《趁iau2日時》

 | | | 轉寄

僱用殘障人士做什麼?

作者 林俊育 2008.10.19

有一pái kap一位長老tī談論殘障福利法規定私人企業員工應僱用百分之一以上殘障人士ê問題，伊一再質問「僱用殘障人士做什麼?」

約翰福音第九章中闡述盲人m̄是伊本身有罪，mā m̄是伊父母有罪，tùi án-ne是上帝boeh藉tio̍h伊來顯明上帝ê作為。而上帝ê作為kap旨意是beh透過咱基督徒來實踐上帝ê愛。基督徒m̄是「將一切交託hō͘上帝」就好了。咱mài bē記得做基督徒ê角色，是beh hō͘上帝差用ê。Che章經節ê重點tī強調「奉差遣」，去愛hiah-ê需要幫助ê鄰居。

路加福音第十五章第一到七節中，耶穌強調tio̍h重視hit百隻羊中被遺棄而迷失ê一隻。殘障人士tī現今ê社會上被歧視甚至被遺棄，tùi án-ne心理上常有障礙，所以容易迷失，耶穌ài咱放落那好好á ê九十九隻而去chhōe並關懷那迷失ê一隻。咱基督徒beh為殘障人士創造一個無障礙ê就業環境，以上帝ê來愛化解一切ê障礙。嘉義北榮教會ê無障礙禮拜堂kap台北雙連教會僱用盲人幹事是真好ê見證。

殘障人士mā是上帝ê子女，是咱肢體ê一部分，咱bē-tàng歧視in。陳五福博士常勉勵大家:中國字「人」是一長一短合tī同齊，互相支持chiah是「人」，長ê代表恩賜khah-chē ê，短ê代表恩賜khah少ê。人kap動物siōng大ê無仝是:殘障ê動物無法度活落去，而殘障ê人tī人類互相幫助下thang繼續活落去。一般講，文明社會ê標準是看該社會對殘障人士ê關懷程度。

英文字典將 CHRISTIAN 解釋為 (1) 基督徒 (2) 文明人。可見大家kā實踐上帝之愛ê基督徒看做文明人，基督徒tio̍h背起「人類文明」ê十字架。

我個人開始從事盲人事工以後，有真chē機會去參觀國內外盲人重建機構，in一再加強對盲人ê心靈重建、生活重建kap就業重建等事工。我發現美國ê社會現在非常重視殘障人士ê工作機會平等，我去參加國際盲人事工交換計畫ê主辦機構叫做佳樂盲人中心 ( THE CARROLL CENTER FOR THE BLIND) 入門ê接待員是盲人，我一入門伊對我微微á笑講:「我ē-tàng為你效勞mah?」我講beh chhōe院長，伊隨時用電話內線kā院長講外chhōe，便請我坐落來等。我看伊真熟練地接電話，電話有五線，電話鈴一響，伊用檢視器(SCANER)chhōe出電話入來線ê按鈕，如被chhōe ê人無tī-teh，伊to̍h是刻透過盲用電腦鍵入來電話人ê留言，並轉印出文字來， khǹg tī固定ê位，外出tńg來ê人tī該固定位頂chhōe家己所屬ê留言。一切井然有序，做得真好。

最近tī美國看tio̍h片長只有十分鐘ê錄影片“ I work with a guy who is blind and deaf”，敘述一位既盲koh聾ê殘障人士tī LOTUS 電腦公司就業ê情況。Chit位盲聾青年六年前tùi印度來美國，進入海倫凱勒ê母校──波金斯盲人學校 (Perkins School For The Blind) ，伊是海倫凱勒了後hit間學校siōng引以為榮ê傑出學生。Tī高科技電腦ê輔助下，伊ē-tàng kap一般人仝款工作，tī某一kóa地方iáu超越明眼人。

Tī美國受過重建訓練ê盲聾人ē-tàng獨立生活，tī厝內，伊手腕帶一個振盪器，thang分辨敲門聲kap電話鈴響，以判斷去接電話或開門。其電話上裝一個點字ê發話kap受話器，以前tī盲聾人kap盲聾人中間lóng購chit種點字發話受話器chiah ē-tàng通電話。現在美國ê電話公司設有中繼站，透過中繼站thang kap一般人通電話。獨居ê盲聾人腹肚餓了，thang khà電話到中繼站，請其代訂麥當勞或其他任何伊想beh kap明眼人仝款享受ê食品。

大家lóng知影phah高爾夫球是有「差一點á」 (to̍h是優者hō͘先) ê比賽，英文叫「HANDICAP」，kap殘障ê「HANDICAP」同字。咱明眼人如承認是受上帝特別祝福ê優者，就應該hō͘伊殘障人士hō͘先差一點á，為in創造平等ê就業環境，hō͘咱ê社會早日成做文明人 (CHRISTIAN) ê社會，mā就是求上帝國早日臨到咱世間。

阮教會有真chē奉上帝ê名而設立ê事業機構，tī上帝ê愛裡，就應該多規劃些殘障ê就業機會，多花點錢來補足殘障人士ê「差一點á」，花chit種錢對事業機構來講m̄是浪費，mā m̄是賠錢，koh-khah m̄是划算不划算ê問題，卻是對上帝國siōng有意義ê投資，mā是償咱iáu欠上帝傳福音ê債。如無án-ni做，hiah-ê事業機構就無應該掛「財團法人台灣基督長老教會附設」ê招牌。咱千萬m̄-thang bē記得第三誡kā咱講「bē-tàng濫稱耶和華你ê上帝ê名，因為濫稱伊ê名ê，耶和華的確無用伊為無罪」，而tio̍h時時刻刻謹慎為上帝作好ê見證。Koh-khah mài hō͘教會投資ê事業機構成做傳福音ê障礙。

﹝台灣教會公報 2159 期 1993.7.18﹞