《胡文池牧師kap布農族》

 | | | 轉寄

非凡ê牧師 一家人

作者 胡文池 2009.12.06

伊是我一生歲月中。所欽佩、敬仰ê同工，阮時常同齊工作，伊是我認bat siōng深ê牧師。Tī羅東小學時，伊bat tòe名畫家藍蔭鼎先生學習畫畫。Tī淡水中學時，bat kap名鋼琴家德姑娘(美國人)學習琴藝．所謂名師出高徒，伊若繼續深造，必定成做相當成功ê藝術家。但是信主了後伊放棄一切世俗ê 慾望，專心跟tòe主－伊就是江天順牧師。伊原是藥師，卻放棄人人求之不得ê職業，一心kap江牧師同工，興起上帝ê教會－伊就是江金定師母。

二人結婚了後，bat向上帝許願，將所有子女奉獻為主所用，in ê誓願果然實現了。三男二女全部進入神學院受造就，成做主ê精兵。

一、全家人lóng讀神學院
江牧師是從來m̄-bat信主ê環境中被神選召出來ê，伊為tio̍h beh入神學院，chiah讀淡水中學。畢業了後，往日本留學，tùi東京神學大學畢業，了後koh再到中國大陸，進入北京恩典院進修，後來koh再轉到南京靈修神學院吸取屬靈ê恩賜。

江師母tī淡水女學院時由宋尚節博士奮興信主。伊本來想beh東京入神學院，m̄-koh父母反對，只好日時讀藥學，夜間chiah到神學大學夜間部受課。

長子榮彰，台大哲學系畢業，自願進入神學院。
次子榮仁，畢業于高雄聖光神學院，伊ê太太是英國人司美玉教士(LEILA SMEE)。

三子榮義，台北浸信神學院，koh再到新加坡三一神學院進修，kap香港人盧樹珠小姐結婚，伊tùi香港建新神學院畢業，koh再讀中華福音神學院，而且到韓國亞洲神學研究院進修，in二人得tio̍h上帝特別ê呼召，作非洲烏人ê宣教師，現在英國受訓練。

長女慶惠，台灣神學院教育系畢業了後，koh再讀神學系，丈夫吳劍秋是外省人，讀改革宗教神學院，koh再到台灣神學院修完B．D課程。

次女信惠，畢業于台灣浸信會神學院，丈夫是布農族松春成先生，就讀于台灣神學院。

像án-ne，全家人奉獻hō͘主ê家庭，tī台灣實真罕得，江牧師夫婦既將子女奉獻hō͘神，所以對子女kap異族結婚ê事mā一切由神安排，m̄-bat提出任何反對歧視ê意見。伊ê家庭有外省人、台灣人、英國人、香港人、山地人，像是一個國際家庭，mā像小型天國，因為天國就是萬國萬民聚集ê所在。「我觀看，見有真chē ê人，無人ē-tàng數過來，是tùi各國各族各民各方來ê‥‥。」(啟示錄七：9)

二、熱心為主工作
江牧師tī日本神學大學畢業了後tńg來台灣，志願到偏僻ê所在傳道，hit時，我tī大甲教會牧會，所以紹介伊到墩á腳庄腳教會傳道，這教會原來ê牧師因薪水siuⁿ少無法度生活，就轉業賣豚肉去了。江師母來大甲開發藥局，扶飼一家族人，江牧師除tī墩á腳傳道不領薪水外，iáu兼牧鯉魚潭教會。

丈人丈ḿ iáu未信主，伊kā in接來屯子腳教會tòa作伙。丈ḿ是熱心ê佛教徒，每日素食，每tú-tio̍h節日就tī教會ê宿舍內擺設祭品敬拜鬼神。Ná親像來便利亞先知kap巴力偽先知鬥法仝款，牧師kap拜偶像ê mā tī同一地力有信仰ê爭戰，結果是丈ḿ戰敗，歸于主耶穌，最後連丈人mā成做基督徒了。

光復了後，第二年，我往東部ê關山向布農族傳道，遇tio̍h伊tī玉里教會牧養平地人，而且每禮拜日下晡，聚集附近ê山胞到教會來。我到玉里附近山地佈道時，伊mā時常kap我同工。

因伊ê熱心，最後mā感動母親信主接受洗禮。
一九六0年，江牧師到花蓮美港開拓教會，現已成做一百五十位信徒ê大教會，tī「chē種多收」冊中，美港教會hō͘編入為增長ê教會。

此外，伊bat開拓光濱佈道所、國富里家庭教會、田埔佈道所(現在成做懷恩教會。)民光家庭教會、卡來灣家庭教會(現在成長成(chiâⁿ)做美德教會)等等。

三、愛ê具體表現
江牧師為tio̍h beh讀神學院chiah進入淡水中學。我讀五年級時，伊讀一年級，因伊是十分熱心ê基督徒，所以阮真緊to̍h熟識。 學校附近tòa了一位真窮苦ê人，我常看見江天順君帶tio̍h學生所食剩ê飯菜hō͘伊食，chit種ê事，一時成做人人lóng知ê美談。

伊ê班上有一位家境甚困彭姓ê學生，伊tī精神上、物質上常hō͘ in幫助。
Tī大甲開藥局時，mā時常以藥品援救貧困ê信徒。
Tī玉里傳道時，mā常用藥品幫助山地信徒。

Tī花蓮時，有一位慕道ê老婦人，嘴齒已全部脫落，bōe-sái咀嚼，soah致使營養不良，身軀衰弱。奈因家貧如洗，那有數萬元thang去補假牙?江師母以愛心kap信心the̍h出車費，千里迢迢帶伊到淡水，chhōe當牙科醫師ê小弟，江師母一路祈求全能ê上帝感動伊ê小弟，ē-tàng為這老婦人免費做假牙。這是極大ê冒險，萬一小弟無願意，豈無浪費車錢mah?而且牧師夫婦ê聲譽mā會受影響。慈悲ê上帝果然垂聽江師母ê祈禱，感動了小弟答應阿姊ê要求，免費為這可憐ê老婦人裝置一嘴真美ê假牙，甚至hit段日子，二人ê膳宿lóng由弟婦招待ê。Chit-ê善舉m̄-nā hō͘老婦人大為感激，mā hō͘近鄰ê人聽得流下目屎來。

朱阿生長老，是熱心為主做工ê傑出人物，伊ê獨生女tī荳蔻年華時過世。長老夫婦年老時無人óa靠，江牧師夫婦帶動全教會ê會友，全力幫助in，安頓in tòa-tī美港教會附近ê國民住宅裡，十多年ná親像一日，大家出錢出力養護in。最後，朱長老ê後事，mā是美港教會全體會友辦妥ê。

四、信心ê祈禱
江牧師凡事祈求上主ê幫助。任何人拜訪伊，伊必定kap伊同心祈禱。
大戰中，伊牧養tī墩á腳教會。有一工一位日本高等刑事到教會來問牧師一個難題：「耶穌kap天皇何者為大?」江牧師對伊講：「我m̄-bat想過這問題，請你kap我同齊祈禱。」講完，就開始一段真長，mā m̄知有jōa久時間ê祈禱，高等刑事受不了，就溜出去，等牧師祈禱完畢，睜開目睭時，伊已敗退á行，不tī hia了。祈禱贏過日本人ê試探。