《趁iau2日時》

 | | | 轉寄

西羅亞=奉差遣，西湖之行

作者 林俊育 2008.06.22

1988年底，雙連教會基於關懷弱勢團体，成立全台北市盲朋友聯誼會。其中幾位kah意歌唱ê會員發起成立詩班，in大多是tùi台中惠明盲校畢業，lóng有宗教音樂ê基礎。Tī李鳳珠老師ê耐心指導下，利用職業按摩工作之餘，每週一、五ê上午十點到十二點，不辭辛勞而努力無放輕鬆地練習。

因為詩班漸漸茁壯，對外演出mā日漸增多，大家便開始腦力激盪來為chit-ê詩班命名。最後由卓忠輝牧師tī一九八九年九月十日ê主日講道中，以約翰福音第九章「耶穌治好生落來就瞎眼ê人」，來闡明瞎眼kap伊家己或伊父母ê罪lóng無關係，而是beh tī「瞎而不廢」ê人身上彰顯神ê大能力。耶穌講：「我是世上ê光」，便用唾沫kap泥巴抹tī chheⁿ-mê ê目睭上，教伊去「西羅亞」池子洗目睭，結果醫好了伊ê目睭。

「西羅亞」ê意思是「奉差遣」，in ê肉眼雖然看bē-tio̍h，心靈ê目睭卻是明亮ê，所以願被神差遣，以優美ê詩歌來事奉。團員就決定正式取名為「西羅亞詩班」，對教會外則稱「西羅亞合唱團」。

「奉差遣」當然是beh行出教會而進入社會，除了應邀到其他教會詩歌見證外，iáu主動到監獄kap國中去喚醒迷失ê靈魂，koh-khah kap伊甸殘障福利基金會附設ê伊甸福音中心合辦「以愛化解礙」百萬殘障福音巡迴佈道會。

西羅亞合唱團有一個心願到戒毒所去慰藉並鼓舞受毒害ê同胞，但一直bē-tàng其門而入，只是khǹg tī祈禱中。聖經kā咱講「tī人bōe-sái，tī神則ē-tàng」。今年五月二十一日，tī中華基層福音差傳會西湖福音中心ê戴彼得牧師安排下，西羅亞合唱團去西湖國中詩歌見證後，到設tī西湖鄉ê「基督教晨曦會苗栗戒毒輔導村」，kap二十幾位晨曦兄弟共進午餐。

午餐後是晨曦兄弟為二位兄弟beh去泰國戒毒輔導村事奉ê惜別會，阮一陣真歡喜應邀參加。晨曦兄弟們全体合唱二首福音詩歌來祝福beh去泰國戒毒所服務ê二位兄弟，經單位主管ê同意，我將全場錄影落來。

In ê歌聲宏壯而鏗鏘有力，hō͘我一種莫名陣陣震撼ê感覺，koh再通過伸縮鏡頭ê拉近，我tùi各種角度看出chit群決心棄絕毒品ê青年們面上表情，in he-ni渴望神用福音ê救贖，看in he-ni盡心、盡力、盡性koh盡情地唱，in迫切希望透過福音詩歌來療傷，肯定神一定ē-tàng tī-chia hō͘ in拾回生命ê價值。Chiah-ê有信心koh有把握ê情感tùi嘹亮ê歌聲中傳達出來，聽in用強而有力ê高聲o-ló耶穌時，無無為之動容而潸然目屎流落來。

由組長紹介西羅亞合唱團ê事工使命後，晨曦兄弟們koh再唱一首「西羅亞池ê神蹟」來表示對團員ê歡迎。我輔導西羅亞合唱團五年gōa來，第一pái聽tio̍h chit首歌，其意義非凡，特別錄下kap讀者分享。

「我tī he烏夜ê暗時，往何處去chhōe黎明。雖然有鐘響kap雞叫聲，但我目chiu前照常是烏暗。當我初見主面ê時chūn，iáu是冷冰冰ê清早。我tùi你慈愛ê眼中，看見光明燦爛黎明。﹝副歌一﹞oh！主，我ê主，我tio̍h感謝你，你賜我án-ne ê恩典。懇求主，叫我永遠mài tùi-án-ni美境中醒過來。﹝副歌二﹞oh！主，我ê主，你賜我光明，tī奇妙西羅亞池裏。懇求主，叫我永遠沉浸tī che美夢ê醫治中。」

西羅亞合唱團mā應邀唱「阮若phah開心內ê門窗」kap「點to̍h ê蠟燭」來回應，感性而動人ê歌詞加上柔美ê歌聲，出自一陣殘而不廢盲人ê口，m̄免看譜而出自內心koh無指揮ê合唱，hiah-ni̍h和諧koh hiah-ni̍h優雅，想必phah開了晨曦兄弟們心內ê門窗，接受耶穌基督作in ê救主，像點to̍h ê蠟燭去照亮罪惡kap烏暗ê世界，拯救hiah-ê迷失tī毒品中哀號待救ê靈魂。

﹝西羅亞通訊第五期,1995﹞