《台灣人e5先覺─黃彰輝傳》

 | | | 轉寄

晚年ê活動

作者 張瑞雄 2009.05.17

１退而不休 tùi 1979年8月退休以後，除lah為神學教育，普世教會聯絡、交誼、受託出動，mā為台灣人民ê自決kap將來奔走外出以外，黃彰輝lóng是留tī厝內。就是因為伊以前ê同事、學生、朋友普遍散居tī世界各地，lóng想念伊，希望chhōe伊表示尊敬kap關懷。黃彰輝mā算是好客，就容許in到Sussex省Seaford市ê The Bye家去看伊。慰爾師母算是真親切體貼，以siōng大ê誠意款待少年一輩。所有台灣基督長老教會歷屆議長kap牧長往歐洲開會tī英格蘭停留ia̍h-sī留學生ê人，大概lóng到過in ê『招待所』。黃牧師ang-á-bó͘預備chi̍t-ê房間，內底有一張單人床。餐食無像台灣ia̍h-sī美國仝款ê『排滿餐桌ê菜餚』，但是簡單ê洋式飯菜，真正表露黃牧師ang-á-bó͘ ê誠意、歡迎。M̄-koh，到過黃牧師厝內ê後輩，thang體會tio̍h in ê日常生活並無寬裕，mā感覺英格蘭人ê食物無夠豐富，有人感覺比起美國甚至台灣，lóng算是貧困ê，in靠退休金ê生活，算是刻苦ê。莫怪有kóa bat受愛護kap教導ê眾學生，lóng tī第二pái訪問in ê時chūn，會買一kóa故鄉ê好料饋贈in，當做一種加菜。台灣人ê特點，就是bē留意tòa高級ê厝，穿高品質ê衫，但是真關心每工ê餐食，因此，遇到親人ia̍h-sī朋友，lóng先問：『您食飽bōe？』黃牧師以前ê眾學生，lóng抱有恩師晚年無『食ê福』ê印象。Tī偏僻ê異鄉，bē-sái買到故鄉氣味ê食物，koh bē曉調理台灣式ê 手路菜色，所以，互相告知隨後到英格蘭ê學生好友，chah hō͘黃牧師ang-á-bó͘一kóa台灣故鄉好料，以聊表師恩。

請看下面黃牧師ang-á-bó͘晚年居家相片：

下底三張相片是張千惠南神校友tī 1980年到Seaford訪問黃彰輝牧師ang-á-bó͘ ê時chūn，tī黃彰輝ang-á-bó͘公館ê客廳所hip ê相片。

下圖是退休了後tī「我家」享受心身放鬆ê黃彰輝。(孫鴻鎮提供)

下圖是丈夫終於會得thang長期tòa tī厝內ê慰爾師母。(孫鴻鎮提供)
下圖是退休後居家ê黃彰輝kap慰爾ang-á-bó͘ ê福照。(張千惠攝，孫鴻鎮提供)

慰爾師母tú-hó tī我訪問Seaford ê三pái，lóng beh去醫院，並且兩pái tòa院，暗時無tńg來。有一pái，黃牧師邀請我同齊去巴士站接師母tńg來，tú好我chah tio̍h照相機，我就拍攝in ang-á-bó͘ tī街路牽手行路ê相片，原來年老ê師母是『法定公認ê盲目』，出入無自由，mā無方便。

下圖是黃彰輝kap慰爾手牽手tī英格蘭ê Seaford街路行路ê相片。（張瑞雄攝）

Seaford是英格蘭南端ê chi̍t-ê小鎮，人口大約一萬六千人，因為靠海，過去bat有chi̍t-ê時期是觀光勝地。黃家ê公館是設tī離海岸無遠ê所在，但是因為建立tī距離海面有kóa高度ê『壁崗』上，無海灘，mā無ē-sái接近水邊ê建設，án-ne，對黃牧師是chi̍t-ê絕好行路探望自然ê好環境。伊tī自然公園內底租 chi̍t-ê小寮，放一kóa登頂下坡採取自然植物用ê器具，mā有運動用ê衫褲、飲用水等等。天氣好ê時chūn，伊就作探勘自然ê『冒險』。

Tī黃家公館ê後面，有真大ê草埔。黃牧師kā我講，伊是除雜草ê專家，就示範hō͘我看，伊手the̍h一條下有尖銳扁平ê鐵棒，一插入草壤，向邊á倒棒，連根ê雜草就hō͘挖出地面，thang輕可除掉棄sak。黃家ê草埔非常táⁿ-le̍k，潔淨可愛。可見伊真用心撒水施肥。Tī右牆邊有築一小塊田地種花種菜。花圃kap草埔上ê花開ka̍h茂盛鮮艷。

有一pái，黃牧師kap我到街路去散步，ná行ná講，行過一間禮拜堂，黃牧師指hit間禮拜堂，kā我講hit間是Seaford市內ê聯合歸正教會。又koh講伊退休到Seaford了後，就勤勉參與hit-ê教會ê活動。因為伊豐富ê知識kap經驗，會友選伊出來做該教會ê『長老』。我驚一tiô，長老？一旦身為牧師，終其一生不就是牧師嚒？伊講：『牧師ê職位是退而且休lah，但是我做長老，是現在tú-teh進行ê，我需要活動活動。』看tio̍h伊ê生活態度，kap一生不倦事奉主ê精神，我真正大受感動。現今過了20 gōa年lah，我ê心裡iáu存tio̍h he感動ê火焰，照常燃燒不熄。

下圖是Seaford聯合歸正教會ê牆壁頂，框掛教友為黃彰輝kap慰爾刻製ê紀念銅碑。

Tī 1979年熱天，因為神學教育輔導會（PTE）ê支援，kap亞洲基督教會協會合辦，tī香港開了華人神學研討會，由道風山kap亞洲基督教協議會主辦，參會者有台神、南神、輔大神學部（天主教學者）、在台耶穌會、新加坡三一神學院、香港宗基大學宗教部等等，koh有北美ê台灣教會張瑞雄kap趙聰仁hō͘邀請參加。這一pái ê研討會，是黃彰輝teh-beh退休時所舉行ê。

黃彰輝退休了後，siōng頻繁ê來往航空站是倫敦－紐約之間。Tiāⁿ-tiāⁿ tī美國有演講ê機會，ia̍h-sī有人有私事ài伊幫忙，譬如：結婚禮、募捐，尤其是關於教會kap台灣ê未來相關ê tāi-chì，mā有北美台灣教會協會tiāⁿ-tiāⁿ邀請伊參加。

Tī紐約ê吳來好女士，是黃彰輝tī台南神學院院長ê時代，伊負責tòa校學生生活ê總務，kap協談ê工作。伊固定僑居ê所在，成做黃彰輝tī紐約ê另外一ê tòa-hioh kap招待所。有時，吳女士kap愛謢教會kap台灣ê有志者，mā樂捐支助伊ê越洋旅費。每pái伊tī紐約暫停ê時，就一定會訪問tī紐約kap美國東岸ê台灣人教會。另外，tī芝加哥牧會ê南神校友王再興，mā熱心資助黃彰輝ê訪美活動經費。

Tiàm tī紐約ê期間，lóng是魏瑞明做司機，載伊到各地去訪問kap辦理事務。每一pái tī美國，lóng至少一pái往返紐約kap華府（華盛頓）之間，因為tī紐約有河邊街475號（475 Riverside Drive）ê聯合基督教會宣教中心。Tī華府有白宮、美國國會（上下院議會），kap蔣政權國民黨ê代表處。台灣ê政治活動人士有彭明敏、蔡同榮、陳唐山等，時常kap美國ê國會議員取得連絡，mā請in提出擁護、紹介『台灣』ê聲明kap議案。

每pái tī北美完成伊ê使命kap事務，到beh tńg去英格蘭ê時chūn，由吳來好、魏瑞明kap王愛籣，為黃牧師準備，買各種食品，hō͘伊chah tńg去厝內。

自1975年到1980年期間，m̄知黃彰輝到過舊金山kúi-pái，m̄-koh至少tī 1976年kap 1978年ê兩pái，是由筆者負責招待mā做了響導。Tī舊金山ê名勝地，tio̍h者lóng開車載伊去看mā攝了bē少ê相片。

下圖是黃彰輝khiā-tī美國舊金山ê金門橋前ê雅姿。（張瑞雄攝）

下圖是黃彰輝khiā-tī金門橋上ê雅姿。（張瑞雄攝）

下圖是黃彰輝tī舊金山漁船港ê露天海產灘（Fisherman’s Wharf ê Grotto），tam過chiah-ê小食了後所hip。（張瑞雄攝）

下圖左是tī舊金山唐人街照相留念；下圖正pêng是tī金門公園園內ê五層塔前所hip。（張瑞雄攝）

２最後一pái ê回國 Tùi 1965年卸下台南神學院院長一職，就任tī普世教會協會，到1987年7月，整整22年期間，黃彰輝lóng是徘徊tī台灣之外。因為伊對弟子ê感化kap影響力真大，koh tī國際關係上有真高ê知名度，國民黨政權m̄敢下手逮捕伊，但是想各種辦法阻止伊為台灣ê將來kap台灣人ê自決運動拓展並且發揚光大。國民黨政權所用來懲罰伊ê是kā伊列tī『永不准回國』ê烏名單上。

台灣基督長老教會把握了解嚴ê機會，tī 1987年春天，開始向中國國民黨申請准予黃彰輝回國。佳哉，因為李登輝教授現今會得thang做副總統ê身份(註一)，特別kā伊幫贊，終於離台22年了後，ná親像眠夢仝款 ê tńg來lah。第一pái伊留英ê時chūn，就是因為第二pái世界大戰，伊留tī海外11年；第二pái是因為愛祖國台灣，mā為tio̍h beh台灣人得tio̍h自決，hō͘強迫登上烏名單，歸bē-tàng台灣，án-ne，就比第一pái等待了雙倍ê時間！真chē朋友、眾學生一接tio̍h消息講，黃彰beh tńg來台灣lah，mā tùi外國趕tńg來，beh聽伊關於台灣ê宣教，也tio̍h kap伊一同感恩，稱謝黃彰輝為普世ê教會，mā為台灣phah了hiah-ni̍h好ê勝仗。大家lóng真歡喜，mā感覺真沈重ê來見伊，而且一再哀愁ê kā伊講再會。因為醫生已經tī一年前就講伊患了肺癌，可能kan-tāⁿ有四個月到兩年ê存活時間niā-tiā。

7月29-31日，到新竹聖經學院禮堂參加台灣教會宣教研討會，其主題為『台灣宣教ê契機』。黃彰輝是第二工下晡2:20-2:40為研討題目：『chit時chit所在宣教神學ê探討』做引言主講。因為考量伊ê健康狀況，kan-ta請伊講20分鐘。續落來由黃伯和講『kap本地文化ê關係』，又koh請董芳苑講『kap其他宗教ê關係』，各為40分鐘。黃彰輝演講ê內容，無記錄落來，但是有一篇演講ê題目是『什麼是神學教育』伊用20分鐘時間做簡單ê說明，由神學教育談到在台灣、tī世界情況下ê宣教。

以下一系列ê相片，是tī研討會中所hip ê：

(1) 會中，黃彰輝kap黃伯和用仝一個主題『chit時chit所在宣教神學ê探討』，發表演講。黃彰輝『坐tī首排』注意聽ê雅姿。（高俊明提供）

(2) tio̍h者（左二）kap台灣自決運動ê功勞者黃彰輝（右三）、黃武東（左三）、林宗義（中）、高俊明（右二）、羅榮光（左一）、趙有源（右一）等，共同攝tī會場。（高俊明提供）

(3) 特別tùi英、美回台赴會ê先輩，tī會場攝影留念。前排tùi tò-pêng分別是：安師母、安慕理牧師、黃師母kap黃武東牧師、黃彰輝牧師、林宗義醫師、李豐明等等。（高俊明提供）

8月2日，長中因為這一pái難得ê機會，黃彰輝會得thang返校，並且因為伊，mā來了黃武東、安慕理、林宗義等等，tùi án-ne tī長中聚集了滿禮堂ê校友，做了一場感恩禮拜。以下是tī禮拜中所hip ê相片。

下圖是tī會中黃彰輝舉手祝禱（孫鴻鎮提供）。

下圖為眾傑出長中校友中，前排tùi tò-pêng分別為：高俊明、安師母、安慕理、林宗義、黃彰輝、黃武東、黃師母、趙有源。（孫鴻鎮提供）

8月3日，台南神學院特別為黃彰輝kap傑出校友黃武東、傑出教授前副院長安慕理，舉行榮譽神學博士學位贈與典禮。黃彰輝以『什麼是神學教育』為題所做ê演講內容：

這可能是最後一pái我有機會公開來講述我所認為ê神學教育是什麼。我ē-tàng tī我所摯愛ê學院hō͘我榮譽博士學位時來講述這題目，實在感覺真榮幸。

畢生做為chi̍t-ê神學教育者，對神學教育ê問答，我心中有一段使徒保羅ê話來做為總結，chit段話是tī加拉太冊四章19節。保羅講：『眾細kiáⁿ！我koh一pái親像母親為lín忍受生產ê痛苦，一直到基督ê特性tī lín ê生命中成形。』

任何真確ê神學教育是，mā必需有三層ê『基督ê成形』。神學教育是一件ná親像母親beh分娩仝款嚴重ê tāi-chì，就親像保羅講ê『……ná親像母親忍受生產ê痛苦，一直到……。』今á日我是tī阮chit間學院對我所摯愛ê神學教育同事tī講述chit項tāi-chì。

事(tāi)先，我先tùi chhián-hiān ê方面講起（可能是chhián-hiān ê），神學教育ê目的是牽連tio̍h神學ê成形。伊m̄是kan-tāⁿ teh積聚jú來jú多ê神學知識，我並m̄是看輕chiah-ê知識，卻是認為咱mài成做chi̍t-ê kan-ta會學習引用別人知識ê神學家。除了學習kap知識之外，咱必需忍受生產ê痛苦，一直到基督ê心tī每一ê人身上成形。咱ê目的是m̄-nā kā咱家己ê心，mā kā別人ê心成做以基督ê心為心（腓立比冊二：5），hō͘每一ê人lóng ē-tàng講：『現今tī思考ê m̄是我，卻是基督tī我內底思考。』

其次，神學教育ê目的是牽連tio̍h服事ê成形，這應該mā是chhián-hiān ê tāi-chì，但是事實上，每pái神學教育tī學識上愈進展，服事ê成形kah-ná就愈hō͘忽略。（有一件tāi-chì我ài tī chia補充ê，就是tī宣教協議會ê時，當有人提議tio̍h chi̍t-ê神職人員tī hō͘任命為神學教育者前，必需先有五年ê實際服事經驗，chit-ê提議竟lóng無多議ê就hō͘否決，原因是以巴克禮博士kap我做例子，kah-ná阮chit種tī極不尋常ê情況下ê不尋常例子，是無應該hō͘用來做例子ê。當我tī神學教育基金會工作ê時，有bē少我訪問ê神學院，因為有kóa in ê神學教師無夠額ê服事成形，致使hō͘學院帶來bē少困擾。Á我所謂ê『服事成形』，並無意思是講kan-ta tī一kóa技術ia̍h-sī技巧上ê獲取。仝款ê，我又koh m̄是看輕chiah-ê技術ia̍h-sī技巧，卻是除了chiah-ê技術kap技巧之外，咱必需忍受生產ê痛苦，一直到基督ê服事tī每一個人成形，chit-ê服事mā是主家己所講ê：『我來是beh服事人koh m̄是hō͘人服事』，kap『我tī lín中間親像chi̍t-ê服事人ê』。咱每一個人lóng ài全心關注服事一直到咱ē-tàng講：『m̄是我teh做工，tùi án-ne是基督tī我內底做工。』

最後一方面，mā是siōng重要又koh是神學教育者siōng艱困ê工作，chit方面時常hō͘世界上tio̍h有名ê神學院ia̍h-sī大學完全忽略ê，kā伊看做kap in ê教育無相關ê，就是『生命ê成形』，神學教育ê目的必需牽連tio̍h『生命ê成形』。咱必需忍受生產ê痛苦，一直到基督ê生命tī每一ê人身上成形，『一直到咱lóng同歸tī……會得thang長大成人，滿有基督成長ê身量。』（以弗所四章13節）chit-ê koh痛苦koh歡樂ê期待tio̍h基督ê生命tī咱每一ê人身上成形，tùi án-ne是神學教育siōng重要ê部份。每一ê神學教育者，當伊ia̍h-sī伊ê眾學生m̄-nā ē-tàng講：『基督tī我內底思考』kap『基督tī我內底做工』，而且也ē-tàng kap保羅同齊講：『m̄是我teh活，tùi án-ne是基督tī我內底活。』時，tùi án-ne是chit位神學教育者siōng光榮歡樂ê時刻。

若是神學教育ē-tàng注意tio̍h這三方面ê成形，nā伊必定會去關心顧tio̍h上帝ê全人ê培養，因為教會ê宣教kap生命必需靠這上帝ê全人來維持。若是神學教育真正ê對『直到』chit-ê字持以認真正態度，『直到』基督ê這三層面tī咱身上成形，nā伊必定會去關注到每一ê基督徒ê kui-ê生命。甚至到像我chit-ê年紀做神學教育者ê我，mā只ē-tàng忠實koh謙卑ê像保羅仝款ê講：『m̄是講我已經得tio̍h lah，己經完全lah。我tùi án-ne是盡力追求，hō͘我ē-sái得tio̍h，ia̍h-sī ē-sái得tio̍h基督耶穌所ài我得tio̍h ê。』（腓立比三章12節）──基督tī咱身上成形──。

以下是8月3日tī舉行榮譽神學博士學位贈與典禮中所hip ê鏡頭：

下圖為南神院長張德香贈與榮譽神學博士証冊hō͘前院長黃彰輝時所hip。（孫鴻鎮提供）

下圖為頒贈榮譽神學博士學位hō͘黃彰輝時ê觀禮會眾。（孫鴻鎮提供）

下圖是黃彰輝tī南神院長公館內書寫勉勵校友kap台灣教會ê評語ê風釆。（孫鴻鎮提供）

為tio̍h這一pái ê訪台kap tī台南神學院所受ê榮譽kap歡迎，黃彰輝特別準備了伊ê遺囑。伊到台灣ê日期是1987年7月28日，m̄-koh伊ê遺囑是tī 7月21日Seaford簽定ê。Tī遺囑上，伊特別託付交代伊ê長男大衛kap次男麥克（執行kap信託ê代表）beh tùi伊ê遺產中the̍h出2萬英磅，交由倫敦市Lavistock聯合歸正教會世界宣道部會設法為台南神學院創設一項講座。伊為tio̍h beh真正ê做到賦予南神che chi̍t項紀念性ê貢獻，就chah一份遺囑到台灣，面交hō͘當時ê院長張德香。

Tī長中kap南神無閒ê訪問時間過去了後，就tī台南kap台灣南部探訪親人、舊知眾朋友，其間，lóng tī神學院院長公館tòa-hioh。當時ê院長是張德香，是黃彰輝就任院長hit年入學又koh tī 1953年畢業，了後一直留tī南神進行研究kap教學。8月7日，黃彰輝依依不捨ê告別伊幼少年時期ê故鄉－台南，坐飛機到台北。

Tī台北ê期間，黃彰輝就tòa-hioh tī另外一位以前ê學生－高俊明ê厝內。伊kap張德香是同班同學，又koh仝年畢業，大部份ê時間服事台灣原住民ê宣教kap傳道人神學教育事工。Tùi 1970年，伊當選為台灣基督長老教會總幹事，mā tī伊ê任中tī 1980年，因為『藏匿叛亂犯罪』hō͘掠去關，坐獄四年三個月21天，到1984年初秋chiah hō͘釋放。（註二）

Tī台北，黃彰輝第一pái看tio̍h tī羅斯福路三段269巷內ê台灣基督長老教會宣教大樓。總幹事ê辦公室就是tī he大樓內底。

下圖是黃彰輝tī高俊明總幹事ê辦公室內參觀，稍事歇睏ê情景。（高俊明提供）

聽tio̍h黃彰輝tī高俊明ê厝內，新組成無久ê民進黨人士，如：尤清、姚嘉文、周清玉，lóng登門拜訪chit位台灣民主運動ê先輩。

下圖是尤清到高俊明厝內訪問黃彰輝時ê留影。尤清（後排右）、張俊雄（後排左）。（高俊明提供）

下圖是姚嘉文、周清玉訪問黃彰輝ê留影。（高俊明提供）

Tī台北ê有關政治人士為黃彰輝安排機會kap三位『政要』見面會談，分別是中國國民黨秘書長李煥、美國在台協會主任丁大衛，kap siōng重要ê關鍵人物－當時ê副總統李登輝。

隔了 22年，koh再kap以前從事tī高等教育ê同僚見面。李登輝kap黃彰輝重溫故知，氣氛融合，一談就三ê小時。黃彰輝抱怨戒嚴法去了，soah換來chi̍t-ê國家安全法，一貫ê『換湯無換藥』。新法上規定『bē-tàng主張共產主義，kap領土分離』，根本是互相矛盾。李登輝非但是無表示否認，顛倒認為國安法確實是處處矛盾。李登輝表示為tio̍h beh khah緊通過新法，以便解除戒嚴法，確實欠缺完整。但是若是無趕tī蔣經國生前解除，恐驚至少ài多等8年。李登輝講，戒嚴法若無解除，政府就kan-tāⁿ是警備總司令部ê工人nā-tiā，解除戒嚴，國家ê體質chiah ē-tàng改變過來。（摘錄自『美國太平洋時報』）

下圖是李登輝kap黃彰輝kap tòe黃彰輝訪問副總統李登輝ê一陣人ê合影。Ùi tò-pêng分別為：張清庚、蘇慶輝、翁修恭、黃武東、宋泉璋、李登輝、黃彰輝、安師母、安慕理、蔡仁理、趙有源、高俊明。（高俊明提供）

下圖是黃彰輝會見李登輝時ê所hip。後排中間是黃彰輝，正pêng是安慕理師母。（高俊明提供）

３最後ê事務回憶kap勉勵 Tio̍h者tī kui年前寫批hō͘黃大衛（黃彰輝ê長子），請求伊協助又koh提供有關ê家庭相片kap故事，以便分享hō͘以前ê學生、同事kap朋友。大衛tī 1998年4月29日回批，提醒tio̍h者如下ê情況，tio̍h者感覺非常失望。大衛án-ne講：

有一件關於主張上ê問題，阮老父ê傳記有三個主要繩索：一是伊成長時期ê故事、伊ê成長、所受教育等等；二是伊ê工作，kā伊ê宗教kap政治並兼ê立場繼續一直到伊做了普世性ê神學教育事工lóng m̄-bat止息；三是tī伊ê《回憶錄》內底，部份ia̍h-sī全然ê欠缺關於伊ê家庭有意義ê提示。當然，伊別世以前，短促ê期間內底，bat kap時間鬥走，iáu tī完成《回憶錄》前辭世，但是另外一方面，伊總是tī危險時刻，慎重而且刻意e5m7 hō͘伊ê家庭捲入伊ê政治生涯。我ê意見是，關於chit項tāi-chì（家庭ê tāi-chì），若伊保持沈默，án-ne，就是伊挑工無beh談。若準你（tio̍h者）kan-tāⁿ是beh求一kóa相片，又koh以家庭相片做開始講故事，chit種ê關於家庭ê相片集是iáu teh形成階段，若將來kā伊傳講出來，mā tio̍h-ài tùi家庭中敘述出來chiah對。………批ê最後，伊又koh加一句：『我希望án-ne講m̄是過份消極ê回答。』

大衛回到英國受教育ê時期，大約是1955年，hit時伊chiah 11-12歲，1959年，伊母親慰爾攜眷tńg去英國。Tī定居以前，大衛一定是飽tam 了孤單痛苦，kap認同上ê苦悶。Koh tùi 1959年（15歲）到in父親黃彰輝離開台南回到英國（1965年），伊己經是成年人，所受ê正規教育mā是英格蘭式ê lah。筆者真希望得tio̍h有關三子一女ê結緍ê日期、配偶ê姓名，並且每位各擁有囝兒ê人數等等ê消息。

下圖是tī Seaford ê老家不時tī離散就業求學ê家庭，有一pái全員到齊時所hip ê。Chit時ê大kiáⁿ兒大衛，己經結婚生查某囝，hō͘黃彰輝ang-á-bó͘有了第一位孫女。前排ùi tò-pêng為：Carol（長婦）、孫女Jane、大衛、麥克；後排ùi tò-pêng為：愛蓮、慰爾、安得烈kap黃彰輝。（林黃淑蓁提供）

大衛是一位擁有哲學博士學位ê科學家；其餘ê三位弟妹，lóng是學醫而且行醫，到1988年黃彰輝kap慰爾相繼逝世ê時，共有五位內外孫á。

當黃彰輝大約tī 1985年到舊金山地區訪問ê時，阮bat同齊上一小坡路，hit時伊就有呼吸困難，我chhòng-kéng ê關心講：『您無koh像以前腳球運動選手lah！』伊講：『瑞雄ah，我老ah！』我問伊：『是什麼款ê病症？』伊講：『查某囝愛蓮chhōa我去海軍醫院檢查。伊指我ê heng-khám講，問題tī-hia ê。』續落來伊講：『我kap愛蓮進入病院，衛兵lóng為伊端鎗敬禮。我chiah知影，原來伊tī軍隊內有án-ne chi̍t-ê官位。』我會記得kúi-nā-pái kap黃牧師同齊，lóng無koh看tio̍h伊像以前tī台灣ia̍h-sī tī英格蘭在職ê時chūn，不時teh食薰。伊以前講：『食薰hō͘伊冷靜，mā hō͘伊有思考ê機會。』大概tùi 1979年伊退休了後，完全戒薰lah。根據筆者ê同學戴忠德牧師到英格蘭訪問伊ê時chūn，問伊為什麼戒薰lah，黃彰輝ê回答是：『tī英格蘭ê香煙siuⁿ貴，食bē起lah。Chia m̄是買一包一包，卻是貴到只ē-tàng買一支ia̍h-sī kui支ê。』戴忠德忍bē-tiâu感嘆，比起台灣tī 70年代以後ê社會kap經濟狀況，tī英格蘭ê生活是有夠清貧lah。

下圖是黃彰輝ê查某囝愛蓮以海軍醫官身份結婚，父親黃彰輝證婚ê相片。（蘭大弼提供）。

Tiāⁿ-tiāⁿ有以前ê學生去探訪，伊若有時間，並且天氣容許ê情況，就到戶外觀光，當然由黃彰輝做導遊。有一pái張千惠到Seaford訪問，kap黃彰輝ang-á-bó͘交談，mā tī該市周圍ê史跡做郊遊觀光。張千惠發現黃彰輝有一件『siōng得意ê西裝夾克』穿kui十年，iáu珍惜ê用，伊真受感動。這mā正顯示黃彰輝一生樸素勤儉，將寶貴ê資源用tī囝仔ê教育上，kap對世界各地教會ê援助。Tī衣、食方面，黃彰輝表示ē-sái khiām，但是tī tòa ê方面，就顯得bē-tàng無維修。伊講，有一pái一chūn大風掠過伊ê厝，括走三片厝頂ê瓦子，伊講hit一pái ê費用真hō͘伊頭殼痛，因為每一片水泥屋瓦，連工資就beh一百gōa英磅。

下圖就是有一pái郊遊，張千惠攝了伊『siōng得意ê劍橋西裝夾克』 (張千惠提供) 。

黃彰輝回到英格蘭了後，就傳來無好ê消息，講伊所患ê病是肺癌，而且己經進行到bē-tàng收拾ê地步，醫療人士mā發表講，伊siōng-ke kan-tāⁿ有兩年ê期間ē-sái療養。身為牧師，而且是牧長ê教育者ê伊，心裡有了準備。M̄-koh，伊有三項tāi-chì牽掛tī心內，一是，師母ê身軀無好，目睭mā看bē清楚，時常需要有人tī身邊照顧伊；二是，親屬好友lóng認為伊擁有非常寶貴ê一生kap思想、神學，要求伊一定beh寫落來。本來是運動選手ê身軀，無想到一經診斷，就hiah-ni̍h脆弱。衰弱ê身軀，koh只chhun兩年，所ē-tàng作到ê事務ê時間實在siuⁿ少lah。三是，台灣人ê出頭天，就是伊ê信念，beh由台灣人民同齊來決定家己運命kap事工，所ē-tàng達到ê目標，iáu真遙遠。伊一感念到chia，就開始用『m̄甘願』來表達伊ê內心。

1986年開始tī台灣昇起了解嚴ê徵兆，因為hit年蔣經國發表『我是台灣人』。台灣ê『反中國國民黨份子』kap半信半疑四散tī世界ê有敢『試火』ê意氣ê hiah-ê人，tī仝年，mā就是高俊明自政治獄釋放後二年，tī台灣終於破禁組了『民主進步黨』。民進黨ê組黨ê基督教會版，thang講是台灣基督長老教會ê三聲明ê釋義化、公開化。因此，台灣基督長老會mā爭取機會hō͘ 在外ê自決運動thang kap台灣ê三pái聲明相呼應，hō͘世人知影其真意kap基督徒ê見証。『台灣基督長老教會兩巨黃』（黃彰輝kap黃武東）（註三）ê回國，成做台灣基督長老教會ê頭一項必經行事，tùi án-ne開始商量hō͘列入烏名單ê黃武東申請入境回國這項tāi-chì，進而ē-táng回到台灣，申請黃彰輝回台探訪ê tāi-chì mā 隨後開始。

會記得可能是tī解嚴ê消息iáu無傳出以前，有一pái，筆者有機會kap黃彰輝作一個相當熱情ê議論。我ê假想是：中國國民黨明明知影為tio̍h繼續統治殖民地台灣ài khah放鬆，因此，thang向外證明『民主化意圖』。中國國民黨mā確實知影台灣菁英，完全無受武力訓練過ê『革命者』文人，nā-niā外交攻勢向世界訴求是弱勢ê作風。所以，中國國民黨應該ài徹底hō͘ phah倒消滅。黃彰輝ê主張是：雖然，中國國民黨會倒，ia̍h-sī hō͘清除，但是in是àn-chóaⁿ倒落去，是真重要ê，因為tio̍h beh顧慮到自決時台灣人bē-tàng hō͘伊壓tiâu、拉落去，同齊倒跨。我發覺黃彰輝對政治職位上ê中國國民黨台灣人黨員抱tio̍h信心。

另外，筆者kap黃彰輝tī議論中，伊提tio̍h一kóa m̄甘願ê心事： (1) 伊自細漢認同家己m̄是日本人。譬如：小學時chūn hō͘日本gín-á羞罵koh phah羣架一項tāi-chì；tùi日本tńg來台灣船頂，因為講台灣話小弟明輝 hō͘日本教官無合情理ê懲罰；koh，伊為仝族hō͘以三等國民對付kap待遇抱不平，等等。 (2) 伊留學英格蘭時期，以台灣華人ê語言、服裝kap文化上表態，處處lóng顯示對華人ê認同。 (3) 戰爭期間，伊無認同日本，但是基於戰略上ê需要，koh tī英格蘭教授日本語；koh基於政治上ê需要，伊學習滿州語；伊尊重以重慶為中心ê抗日戰爭政府，甚至採信聯盟國方面ê『抗戰正義ê解釋』。 (4) kap中華民國駐英大使館ê館員交往，以領取護照回國；比照台灣以外ê地ê華人（外省人）有同等ê尊嚴。 (5) 戶籍方面，中國國民黨挑工刁難，以伊ê夫人『無歸化』為藉口，m̄標示伊是已婚身份，koh誣稱伊未婚生子，刻意中傷伊。 (6) 伊以傳統基督教會ê途經，拍拚達成tī台灣建立東海大學，而且接連W.C.C.tī台灣基督長老教會，但是伊soah hō͘列為一般ê『造反分子』(民主化運動ê一員)，koh hō͘抹烏列入『烏名單』，申請出境ê時，以拖延方法無hō͘伊入境證件;koh 在外從事普世基督教會工作時期拒絕伊入境回國。

現今，中國國民黨ê全盛時期已經過，甚至其夜幕mā將盡，伊ê脈衰beh窒息lah，soah iáu m̄悔過，無承認家己已經行到末路，iáu一味ê姑息養奸、欺詐哄騙、竄改濫刪歷史，意圖繼續吸食台灣人ê心血成果。M̄-nā無hō͘台灣ê人民自決ê機會、正確消息，iáu抹殺新聞自由、壟斷媒體，甚至tī為大中國（大統）ê版本粉飾歷史kap教育。

就tī二二八殘殺事件（1947）當年，雖然黃彰輝ê長中同學蔡愛智專程到香港，勸告伊mài tńg來台灣，因為有可能會受到冤死，但是伊iáu抱tio̍h希望，認為『英明』ê中國國民黨領導者會洞知真相，tùi-án-ne徹底悔過，轉而施行對台灣有利ê政策。歷經40年了後，黃彰輝一再看到中國國民黨tī台灣ê一貫技倆，iáu是壓迫、欺騙、恐嚇、壟斷媒體、禁止善良懷鄉知識人士入境，伊iáu是以『老父』ê心懷，想各種方法，beh將無仝族群ê台灣人和解合一，建設新ê國家。但是，伊意識到家己ê生命終局將臨，七十年終其一生，為爭取台灣kap台灣人ê尊嚴，kap中國人kap世界人類ê和諧ê努力成果，soah無法度看到伊ê實現，伊感覺太m̄甘願，『呣甘願』。

1987年，蔣經國總統就開始公佈廢棄實施近50年ê戒嚴令。解嚴其實mā肇因於日日抬頭成長ê在野份子，hō͘中國國民黨政權惡名為世界歷史上siōng久長ê戒嚴國家，當然擋bē-tiâu民主世界追求名副其實ê潮流。Chit一年，由台灣基督長老教會ê申請又koh得tio̍h李登輝副總統ê特別關照，黃彰輝終於得tio̍h允准而且收tio̍h入境台灣ê許可證件。伊tī台灣ê三ê禮拜內，所做ê tāi-chì kap所講ê話kap演講，己經tī前節敍述過。Tī-chia，無koh提有關黃彰輝kap教會ê同仁往訪李登輝這項tāi-chì。

訪過李副總統了後，黃彰輝mā到中國國民黨總部chhōe秘書長李煥講話。Tī談話當中，伊坦白正直ê直言，hō͘中國國民黨ê代表知影，台灣人所受ê『同胞』待遇是遠比日本『異族』ê殖民待遇歹。Tī《回憶錄》內底伊記述講，伊kā李煥講有關伊tī戶籍上kap護照上ê『未婚』記戴，kap後來tī伊ê清白婚姻上中傷伊是『kap外籍女子同居生育囝兒』，挑工ê誹謗kap抹烏，所受ê羞辱。Kā黃彰輝kap其他台灣人tī國外ê活動hō͘ in紅帽仔ê報導kap烏名單等挑工扭曲事實，kap無『民主』ê管制，kap假新聞演戲性ê捕風捉影等tāi-chì作體驗ê講述。一方面中國國民黨允准世界級ê台灣人進到台灣來，但是另外一方面中國國民黨慎重ê考量，是m̄是通過hiah-ê人物hō͘中國國民黨政權開開公關ê門求其影像ê光亮。到1987年為止，中國國民黨政權lóng iáu無一絲á誠意接納tī世界舞台頂公開活動ê人士來參與改善『國政』。

1987年8月，tī台灣，黃彰輝mā得tio̍h機會kap在台協會ê主任丁大衛相見koh晤談，同行ê人有黃武東、林宗義kap高俊明。Tī派駐台灣代表美國以前，丁大衛是國務院內ê官員。自美麗島事件了後，高俊明hō͘掠去ê時，黃彰輝去華盛頓chhōe丁大衛，尋求解救辦法。當時，丁大衛安慰黃彰輝講：『時間khiā-tī lín chit邊。（Time Is On Your Side.）』這一pái，in tī台灣koh見面，暢談及前所聽聞ê秘密，伊講范鍚任美國國務卿ê時，伊隨范鍚到中國訪問，范鍚tī會見鄧小平ê時，出人意外ê問鄧小平：『阮kam ē-sái得tio̍h lín ê允准，tī台灣設領事館？』。所以，tùi美國kap中國國民黨政權斷交了後，黃彰輝認為chin-má ê時間就變成對台灣非常不利。因為tī聯合國決定kā『中華民國』一席由『中華人民共和國』取代以前，美國就有意beh支持以『台灣國』ê名義加入聯合國，mā支持成立chi̍t-ê中國kap chi̍t-ê台灣ê構想。國家ê方向kap定位權，無tī-teh人民，反tī獨裁暴力者ê手頭，chit點，mā是伊tī別世以前，『呣甘願』台灣人民iáu teh政權門外，又koh承受kap世界斷交ê惡政後果。

1988年，蔣經國別世了後，李登輝－chi̍t-ê台灣人做總統ê機會終於到lah。黃彰輝ê健康漸漸走下坡。Tī紐約，美國kap海外ê台灣人邀請黃彰輝做最後一pái ê紐約行，又koh tī 3月20日，tī紐約ê台灣會館召開盛大ê歡迎會。總共有200 gōa位台灣同鄉出席，餐宴中席開25桌，thang講空前盛況，hō͘長居英國倫敦ê黃彰輝感覺到國寶級人物ê光榮kap謝忱。

Tùi 4月到10月ê 6個月中，黃彰輝真正留tī厝內，寫出伊回憶kap懷念，正如大衛－伊ê長子講，每工lóng tī kap時間鬥走。雖然伊無koh旅行，soah iáu親像khah早仝款接待自遠方來訪ê賓客。真悲傷ê就是相依為命ê老伴慰爾，健康m̄-nā比伊差，iáu幾近全盲。

10月初ê秋天，tī洛杉磯ê南加州台灣人聯合基金會接獲黃彰輝病情惡化ê消息了後，hiah-ê人koh-khah關切伊垂危ê生命。Tùi án-ne由林哲雄、蘇國雄、王鵬勲等人負責籌款，mā催促《民進週刊》tī洛杉磯ê特派員胡忠信前往英國，直接訪問黃彰輝，又koh收集第一手資料。伊tī成行chìn-chêng，彭明敏kap許信良lóng分別為胡忠信餞行，請伊代為請安。黃彰輝bat照射鈷60，以防癌細胞擴散，但是身軀ê造血機能因為án-ne hō͘破壞，嗽ê時不時出現血絲。據胡忠信ê報告：『來到英倫以後，黃彰輝事實上已經kan-tāⁿ是尚存一息，tī無影響伊ê病況之下，我以問答ê方式，做密集式ê錄音訪問。因為黃彰輝隨時會吐血，我一工kan-ta ē-tàng做三、四點鐘ê訪問；tī伊歇睏ê時chūn，我除了翻讀伊ê檔案資料以外，就到附近ê歷史古蹟尋幽訪勝。』（註四）tùi án-ne胡忠信錄製了八卷口述回憶錄音帶。

除了直接ê家族以外，見到黃彰輝最後一面ê，就是伊任南神院長時ê前學生高俊明ê夫人高李麗珍kap kap黃彰輝仝年tī彰化出世ê蘭大弼醫師。10月25日暗時，高李麗珍tùi普世歸正教會聯盟（W.C.C.）執行委員會ê會址北愛爾蘭，飛到倫敦，趕往蘭大弼ê厝tòa-hioh一暗，10月26日，由蘭大弼開車到Seaford，到病院去看黃彰輝。以下ê文章是自高李麗珍tī《台灣教會公報》第1915期（1988年11月13日）刊載ê＜最後一面＞文章中摘錄落來ê，koh tī下面ê相片是當日（10月26日），由蘭大弼hip ê『kap黃彰輝ê最後一照』。當時tú好輸血liáu，hō͘伊ê氣色kap神情好khah chē。（蘭大弼提供）

下圖為黃彰輝ê最後一照。當時tú好輸血liáu，hō͘伊ê氣色kap神情好khah chē。（蘭大弼提供）

高李麗珍án-ne講：（《教會公報》第1915期）
黃牧師倒tī眠床頂真歡喜ê接待阮。伊瘦真chē，面色mā真蒼白，但是伊soah惦念tī厝內ê bó͘，伊kā阮講這一chūn-á師母真虛弱，真需要伊ê照顧，但是伊soah tòa進病院，無法度tī厝好好- -á照顧伊，實在遺憾，但是醫生kap眾細kiáⁿ lóng kā伊講輸血了後會好一點，伊家己mā希望輸血了後會khah有元氣。伊講因為電療ê後遺症，血管khah脆弱，嗽ê時會因為血管破裂吐血，伊ê身軀雖然真虛弱，但是精神iáu-kú真好，竟然kap阮講了兩點鐘半，阮驚伊講siuⁿ-chē話對身軀無好，醫生soah講hō͘伊講無關係。伊講了真chē有關台灣教會、台灣前途kap外子（高俊明）退休ê tāi-chì等等。

伊希望咱ê教會應當時常研讀過去所發表ê三個聲明，又koh好好教育會友，hō͘會友清楚明瞭這三項聲明ê意義。關於台灣ê前途，chin-má ta̍k-ke對統一kap獨立lóng m̄真明瞭，伊希望當局ē-tàng許可hō͘主張統一kap主張獨立ê人有koh-khah chē對話ê機會，並且kā應該如何統一ia̍h-sī應該如何獨立ê方法kap統、獨了後有siáⁿ-mi̍h利弊列出來，hō͘ ta̍k-ke同齊來看、同齊來思考、同齊來討論，然後koh再由全民投票做決定，mài bē記得台灣ê前途應該由台灣全體居民（凡認同台灣ê人，無論台灣人、外省人、平地人ia̍h-sī原住民）來做決定，這是阮提出聲明ê原則。

伊一直想beh繼續koh談落去，但是時間已經bē早，阮mā驚伊siuⁿ thiám，所以六點鐘左右阮向伊告辭，辭別以前，伊特別交待我向(林)文珍姐、(張)千惠姐、翁(修恭)牧師、楊(啟壽)議長、黃武東牧師、外子kap台灣ê兄姐請安。

離開病院了後，阮前往黃牧師ê tòa所去拜訪師母，伊知影阮beh去，早就tī客廳等阮，伊mā真瘦，伊講伊ê背部已經無jōa疼痛，但是身軀猶原真虛弱，佳哉有小kiáⁿ兒安得烈（伊是一位小兒科醫生，已經有兩個kiáⁿ兒）tī厝陪伊，暗時查某囝愛麗絲會來換班，有時眾細kiáⁿ bē-sái tńg來就請特別護士來照顧伊。Kap in談了將近一點鐘便依依不捨kap in辭別，心中祈求上帝憐憫，減輕敬愛ê黃牧師kap師母ê痛苦。

但是，伊soah hiah-ni̍h緊ê走ah，投入天父慈愛ê懷抱。安息pah！敬愛ê黃牧師！伊必定記念您為伊所做ê一切工作，您為咱所付出ê心血mā絕對bē落空，阮會tòe您所留落來ê佳美腳踪勇敢ê繼續行落去!!……耳孔邊不禁koh響起伊he激動ê感嘆：『想tio̍h台灣ê tāi-chì，我ê心就痛，真想beh為台灣多做一kóa tāi-chì，但是……ah！……chin-má應該換lín來做lah……。』

根據高李麗珍ê報告，伊是tī 27日暗時搭機離開倫敦，回到台灣桃園機場是28日暗時9點gōa，伊ê女兒kap kiáⁿ婿到機場去接高李麗珍，見到伊ê第一句話是：『黃彰輝牧師過身lah！』伊講：『m̄是！無可能ê！我實在無法度相信。前日我去拜訪伊ê時，伊雖然倒tī病床中輸血，但是精神iáu真好，而且kā我講了真chē ê話……nà會chiah-ni̍h緊neh？……nà會neh？』（《台灣教會公報》第1915期）

註一：蔣經國當第六屆總統時選李登輝為副總統，一直到伊tī 1988年1月13日死亡，李登輝就任為第七屆總統。 註二：高俊明《十字架ê路》p.383 註三：兩巨黃，bat同齊做台灣基督長老教會總會議長kap總幹事、台南新樓ê隣居，同為W.C.C.ê會員教會，爭取會員地位，mā同為設立東海大學奔走，而且為台灣人自決運動同發動kap領導。 註四：《民進周刊》第89期，p.40。