《胡文池牧師kap布農族》

 | | | 轉寄

天火大燒日本神

作者 胡文池 2009.05.03

第二pái世界大戰末期，日本政府tī台北圓山興建規模宏大ê大神宮，並恭請天照天神(to̍h是日頭神)來坐鎮助戰。誰mā料想未到，當神宮開張大吉前一日，忽然天降大火，燒燬大神kap宮殿，無久日本就戰敗了。

Chit件事雖然是過時ê新聞，但卻是各時代基督徒所樂道ê大故事。日本人自一八九五年入侵台灣以來，雖然m̄敢禁止台灣人ê宗教信仰，煞限制十五萬山地同胞ê宗教自由，除了信仰日本神道之外，不准in信仰其他任何ê宗教，特別是基督教。

主耶穌最後ê命令講：「lín tio̍h往世界各地去，hō͘所有ê人lóng做我ê門徒，奉父、子、聖靈ê名hō͘ in施洗，並且教導in遵守我所hō͘ lín ê一切命令。」(馬太福音二十八：19－２０)chit句話內底ê「所有ê人」當然包括了chiah-ê山地民族。

台灣初代宣教師對chit-ê tāi-chì mā有負擔，但bē-tàng其門á入。到一九一二年十月，tī彰化召開ê首屆台灣基督長老教會大會bat熱切提議，負起山地傳道責任，日本政府認為新宗教將妨害山胞ê原始信仰á嚴禁。當時有一位日人基督徒井上伊之助願實踐「愛ê宗教」來感化殺死in父親ê山胞，但是mā無被許可。幾年了後有一位加拿大聖公會宣教師葉資牧師(Rev.N.Ya-tes)bat獨自在台東卑南暗暗ê向彪馬族(Pyuma)傳道數年，但其效果並無彰顯。

Tī第二pái世界大戰時，日本人極力推行「皇民化運動」，鼓勵台灣人講日本話，推行「華語家庭」(to̍h是日語家庭)並將中國姓名改為日本名。最後命令台灣每一個家庭設置日本小神社(kamitana)，買日本神、天照大神ê神主牌來做敬拜。自此對教會ê壓迫koh-khah厲害，命令每主日禮拜時，敬拜上帝chìn前tio̍h先向東方「遙拜皇太神宮」to̍h是敬拜天照大神為siōng重要。這天照大神就是日頭ê神格化，亦就是崇拜日頭。

戰爭中，日本有南進計劃，以建設「大東亞共榮圈」ê美名來侵佔東南亞一帶，為tio̍h beh借重日本神ê力量，因此tī台北圓山，bat花費數年時間，全部採用高級ê香檜木來建造規模龐大ê「天照大神」大神宮，並恭請日皇ê大祖神來援助其侵略大業成功。
大神宮完工了後，就擇定吉日良辰舉行落成大典。典禮兩工前，bat派一位大官員坐專機由日本天照大神ê祖家皇太神宮，恭迎大神分身來台坐鎮。大神tī台北過了安靜ê一夜，次日就beh迎接to̍h是 熱鬧koh光榮ê大日子了。

不料，當日中晝，有一架日本飛機，專程滿載由中國大陸等各地搶來ê金銀財寶飛來台北。講來真奇怪，台灣這幅廣大ê土地，各所在lóng boài，偏偏選中teh-beh開幕ê大神宮，這架飛機突然tī神宮上空大爆炸，對準神宮墜落，m̄驚犯了不敬之罪，立時引來大火kā天照大神kap宏偉ê神宅燒得寸草不留。這甘m̄是上帝ê安排mah?

Chit件大新聞，tī當時ê報紙煞無刊出，講實在， bōe-sái mā m̄敢刊登出來，因為chit-ê不吉利ê消息，會影響人民ê心情，打擊戰場上士兵ê士氣。

但是當日親眼看tio̍h大火燒燬神宮ê日本人，個個lóng搖頭嘆氣，內心有數，但m̄敢言出。反之，有智識ê台灣人無m̄是暗中交頭接耳，議論紛紛，猜測日軍之末日已到，感覺無限安慰。

古時，上帝kám m̄是是tùi天頂降下大火燒燬所多馬kap俄摩拉mah?(創世記十九：24 )

「án-ne，lín就kā第五十年分別出來，向全體居民宣佈chit一年為自由年，為五十年節。Tī chit一年，所有賣去ê產業tio̍h還hō͘原主或原主ê後代，以前被販賣為奴ê得tio̍h釋放，tńg來到家己ê厝。」(利未記二十五：10 )

無m̄-tio̍h，神ê話必然應驗，日本管轄台灣整整五十年了，台灣tio̍h歸回祖國，原住民tio̍h歸到上帝國。

果然，chit件事發生以了後無久，日本戰敗，台灣光復，島民得tio̍h自由。

宗教自由chiah有山地傳教，所謂二十世紀ê神蹟chiah迅速發展。

聽講，大火ê次日，日本政府bat動員tī台北ê女中學生到全烏ê灰塵中，boeh撿回金銀財寶，到尾所得tio̍h是jōa-chē就m̄知了