《趁iau2日時》

 | | | 轉寄

盲人義工是我ê「蘭巴倫」

作者 林俊育 2008.06.08

「人生以服務為目的」，「服務是愛ê表現」，「愛你ê鄰居」，chiah-ê lóng是我1988年以來投入盲人義工ê原動力。

Tī從事各項盲人義工中，我漸漸体會到神ê大愛充滿我ê生命，hit種愛ê力量mā時時催迫我去擴大我ê「蘭巴倫」。我ê生活充滿喜樂，我ê生命會得thang成長，盲人義工將成做我今生今世ê「蘭巴倫」。

感謝神ê帶領kap恩典，我有一個美滿ê家庭kap順利ê事業，四年半前，為tio̍h cha-bó͘-kiáⁿ ê教育而移居波士頓。太太tī一間大學會計部門上班，cha-bó͘-kiáⁿ就讀麻省理工學院大學部，我為tio̍h seng-lí kap盲人事工而成為台美兩地ê空中飛人，koh-khah有機會將美國khah進步ê盲人福利措施紹介hō͘國內參考。

回顧七年來，tùi實踐基督教siōng基本ê信仰，mā就是耶穌ê新誡命「愛你ê鄰居，ná親像我愛lín仝款。」我体認到kap神同工ê喜樂。人bōe-sái只為家己而活，he是自私ê小我；若ē-tàng為「愛你ê鄰居，而活，he就是大我ê永生之道，mā就是神ê國度降臨人間。

周遭ê弱勢團体就是咱ê鄰居，當時教會中有二、三位盲朋友來參加主日崇拜，我就tùi關懷盲人開始。Kap in深入接觸後，我發現盲人是弱勢中ê弱勢，但神雖然關閉in肉体ê目睭，卻phah開in koh-khah明亮ê心靈目睭。

Tùi án-ne，我決定輔導成立一個超教會ê盲朋友聯誼會，tī教會內ê二、三位盲會友陪同下，展開探訪盲朋友ê工作。In lóng是從事按摩工作，暗時是siōng忙ê工作時間，只好利用我日時上班時間，抽空去做訪問工作。

Hō͘我忘掉辛勞ê是，in lóng真歡喜地認同成立盲朋友聯誼會ê構想，幾位khah熱心ê就馬上成立籌備委員會。會記得第一pái舉辦陽明山郊遊，兩部遊覽車約八十人參加。阮tī教會內招募十幾位義工，出發前舉辦義工訓練，由盲朋友親自教導義工如何kap盲人接觸。原來盲人ê障礙m̄是目睭看bē-tio̍h，卻是周遭ê人kap社會大眾對in ê誤解而產生ê歧視。In只是視覺無方便而已，並m̄是殘障，in有雙腳ē-tàng行路，所以mài牽in行，卻是你ê手臂hō͘伊扶tio̍h，你行tī前方引chhōa方向。做義工ài有chit種siōng基本ê認bat，盲人期待ê是尊重，而m̄是你那高伊一截ê同情。

Chit-pái ê郊遊，盲朋友kap義工lóng樂而忘tńg去，彼此第一pái ê心靈接觸，留落來甜美ê回憶。真chē義工寫出in ê感觸文章發表tī教會ê雜誌。報讀hō͘ in聽了，籌備委員ê信心倍增，tùi án-ne舉辦成立大會，選舉幹部，擬訂章程kap工作計畫，我以義工ê立場kā/hō͘伊協助kap輔導。

Chiah-ê盲朋友大多是tùi xx 畢業台中惠明盲校kap羅東慕光盲人重建中心，tī校期間深受神愛ê感動而受洗成做基督徒，但畢業後進入社會，tī殘酷ê社會夾縫中，以按摩維生餬口。無情社會大眾ê誤解kap歧視，只好kā家己關tī厝裡，忍氣吞聲地渡過漫長而寂寞ê烏暗歲月。神ê愛tùi án-ne消失殆盡，對教會mā失望，只好錮禁厝內。Chit-pái聯誼會hō͘ in重新tam-tio̍h神ê愛，tùi教會開始有人接納in，chiah有勇氣行出家門koh再到教會禮拜，重新行入社會。

聯誼會中有kóa愛唱歌ê惠明盲校畢業生，koh再次有機會唱聖詩，回憶tī校期間唱聖詩o-ló神ê喜樂，in kā我講希望ē-tàng組成詩班，我舉雙手贊成，á我kā-in講自chhōe團員、指揮kap伴奏，其他經費問題由我籌組後援會來募款。一切進行順利，tī聖誕節晚會中，chit-ê盲人詩班一鳴驚人，掌聲久久不絕，我mā感動得潸然目屎下，是喜樂ê目屎，那情景到taⁿ記憶猶新。

In雖然從事按摩工作到深夜，但tī神愛ê催迫下，詩班團員每週一kap週五上午十點到十二點練唱，in自作點字樂譜，用錄音帶錄下上課老師教ê四部，tńg到厝了後各自努力練習，下次上課老師koh再將四部合起來練習。比明眼人boeh辛苦kúi-nā倍，但in樂此不疲，為tio̍h是boeh ài彰顯神ê大能。In体認到神boeh重用目睭殘缺ê詩班來o-ló神，我chit-ê做義工ê深受感動而催促家己koh-khah努力服務。

詩班受邀到各教會去獻詩見証，我lóng bōe錯過做義工陪in出去ê機會，in傳達神愛ê信息不輸hō͘專職傳道ê牧師。我鼓勵in繼續努力，並將詩班定名為「西羅亞詩歌佈道團」，tī聖經中記載耶穌叫一位盲人去西羅亞池洗目睭，結果醫好瞎眼。西羅亞ê意思是「奉差遣」。In取chit-ê團名就是beh奉神ê差遣去宣揚神ê大愛。

我iáu鼓勵in去監獄、戒毒所及國中學校演唱並見証，koh-khah kap伊甸殘障基金會ê喜樂﹝盲人﹞四重唱聯合，到全島六個點舉辦「百萬殘障巡迴歌唱見証會」，透過詩歌來拯救迷失而墮落ê靈魂。我這長期陪團ê義工ê心靈，mā被淨化而充滿喜樂。

我發現台灣盲用品ê供應短缺，尤其是弱視輔助器，對盲朋友來講實在不公平。我tùi án-ne邀一位seng-lí往來ê工廠頭家蔡辰光先生來開發盲用品， tāi先開發盲扙，mā是beh免費送盲朋友每人一支。最近koh開發倒水叫停器，mā是beh免費贈送盲朋友每人一個。阮希望ē-tàng開發koh-khah chē ê盲用品，in the̍h-tio̍h盲用品ê喜樂，mā是阮chiah-ê義工ê喜樂。

每年來往台美五到六次，我有機會認識退休移居洛杉磯ê程文輝女士，伊是出生tī廣州ê盲人，自力奮鬥求學上進，有機會到波全斯盲校求學，並tī海倫凱勒ê鼓勵下，寫成一本自傳，英文版是“ONE OF THE LUCKY ONES”，中文版叫「失明hō͘我ê挑戰」。我感覺盲人mā ē-tàng當作家，將心靈ê感受寫出來，一定有真好ê作品。Tī kah意文學kap寫作ê盲朋友要求下，我就到波士頓家附近ê“THE CARROLL CENTER FOR THE BLIND”kap“PERKINS SCHOOL FOR THE BLIND”ê研究圖書館，chhōe盲人ê作品來譯成中文，thang hō͘國內盲朋友有閱讀國外盲人作家ê作品。現在正無閒翻譯「生命tī我ê手指尖」﹝作家是盲聾啞﹞，kap「光tī隧道ê hit端」﹝作家是全盲﹞二本冊，忙得非常歡喜，我chit-ê盲人義工mā有機會欣賞盲人ê文學，真是感受良深，mā得tio̍h珍貴ê啟示。

神hō͘盲人失去視覺，但tī聽覺方面賦予超過明眼人ê才華。這七年來，我深覺應該tī台灣創造大環境來培訓視障音樂人才，我chhōe幾位有共識ê企業界朋友同齊出錢，成立台北市視障音樂文教基金會，大家推我當董事長。

我目前iáu擔任教會盲朋友聯誼會ê輔導、慕光盲人重建中心董事、視障協會顧問，iáu有波士頓ê THE CARROLL CENTER FOR THE BLIND kap VISION FOUNDATION, INC. mā邀我去當in ê董事。看起來我chit-ê「不務正業」而樂此不疲ê盲人長期義工，將tī無久就變成正業了。盲朋友kap我周遭ê人lóng講我為盲人付出真chē，但我總回答講，我因做盲人義工所得tio̍h ê生命成長比付出ê koh-khah chē。
1995.1.14