《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第八章

作者 巴克禮普世版小組 2011.05.15

1, Iâ-so͘ í-keng lo̍h soaⁿ, kui tōa tīn ê lâng tè I.
2, Tú-tn̄g ū chi̍t ê thái-ko ê chiū-kūn lâi pài I kóng, Chú ah, lí nā khéng, chiū ē hō͘ góa chheng-khì.
3, I chiū chhun chhiú bong i kóng, Góa khéng, lí thang chheng-khì; i ê thái-ko liâm-piⁿ chheng-khì.
4, Iâ-so͘ koh kā i kóng, Kín-sīn bo̍h-tit kā lâng kóng; chí-ū khì, chiong pún-sin hō͘ chè-si giām, iā tio̍h hiàn Mô͘-se só͘ hoan-hù ê lé-mi̍h, lâi chò chèng-kù tī lâng.
5, Í-keng ji̍p Ka-pek-lông, ū pé-chóng chiū-kūn I, lâi kiû I kóng,
6, Chú ah, góa ê lô͘-po̍k piàn-sūi, tó tī chhù-lāi, kan-khó͘ kàu ke̍k.
7, I chiū kā i kóng, Góa lâi khì kā i i.
8 Pé-chóng ìn kóng, Chú ah, lí kàu góa tau, góa tng bē khí; lí kan-ta kóng chi̍t kù ōe, góa ê lô͘-po̍k chiū ē hó.
9, In-ūi góa iā sī hō͘ lâng koán ê lâng, iā ū peng hō͘ góa koán; kā chit-ê kóng, Khì, i chiū khì; kā hit-ê kóng, Lâi, i chiū lâi; kā góa ê lô͘-po̍k kóng, Kiâⁿ án-ne, i chiū kiâⁿ án-ne.
10, Iâ-so͘ thiaⁿ-tio̍h chiū kî-koài, kā tè I ê lâng kóng, Góa si̍t-chāi kā lín kóng, chhin-chhiūⁿ chit chióng ê chhim sìn, liân Í-sek-lia̍t tiong, góa bē bat tú-tio̍h.
11, Góa koh kā lín kóng, tùi tang tùi sai, ū chē-chē lâng boeh kàu, kap A-pek-la̍h-hán, Í-sat, Ngá-kok, chē toh tī Thian-kok;
12, tān-sī kok ê chú-bîn boeh tú-tio̍h kóaⁿ-chhut tī gōa-bīn ê o͘-àm; tī hia boeh ū thî-khàu kā-gê chhiat-khí.
13, Iâ-so͘ chiū kā pé-chóng kóng, Khì ah, chiàu lí ê sìn kā lí chiâⁿ; tú-tú hit sî, i ê lô͘-po̍k chiū hó.
14, Iâ-so͘ ji̍p Pí-tek ê ke, khòaⁿ-tio̍h i ê tiūⁿ-ḿ, hoān-tio̍h jia̍t-pēⁿ tó-teh.
15, Chiū bong i ê chhiú, jia̍t chiū thè; hū-jîn-lâng chiū khí-lâi su-hāu I.
16, Kàu hông-hun-àm, ū lâng chhōa chē-chē hoān-tio̍h kúi ê chiū-kūn I; I ēng chi̍t kù ē kóaⁿ-chhut hiah-ê sîn; koh i-hó it-chhè ū pēⁿ ê lâng;
17, chiū-sī boeh èng-giām sian-ti Í-sài-a só͘ kóng ê, kóng, I pún-sin thòe-siū lán ê loán-jio̍k, tam-tng lán ê pēⁿ-chèng.
18, Iâ-so͘ khòaⁿ-tio̍h kui tōa tīn ê lâng ûi I, chiū hoan-hù kè-khì hit pêng hōaⁿ.
19, Ū chi̍t ê keng-ha̍k-kàu-su lâi, kā I kóng, Sian-siⁿ ah, lí bô lūn tó-ūi khì, góa boeh tè lí.
20, Iâ-so͘ chiū kā i kóng, Hô͘-lî ū khang, thiⁿ-tiong ê pe-chiáu ū siū; chí-ū Jîn-chú bô khòa thâu-khak ê só͘-chāi.
21, Koh chi̍t ê bûn-tô͘ kā I kóng, Chú ah, hō͘ góa seng tńg-khì bâi-chòng góa ê lāu-pē.
22, Chí-ū Iâ-so͘ kā i kóng,, Lí tè góa, chhut-chāi sí lâng khì bâi-chòng in ê sí lâng.
23, Í-keng lo̍h chûn, I ê bûn-tô͘ tè I.
24, Hut-jiân hái-ni̍h khí tōa hong-éng, tì-kàu chûn hō͘ éng khàm; tān-sī Iâ-so͘ teh khùn.
25, Bûn-tô͘ chiū-kūn lâi kiò I khí-lâi, kóng, Chú ah, kiù o͘h, boeh bô miā lah!
26, I chiū kā in kóng, Sió-sìn ê lâng ah, cháiⁿ-iūⁿ hiah bô táⁿ? Chiū khí-lâi, chek-pī hong kap hái, chiū tōa pîⁿ-tiāⁿ.
27, Hiah-ê lâng kî-koài kóng, chit-ê sī sím-mi̍h hō lâng, hong kap hái iā sūn I?
28, Í-keng kè-khì hit pêng hōaⁿ, kàu Ka-tāi-lia̍p lâng ê tē; ū hoān-tio̍h kúi ê, nn̄g lâng, tùi thióng-bōng chhut-lâi, tú-tio̍h I, sè-bīn hiông kài-kài; tì-kàu bô lâng káⁿ tùi hit tiâu lō͘ kè.
29, In hut-jiân âu-kiò kóng, Siōng-chú ê Kiáⁿ ah, goán kap lí ū sím-mi̍h kan-sia̍p? sî bē kàu, lí lâi chia sī boeh khó͘-chhó͘ goán mah?
30, Lī in hn̄g-hn̄g ū tōa kûn ê ti teh thó-chia̍h;
31, hiah-ê kúi kiû I kóng, Lí nā kóaⁿ goán, chiū chhe goán ji̍p ti kûn.
32, I chiū kā in kóng, Khì ah. Kúi chiū chhut-lâi, khì ji̍p ti; hut-jiân choân-kûn chông lo̍h soaⁿ-khàm, ji̍p hái, sí tī chúi-ni̍h.
33, Kò͘ ti ê cháu khì ji̍p siâⁿ; chiong chiah-ê sū, í-ki̍p hoān-tio̍h kúi ê lâng só͘ tú-tio̍h ê, lóng kā lâng kóng.
34, Thong siâⁿ ê lâng chhut-khì, chhōe-tio̍h Iâ-so͘; í-keng kìⁿ-tio̍h, chiū kiû I lī-khui in ê tē-kài.