《台灣人e5先覺─黃彰輝傳》

 | | | 轉寄

黃彰輝kap神學教育基金

作者 圖屠大主教（1984年諾貝爾和平獎得主） 2009.01.18

1972年，我奉「普世教會協會」（下文簡稱普世教協）ê「世界宣教kap傳道委員會」指派為「神學教育基金」副主任，來到英國肯特邵布倫來市倫敦路十三號。當時普世教協因為發起「反種族歧視」運動，金援「非洲民族議會」kap「泛非民族議會」chit兩個南非政府看做恐怖組織ê地下黨團，koh hō͘主張種族隔離政策ê南非政府看做眼中釘；所以阮m̄知南非政府kám bē拒絕發放護照，阻擋我就任。M̄-koh我ê申請竟然得tio̍h允准lah。Tī當年，南非政府願意發放護照hō͘一個烏人實在是從來m̄-bat看過ê特例；tùi-án-ni，我tio̍h展開了生命中一段非常重要ê歷程。

阮chit-ê團隊由四位副主任kap執行主任黃輝彰牧師作伙組成，每一個人負責無仝ê地區。譬如巴西籍ê阿哈隆．沙普賽鍚安（Aharon Sapsezian）負責中東kap拉丁美洲地區，伊是亞美尼亞人。來自美國ê吉姆．柏基斯特（James Berquist）（伊是唯一ê白人）負責印度地區；黃牧師kap周藤負責亞洲其他地區。所執行ê專案是普世教協「第三訓令」ê一支，主要任務是推廣所謂「第三世界神學」所屬機構kap教會ê本土化。簡單來講，就是tī各地推廣傳道人才教育，hō͘神學教育tī地方紮根深化、融入地方色彩，解脫基督教久長以來hō͘人看做外來文化ê形象。

菲力普．波特（Philip Potter）因為擔任世界宣教kap傳道委員會總幹事表現真好，進一步koh榮升普世教協ê秘書長──有色人種擔任chit-ê重要ê職位，伊應該是第一人。繼任ê總幹事是來自玻利維亞ê艾米力歐．卡斯卓（Emilio Castro）。伊出色ê表現，mā預定伊日後跟tòe菲力普ê腳步、接任普世教協秘書長chit-ê職位。

阮五個人無論tī種族、國籍ia̍h是教派上lóng完全無牽連。黃牧師隸屬長老教會，周藤是衛理公會派，吉姆是路得教派，我是tī英安利甘教派。阿哈隆大概是衛理公教派ê。組織ê官方語言是英語，m̄-koh阮kan-tāⁿ有一個人ê母語是英語。阮ê成長背景mā完全無相仝。周藤tī中國大陸出生，m̄-koh tī新加坡大漢；吉姆是美國公民，soah tī印度教一段chiok長ê時間ê冊；阿哈隆ê內心充滿亞美尼亞大屠殺ê陰影，iū-koh受tio̍h拉丁美洲解放神學觀念chiaⁿ深ê影響。黃牧師是一個難民，tùi伊ê祖國福爾摩莎，mā就是今á日ê台灣走出來；講到我，to̍h是來自不公不義、無自由、實行種族隔離ê南非共合國。雖然阮之間有chiaⁿ chē無仝，m̄-koh soah有一個共通點，he就是tī阮身上lóng ē-táng看tio̍h sàn-chhiah、腐敗、剝削、破病政府ê影像；這to̍h是阮轄區中急ài改善、盤根錯節ê麻煩問題。

Tī定期ê工作會議上，阮會提出每一個人家己ê計畫，chhan-chhiūⁿ tī轄區ê大專院校設立獎學金用來培育宣教人員，ia̍h是建立圖書館等等，然後說服其他四個人ê提案chiah是頭一個ài做ê。會議中tiāⁿ-tiāⁿ有衝突，充滿火藥味，因為大家lóng想beh爭取經費，因此tī審查其他同事ê提案ê時特別嚴格。M̄-koh黃牧師總有辦法hō͘大家 tī chit種緊張ê氣氛下保持冷靜，tī激烈ê爭吵了後iáu ē-tàng維持友誼。阮每一個人lóng有每一個人ê脾氣、每一個人lóng有每一個人ê出發點，ē-tàng將án-ne一個團隊維持tiâu，我想除了伊以外bē koh有第二個人。伊承受tio̍h流亡國外、離鄉背井ê痛苦，iáu ē-tàng將阮五個人團結起來，hō͘我非常敬佩。伊從來m̄-bat自嘆自憐。伊ê境遇kan-tāⁿ加深了伊敏感別人ê痛苦ê胸懷。

有伊 chit種上司兼好友，我感覺tio̍h非常ê光榮。真chē kap伊接觸過ê人，lóng kap我仝款因為伊所以改變了人生。伊是上帝完美koh忠實ê僕人。伊是一位偉人。我真有幸ē-tàng為伊ê傳記作序。伊必然聽tio̍h了伊ê上帝、伊ê主對伊ê o-ló，「好ah！我忠實ê良僕。」

2004年4月13日