《胡文池牧師kap布農族》

 | | | 轉寄

為主工作雖苦猶樂

作者 胡文池 2009.11.22

使徒保羅bat稱呼一般俗世ê人為「隨從今世ê風俗、順服空中掌權者ê首領，就是現今tī悖逆之子心中運行ê邪靈。」(以弗所冊二－2)。宣傳救世ê福音就是beh向邪惡ê魔鬼挑戰，因此，傳教者一定beh經過真chē磨鍊kap苦戰，chiah ē-tàng得tio̍h勝利。主耶穌本身tī開始傳道ê時chūn，也bat tī曠野領受魔鬼ê試探。阮這老一代ê傳道人，雖然無經過像使徒保羅hiah-ni̍h chē ê苦難，卻mā難免遭遇真chē挫折、勞苦。主耶穌明白ê kā咱講:「若有人beh tùi我，就當捨己，背起伊ê十字架，來跟tòe我。(馬太福音十六：24)。所以，為tio̍h傳福音á遭受艱難、痛苦，無算什麼，將來tī天頂那永久ê榮耀chiah是siōng重要ê。以下是我傳道生涯所經歷ê甘苦，願kap大家共勉。

一、食ê問題
本人tùi神學院畢業了後，就受派到一間小教會牧會。那已經是五十多年前ê事了。當時每月由傳道局所領tio̍h ê報酬是卅二元五角，á我ê大兄tī鎮公所辦公每月領tio̍h四十五元。假使是新婚ê夫婦，án-ne這筆薪水iáu ē-tàng過bē-bái ê生活。如果gín-á續落來，問題就大了。有一位同工有七、八個gín-á，雖然領了子女津貼。但是gín-á有ê tī中學讀冊，the̍h去交學費了後，chhun落來ê錢就寥寥無幾!因此，in每餐飯桌頂ê菜，總少不了一盤鹹豆腐乳。

當時mā有人向外國差會反應，但是外國宣教師煞講:「我每pái到各教會巡視時，傳道師招待我ê有魚有肉，可見in ê生活是真豐富ê。」伊不bat中國人是以禮待客，雖然家己每日刻苦儉食，但是招待人客一定會準備好ê菜來饗客。Á外國人就無仝款了，隨便二、三道菜就ē-tàng宴客了。

因為傳道人ê收入微薄，所以常時有一句俗語稱呼in為「貧傳道á」。有一位未婚ê傳道師向一位心愛ê小姐求婚，伊ê父親講:「假使我有一頭牛，我一定會kā伊綁tī青草多ê所在。」用chit句話來拒絕chit件婚事。

第二次大戰末期，一切生活物資優先分配hō͘日軍，因此民間食物koh-khah缺乏，lóng是用配給來限制人民ê生活用品。

二、衣ê問題
牧師、傳道師tī社會上是「士、農、工、商」中屬tī上流ê「師」級人士。雖然生活貧苦，但是，一旦khiā-tī講台頂或交際上，服裝就bōe-sái馬虎，以免hō͘人看bōe起。

五十年前，寒天毛織男西裝一套tio̍h卅元。我知影神學院畢業了後第一禮拜就beh上台講道，所以預先向裁縫店訂做一套烏色洋服。因身上無夠額ê錢，所以kap主內店主商量，以每月償iáu五元ê條件訂做。皮鞋mā只有一雙，禮拜日講道或外出開會時chiah穿。

三、行ê問題
阮chit代盡程退休ê老牧者，是經過日本人統治臺灣ê時代，tī in剝削、控制下，一般人生活窮苦，連買一台腳踏車ê能力mā無。阮每pái探訪會友，或家庭禮拜，lóng是靠雙腳行路。第二次大戰末期，美國飛機ta̍k工轟炸臺灣，因此火車只tī夜間行駛。夜間行路mā bōe-sái點燈，所以koh-khah不便。二次大戰結束，臺灣回歸中國，原住民得tio̍h信仰ê自由。微僕入山傳道，lóng是步行登山，siōng短ê行程也tio̍h行二小時，有時甚至行一工。雖然肉體厭倦，但看tio̍h信徒人數口增、信仰益堅，教會增長有淡薄á快，心中就感覺極大ê喜樂kap安慰。

四、結語
阮老一輩ê牧師雖然收入不豐，但因生活儉僕，量入為出，所以m̄-bat舉債度日。凡事靠主，每日感謝、喜樂。現在老了，兒女mā長大了。In mā lóng tī教會中服事，並盡孝心來奉養父母。傳教師獎慰會每月mā會寄來生活補肋費，阮心中充滿溫馨。同時koh-khah tio̍h感謝上帝無限ê愛kap主內兄姊對老僕人ê照顧kap關懷。