͘-sat-léng ē án-ne pa̍k chit-tiâu io-tòa ê chú-lâng, jiân-āu kau hō͘ Gōa-pang-lâng ê chhiú.'" 12 Goán chi̍t-ē thiaⁿ-tio̍h chiū kah hit só͘-chāi ê lâng khǹg Pó-lô m̄-thang chiūⁿ Iâ-lō͘-sat-léng. 13 Pó-lô chiū ìn kóng, "Lín ná-ē thî-khàu lâi hō͘ góa ê sim hoân? Góa ūi-tio̍h Chú Iâ-so͘ ê miâ, m̄-nā siū pa̍k, sīm-chí sí tī Iâ-lō͘-sat-léng mā kam-goān." 14 I m̄ siū khó͘-khǹg, goán chiū soah-khì, kan-taⁿ kóng, "Goān Chú ê chí-ì si̍t-hiān!" 15 Kúi-nā ji̍t liáu-āu, goán kā hêng-lí chún-pī hó-sè chiū chiūⁿ Iâ-lō͘-sat-léng. 16 Chi̍t-kóa tùi Kai-sat-lī-a lâi ê sìn-tô͘ kah goán chò-hóe khì, in chhōa goán khì tòa chi̍t-ê Ku-pí-lō͘-lâng Ná-sun in tau, i sī chá-kî ê sìn-tô͘.

Pó-lô Hóng-būn Ngá-kok
17 Goán lâi-kàu Iâ-lō͘-sat-léng, sìn-tô͘ jia̍t-lia̍t kā goán hoan-gêng. 18 Keh-tńg-ji̍t, Pó-lô kah goán khì hóng-būn Ngá-kok, chèng tiúⁿ-ló mā lóng chò-hóe tī hia. 19 Pó-lô kā in chhéng-an liáu-āu, chiū chiong Siōng-Chú thong-kòe i tī Gōa-pang-lâng tiong-kan só͘ chò ê kang-chok, chi̍t-hāng chi̍t-hāng tùi in pò-kò. 20 In thiaⁿ-tio̍h chiū o-ló Siōng-Chú, mā tùi Pó-lô kóng, "Hiaⁿ-tī chí-mōe ah, lí chai ū kúi-nā-bān Iû-thài-lâng chiâⁿ-chò sìn-tô͘, in lóng chin jia̍t-sim teh chun-siú lu̍t-hoat. 21 In bat thiaⁿ lâng kóng, lí kà-sī tòa tī gōa-kok ê Iû-thài-lâng hòng-khì Mô͘-se ê lu̍t-hoat, m̄-bián kā in ê gín-á kiâⁿ kat-lé, mā m̄-bián chun-siú Iû-thài-lâng ê kui-lē. 22 In it-tēng ē thiaⁿ-tio̍h lí lâi chia ê siau-sit. Taⁿ beh án-chóaⁿ chiah hó? 23 Taⁿ tio̍h chiàu goán kā lí kóng ê khì chò. Goán chia ū sì-ê lâng hē goān. 24 Lí chhōa in chò-hóe khì chham-ka kiat-chēng-lé, chhut só͘-hùi hō͘ in thang thì thâu-mn̂g, án-ne chèng-lâng ē chai in só͘ thiaⁿ-tio̍h koan-hē lí ê tāi-chì m̄-sī sū-si̍t, thang hō͘ in chai, lí pún-sin mā sī ū teh siú Mô͘-se ê lu̍t-hoat. 25 M̄-koh tùi sìn-Chú ê Gōa-pang-lâng, goán í-keng ū kià phoe kā in kóng goán chhâi-koat m̄-thang chia̍h chè ngó͘-siōng ê mi̍h, hoeh kah ni̍h-sí ê cheng-seⁿ, mā m̄-thang îm-loān." 26 Keh-tńg-ji̍t, Pó-lô chiū chhōa hit sì-ê lâng khì chham-ka kiat-chēng-lé, jiân-āu ji̍p-khì sèng-tiān pò-kò kiat-chēng-lé móa ê ji̍t-kî, thang ūi in ta̍k-lâng hiàn chè-mi̍h.

Pó-lô Tī Sèng-tiān Hông Lia̍h-Khì
27 Chhit-ji̍t ê kî teh-beh móa ê sî, tùi A-se-a-séng lâi ê Iû-thài-lâng khòaⁿ-tio̍h Pó-lô tī sèng-tiān, chiū siàn-tōng kûn-chiòng lâi kā i lia̍h, 28 tōa-siaⁿ hoah: "Í-sek-lia̍t-lâng ah, lâi tàu-kha-chhiú, chit-ê lâng tī ta̍k só͘-chāi kà-sī kûn-chiòng kong-kek Í-sek-lia̍t-lâng kah Mô͘-se ê lu̍t-hoat, mā hoán-tùi chit-ê sèng-tiān. Chit-má koh káⁿ chhōa Hi-lia̍p-lâng ji̍p-lâi sèng-tiān, ù-òe chit-ê sîn-sèng ê só͘-chāi." 29 In-ūi in bat khòaⁿ-tio̍h Í-hut-só͘-lâng Te̍k-lô-hui-mô͘ kah i tī siâⁿ-lāi, siūⁿ-kóng Pó-lô ū chhōa i ji̍p-khì sèng-tiān. 30 Choân siâⁿ khí jiáu-loān, bîn-chiòng lóng cháu óa-lâi lia̍h Pó-lô, kā i thoa chhut-khì sèng-tiān gōa-kháu, tiān ê mn̂g sûi-sî koaiⁿ khí-lâi. 31 In tú siūⁿ-beh thâi Pó-lô ê sî, ū siau-sit thoân kàu Lô-má kun-tūi ê iâⁿ-tiúⁿ, kóng choân Iâ-lō͘-sat-léng teh khí jiáu-loān. 32 Iâⁿ-tiúⁿ sûi-sî tòa peng kah kun-koaⁿ lâi-kàu bîn-chiòng hia. In khòaⁿ-tio̍h kun-koaⁿ kah peng chiū thêng chhiú, bô koh phah Pó-lô. 33 Kun-koaⁿ óa-khì lia̍h Pó-lô, bēng-lēng ēng nn̄g-tiâu thih-liān-á kā i liān khí-lâi, koh mn̄g i sī siáⁿ-lâng, ū chò sím-mi̍h tāi-chì? 34 Bîn-chiòng chi̍t-ê hoah chi̍t khoán, in-ūi hán-hōa, kun-koaⁿ bô hoat-tō͘ chai-iáⁿ si̍t-chè chêng-hêng, chiū bēng-lēng kā Pó-lô ah ji̍p-khì iâⁿ-pâng. 35 Lâi-kàu kiā-á ê sî, in-ūi kûn-chiòng e-kheh chin hiông, peng soah tio̍h chiong Pó-lô kng khí-lih. 36 Kûn-chiòng tòe tī āu-bīn, tōa-siaⁿ hoah: "Hō͘ i sí!"

Pó-lô Ūi Ka-kī Piān-hō͘
37 Pó-lô hō͘ in ah-khì beh ji̍p iâⁿ-pâng ê sî, tùi kun-koaⁿ kóng, "Góa chi̍t-kù ōe kā lí kóng, thang-bô?" Kun-koaⁿ kóng, "Lí bat Hi-lia̍p-ōe oh? 38 Án-ne lí to̍h sī hit-ê chêng ji̍t khí jiáu-loān ê sî chhōa sì-chheng-ê sat-chhiú chhut-khì khòng-iá ê Ai-ki̍p-lâng lò͘?" 39 Pó-lô ìn kóng, "Góa sī Iû-thài-lâng, chhut-sì tī Ki-lī-ka ê Tāi-sò͘, sī chi̍t-ê put-chí chhut-miâ ê siâⁿ-chhī. Kiû lí chún góa tùi bîn-chiòng kóng-ōe." 40 Kun-koaⁿ chún i, Pó-lô chiū khiā tī kiā-á-téng, tùi bîn-chiòng pí chhiú-sè. Kûn-chiòng sûi-sî tiām lo̍h-lâi, Pó-lô chiū ēng Hi-pek-lâi-ōe tùi in kóng,