《趁iau2日時》

 | | | 轉寄

宗教信仰kap失明

作者 林俊育 2008.04.27

殘障者心態上ê障礙，有其宗教信仰ê根thang尋。殘障界ê專業工作者有責任來處理其心態上ê變化，並提供促進chit種變化ê專業知識。本文boeh探討宗教信仰ê態度kap失明之間ê關係，並舉一kóa我所接觸ê失明基督徒ê例來佐證，koh-khah boeh建議一kóa方法，來改變歷史傳統ê消極負面心態。

人類對身体殘障ê心態，tòe歷史文化ê演變，歷經消極ê可憐、同情kap保護，轉而尊重kap積極ê教育kap重建，其間宗教信仰扮演tio̍h重要ê角色。咱beh tùi宗教信仰來學習了解，殘障者需要ê是愛ê關懷，m̄是高姿態ê可憐kap同情。

對殘障者來講，心態上ê障礙比歹接近ê環境koh-khah有挫折感；siōng好接近ê無障礙環境kap內容充實ê重建計畫，如果家人、朋友、同事kap僱主iáu繼續抱tio̍h負面ê態度，boeh調整一個視障者是無法度ê。Siōng好ê立法mā只有ē-tàng消除建築物kap就業ê障礙，提供獎助學金、生活輔助器、獨立ê生活中心kap專業研究，但只有人ê正面心態chiah ē-tàng改變殘障人。

一般社會大眾對視障者ê看法是，無助ê、溫順ê、依賴性ê、憂鬱ê kap唯美主義者，tùi án-ne認為失明是一種恥辱，koh-khah hō͘明眼人bōe-sái接納視障者，甚至tī將in當做異類看待。Chiah-ê lóng是根深蒂固ê傳統思想，而宗教是反應傳統思想kap態度kap實際生活關聯ê交hō͘關係。所以，透過宗教歷史ê考證， ē-tàng追根究底來查出對失明心態ê形成原因。

Tī人類歷史有文字記載chìn前，宗教ê態度無文獻thang查；真chē目前對失明人ê心態，lóng來自古代ê神話kap聖經文學。希臘神話有真chē kā失明看做是一種天罰ê故事，tùi án-ne繼續影響宗教ê歷史發展。舊約聖經對失明有雙重ê態度，失明人被描述成可憐、無助kap被排斥，摩西律法保護失明人。猶太律法賦予失明人有特權，但mā被禁止參加某一kóa宗教儀式；因為失明hō͘一個人無法度研究律法，所以被認為是神對一個罪人ê懲罰。Tī舊約時代，失明人一方面受保護，某一kóa方面mā受排斥，但chit種矛盾ê社會並無阻止失明人超越其身体ê障礙，而成為聖哲、學者kap作家等。但一般ê失明人tī宗教歷史上，是無跡thang尋ê。

新約聖經改變對失明tī身体殘障方面ê強調，轉為探究其成因kap治療，有真chē失明人得tio̍h醫治ê神蹟。耶穌特別關心失明人，kā失明看做一種需要治療ê殘障，所以行真chē神蹟hō͘失明人ē-tàng看見。M̄-koh，耶穌mā以負面ê態度，引用「失明」chit-ê字來比喻無知kap自欺。失明被看做缺陷、懲罰、驚人ê剝奪kap負面ê含意，基督徒ê慈悲意念形成失明乞丐ê次文化，早期基督教ê教會koh-khah是為甚。Chit種懲罰kap保護ê混淆，tòe歷史ê發展，一直hō͘明眼人困惑bē了解。

保羅kap伊ê門徒將基督教傳遍羅馬帝國，tī四世紀成做國教，以後koh-khah傳遍kui-ê歐洲。失明乞丐受鼓勵到天主教堂大門前唱特別ê祈禱詩歌，法國到十三世紀就有失明乞丐ê慈善兄弟會，受教會、法律kap封建制度ê庇護。Chit種對失明消極ê負面心態、驚惶kap混淆，一直teh人類ê潛意識中無法度袪除。

其他ê宗教kap各種文化，對失明ê解釋mā lóng含糊不清。佛教認為失明是對前世罪孽ê懲罰，墨西哥ê印地安人視失明為tio̍h這生ê行為不檢，緬甸人叫失明為巫師ê做法術，韓國人則崇敬失明人有內心ê異象。目前深植人心ê矛盾心態，埋藏tī chiah-ê文化kap歷史ê起源中，比咱想像ê iáu深。

人類tùi中央價值系統中決定其心態kap行為，將所有ê驚惶、敬畏、否定、考慮kap期待，tùi根深蒂固ê宗教信仰轉變成做對失明ê心態kap行為表現。明眼人潛意識中持有chiah-ê價值觀，既hō͘ tī智力上獲勝，明眼人tī潛意識形成ê心態上iáu是改變不了ê。如果真tú beh改變心態，明眼人就ài面對in之間kap伊個人對失明ê看法，mā ài面對沾滿污點ê失明原始意義ê考量。態度無法度為人而改，必須tùi人本身ê意願來改。

宗教ê領導人，諸如猶太教ê拉比、天主教ê神父kap基督教ê牧師，in負責詮釋信仰ê信息，並以靈性領導者ê地位，來克服人類自我中心ê軟弱。以公義淨化社會ê重擔落tī各宗教領導人ê肩膀上，in boeh以道德ê權威，對人類ê不安全感提出公正ê回答，in ê態度被認為是一個示範標準。In態度ê偏見或是不明確，對社會文化ê衝擊比一般大眾ê偏見大。In ê神學教育就必須注重對失明ê正確態度，而其神學ê理論基礎必須突破歷史文化ê傳統。

據我ê了解，一般神學教育真少重視殘障福音，台灣ê殘障福音mā是由殘障神職人員推動，譬如輪椅上ê陳博文牧師，四界宣講殘障福音，ē-sái講是跟tòe伊ê腳步ê明眼神職人員iáu是鳳毛鱗角。其實身体殘障者siōng需要福音來重建in ê心靈，尤其是視障者ê肉体目睭被關閉，心靈ê目睭卻是明亮ê，若有機會接觸好ê宗教信仰，一定會超越身体ê障礙，燃燒koh-khah輝煌ê生命，照亮烏暗ê社會。

輔導西羅亞盲人合唱團七年gōa來，我一直teh觀察團員為何有án-ne熱心服事神ê心志，tùi in ê詩歌見證中，我寫過一kóa文章，mā寫幾篇個人ê心路歷程。我發現神ê愛ē-tàng點每一個視障者ê生命蠟燭，尤其是「將滅ê燈火，伊不吹熄。」視障者自細漢就不被家人接納，koh-khah受社會大眾以異樣ê眼光對待，in tam bē-tio̍h愛，koh-khah m̄知影什麼叫做愛。有機會進入由基督教創辦ê台中惠明盲校了後，tī基督ê愛裏，in開始有歡笑kap喜樂，有真chē學生寒暑假boeh留在學校煞無願意tńg去厝裡；有真chē學生tī惠明盲校受洗成做基督徒。但畢業一行出校門，殘酷ê社會koh逼in自我鎖閉tī厝內狹窄ê空間內，甚至m̄敢koh再行入教堂。雙連教會成立台北市盲朋友聯誼會和西羅亞合唱團了後，in koh感覺神ê恩典koh再光臨，生命ê火花koh再燃燒，甚至點to̍h生命ê光輝，四界為神ê愛做見證。

教會常講beh「做光、做鹽」，但卻mā常常將教會築起高牆，看bē-tio̍h﹝=盲﹞社區中ê弱勢團体。希望神學院辦好視障福音ê教育訓練，教會也ē-tàng tī神職人員ê領導下，舉辦視障福音研習營，大家同齊來突破視障者kap明眼人e之間ê障礙，以愛化解礙來廣傳福音。

Tī陳博文牧師ê鼓勵下，西羅亞合唱團將kap高雄手語教會聯合，koh再舉辦「百萬殘障福音巡迴佈道會」，希望各教會ē-tàng參與chit項殘障福音運動，願神繼續帶領，將一切榮耀歸予神。


參考資料：“JOURNAL OF VISUAL IMPAIRMENT AND BLINDNESS” JUNE, 1987. “RELIGION AND BLINDNESS：INHERITANCE TO OPPORTUNITY”BY V.E. BISHOP.
﹝台灣教會公報2264 期 1995.7.23﹞