《胡文池牧師kap布農族》

 | | | 轉寄

酒是萬惡根源

作者 胡文池 2009.10.25

一九四七年，我初到關山時，常看tio̍h布農族人蹲tī街道邊，三五結群飲酒，談笑歡樂。有kóa人已經醉倒tī路邊睏。無論iáu teh飲酒ê或倒tī路邊ê lóng是全身lah-sap不堪，情景十分可憐。

「酒」，布農話是「davus」kap「甜」(madavus)同一語源。Tī山區無糖仔，hit種iáu未變成酒ê發酵飯，甜甜ê，是高級ê米糕飯，莫怪「酒」ê名字叫「甜」，確實不虛其名。

一九四八年，有一個暗時，我tī延平鄉桃源村佈道了後，當地ê鄉民代表真細jī地留我tī in-tau過夜。

早頓時，桌頂只放了一大碗朱紅色ê飯，其他無任何佐料。我食時chiah發現飯是甜甜ê，我問主人「這是什麼?」伊答講：「是造酒ê原料，這飯無久會變成酒。」

In造酒方法非常簡單。經過發酵ê米飯內含酒精，只要除去其渣滓，汁就ē-tàng飲用了。Chit種粗製ê酒，雖然含有雜質，飲多了仝款thang hō͘人醉倒。

酒tī山地確實造成真大ê損害。

一、糧食ê損失
日人統治ê初期，in thang自由造酒。M̄知節制ê山胞先民因製酒耗盡了龐大ê糧食。當久旱收成無好時，欠缺糧食，soah致使全家餓死ê事件也bat發生。

二、金錢ê損失
自從小鎮賣有米酒了後，山胞紛紛前來購買，無錢只好賒賬，因此每工lóng可見到山胞挑運蕃薯或薪木前來iáu酒帳。還了舊帳koh再欠新帳，次日勞碌工作koh來iáu帳。Án-ne繼續落去，永久成做酒ê奴隸。

Tòa-tī靠近山地ê商人，大thàn原住民ê酒錢soah致使發財。原住民若口袋有三元五元，總不考慮留待明á載，即時買酒，無人kā錢存在銀行。直到福音傳入山地，智識大開，現在已經有真chē人將錢存入銀行了。

三、健康受損
飲酒了後容易患感冒，這是人人lóng知ê事實。

原住民飲酒不時不醉不散，非醉無停，醉酒了後tòe地倒下睏。寒天koh-khah易招來傷風感冒。

以前ê原住民，無患高血壓或心臟病者。但是to̍h是有百分之七十人口是肺病患者，因為in不注重衛生，感冒、慢性氣管炎soah致使變為肺病。

四、犯罪之源
「濃酒hō͘人喧嘩」(箴言二十：l)

In醉酒了後，性情變hia-pai兇暴，soah致使時常發生爭論，甚至相打。若tī村莊內底，男女老幼集體飲酒，有ê人故意少飲，tī大家醉倒了後行淫。的確，「酒會hō͘人放蕩」(以弗所冊五：18) 十多年前，tī關山附近有一位布農族人，因醉酒倒tī路邊，無thang奈何，其妻叫不醒伊只好先tńg去厝裡看顧子女。

其夫醒來時已經是午夜，步履蹣跚地tńg來到了家，伊懷疑其妻另有新歡，chiah會放棄伊獨自tńg去厝裡。Tī酒意iáu未完全清醒時，糊糊塗塗地，竟然the̍h起自用獵槍，對準其妻開槍，「碰」了一聲，其妻臥地，血流不止á死。

翌晨治安人員來到in-tau，以手銬銬了兇手，beh chhōa伊行時，伊ê四歲gín-á，giú-tiâu伊ê衫褲不放，並大聲啼哭講：「爸爸!為什麼你要phah死媽媽?為什麼?」

旁觀者lóng流出了同情ê目屎，感覺可憐。

五、出草(獵人頭)ê原因
以前有一句俗語講：「大陸有虎，台灣有高山族。」

這是當時ê人siōng驚ê事。日本政府bat tī山麓界線teh鐵線kā圍，帶有高壓電，來防止in落山。

In為什麼高山族以前bat殘忍兇暴，出來獵人頭neh?

根據in由先民傳落來ê故事講：「大約三百年前，有一個台灣人名叫Baksia，有一工，伊邀請數名族人到集集街飲酒，m̄知何故，伊tī酒中放毒殺害了這數名族人。因此in ê同胞為tio̍h報仇，就開始獵人頭。」

被欺負受壓迫ê人，tī無法度忍耐時出手傷人，mā是真自然ê事。In siōng早ê動機mā可能是報復，但是了後來tī山胞ê心目中，有出草(獵人頭)ê膽量chiah會hō͘人尊為英雄。

但是beh出來獵人頭mā是一件危險ê事，因此tī出發時，必須飲酒壯膽。飲了酒，chiah會喪失理性，後果真是不堪設想。

六、酗酒soah致使不生育
上帝對始祖講：「lín tio̍h生養真chē兒女，hō͘ lín ê後代遍滿全世界。」這是上帝對人類ê祝福。所以人口增加是自然ê事。

一九四五年台灣光復時，布農族ê人口是一萬八千人。Chit-ê數目是自十多年來一直維持來ê，一點lóng m̄增加。查其原因有二點。第一點是結婚了後ê女人有半數不生育。第二點是，因為in不bat育兒ê方法，真chē嬰兒患破傷風，或營養不良á夭折。

對tī平地人來講，除非用人工避孕，或者患病，若無一般ê婦人lóng會生育ê。布農kap平地人lóng是仝款上帝ê兒女。其不生育ê原因只在tī酒ê問題。

自開始向原住民傳道以來，阮長老會ê方針是堅決禁止信徒飲酒。到一九七0年布農總人口已增加到二四、二0七人，增加人數多達六千gōa人。由此可見酒毒害了真chē布農女人bōe-sái生育。

一九七0年以後ê人口問題我bōe-sái koh再提起，因為這時代to̍h是政府獎勵節制生育，kap酒ê問題已無關係了。