《巴克禮普世版聖經（試讀本）》

 | | | 轉寄

巴克禮普世版（試讀本） 使徒行傳第九章

作者 巴克禮普世版小組 2014.04.27

Sò-lô Kui Chú (St 22:6-16;26:12-18)
1 Sò-lô iáu-koh kè-sio̍k khióng-hat beh thâi Chú ê bûn-tô͘, i khì kìⁿ chè-si-tiúⁿ, 2 iau-kiû i siá phoe hō͘ Tāi-má-sek hia-ê hōe-tn̂g, chún i nā tú-tio̍h sìn chit-ê tō-lí ê lâng, bô-lūn lâm-lí, thang kā in pa̍k khí-lâi, ah khì Iâ-lō͘-sat-léng. 3 Sò-lô kiâⁿ beh-kàu Tāi-má-sek ê sî, hut-jiân tùi thiⁿ ū kng chiò-siā tī i sì-chiu-ûi. 4 I chiū poa̍h-tó tī thô͘-kha, thiaⁿ-tio̍h ū siaⁿ tùi i kóng, "Sò-lô, Sò-lô, ná-ē beh pek-hāi Góa?" 5 I mn̄g kóng, "Chú ah, Lí sī siáⁿ-lâng?" Hit-ê siaⁿ Kóng, "Góa to̍h-sī lí só͘ pek-hāi ê Iâ-so͘. 6 Khí-lâi ji̍p-khì siâⁿ-lāi, ū-lâng ē kā lí chí-sī lí tio̍h án-chóaⁿ chò." 7 Tâng-phōaⁿ chiū tòng-tiām, gāng-gāng khiā-teh bē kóng-ōe; in ū thiaⁿ-tio̍h siaⁿ, m̄-koh bô khòaⁿ-tio̍h iáⁿ. 8 Sò-lô tùi thô͘-kha peh khí-lâi, ba̍k-chiu thí-khui, m̄-koh khòaⁿ bô sím-mi̍h. In chiū khan i ê chhiú, chhōa i ji̍p-khì Tāi-má-sek. 9 Sò-lô tī hia saⁿ-ji̍t kú, ba̍k-chiu sit-bêng, bô chia̍h mā bô lim. 10 Tī Tāi-má-sek ū chi̍t-ê bûn-tô͘ miâ-kiò A-ná-nî-a. Siōng-Chú tī īⁿ-siōng tiong kā i kóng, "A-ná-nî-a ah." I ìn kóng, "Chú ah, góa tī chia." 11 Chú tùi i kóng, "Khí-lâi, khì hit-tiâu kiò-chò "Ti̍t" ê ke-lō͘, tī Iû-tāi ê chhù chhōe chi̍t-ê miâ-kiò Sò-lô ê Tāi-sò͘-lâng, lí ē khòaⁿ-tio̍h i tī hia teh kî-tó. 12 Sò-lô tī īⁿ-siōng tiong khòaⁿ-tio̍h chi̍t-ê miâ-kiò A-ná-nî-a e5lang5, ji̍p-lâi kā i hōaⁿ-chhiú, hō͘ i ē-tàng koh khòaⁿ-kìⁿ." 13 A-ná-nî-a ìn kóng, "Chú ah, góa ū thiaⁿ-tio̍h chin-chē lâng kóng-khí, chit-ê lâng tī Iâ-lō͘-sat-léng tùi Lí ê sìn-tô͘ chò chin-chē ok-to̍k ê tāi-chì. 14 I koh ū chè-si-tiúⁿ ê siū-koân, thang tī chia lia̍h só͘-ū kiû-kiò Lí ê miâ ê lâng. 15 M̄-koh Chú kā i kóng, "Chò lí khì, i sī Góa kéng-soán ê khì-kū, beh tùi Gōa-pang-lâng, kok-ông kah Í-sek-lia̍t-lâng soan-iông Góa ê miâ. 16 Góa mā beh hō͘ i chai, ūi-tio̍h Góa ê miâ, i it-tēng tio̍h siū chin-chē kan-khó͘." 17 A-ná-nî-a chiū khì, ji̍p-khì hit-keng chhù, kā Sò-lô hōaⁿ-chhiú, kóng, "Sò-lô hiaⁿ-tī, Chú, chiū-sī lí lâi ê sî lō͘-tiong chhut-hiān hō͘ lí khòaⁿ ê Iâ-so͘, chhe góa lâi hō͘ lí ē koh khòaⁿ-kìⁿ, koh tit-tio̍h Sèng-Sîn chhiong-móa." 18 Sûi-sî tùi i ê ba̍k-chiu ū chhin-chhiūⁿ hî-lân ê mi̍h lak lo̍h-lâi, i chiū koh ē khòaⁿ-kìⁿ, khí-lâi niá-siū sé-lé.

Sò-lô Tī Tāi-má-sek Thoân-tō
19 Sò-lô chia̍h-pá liáu-āu chiū ióng-kiāⁿ khí-lâi. I kah Tāi-má-sek ê bûn-tô͘ chò-hóe tòa kúi-nā ji̍t. 20 I sûi-sî tī chiah-ê hōe-tn̂g soan-káng Iâ-so͘, kóng, "I sī Siōng-Chú ê Kiáⁿ." 21 Thiaⁿ-tio̍h ê lâng lóng tio̍h-kiaⁿ koh kî-koài, kóng, "Chit-ê lâng kám m̄-sī hit-ê tī Iâ-lō͘-sat-léng pek-hāi só͘-ū kiû-kiò chit-ê miâ ê lâng? koh lâi chia beh lia̍h sìn-tô͘ thoa in khì kau hō͘ chè-si-tiúⁿ." 22 M̄-koh Sò-lô ná kóng ná ū la̍t, chèng-bêng Iâ-so͘ sī Ki-tok, hō͘ tòa tī Tāi-má-sek ê Iû-thài-lâng lóng bô piān-pok ê î-tē. 23 Kòe chin-chē ji̍t liáu-āu, Iû-thài-lâng chò-hóe kè-bô͘ beh thâi Sò-lô. 24 Sò-lô ū thiaⁿ-tio̍h in ê kè-bô͘, hiah-ê lâng mê-ji̍t tī siâⁿ-mn̂g teh tng-tán beh kā i thâi. 25 M̄-koh Sò-lô ê bûn-tô͘ thàu-mê chiong i ēng chi̍t-ê nâ-á tùi siâⁿ-chhiûⁿ kā i lūi lo̍h-khì.

Sò-lô Tī Iâ-lō͘-sat-léng
26 Sò-lô lâi-kàu Iâ-lō͘-sat-léng, beh kah bûn-tô͘ kau-pôe. Chèng-lâng lóng kiaⁿ i, bô siong-sìn i sī bûn-tô͘. 27 Chí-ū Pa-ná-pa chhōa Sò-lô lâi kìⁿ sù-tô͘, kā in soat-bêng i tī lō͘-tiong án-chóaⁿ khòaⁿ-tio̍h Chú, Chú kā i kóng-ōe, í-ki̍p i tòa Tāi-má-sek jōa-ni̍h-á hó-táⁿ hōng Chú ê miâ lâi thoân hok-im. 28 Sò-lô tī Iâ-lō͘-sat-léng kah sù-tô͘ ū chhut-ji̍p lâi-óng, Chú ê miâ hó-táⁿ thoân hok-im. 29 I mā kah kóng Hi-lia̍p-ōe ê Iû-thài-lâng kóng-ōe piān-lūn, hiah-ê lâng iáu-koh put-sî kè-bô͘ beh kā i thâi. 30 Sìn-tô͘ chai-iáⁿ chit-ê tāi-chì, chiū chhōa i lo̍h-khì Kai-sat-lī-a, sàng i tńg-khì Tāi-sò͘. 31 Hit-sî choân Iû-thài, Ka-lī-lī-séng, Sat-má-lī-a ê kàu-hōe lóng ū pêng-an, ná kian-kò͘ hoat-tián, só͘ kiâⁿ só͘ chò lóng kèng-ùi Chú, tit-tio̍h Sèng-Sîn ê kó͘-bú, sìn-tô͘ jîn-sò͘ ná ke-thiⁿ.

Pí-tek Tī Lū-tāi kah Iok-phàⁿ
32 Pí-tek khì ta̍k só͘-chāi hóng-būn, mā ū hóng-būn tòa tī Lū-tāi ê sìn-tô͘. 33 I tī hia tú-tio̍h chi̍t-ê lâng, miâ-kiò Í-nî-ngá, chit-ê lâng hoān-tio̍h piàn-sūi, tó tī bîn-chhn̂g peh nî kú. 34 Pí-tek kā i kóng, "Í-nî-ngá, Iâ-so͘ Ki-tok kā lí i-hó à, khí-lâi, chéng-tùn lí ka-kī ê chhn̂g-pho͘. Í-nî-ngá sûi-sî khí-lâi kiâⁿ. 35 Só͘-ū tòa tī Lū-tāi kah Sat-lûn ê lâng lóng ū khòaⁿ-tio̍h án-ne, chiū lâi kui Chú. 36 Tī Iok-phàⁿ ū chi̍t-ê lí-sìn-tō͘, miâ-kiò Tāi-pí-tāi, Hi-lia̍p-ōe kiò-chò "To-ka", chiū-sī lo̍k-á ê ì-sù. I chò chin-chē hó tāi-chì, koh chín-chè sàn-chhiah-lâng. 37 I phòa-pēⁿ sí-khì, lâng sé i ê sin-si, kā i hē tī lâu-téng ê pâng-keng. 38 In-ūi Lū-tāi lī Iok-phàⁿ bô hn̄g, bûn-tô͘ thiaⁿ-tio̍h Pí-tek tī hia, chiū chhe nn̄g-ê lâng khì chhōe i, kiû kóng, "Chhiáⁿ lâi goán hia, m̄-thang iân-chhiân." 39 Pí-tek chiū sûi-sî kah in khì, khì kàu-ūi chiū ū-lâng chhōa i khì lâu-téng ê pâng-keng. Chèng kóaⁿ-hū khiā tī Pí-tek ê sin-piⁿ teh háu, chiong To-ka kah in chò-hóe ê sî só͘ chò ê saⁿ-khò͘ hō͘ i khòaⁿ. 40 Pí-tek chiū kah kûn-chiòng chhut-khì, kūi lo̍h-khì, kî-tó, oa̍t-tńg-sin tùi sin-si kóng, "Tāi-pí-tāi, khí-lâi." To-ka ê ba̍k-chiu thí-khui, khòaⁿ-tio̍h Pí-tek, chiū khí-lâi chē. 41 Pí-tek chhun chhiú kā i hû khí-lâi, kiò hiah-ê sìn-tô͘ kah kóaⁿ-hū ji̍p-lâi, chiong koh-oa̍h ê To-ka kau hō͘ in. 42 Choân Iok-phàⁿ ê lâng lóng chai chit-hāng tāi-chì, chiū ū chin-chē lâng sìn Chú. 43 Pí-tek tī Iok-phàⁿ kah chi̍t-ê chè-phôe sai-hū Se-bûn chò-hóe tòa chin-chē ji̍t.